Efesus 6:5 - Eipomek

⁵ Sik yo bok deice deksikiba, talye ati pil domunye nang ara, anggun deiyok nang arye, nyasice yupu ara, moubuka kekepmunce, ‘Nun deiyok nang ara, pia mambule’ tenen, si erebuka unamlume. Aning nirya ara, tenepce winina kum bukni, anggun kanye talima diksukum ubuka telebuk wininamlulume. Ara, ‘Kristus nyapsutuba, el yupu kekebuka dobolbana atonun winipnuyabe’ tenen, anggun deiyok nang arye, nyasice yupu ara, kekebuka teleb ubuka wininamlulume.

Efesus 6:5 Referans Kwoze

Efesus 5:22

Anggun kilapu nirya arye, anggun akanye yapu ati, sik amu tam bukmunce, sik yupu kekebuka nimalye arye, unamlulume. Winibuka unamlum talak ara, ‘E ara, nun Deiyoknye Yesus, el si erena ati, el amu tam bukibirye, el yupu kekenyapa atonun, nun akanye yapu sik amu tam bukuka unyabe,’ tenenamlulume.

Maleaki 1:6

Na Allah Yahweh, aning-aning nirya talibuka, im deice yin talin malaikat sik weik deiyoknye unune. Narye, na si eren aik pum tam, pil dona deiyok nang, anggun imam-imam nang ati nyapsine. Anggun teneipdelulume. Anggun kele, yata ninye do, sik mapu arye, sik ni yapu ati kanye delinyake. Atonun, weik nang amu tam unyakce, aik pum tam talye pil donyak ninye ara, sik deiyok nang ati kanye delinyake. Nara, anggun ni koproba Allah Yahweh unune. Tonda anggun weik deiyoknye unune. Ati ara, yata ning ati, anggunce nati, si kum erenululum do? Nara, weik mambulnye unun bukni, anggunce nati, ilil kum usulul do? Dipkoprop anggunce na ap, na si ap ati, malye nyanululume. Bukni, aning nyapsiniba, angguncuk tamubuka nyalulume, “Nunda yata ning wininyaba deice arye, an si ati malye nyanyap do?” nyabuka asipdenulume.

1 Peterus 3:2

Ara, malye una pia kum arye diksukumuk ulye ning ap, ‘Allah eluk ara, pia mambule’ tenen, el yupu kekebuka dobolbalulum ning ap, sikce aning eibikceura, moubuka kel kibikirye diba tenepnamake.

Pilemon 1:16

Anggun bitinye, neika unamruma ara, minop talak yo bok deice arye, Onesimus dekuka talipmunba, an piluk talye dolamuk touk, wini talak aning atouk kum unamle. Aning ara, mitik teleb bukni, pia teleb ning ara, wini talak an weit koprop atouk, an talimanye akunum kipkile. Onesimus birye, na pia talima aribuka, bico tenenun bukni, ara mitik uka. Wini talak an arye elti, weik arye kanye deibuka, bico tenenamlame. Elda talye tukwaknye bukni, tonda elce nun Deiyoknye Yesus ati, akunum diba tenebukura, Yesus talima dukdongopsukba, neika unyaba anya arye, an weit koprop atonun, an kanye deilinanye ulule. An talimanye unamkile.

Pilipi 2:12

Aning ati ara, na kayapu, minop talak dipdongobuka, anoutam talak nirya, na yupu kekebuka, teleb kibuka winimunya atonun, pia wininamlume. Tonda na ap, neika ulamubu talak babye, wini talak nun yuk-yuk unyap talak babye, Allah el yupu uk kekebuka, el yupu uk talibuka dobolbalulum touk, apia wininamlulume. Allah arye, ‘Apil winibuka donamak’ tenen, teleb kibuka tenyamsuk touk, ‘Aninguk pataplya ati, apiluk tenebuka donamak’ tenen, anggun kanye talima noutamak melibuka pil dosulule. Winibuka anggun talima noutamak pil dosulul anya arye, anggunce atouk, yuk-yuk tenepmunce, ‘Allah arye lyepnamnil ara, weik mambule,’ tenenamlume. Tonda, ‘Na mikip kumnye birye malye winipnun’ tenen, kanye pia moupnamlulume, na Paulus arye, nyapsine.

Mazmur 86:11

Se, na nio Yahweh, ance nunti, ‘Aning ara, wininamlume. Aning ara, pia kum wininamlume,’ nyapdeiamsulum yupu ap, ‘Teleb winina ati, ban bisik ara ani,’ nyapdeiamsulum ning ap ara, ‘Ance peterepniminba, bita kel biktinye’ tenen, patapnil ati, moropkine na nio. Ara, talye kekena ati kum bukni, deiyok ara ance, “Dipkoprop diksukum winin ning ara, ani,” nyasilyam yupu, ‘Narye aninguk talibuka, dip ninguk winiptinye’ tenen, patapnila ati, moropkine na nio. Ance na kanye noutamak pil dopnutuma deice arye, na teniltona kumce, na kanye talima nirya tonok keipniminba, an deiceuk deipkinirye, antibuk ilil tenebuka, an amu tam unamne.

2 Korintus 1:12

Ara, na kayapu, nun kanye deibuka ayupu nyapsitibye. Nunce tenepce nyana kum aniryuk, nun kanye talima diksukumuk upsilirye, ayupu nyanyabe. Amutuku-mutuku nirya ulamubu talak ap, weik mambul ning anggun ap neika ulamubu talak nirya ap, malye una pia kumce, diksukumuk ulamubu. Tenepce nyana pia kum aniryuk, dipkopropuk ulamuburye, pil dolamubu. Adiksukum una ap, duknuna kumce dipkoprop una ap ara, Allah arye aresulule. Winibuka unyaba nirya ara, dib tenena kum ninye arye, ‘Nunda weik kel nang,’ tenekirye winilamak atonun, aning deice kum unyabe. Nunda, Allah el kanye aniryuk bico tenepsilirye, melisilya deice arye aresilye touk, pia diksukumuk unyabe.

1 Korintus 7:22

Ayupu ara, talye kum nyapsine. Deiyok ani. Yo bok deice dekikceura, Pil urdem aryuk donyak bukni, Allah arye, yukupliba, dib tenebiceura, adeice arye, nun Deiyoknye Yesus arye tapu lopdeipsiliba, sik talima noutamak ara, talye balamak ninye atonun banyake. Aning atonun, ton nang ara, talye balamak bukni, Allah arye, yukupliba, dib tenebiceura, adeice arye, Kristus el pil melin nang unyakba, elce nyalye yupu uk kekebuka, el piluk donyake. Talye kum unyake.

Matius 8:9

Aning ara, talya ati kum nyapkine. Na kele. Na deiyok nang arye nyapnikiba, sik nyapnikce touk, adiparyuk pil donune. Tonda, na babye, na amu tam yin talin nang ati, ‘Winiplulume,’ nyabuka, yupu nyapdeipniba, kekebikirye, adiparyuk apiluk donyake. Tonoknye biti, ‘Bilyame,’ nyapniba balule. Tonye biti, ‘Yalyame,’ nyapniba, yangalule. Aning atonun, na pil donanye biti, ‘Apil dopnilyame,’ nyapniba, apiluk donulule. Aning ati ara, anda weik mikipnye unmalama anya arye, yupu uk nyaptumba, na pil melibuka melina teleb uptue.” Yin talina deiyoknye birye, Yesus ati nyabuka morobuk.

Matius 6:24

Yesus arye ayupu nyabukce, ayupu ton nyabuk, “Yata nang do nirya, sik deiyok nang bitinye nang ati, kanye talima deibuka, tonye pil dobuka, tonye pil dobuka, kum winiptinge. Tonok pil donye birye, el deiyok nang bitinye nang utiringopura, tonoknye birye abitinye nang ati, pil kum doptue. El deiyok nang bitinye nang ati, kanye talima deibuka, sik bitinye nang ati, pil teleb ubuka kum doptue. Ato pil don nang ara, ton deiyoknye biti, kanye talima deibuka, ton deiyoknye biti, lik tenebuka unamake. Tonda, sik deiyok nang bitinye ubrikiba, ton deiyoknye biti, kanye deiplirye, meliplirye, pil donamle. Ton deiyoknye biti, lik tenebikirye, lik upliba, bataknamake. Tonye bira, bataknamle. Tonye bira, pia talinamle. Ayupu nyapmasin touk, Allah ap, yo bok do, talya tukwak ning nirya ap ati, neika atonun patapliba, teleb ubuka kum pil doptume. Weik mambul ninguk tenepmunce, wibuka talinamlulume,” Yesus arye nyabuk.

Kejadian 16:9

Hagar birye nyabukba, Allah el si Yahweh arye dopdeipmok Malaikat arye, tamubuka nyabuk. “Kume, an deiyok kil dam tamubuka bimince, el amu tam bukuka, el yupu kekebuka unamlyame.

Efesus 6:24

Tonda, yata mutuku ninye do nirya, nun Deiyoknye Yesus Kristus ati, sik kanye el deiceuk deibuka, eluk talibuka unyakce, pia kum batakanyak ninye ati ara, Allah moronun ning nyapnusine. Ara, ‘Allah bico tenesilirye, el kanye aniryuk talye arisilye ning ara, weik arye, arepsilirye, teleb kipdeipnamsil’ tenen, Allah morosunune. Telebe akunum nyapsine. Na Paulus birye, asukumuk deipsine.

Mazmur 123:2

Ara, nun ikin unyaba ati, ance nunti dipdebuka melipsilyame na nio. Nun nirya arye, ‘'Nun ni Allah, elcuk melinamsil’ tenen, an atibuk patapsilyeba, anti morokinyabe. Winipmanto ara, bona talin nang, sik amu tam talye pil donyak nang arye, ‘Na deiyoknye birye, yata yupu nyapnamasil do?’ tenen, el dam dinauk unyak touk, nunce an dam dina ap, kekena ap unyabe. Diba winipmanto ara, talye pil dolamlye kil arye, el deiyok kil dam yanuka, ‘Yata yupu nyapnunil do?’ tenen, ebuka dina ap, kekena ap, ulye touk, nun babye, an dam yanuka kekenauk unamabe. Aning ati ara, nun urasin erebibirye, ‘'Nun ni Allah, el si Yahweh ara, dan sukum ulul do? Dan talak yalirye, teleb yupu nyapsilirye, melibuka lyepnamsil do?’ tenebuka unyabe. Tonda, anti dipdebuka kekenauk unyabe na nio. Ara, nunda malye wininyak nang unyap bukni, Allah arye aning namin kipsilirye, el kanye aryuk bico tenepsilirye, teleb kibuka melinamsil talak ara, min kum yanmalye talak nirya ara, nunce el dam yanuka, dinauk unamabe.

1 Tawarikh 29:17

Na Daud birye akunum kele bikamse. Na ni koproba Allah, ninye nirya sik kanye noutamuk deipmince, asilelyame. Tonda, el talima noutam pia teleb ulamlanye bira, diksukum ulamlanye biti, kanye pia delilyame. Ati, narye aning nirya ara, na kanye pia teleb deice aryuk talye arepkine. Tonda wini talak ara, narye an mapu koproba, abulupmak Israel nang babye, akunum eipmane. Ara, asukum yanmakce, aning nirya, sik kanye talima noutam arye, ‘Se, nun ni Allah ara pia telebeʼ tenen, teleb kanye bobuka, pin-pin deice arye, aning boyanuka arepmak nang ara, akunum eipmane.

Yosua 24:14

Nyabukopura, Yosua birye ayupu nyabuk. “Ati ara, nun ni koprop Allah, el si Yahweh ati, ilil tenebuka unamlume. Allah arye nyasilye yupu nirya, moubuka kekepmunce, aninguk talibuka unamlume. Tonok ning babye batakana kume. Minop talak arye, anggun ni yapu, pia pera mutuku Efrat mek koubuka, otam ulamik talak ara, talye ning Isa Mutuku Dongonye el siuk erelamik ning nirya ara, bataknamlume. Tonda, anggun ni yapu arye, Mesir mutuku noutamak ulamik talak arye, Isa Mutuku Dongonye si erelamik ning nirya ara, bataknamlume. Yata yuk ning do nirya ati, ‘Nun ni koprop,’ nyabuka, yuk talye ning si, pia kum erenamlume. Allah el si Yahweh, el tonok ati, el talibuka, el amu tam ulamunce, el siuk erenamlume. El tonoka.

2 Korintus 7:15

Tonda, Titus arye anggun ap, neika wamlum talak ati, kanye arye teneplirye, ‘E, sik Korintus ninye ara, na yupu nirya moubuka kekelamnikce, ‘Titus ap, el yupu ap ara, weik mambul’ tenen, ilil una deice arye moubuka kekelamnike,’ tenesulule. Winibuka tenesilye ning ara, Titus arye anggun Korintus ninye ati, weik arye kanye deibuka talima aresulule.

1 Korintus 2:3

Na anggun dam yasirye ulamse talak ara, kele weik nang arye winilamak touk kum ulamse bukni, ilil upnukba, na mikip kum mitang asa arye una ap, ilil una ap deice arye, sirim talilamnukba, adip arye peterelamsise.

Rasul 2:46

Winilamik akarye, asum-asum nirya, Yahudi yala nang, sik malye winilamik ning dekna ati, Allah arilbalamik aik dam bulubuka wekelbalamik. Tonda, sik anyaik-anyaik nirya bulubuka weklamik akarye, din ning bokuka, kanye deilildalamik akarye, din neikauk dilamik. Tonda kanye kum wililamikce, talye neik kanyeuk bobuka ansinibuka ulamik.

Matius 6:22

Anggun nonge upna atonun ning ara, anggun asing upsuke. Asing teleb dasutopura, bisik teleb ninguk eibuka bitume. Bukni, asing malye upsilyopura, asing kubuka kwepdanin, malye bisikuk binamlume. Aning atonun, anggun kanye talima anggun bidamnye ning ap, malye ning ap, aning atibuk tenepmunyopura, aminyan wininamlum ning nirya malye winipnamsile.

Roma 9:3

Na yala nang kopropa, nun Israel yala ninye ati, imun kanye bonune. Imun kanye bonuna deiyok ara, nyapnusine. Ara, na yala ninye sik Israel ninye nirya ati, ‘Nun ni Allah arye lyeptue’ tenen, pia se tenenune. Israel yala ninye nirya lyena ati ara, ‘Allah arye na Paulus ati, bataknuturye, Kristus ap, na ap wilibuka yuk-yuk deipnutuba, adeice arye Israel ninye nirya lyeptue’ tenenune. Ara, ‘Se, na yala nang kopropa, Israel ninye nirya lyeptue’ tenen, pataniliba, nyapsine.