Esra 3:12 - Eipomek

¹² Abulubuka wekmek nang weika arye, sik talima noutamak weik kanye deibikce, weik yupu arye, ‘Telebe,’ nyabik. Bukni, Allah el aik pum pil melibuka dona deiyok nang, wisi nang ap, tonda Lewi yala nang, wisi nang ap, tonda Israel yala yuk-yuk bukni, sik yala deiyok nang, wisi nang ap nirya arye, mambul kanye bobuka engebik. Aengebik ning deiyok ara ani. Ara, Allah si erelamik aik minop talak domika elilamik nang arye, winiryuk ayukumna yo ikmekba, eipmekce malye kanye bobuka, malye yupu nyanmekce engebik. Ara, minop talak domik aik atonun ubukba kum eibik ati, engebik.

Esra 3:12 Referans Kwoze

Hagai 2:3

Ayupu nyabukce, ayupu tonap dukdongobuka nyabuk. Anggun wini talak ulalum ninye nirya ara, minop talak, na si eren aik, pia urasin teleb aik domik ning, anggun damnye asing arye elilamlum ninye ton ululum do, kum do? Anyaik minop talak elilamlum ninye arye, minop talak ara, ‘Se, anyaik ara, urasin pia teleb ubuka domik ning asukum’ tenen, elilamlum bukni, wini talak ara, dan do? Anyaik ara, uluplobikce, atu atonun kiplobika ati, ‘Se, anyaik ara, urasin pia telebe’ tenen, kanye deibuka, ayupu tuba nyalulum do? Kume, wini talak ara, anyaik pia malyeuk ulule. Ati, wini talak ara, anggunce, ‘Se, Allah el si eren aik ara, teleb ubuka domik bukni, wini talak ara, anyaik uluplobik ning ara, talye dauamlye keil atonun ulule,’ tenebuka, nyalulum do?

Zakaria 4:10

Ura, yata nang do nirya, anyaik don pil ati, deiyok kouamik talak ara, pil sikcuk dolamikba, mitik tonunuk, pil dopnin balamikba, sik anang arye, ‘Se, pil mitik tonunuk donyaka ati, nun like,’ tenenamake. “Anyaik dona ara, dauplye,” nyabuka, ‘Nun likeʼ tenen, malye yupu nyanyak nang nirya arye, sik kayapu nang arye, anyaik don pil tuba donmakca ani, sirya dakmanto talak eibikcopura, sikce, ‘Se, aning ara, pia telebe,’ tenebikirye, teleb kanye deipnamake. Tonda, sik anang nirya arye, aminyan talak Zerubabel birye, ‘Kume, anyaik donauk unamabeʼ tenen, ‘Aik abilinga ara, moubuka dopmap do, kwalipmal do?’ tenen, kiklilen tapu doplirye, balyopura, sik anang nirya, anye eibikirye, kanye pia deipnamake. Zerubabel birye nyabuk. Aminyan talak, na ap, yupu talipmanumu malaikat arye, nati tamubuka nyapnuke. “Atekbarye lampu weisa ara, bikilina ati, asing tekbarye atonun ulule. Aweisa tekbarye ara, winipmanto ninguk ulul bukni, el nong, ara Allah Yahweh el asing arye, tukwak mutuku, im sirya, mutuku sirya nirya, uamlye ning dilamlirye, ‘Yata wirinyak do? Yata wiripnamak do?’ tenen, dipnilibuka kalikilula ati, aweisa memebuka deiamik,” nyapne.

Yesaya 60:22

Amambul pil dopsisa arye, anggun Israel ninye noutamak arye, tonok yala nang yupa mitik wamlye babye, aminyan talak ara, mapu pia weik deibikirye, yupa weik upra banamake. Yata mitik yala nang do nirya, wini talak mitik ulamtuma babye, aminyan talak, narye teleb kipdeipsinyopura, sikce mapu weik deibiceba, ninye pia weik upliba, mikip weik ninye unamake. Aning nirya ara, na Allah Yahweh arye tenepse touk, atalak akunum oplyopura, nong dipkoprob upnamlarya. Aning ara, kume kum datue, dipkoprob upnamle. Na Allah Yahweh arye nyapsine. Allah arye nyabuk.

Yesaya 41:14

Anggun apu koproba Yakub birye deibukba, dadeipdanin yangalamik ninye, anggunda el yala nang ara, anggun ilil una meme. Yuk yala ninye arye anggunti, ‘Sik Israel ninye ara, mitik ap, mikip kum ap unyaka anya arye, sikda, talye kwising ap, kuluma ap atonun ninye unyake. Sikda mambule pia kume,’ nyabuka nalinamsiyake. Nyapsica babye, aning tenena meme. Deiyok ara, nara Allah Yahweh arye nyapsine. Narye anggun Lyena Deiyoknye unune. Nara Allah Pia Telebnye unirye Israel ninye ati, lyelona ap, kalikuka melina ap deiyoknye usunune.

Mazmur 126:6

Aning atonun, ninye asing maka aryuk engebuka bakirye, yala ning dokikceura, tuba tamubuka bikirye, kanye deibuka mot senamake. Ara, kouamice ning wisiplyeura, libuka deibikirye, bobuka yanganyak talak ara, kanye lon mot nyabikirye, boyanganamake.

Ayub 8:7

Minop talak ara, anda bona mitik tonun talilamlum bukni, Allah arye melilamkuka ani, aminyan ara, bona weik talinanye ulamlume. Anirye ubuka, aning nirya kum upkuk bukni, aminyan doupnamle talak ara, aning nirya tuba tonap arepkiliba, tonap, anda pia bona talina weiknye unamlame.

Esra 3:13

Ati ara, sikce yuk-yuk ton kum, tonok kanye bobukabikce, sik kanye talima noutamak arye tenibuka, ton nang engebikba, ton nang arye, ‘Telebe,’ nyabuka, Allah si erenmek. Tonok talak aryuk yupu neiktoto weik arye nyanmeka ak, yuk mutuku nirya kekenmek. Anang ara, engenmek bukni, yuk mutuku unmek nang arye, ‘Engenmak do, mot senmak do?’ tenen, kel bikmanto kum ubik. Ara, lelim pia weik nyanmeka atia.

Yeremia 50:4

Allah Yahweh arye, Yeremia biti nyabuk. Yuk mutuku nang arye, Babel mutuku nang nirya obicopura, anoutam arye, Israel yala nang ap, Yehuda yala nang ap, sik neika, sik mutuku koproba, tamubuka yakirye, engepnamake. Engebikirye, ‘Se, nun si erenyap Allah, el si Yahweh ara dan sukum ulul do? ‘Yata yupu nyapsiliba, kekebuka unamap do?’ tenen, sik mutuku tamubuka yakirye, na sik ni koproba Allah Yahweh ati, yanuka enamniake.

Mazmur 147:1

Nun ni Allah Yahweh ati, “Yahweh, anda pia telebuk ulyame,” nyabkiyabe. Nun si erenyap Allah ati, “Anda pia telebe,” nyabuka, el si erebuka kina ati, mot nyanyaba ara, telebe! Allah ati, “Anda pia telebe,” nyabibyeura, nun kanye deibuka, telebuk unyabe. Wininyaba ara, pia teleb un ning ulule. Wininyap ning ara, Allah arye kanye delilule.