Esra 4:7 - Eipomek

⁷ Daulamika ani, aning atonun, Raja Ahasyeweros dibukba, el punubuka tikuknye, el si ara, Raja Artasasta birye Persia mutuku taleamuk. Bukni, anye birye Persia mutuku taleamuk talak ton, Yerusalem mutuku dana-dana bukni, yuk yala nang, sik deiyok nang arye, surat tonap dopkwetebikce, nyabik. “Kume, sik Israel nang arye donyak pil ara, nun lik ati, kanye imun upsile. Yerusalem mutuku weik asik lipsisikuka dobikcopura, an Raja ap, nun ap ara, ‘Malye kipdeipsikcak,’ tenen ati, ‘Anyaik pil dona ara, batakting’ tenen, nyapnamabe,” nyabuka, malye weik nyabik. Min yuma talak surat sekikce, malye yupu nyabika deiyok nang, sik si ara ani. Ara, Bislam ap, Miteredat ap, Tabeel ap, sik kwitcapu ap nirya arye, Raja Artasasta biti, surat sekuka dopkwetebik. Asekuka dopkwetebik surat ara, anang sik mutuku yupu koproba, Aram yupu deice arye sekik. Winibuka sekika ati, Persia mutuku weik ninye deiyoknye Raja, asurat el dam akunum yayukopura, ayupu nyana ati, Aram yupu punubikce, ‘Persia mutuku ninye deiyoknye birye, teleb kibuka kekenamle’ tenen, elce nyalamuk yupu deice arye, nukuka yinibike.

Esra 4:7 Referans Kwoze

2 Raja-Raja 18:26

Nyabukopura, Hizkia el mi Elyakim ap, Sebna ap, Yoah ap, sik nirya arye, Asyur mutuku deiyoknye, el yin talin nang deiyoknye biti nyabik. “Aning ara, telebe. Danyapsilyame. Bukni, sik amu tam nang ak, nunti, Aram mutuku yupu deice arye, nyapsiminyeba, nun nirya kekeptibirye kel biktibye. Bukni, Ibrani yupu deice arye, nyapsiminyopura, nun dam unyak ninye, keil poka deice tam unmaka ara, kekepsicak ati, Ibrani yupu nyana kume,” nyabuka morobik.

Daniel 2:4

Nyabukopura, sik Kasdim mutuku nang arye, sik yupu Aram yupu deice arye, ninye deiyoknye ati asipdeyik. “Diba, nun ni koproba, nun patapsil ning ara, ‘Anda pia unamlam’ tenen, ‘Se,’ tenebabe. Ance winipmal ning ara, an mapu kekenmabak arye lak lepminba, ‘Yata deiyok arye winipmakil do?’ tenen, moubuka teneipdebirye, kel kibibirye, lak lepnukiyabe,” nyabik. Ayupu nyabik nang ara, sik wala ap, kurya ap, deiyok kel bikamik nang arye nyabik.

Yesaya 36:11

Nyabukopura, sik Yudea tam deiyok nang, Elyakim ap, Sebna ap, tonda Yoah ap, sikce Raja Asyur mutuku deiyoknye, Raja el amu tam pil dona deiyoknye, Rabseka biti tamubuka nyabik. “Se, amio, ance Aram yupu deice aryuk yupu nyapnusilyame. Nunce Aram yupu nyapminba, nunce ayupu kel bikamupu anya arye, kekebibirye, kel biknuyabe. Bukni, nun mutuku noutam arye nyanyap yupu, ‘Yudea tam nyanyap yupu deice arye, kum nyapnusilyamʼ tenen, moropkiyabe. Deiyok ara, ance nunti Ibrani yupu deice arye nyapsiminyopura, ‘Nun kayapu nang ton kekepsikcakʼ tenen, nyapkiyabe. Ara, anyasik dobupu ning dana-dana tam nirya, antapdongobuka dobupu cang keil poka deice tikikirye, amutuku kalikinmak nang ton, ‘Ance nyaplam yupu kekebuka, kel biknamakʼ tenen ati nyapkiyabe,” nyabik.

Esra 4:17

Sik atam ninye deiyok nang nirya arye, ayupu nyabuka, sekik surat dopkwetebikba, Raja Artasasta birye kekebukopura, ayupu ton tamubuka nyabuk. Telebe, anggunce asurat sekuka, dopkwetepnuluma deiyok nang nirya ara, Gubenur Rehum ap, el Sekretaris Provinsi deiyoknye Simsai ap, anggun kwitcapu, Samaria tam unyak deiyok nang ap nirya arye, tonok kanye bopmalumce, asurat sekuka dopkwetepnuluma ati, telebe nyapsine.

Esra 5:6

Sik anang ara, Gubenur Tatenai ap, el amutam deiyoknye, el si Syetar-Boznai ap, tonda sik amutuku yuk deiyok-deiyok nang ap arye, Babel tam weik deiyoknye, Raja Darius ati, surat sekuka dopwetebik. Asekik surat noutam nyabik yupu ara, ani.

Esra 4:1

Ura, Allah el si eren aik dona ati, lipsisikuka don pil deiyok koubikopura, Yehuda yala nang ap, Benyamin yala nang ap, sik oldan nang arye, malye kanye bobik. Ara, yuk nang arye, “Kume minop talak Persia mutuku nang arye, Israel ninye obikce, anang bobuka Persia mutuku bobinamikba, daulamika ani, wini talak tuba tamubuka yanmakce, Allah el si Yahweh, el si eren aik donmake. Ara, Israel ninye kalikuka meliamuk Allah, el si erena ati anyaik deiyok koubuka donmake,” nyabikba, sik oldan nang kekebikce, malye kanye bobik.

Esra 4:8

Persia mutuku taleamuknye, el si Raja Artahasta, yuk nang arye ton, surat bitinye ton sekuka dopkwetebikba, anye birye doprobuk. Asurat noutam ara, “Yerusalem mutuku noutam, weik asik lipsisikuka donmaka ara, nun lik,” nyabuka malye nyabik. Asurat sekika, deiyok nang si ara, ani. Ara, Gubenur Rehum ap, el Sekretaris Provinsi deiyoknye Simsai ap, sik kwitcapu ap, amutuku yupu bokolina deiyok nang, hakim-hakim ap, Pemerintah Persia tam deiyok nang ap, tonok kanye bobuka asurat sekik. Adeiyok nang ara, Erek mutuku ap, Babel mutuku ap, Susan mutuku ap, amutuku noutam nirya ara, Elam tam ulamika deiyok nang arye, tonok kanye bobuka asurat neika sekikce, Raja Artasasta dam dopkwetebik.

Esra 8:36

Tonda, atalak ara ninye deiyoknye Artasasta birye nyabukce, sekuka deiamuk surat ara, sik Israel deiyok nang arye, Raja el amu tam deiyok-deiyok nang ati, binuka arebik. Ara, weik balamle mek, Efrat mek atam, otam keting kumulban tam ulamikce, amutuku taleamik ninye deiyok-deiyok nang ati, sik dam binuka arebik. Tonda, atam taleamik ninye deiyok Gubenur nang ap, Bupati nang ap ati, asurat bokuka arebik. Aning akunum arebikopura, sik atam taleamik ninye deiyok-deiyok nang arye, ‘Nun ton melipnuyap’ tenen, teleb aren ning ton, weik tonun bulubuka, Allah si eren aik lipsisikuka dona ap, anyaik pum tam pil dona ap, nun Israel yala nang melina ap ati, sik melin ning arepsik.

Esra 7:1

Aning nirya akunum winibukopura, aminyan talak tikamuknye, Persia mutuku ninye deiyoknye, el si Artasasta birye Persia mutuku taleamuk talak noutamak arye, tonye el si Esra, provinsi Babel mutuku batakuka Yerusalem mutuku tamubuka yayuk. Esra bira, talinye kume. Elda, Allah arye nyamukba, Musa birye sekeiamuk yupu weik arye, kel bikamuknye ulamuk. Esra bira, Persia tam bukni, provinsi Babel mutuku noutam ulamuk bukni, amutuku batakuka, Yerusalem mutuku tamubuka yayuk. Esra bira, Harun yala nang arye deibikba dadeipdanin, yangalamika ani, deiamiknye ulamuk. Esra el apu yapu, sik si ara ani. Esra el li koproba si ara, Seraya. Seraya el li koproba si ara, Asarya. Asarya el li koproba si ara, Hilkia.

Nehemia 2:1

Na Nehemia bira, Persia mutuku ninye deiyoknye Artasasta, el anggur mek din talak, mek makau moubuka boyangalamsinye ulamse ati, Raja arye, Persia mutuku tam talibuka ulamuk talak ara, keting tamun dua puluh tahun noutam arye, el dam nyalbise. Ara, el melin nang arye, ‘Anggur mek dipnul’ tenen, el anggur din mek boyayikopura, amek makau dopropsirye, Raja dam binuka arepse. Yuk talak, el dam balamse talak nirya ara, pin-pin asa ulamse bukni, asup ara, lik kanye bobuka pin-pin kum upmanukba, el dam bisiba eipnuke. Eipnukce, asipdenuke.

Daniel 11:2

Narye anti nyapnukin yupu ara, dipkoprob nong upnamle ninguk nyapnukine. Ara, ani. Yuk-yuk arye yanuka, deiyok kibuka, Persia mutuku talinamak bukni, winilye Raja ap arye, Persia mutuku talibikirye, Raja kibuka unamake. Sik yuk-yuk bukni, winilye nang arye, Persia mutuku talibuka daulamikca ani, aminyan ara, Raja dumunye ton tiklirye, anang punuplyopura, Persia mutuku uk talipnamle. Min yuma talak, Persia mutuku talinamaka deiyok nang, sik winilye Raja nang ara, mitik bona talin nang unamak bukni, el adumunye Raja bira, bona weik talinanye unamle. Anye el talinamle ning, pia weik uplya deice arye, aminyan talak ara, mikip ton ap upliba, elce, ‘Winipnamabe,’ nyapnamle yupu deice arye, deiyok kiplyeba, yuk mutuku nang, dana-dana tam unyak nang weik tonun, el yupu kekebikirye, sik ap, el ap, Yunani mutuku talipnamle Raja ati, obuka sirya daknamake.