Biblia Todo Logo
Bib sou entènèt

- Piblisite -




Habakuk 1:12 - Eipomek

12 Na ni Allah Yahweh, anda mikip weiknye minop talak arye, aning-aning min kum kwepdeialum talak arye, an akunum aulalume. Tonda, anda kam pia unalame. An siuk erekunune. Anda, Pia Malye Ning Winina Kumnye, Pia Teleb Leknye ulyame. Ati, narye moropkine. ‘Nun Yehuda tam unyap Israel nang ara, lyepsutumba, nun kum dipnamabe’ tenen, moropkine. Na nio, ancuk nunti, yupu bokeipsutumce, nunti wenepsutum bukni, dipkoprob sik Kasdim nang ara, ance, ‘Wininamake’ tenen, wipdeipluma anya arye, sikce nunti, wenepnamsiyake. Anda, weik mutuku yangan keil atonun ulyama anya arye, an amu tam lelipdongopsutumce, kaliksutum bukni, ance tenealum touk, Kasdim mutuku nang wipdeipmunba, sikce nunti, wenebuka olyanganamsiake.

Gade chapit la Kopi




Habakuk 1:12
48 Referans Kwoze  

Nun ni Allah, yuk-yuk kum ulule. Elda keil pala yangalamla atonunuk ulule. Weik keil pia aulye touk, Allah babye, pia aulule. El tenena ap, el winilye ning ap ara, yuk-yuk kum ulule. El pil dolye ning ara, pia telebuk winilule. Tonda, el winilul ning nirya ara, dipkoprob kibuka diksukumuk winilule. Allah el pil dolul ning ara, ‘Ton tam nang, teleb kipnirye, ton tam ara, namin kipnamne,’ kum tenelirye, el nyalul touk, nirya pil dolule. Malye ning tonok babye, ton kum winiptue. El winilul ning nirya ara, yamubuka diksukumuk winilule. Ninye winilamak touk, elce teleb kibuka, yupu diksukumuk bokolisulule. Ati ara, el si erenyabe.


Tonda, mutuku-mutuku nirya, min kum kwepdeialum talak arye aulalume. Tukwak mutuku ap, mutuku-mutuku nirya ap, min kum kwepdeialum talak ara, anda akunum aulalume. Allah an Kam Una Deiyoknye anya arye, pia ati, aunauk unalame. Atalak arye diprongobuka, dounamle talak babye, kam pia ati unalame.


Allah ara, pia unamle. Atalak-atalak nirya, anggunti melipsilirye, kalikilamsiliba, malye ning ara, anggun dam ton kum yanamle. Allah el taruk mikip arye, anggun amu tam talipsilirye, el taruk deice arye, pia kalikinamsile. Anggun mal olan nang ati, Allah arye yupu sekliba, anggun dam kum yanganamake. Allah arye anggunti, mikip arepsilirye, melipsilyopura, anggun mal olan nang ati, ‘Anang opnuyabe,’ nyabuka yakmunyeba, bai sakuka bindopnamake. Winibikiba, anang obuka, sirya daknamlume.


Ati ara, se na mapuo, anggun apu koproba, Yakub birye deiamukba, dadeipdanin yangalamika ani, wini talak unmalum Israel nang ara, na amu tam ululum ati ara, anggun ilil una meme. Nara, anggun dam yanirye, anggun ati lyepdopnamsine. Minop talak anggun wenena ati, narye anggunda yakuka donoksiseba, yuk-yuk mutuku nang arye, sik unyak mutuku bobinamsikba, daulamlum bukni, anggun olana ati ninye, sik yuk-yuk mutuku ulamice buk, narye anang nirya obuka, kum kipdeipnamne. Winipnamne bukni, dipkoprob nyapsine. Anggunce, malye winin ninguk talibuka, malye-malye weik winilamlum ning ati, narye, ‘Daupmalye, aning ara, talye lubakibuka namin kipnamsine,’ kum nyaptinye. Ati, aminyan talak, anggun malye-malye ning winilamlum touk, anggun dengna ati wenepnamsine. Bukni, anggun nirya ara, obuka sice buklobuka, min kume kum daneipnamsine. Aning kum bukni, aminyan doupnamle talak ara, tonap teleb kipdeipnamsinca! Anoutam talak, anggunti obuka bobinamsik yala nang nirya ara, aminyan talak narye opnirye, kum kipdeipnamne. Bukni, anggun Israel nang ara, pia kum bataknamsine. Na ap, anggun ap, neika pia unamaba ati, aminyan talak ara, pia teleb kipdeipsiniba, telebuk unamlume. Na Allah Yahweh arye, ayupu nirya akunum nyapmasina ati, aning nirya ara, dipkoprob nong upnamlarya, nyapsine.” Allah arye nyabuk.


Aning ara, talye ati kum nyapsin bukni, deiyok ara, naryuk anggunti yanuka lyepropsinirye, anggun ap neika unamabe. Narye anggun wenena ati, yuk-yuk mutuku noutam yakuka, dopkwetcamsise mutuku nang nirya ara, wenebuka opnyopura, sice buklopnamnarya! Bukni, anggunda, na mapu koproba ara, ‘Naʼ tenen nang ululuma ati, tuba tonap yakuka donoknyeba, yuk-yuk mutuku noutam, kum binuka unamlume. Anggunda, pia ati amutuku uk unamlume. Winipnamsin bukni, anggunce minop talak malye-malye weik winilamlum ning ati ara, dipkoprob wenepsinirye, deken ning arepnamsine. Dipkoprop anggun malye winilamlum ning ara, talye Luba kum kipnamne. Amalye winilamlum ning ati, ‘Daupmalye,’ kum nyaptinye. Aning kum bukni, anggun malye winilamlum touk, anggun deken ning ton, wenebuka arepnamsine. Bukni, winibuka wenepsinirye, tamubuka teleb kipdeipnamsine. Narye anggun Israel nang ati, kume kum daneipnamsine. Ayupu ara, na Allah Yahweh arye akunum nyapdeipsine.


Nun ni Allah, anda aning-aning nirya, min kum kwepdeiyalum talak arye, anuk ulalume. Tonda, pia tuba aunalame. Minop talak dorapce, aminyan yanamle talak babye, ancuk aning-aning nirya talibuka, weik deiyoknye pia aunalame.


Yesus Kristus ara, minop talak pia teleb ulamuk touk, wini talak babye ulirye, aminyan doryanamle talak babye, atonun pia unamle. Yuk ton kum unamle.


El tonok ara, kum diptue, pia kamuk unamle. El ulya ara, ninye tukwak ninye kum binmanto ak, weik dirina noutam ulule. Yata mutuku ninye do nirya, el nong pia kum elilamik, tonda, pia kum eiptinge. Na Paulus arye nyapmakine. Na pia patanulul ning ara, ninye mutuku-mutuku nirya, el siuk pia erenamake. Tonda, el weik mikip arye aning-aning nirya ap, ninye nirya ap, talibuka unamle. ‘Aning ara, dipkoprop upnamle’ tenen, Amin nyapne. Na Paulus arye sekeibkine.


Aning ati ara, nun ni Allah, elda Weik Ninye Deiyoknye, Sisinanye minop dorapce dipdongobuka noutam talak ap, wini talak ap, aminyan do unamle talak ap nirya, pia unamle. Elda, pia kam ulul anya arye, kum diptue. Ninye asing arye pia kum eiptinge. Dipkoprop Allah ara, el tonoka, yuk ton kum ulule. Ati ara, ninye nirya arye, adiparyuk atalak babye, aminyan talak nirya babye, ‘El ti si erebuka, el si weik arye erepnamak’ tenen, Allah moronune. ‘Aning ara, dipkoprop unamle’ tenen, pia patanulul anya arye, Amin nyapne. Akunuma.


Yesus ara, Diksukum Ululnye atia. Allah el yupu pia teleb kibuka kekebuka dolamuk akarye, malye una pia kum arye, Allah piluk dolamuk bukni, anggunce elti, bataklum akarye, “Ninye onanye Barsabas lobuka arepsilyame,” nyabuka moroplume.


Allah arye nyabuk. Nara Allah Yahweh, pia min kume kum danmantonye unune. Minop talak ulamse touk, wini talak babye, aminyan talak babye, pia ati aunamne. Na si ton pia kume kum danamnile. Narye nyalin yupu nyapyopura, pia kum luba kinune. Pia teninune. Ati ara, anggun Yakub birye deiamsukba, dadeipdanin yangalulum ninye ara, malye weik umunya ati, talye lukparabuka wenebuka, obuka sirya dakamsitinye bukni, aning ara min kum winipsise.


Habakuk birye nyabuk. “Se, na ni Allah, ninye weik arye, an si ap, ance weik mambul pil dolamlum ning ap ara, nyalamikba, na akunum kekelamse. Tonda, an Allah Yahweh arye, weik mambul pil, minop talak dolalum ning ara, kekepse ati, ilil unulule. Aning nirya ara, keting tamun, keting tamun nirya weik, mambul pil dolamlum ati, ‘Wini talak babye, aning tuba lak kibuka, pil dopsutum’ tenen, moropkine na nio. Wini talak ara, nun Israel ninye, pia malye weik winilamupu ati, ance yu kanye bosimince, wenenamsilam bukni, wini talak noutamak ara, pia tuba bico ukilye ning ara, luba kina kume. Nun malye winina ati, adiparyuk obuka, sirya daksutum bukni, ‘Nun ti bico tenebuka melinamsilam’ tenen, moropkine na nio.” Habakuk birye, Allah Yahweh ati, nyabuka morobuk.


Allah arye ayupu ton nyabuk. Ati anggun Israel ninye ara, Allah el si Yahweh arye namin kipsiliba, anggun mal olan nang arye, tapu koubuka bobisicopura, ikin pil aryuk unamsiyak bukni, anggun ni koproba Allah tenebuk talak akunum dam uplyopura, lyepnamsile. Ara, Israel ninye kan-kan arye, Allah elcuk wel kil tonok wipdeipliba, mi bomlya ani, aminyan talak el mi deipnamle. Tonda, akam kil arye, el mi akunum deiplyopura, el kayapu Israel yala nang, sik wenena ati, yuk pera mutuku ninye arye, tapu koubuka bobinamik mutuku noutam unyak ninye, ninye yupa weik ning nirya ara, Allah arye lyebuka doproplirye, ila tamubuka sik min arye ulamik mutuku uk, yanuka deipliba, tonok kanye bobuka, teleb kibuka unamake.


Dipkoprob nyapne. Babel mutuku noutam ara, ninye deiyok kibuka talibuk Rajanye biti, narye mikip kipdeipnamne. Bukni, Mesir mutuku noutam ara, ninye deiyok kibuka talibuknye, Firaun bira, elda mitang kipdeipnamne. Winipnyopura, na mikip weik ninye on ya ara, Babel mutuku ninye deiyoknye arepnyeura, elce aparang ya boyanuka, Mesir mutuku nang nirya oplopnamla atia. Winipnyopura, Mesir mutuku nang arye, ‘Se, el Allah ara, dipkoprob Yahweh ululeʼ tenen, nati biknamniake.


Bukni, nun ni Allah Yahweh, ance nunti, pia mikip arye talipsuluma atonun, doupnamle talak nirya babye, Ance nunti, pia talinamsilame. Aning-aning nirya talibuka unamlam ning ara, pia ati aunamle. Pia winipmanto kum ulule.


Nara Allah Yahweh unune. Nara, pia Teleb uk unirye anggun Israel ninye ati pia kalikuka melisunune. Israel ninye, anggun ninye deiyoknye, Raja usunune. Narye kwepdeipsisirye pia talisunune.


Anggunda yata ati bita kel kum kilulum do? Anggunda yata ati kum kekeplum do? Anggunda yata ati walwal asa ululum do? Nara Allah, na si Yahweh unune. Nara Kam Pia unune. Minop talak arye dipdongobuka, doryanamle talak ara, pia aunamne. Mutuku sirya ap, im sirya ap, anoutamak mutuku nirya kwepdeipsa deiyoknye bira, na uka. Nara Allah ara mikip kum upniliba dikdik sena ton kumnye unune. Weik mambul pil donun bukni, ikin kum upnutuba, dikdik kum senune. Tonda, narye weik mambul ning nong noutam ning nirya akunum kel kiamse ning nirya ara, talye tukwak ninye nirya arye, pia dipkoprob kum teneptinge. Tonda na kel kipse ning sik ton bita kel kum biktinge.


Aning-aning deice tam unirye, weik mikipnye unune. Nara, pia weik Ninye Deiyoknye Allah arye nyapsine. Aning-aning min kum uamuk talak ara, na akunum ulamse ati, na si ton, Alpa nyaninyake. Tonda, aning-aning nirya akunum kum uplyopura, nara pia kam unamne ati, na si ton Omega nyaninyake. Nara, minop talak ulamsa ani, anoutam talak unirye, aminyan doyanamle sirya talak ara, yanamne. Na Allah arye nyapsine.


Allah Yahweh arye nyabuk. “Nara Israel ninye, sik Lyena Deiyoknye unune. Sik malye wininyak ning ati, talye lukparabuka opnirye, sirya daktinye bukni, sik malye ning pununa ati, narye sikti, dekuka lyepnamne. Nara weik Diksukum koprop Una Deiyoknye unirye Israel yala ninye ati pia kalikuka melinune. Pia Telebnye uniba, Israel ninye arye na si ereninyake. Na Allah arye na amu tam pil donamnuknye, na melinanye biti nyapkine. Israel yala ninye nirya arye anti, ‘Anye bira nun like’ tenen, anti malye yupu weik nyalamkike. Tonda ance ninye deiyok nang, sik amu tam pil dolalumnye biti nyapkine. Sik ninye deiyok nang ara, narye anti donamkin pil eibuka kel bikikirye, an si erena ati, tikukabikirye, an si erenamkiyake. Tonda ninye deiyok nang arye, delilamak mapu eipkikirye, an si erena ati, yanuka nong kanulongonamake. Wininamaka deiyok ara nyapnune. Ara, nara Allah Yahweh arye ‘Wininamne,’ nyanye yupu nirya ara, dipkoprob dukulongonanye ununa ati, ereipkiniba an si erena ati, an si erenamkiyake. Nara weik Diksukum koprop Una Deiyoknye unirye, Israel yala ninye ati pia kalikuka melinune. Na aryuk anti wipdeiamkisa ati, yuk-yuk mutuku deiyok nang nirya arye, an si erenamkiyake.” Allah arye nyabuk.


Bukni anda bicoe. Anda min talak arye ayupu ton kum kekelamlum do? Dipkoprop ning ara, aning nirya ara, na Allah Yahweh arye, ‘Aning ton, aning ton winipnamne,’ akunum teninyamse. Winibuka akunum tenibuka nyapdeiamse anya arye, wini talak ara, anyapdeiamse ning ara, akunum nong kibuka pil donyake. Narye anti, ‘Winipnamlarya,’ tenyamkise touk, mikip areamkisirye, lo arekiseba, an ap, an yin talin nang ap arye, apil dolulume. Ara, yuk mutuku nang arye, ‘Nun mal olan nang olyasikcakʼ tenen, cang weik keil poka domik ning, an ap, an yin talin nang ap arye, akeil poka ulubuka sung-sunga bultakalamlume. Na mikip deice arye amutuku nirya ara akunum obuka sirya dakamlume. An mikip deice arye kuma!


Nara, kum dipnamne bukni, pia tuba kamuk unamne. Akam tuba unamne talak ara, na ni Allah Yahweh, elce weik mambul pil dolul ning nirya ati, narye sik yuk ninye kekena ati, laka nyanamne.


Raja Daud birye, aMazmur yupu mot sekukce, ‘Allah yupu mot nyana deiyoknye arepnamuka ati, sekuk. Daud bira, Allah Yahweh, el amu tam pil talibuka donanye ulamuk. Amazmur yupu mot sekuk ning ara, Yahweh ati, nyabukce, amot nyalamuk. Tonda, amot sekuk talak, ara Allah Yahweh arye, Daud biti melibuka lyepdobuk deice arye, Daud el mal olan nang ati, obuka sirya dakuk. Daud birye nyabuk yupu ara, ani.


Ati ara, na ni Allah Yahweh, anda tikmince, na ona ati, yu nang ara, wenepmince, amu tamuk deipnamlame. Yu weik nang arye, nati, ‘Nun ninye ona ati, parang doprobibyakarye, anye oplopnuyap,’ tenenyaka ati, na nio, ance melibuka lyepdopnamnilame!


Nyabukce ayupu ton dukdongobuka Allah arye, nyabuk. Malye kilalumce ayupu nirya ara, kwalina deice arye, nyalamnulum bukni, nara Allah arye, nyapkine. An kekebuka kel kum bikamlum do? Minop talak arye, deiyok koubuka, ‘Aning nirya winipnamle,’ tenyamsirye, akunum kintinipse. Na Allah aryuk, ‘Asyur mutuku deiyoknye deice arye, mambul pil weik donamle,’ tenyamkisa ati, narye areamkisiba apil dolamlume. Minop talak arye, ‘Winibuka-winibuka, winipnamne,’ tenyamse ning nirya ara, wini talak ara akunum winipmane. Ara, narye, deiyok ning areamkisiba, amambul pil dolamlume. Ancuk kume. Ati narye, arepkisiba, weik asik akunum yanuka obuka sirye dakike. Amutuku-amutuku nirya ara, ‘Malye nang wekuka opsicak’ tenen, sik asik dana-dana tam cang keil poka yangabuka wiamik bukni, akeil poka ap, anyasik-anyasik nirya ap ara, ance uluploplumba, wini talak ara mitik keil uk tuba upmale.


Tonda, Allah Yahweh el lek koprop, pia teleb ulye touk, yuk nang ton atonun, pia kum unyake! Aning ara, Allah elcuk, nati melin ning ara, pia tuba arenulule. Ninye arye, ‘Nun mal olan nang arye opsikcakʼ tenen, weik mutuku bulamle keil dam, keil deia pum, binuka duknunyak touk, Allah elcuk erebuka deice tam ulirye, el mikip deice arye kalikisiliba, el amu tamuk unyabe.


Kekepsiba, Allah arye nyapnuk. “An kekepnulam ning ap, eipnulam ning ap nirya ara, moubuka seklyame. Surat sekminyopopura, Asia tam noutamak diba tenenyak ninye ati, mutuku si tekbarye dopdeipnulyame. Amutuku si ara, ani. Efesus ap, Semirna ap, Pergamus ap, Tiatira ap, Sardis ap, Piladelpia ap, Laodikia ap, ulule,” nyabuk.


Aning-aning nirya ara, na tenyamse touk, lo arepnyeba, ayu nang arye, dipkoprob ikin ning deipnamniak bukni, atalak ara, aning winipnamaka babye, na Allah Yahweh arye, anggunda na mapu koproba ululum ati, anggun nirya dipkoprob min kum kipdeipnamsine. Sik yala nang ara, mitik tonun, tuba kam unamake.


Aning-aning eipse deiyok ara, ani. Allah Yahweh arye nyabuk. Amutuku ubuk tuku deice nirya ara, sisal sebuka pia kata upnamle. Bukni, amutuku tuku, weik tam nirya ara, malye kipdeipnamne bukni, aning nirya ara, Sice buklobuka, kum kipdeipnamne.


Nara Allah, aning-aning nirya deice tam erebuka ununye birye, nyapsine. Tonda, aning-aning nirya deice tam ununa ati, na siuk weik tonun ereninyaknye birye, nyapsine. Nara min talak akunum kam ulamsirye, aminyan doyanamle talak babye, na pia Kam Una Deiyoknye unune. Na ap, na si ap, Pia Teleb, Lek Ululnye unune. Nara, pia weik erenak, im deice unune. Na ununak ara, dipkoprob malye ning tonok babye kum ulula ati, pia teleb kurunak unune. Bukni, nara yata nang do nirya, sik talima amu tam kibikirye, sikce, ‘Se, nun malye unyap ning ati, alye dakdanuka unyaba ati, aning nirya batakabe,’ tenebikirye, talima erena kumce, malye kanye bobuka, sik kanye talima namin unyak nang ap, neika unamne. Na ap, sik epdanuka neika unamap deiyok ara, narye sik malye kanye bobuka talima lamapdongobuka unyak nang ara, mikip arepnyeba, sik kanye deipnamake. Tonda, sikce, ‘Se, nun malye unyap ning ati, alye dakdanuka unyaba ati, aning nirya batakabe,’ tenebikirye, engenyak nang ati, sik talima kwa dipnyeba, sikce kanye deibuka teleb unamake. Sik ato unyak nang, sik dam ara, na aunamne, nyapsine.


Abraham bira, asukum Bersyeba mutuku dam, yo si tamaris yo koubukce, ‘Na ni koproba Allah, el si Yahweh, Pia Kam Ulul Allah tonok’ tenen, Yahweh el si erebuka morolamuk.


Bukni, narye ayupu nyapmanye bira, wisi kum dase talak ara, Allah arye na mikip nirya ara, adiparyuk akunum dopropnukura, na mitang unune. Winipnuka deice arye, na kam unamne talak ara, akunum sekdongopnukba, keting tamun weik tonun ton, kam kum unamne. Nara, ‘Se, Minopce dipnamnarya,’ tenepne.


Allah arye nyapdeibukba, nabi Yesaya birye sekeipsuk. ‘Yuk mutuku nang arye olyanamsiyak talak, nun melibuka lyepnamsiyak’ tenen, Mesir mutuku nang dam morolbanyak nang ara, pia bicoe. Sikce utenenyake. ‘Se, Mesir mutuku yin talin nang ara, yuk ninye olana ati kuda basam deice bukikirye, minopce bikbik abuka bana ati, mikip dobuka banyaka anya arye, sikda weik mambule. Tonda, se, Mesir mutuku yin talin nang pia weik tonun unyake. Sik kuda tuku deice libuka banyak ning ara weik mambule,’ tenenyake. Bukni, winibuka tenenyak nang ara, Allah Yahweh aning-aning nirya talibuka deice tam ulirye, Pia Diksukumuk ulirye Israel ninye melibuka kalikilinye biti, ‘Nun ton melipsilyame,’ nyabuka kum moroninyake. Winibuka unyak ara, walwal arye wininyake, nyapsine. Allah arye nyabuk.


Anda moubuka kel biknulyame. Ance, Yudea tam nang ati, malye yupu nyapmalumce, nalibuka akutupmalum ning ara, anggunti buk nalipmalumce, akutupmalum do? Tonda, yatanye biti an pi talima erepdamince, maknya kintininmamunce, an asing erebuka dinmamince, malye yupu weik tonun nyanmamunce nalilulum do? Dipkoprop ning ara, nara, Israel nang, anggunti pia melibuka kalikisununye, pia Diksukumuk Ululnye, nara, Pia Leknye biti malye yupu nyamnulume.


Na nio, an Allah arye, mutuku deice tiklumba, amutuku ara, weik arye lulukamuk. Tonda, yata mutuku ninye do nirya, ance aninye sik wenena ati, pia pirilelalum talak ara, ninye nirya elilamekce, ilil ubukba, imun kanye bolamikce, ‘Se yata wiripnamsil do?’ tenen, sirim talilamukba ulamik. Minop talak bukamuk mutuku ara, ance areplumba, weik arye lulukunmok deice arye, sakukba, kum kipdeiplume. Tonda, minop talak elilamupu mutuku dup ara, ance areplumba, ila tokna dobukce, pia kum kibuka deiplumopura, lyu weik ubuke. Na nio, ance winiminye ning nirya ara, pia aunamle.”


Na Allah arye, anggun dam yanamne talak ara, talye ati kume. Anggun wenebuka yupu lipsisikuka bokolina ati yanamne. Tonda, na minopce yanamne talak ara, anggun asing keten nang ap, tonda kil talye-talye mal olan nang ap, tilila yupu nyana nang ap ati, ‘Anggunda dipkoprob malye winilulume,’ nyabuka, weik arye wenepnamsine. Aning atonun, bona utotoa kum nang ati, weik ikin pil arukikiba donyak bukni, dekna mitik tonun arinyak nang ap, youwak kilapu ap, kwaknamne mapu ap ati, sik ning ubula dolonyak nang ap, tonda ninye asik nang ati, deiyok kum upmalibuk, malye yupu sik deice nyanyakce, malye kinyak nang ap nirya ati, na yanirye, ‘Anggun malye weik ululume,’ nyabuka wenepnamsine. Deiyok ara, sik amalye-malye weik wininyak nang arye, nati ilil kum ulule. Sikce, na si kum ereninyaka ati, yanirye sikti, wenebuka oplopnamne. Na Allah Yahweh, im deice yin talin malaikat nirya, sik weik deiyoknye birye nyapsin ning ara, dipkoprob winipnamne, nyapsine. Allah arye Israel ninye ati, nyabuk.


Aning nirya ara, na walwal bukni, na dipkoprob akunum bikamse ning ara, ani. Ara, na ni Allah bira, na weik ninye deiyoknye, Raja ulirye talinulule. Allah elcuk, mutuku sirya, im sirya nirya ara, ninye tukwak nang ati, melibuka lyelule. Yuknye birye kume.


Allah el pil donanye Musa arye, Allah ati morobukce, mot sebuk. Diba na ni Allah Yahweh, anda nun damak umince, minop arye melilyangalamsuluma ani, pia ati, melipnin banamsilame.


Nun Israel nang yuk-yuk nang nirya ara, Allah arye kwepdeiamsuka deiyoknye bira, aulirye talisulula ati, kil-kil kanye bobibirye, Allah el siuk erenamabe. Ara, Sion mutuku noutam unyap nang nirya ara, nun ninye deiyoknye, Allah arye nun talisulula ati, nun deiyoknye Raja usulule. Tonda, Allah ap, neika unyaba ati, kanye deibuka unamabe.


Swiv nou:

Piblisite


Piblisite