Aminyan talak ara, Yesus arye amutuku ninye ati nyabuk. “Nara, tukwak mutuku im sirya, mutuku sirya unyak ninye ati, dirina deiyoknye unune. Na nyasinye yupu kekeplirye, talibuka dobolbalinye bira, kunuknak pia kum unamle. Aning kum bukni, kam una deiyok dirina ara, el talima ak unamle.” Yesus arye nyabuk.
Efesus 5:8 - Eipomek8 Sik malye wininyak ninye ap, ansinibuka una meme nyapmasina deiyok ara, ani. Minop talak ara, anggun Efesus mutuku ululum nang ara, pia malye-malye ulamluma deice arye, kunuknak atonun ninye ulamlum bukni, wini talak ara, nun Deiyoknye Yesus ap, talima dukdongobuka umunya deice arye, dirina ninye atonun akunum ululume. Ati Dirina Deiyoknye arye el mapu una ati, akunum teleb kipdeipsuka ati, dirina nang ulamak atonun diksukumuk unamlulume. Gade chapit la |
Efesus 5:8
43 Referans Kwoze
Aning atonun kum bukni, Allah malye winina pia kumce, dirinak ulamle touk, nun babye, malye winina kumce, telebuk ubirye, dirinak atouk ulamibyeura, nun nirya ap, tonok kanye tenebuka, ansinibuka unyabe. Allah el yupu uk kekebuka, dobolbabyeura, Allah el Mi Yesus, el ining arye, nun malye tenenyap ning ap, malye wininyap ning nirya ap, kum ubuka deipsilirye, lyepnamsile.
Narye aning ati dopkwetepnamkin deiyok ara, ‘Sik asing laipnalama’ tenen, dopdeipnamkine. Tonda, ‘Sik kanye talima yuk punubiceura, sik kanye talima kuna atonun unyaka ati, dirinak tamubuka dobuka, delilyanganalam’ tenen, dopkwetepnamkine. Tonda, Isa Mutuku Dongonye, el mikip arye talibukak arye tamubuka, ‘Allah el mikip arye talipnamle ati dobuka, delilyanganalama’ tenen, dopkwetepnamkine. Ara, yata deiyok ati kume. Ance anang ati aning nirya akunum winipminyeura, nati diba tenebikca deice arye, sik talima ak malye tenenyak ning ap, sik malye unyak ning ap, Allah arye meliplirye, aning kum kipdeipnamle. Tonda, na Yesus ati diba tenepnika deice arye, Allah arye akunum wipdeiamuk ninye ap, ansinibuka unamake. Allah arye aning ati winipnamle. Yesus arye na Paulus ati nyapnuke, Paulus arye nyabuk.
“Im deice weik dirina noutamak umunce, mininga dekna weik ning dolonamlume,” nyapmanama ara, urtalya ati kum nyapname. Isa Mutuku Dongonye arye, nun kanye talyamsukba, pia kunuknak atonun ulamubu noutamak arye, Allah arye akunum lobuka lyepsuke. Lyepsukce, el kanye deiamuknye, el Mi Koprop Yesus arye, aning-aning nirya talibuka, weik deiyoknye kibuka ulya noutamak, akunum dobuka deipsukura, aunyabe. Winira, el Yesus elcuk talisulule.
Sik dib tenena kum ninye arye, ‘Allah el winilul ning ara, nun lik’ tenen, kum kekelamikce, sik kanye talima pia gat akunum kibukba, pia walwal nang akunum unyake. Unyaka anya arye, sik kanye tenen ning nirya ara, kuna atonun akunum ubukba, Allah ap, kanye dukdongobuka neika upmanto kum ninye akunum unyake.
Dirina tuba wapsilye talak ara, anggun kanye talima adirina ning deice deibuka, dib tenepnululume. Ara talye ati kume. ‘Nunda dirina deiyoknye, el dirina mapu unamabe’ tenen, dirinanye, nati dib tenepnululume. ‘Winipnamlum’ tenen, nyapsine,” Yesus arye nyabuk. Yesus arye ayupu nyapdongobuk ning ara, aninye asukumuk batakuka, dungnubuka biyukbuk, sikce el ton kum eipmek.
Minop talak, ikin ning weik ulamukba, pia imun kanye bobuka unyakakuk ulamik ninye ara, atalak noutam, dirin weik ulul ning akunum eipmake. Ikin ning ap, ninye dipna ap, weik ulamuk mutuku noutam ulamik ninye ara, wini talak ara, weik dirina ning akunum eipmake. Ara, beren tam talak keting panaplirye, dirina weik ulamle touk, aninye arye dirina atonun ning, weik mambul ning akunum elinmake.
Minop talak ara, sik Yesus ati dib tenena kum ninye arye, malye-malye winilamak touk, anggun babye, atonun malye winilalume. Asing arye, kum eilinyap bukni, im noutamak balamak Isa mere, sikti, talipsinaba, sik weik deiyoknye Isa Mutuku Dongonye, el yupu kekebuka ulalume. Ara, Allah el yupu yaniltalamak ninye ara, Isa Mutuku Dongonye elcuk sik kanye talima taliliba, malye weik wininyake.
Allah arye, “Kuna noutamak arye, dirina unamle,” nyabuk. Ayupu nyabuknye Allah, elcuk nunti pia mambul ning arepsuke. Ara, nun kanye talima noutamak, el dirina ning arepsuka deice arye, Allah el pia teleb ulul ning ap, pia teleb winilul ning ap ara, bikinyabe. Allah el pia teleb ulula ara, Yesus Kristus el winilamuk ning kel kibibya deice arye, laka usilibuk, bikinyabe.
Anggun ni koproba Allah Yahweh, elce nyamuk sum, tamubuka kunukna arepnamle talak aryuk, Allah el tibuk, si erenalume. Kunukmiting aplyeba, anggun weik mutuku kon deice kwepmunyak arye, anggun yan dum min kum dukmasilye talak aryuk, anggun si erelulum Allah ara, el si erepmunce, ‘Elda pia telebe,’ nyanamlulume. Anggunce, ‘Nun dirina ara, dan tam arye yanamle do?’ tenen, kintinibuka dinamlum bukni, Allah elce tamubuka, “Asum ara, kunukna deipnamle. Malye uplye ati, asum noutam ara, pia kunukmiting,” apnamle.
Aning peterelamlyam deiyok ara ani. Ara, minop talak nun babye kanye bona kum arye, walwal ulamubu. Ara, malye kibuka, ninye deiyok nang yupu ap, Allah yupu ap, kum kekelamubu. Yata malye winin ning do, malye patan do, malye kanye tenena do nirya, amalye ninguk patalamsuka deice arye, yukulamsukce, nun malye ning winina deice arye, tapu kouamsukba, pia malye ulamubu. Atilila ning diba tenelamuburye, yuk nang ati, yu weik ubuka, waldana ap, oldana ap, ulamubu. Tonda, yuk nang ning ati, ‘Se sik ning ara, naryuk doproptinye’ tenen, kanye talima engena ap, ulamuburye, nun nirya arye, yuk nang nirya ati, lik upsinabuk, ‘Pia lik,’ tenelalamubu.
Nyabuk ati, aning ara, ayo bok moubuka delinanye, el weik deiyoknye birye nyabuk. “Sik ti a domik ning ati, kilibuka yuk sekuk ning ara, malye bukni, anye birye ‘Aminyan talak, na pil kum dopnilyopura, yata winipnamne do? Narye sik tia domrik nang ati, melipnyopura, aminyan talak ara, tia domrik nang arye nati, yukupnamniyake,’ tenebuk ning ara, teleb uka. Weik deiyoknye birye nyabuk.” Yesus arye winipmanto yupu deice arye, nyabuk. Yesus arye winipmanto yupu nyabukopura, ayupu dukdongobuka nyabuk. “Na dipkoprop nyapsine. Allah dirina deice arye unyak nang ara, sik pil ati yupu talibikirye, wibuka delinyaka ara, atalak un ninguk tenenyake. Sikda aminyan talak upnamle ning ati, kum tenenyake. Ati, diba tenebuka dirina noutam unyak nang ara, mitikto kel arye wininyake, nyapne. Bukni, sik dib tenena kum ninye arye, ‘Aminyan talak bona utotoa talin ninye unamap’ tenen, sik kayapu nang ak, ‘Yata wiriptibya arye, nun kayapu nang melipsikca deice arye, bona utotowa talin ninye unamap do?’ tenenyake. Tonda, sik pil ati, yupu talibikirye, wibuka deilinyaka ara, weik kel arye wininyake. Ara sikce, ‘Amenyan talak yata wiripnamsil do? Ikin unamap do, telebuk unamap do?’ tenen, moubuka tenenyaka ati, nyapsine,” Yesus arye nyabuk.
Aning ara, talye kum nyapsine. Nun nong deice ikin ning deipsikirye, nun kanye talima malye kilina ati, usulula deiyok ning ara, ninye arye, kume. Tonda, nunti opmanto usulul ning ara, ninye arye, kume. Aning kum bukni, malye ulul ning nirya talibuka, deice tam mikip ulya deiyoknye Isa Mutuku Dongonye ap, tonda Isa Mutuku Dongonye el amu tam unyak bukni, im ap, tukwak ap, im sirya, mutuku sirya bokuka, talilya deiyok isa mer ap, pia malye tukwak kunuknak mutuku noutamak mikip ulul isa mer ap, asing kum elinyap bukni, im noutamak unyak isa mer ara aning-aning nirya ap, aisa mer nirya arye, nun dib tenenyap ninye ati, ‘Malye kibuka, optibye’ tenen, yaniltasinyake. Ati, winipsikiba, ikin weik usilye ning deiyok ara, ninye arye kume, ara Isa Mutuku Dongonye aryuka.
Tonda, nun nirya ara, nun urasin lelina kum, kimilana deice arye ninye urasin elilamak touk, nun ubya deice arye, yuk ninye arye, Yesus el winilul ning elinyake. Ara, nun Deiyoknye Yesus Kristus, el pia teleb ulye touk eibikirye, kel bikinyake. Nun Deiyoknye Yesus ara, Allah El Dib Kanye eluk ulule. El pia teleb ulya deice arye, nun talima pum tam pil dosilirye, el teleb ulye touk, nun babye atonun teleb ulisulule. El ulye touk teleb winilisilye talak nirya ara, teleb winipnin balamibya ani, aminyan ara pia teleb wininamabe. Anirya ara, Yesus Kristus aniryuk, teleb ulisulule.
Nun kuna ap, dipna ap noutamak unyap ninye dam yalyeura, dirina kipdeipsilirye, lyepnamsile. Nun Lyenanye dirina kipsilirye, nun ap, Allah ap, ‘Teleb kibuka neika unamak’ tenen, bisik peterenamsile. Na mi Yohanes an wininamlam ning ap, nun Lyenanye elce winipnamle ning ap ati, nyapne. Zakaria arye nyabuk.
Na kayapu, anggun dib tenen ninye arye, kilapu do, sal do, dib tenena kum ninye kum dolanamlulume. Tonda anggun dib tenen ninye ap, dib tenena kum ninye ap, pil tonok kum donamlulume. Anyapmasina ara, talye ati kume. Anggun tenipdelulume. Diksukum winin ninye ap, pia malye winin ninye ap, sik kanye talima insinibuka ulul do? Yuk-yuk ulul do? Aning atonun, kunuknak ap, dirina ap neika una teleb do? Kume, aning ara kum winipmanto.
Allah el kanye aryuk, ‘Aninye ara, Yesus Kristus ap, kanye talima dukdongobuka neika unamake’ tenen, el mapu kipdeipsuke. Yesus Kristus nun kanye noutam pil dosilya deice aryuk, Allah el weik kele arye, pil teleb kibuka dosilye ning ara, moubuka bikinyabe. Kristus elcuk nun malye winin ning kilipsilirye, diksukum un ninye kilisulule. Allah ap, ansinilisulule. Kristus el pil dopsuka deice aryuk, nun malye winin ning kilibuka pununa ato ning punupsukce, nun malye winilamubu noutamak arye, lobuka lyepsukce, Allah el mapu kilisulule.
Tonda anggunce utenelulume. ‘Nunda Yahudi yala kum ninye nirya ati, “Allah el dipkoprop bisik ara ani,” nyabuka petereptibye,’ tenelamunce anggun bidamang kanye arye erelilalulume. ‘Bisik peterena deiyok nang arye asing kun ninye talibuka bobalamak touk, nunda yuk ninye ati, ‘Teleb bisik ani,’ nyabuka peterena deiyok nang unyabe,’ tenelalulume. ‘Nunda, kunukna noutamak unyak ninye ati, dirin kilina deiyok nang unyabe,’ tenelamunce, anggun bidamang kanye aniryuk erebuka kwalimunce ululume.
Anggun kanye talima kunuknak atonun ulamak bukni, wini talak ara, weik dirina atonun ning akunum eipmake. Sik aunyak nang, talima kanye dipna atonun unyamukba, kunuknak atonun ulamak bukni, wini talak ara, weik dirina atonun ning eipmaka ati, bereklirye, keting deililamle touk unamake,’ Yesaya arye, domon yupu nyabuk. (Yesaya 9:1-2)
Ninye wenebuka dongolamak aik bunyak nang ara, lopdeipnirye, ‘Bai tam bilulume,’ nyapniba binamake. Tonda kunuknak unyak ninye ara, dirin dam dobuka deipnamne. Winipnirye sik aninye ara, dobuka yo pata mutuku aning-aning nirya teleb kibuka pana kum mutuku deipniba, unamak bukni, sik unamakak nirya ara, din ton pia kum patapnamle. Auna uk upnamle. Sik weinyak ning babye, bisik lilunak palamle maning ap, mutuku kon palamle maning ap, talye lukparabuka dinamake.
Ayupu ara, talye ati kum nyapsine. Ayupu deiyok ton laka nyapnusine. Ara im sirya, mutuku sirya nirya unyak ninye noutamak ara, malyeuk wininyake. Malye wininyakce, ‘Allah elda aulule’ tenen, akunum kel kiyamik bukni, sik nirya arye elti, ‘Nun ni Allah, elda pia mambulnye’ tenena kumce, el si kum erelamik. Tonda, tonok talak babye, elti, ton, “Telebe,” nyabuka kum ulamik. Aning nirya kum bukni, sik kanye tenen ning nirya ara, malyeuk upra balamikba, ‘Dipkoprop nong upnamle ning ara ani’ tenen, moubuka kum tenipmanto ulamik. Talye-talye ninguk tenelamik. Tonda, sik kanye talima pum tam ara, walwaluk upra balamika deice arye, pia kunukukba, malyeuk ulamik.
Allah arye, el amu tam pil melibuka dolulunye, nati nyapnuke. “Na mi anda weik mambul pil dopnamnilam bukni, ‘Aning mitik uplyak’ tenen, weik ikin ning ton nyapnukine. Ara, Israel ninye, sik apu koproba Yakub birye deiamukba dadeipdanin yangalamik ninye ara, yuk pera mutuku yu nang arye, obuka sirya dakikce, tapu koubuka sik mutuku tamubuka bobinamike. Winilamik bukni, ance pil donmaminya ani, aninye tuba tonap, dekenamnululume. Yuk nang arye Israel yala ninye weik tonun, bobinamikba, kum danin balamikba, na Allah arye kalikuka melilamsiba, tuba kam unyak ninye ara, an pil dominya deice arye, aninye dobuka weik tonun, na dam ila tamubuka boyanganamnilyame. Na Allah arye, anti, dirina kina deiyoknye kipdeipkiniba, ance Yahudi yala kum ninye ara kunuknak atonun unyak bukni, anggunce, sik talima dirin kilinamlume. Winipnamluma deice arye, na dirina ara Yahudi yala kum ninye sik deice arepneba, moubuka tenebikirye, nati kel kipnamake. Na dirina sik arepneba, adirina eibikirye, sik kanye deipnamaka deice arye, sikce ninye mutuku-mutuku nirya ap, mutuku sirya im sirya daunyak ninye ap, peterebikiba, kekebuka kel kibikirye, sik malye unyak ning batakicopura, narye ninye weik lyepnamne.” Allah arye nyabuk.
Na mapu sik asing kuamlye ninye ati, narye melibukapnirye sik min balamikirye bita kum bikamikce bisik ara, narye sik taruk talipnirye, menekuka banibuk, sik banamake. Kuna sukumuk balamice ninye ara, sik binamak sukum narye dirina kipdeipniba, dirin arye eibuka teleb ubuka banamake. Tonda, ‘Kanam aryuk binamak’ tenen, kot dam bisik nirya teleb kipdeipnamne. Winipnyopura, talye lukparabuka teleb bisikuk banamake. Diba aning-aning nirya ara, narye sikti, winibuka melinamsine. Na wipdeiamsiba, ‘Naʼ tenen, ninye, Israel yala ninye ara, pia kum bataknamne. Kalikuka melinauk unamsine.
Ara, minop talak ulamik Yahudi ninye arye, ‘Allah nun malye winin ning namin kipsilirye, nun moronyap yupu kekenamsil’ tenen, Allah el si erena ati, kam ning obuka arena ap, nintong teleb ning dobuka, uku dongona ap, ulamika atonun, Kristus arye nunti, bico tenebuka kanye talima arepsukce, elcuk el bidamnye nong, Allah ati aribukce, nun yok pununa ati dibukura, Allah arye, kanye deibuk. Yesus arye, kanye talima arepsukce, bico tenesilye touk, anggunce yuk ninye nirya ati, bico tenebuka melilanauk unamlulume.
Tonda, an Allah arye, “Narye nyapdeiamsise yupu moubuka taliplumce, dipkoprob uk winimunyeba, narye pia teleb kilinamsine,” nyabuka, nyalin yupu deice nyapdeiamsulum ning ara, luba kina kume na nio! ‘Aning ara, tuba-tuba tenemince, nunti melibuka kalikinamsilam’ tenen, moropkiabe. Aning moropmakiyap ning ara, talye ati kume. Deiyok ara, nun mutuku noutam ara, pia malye wininyak nang tuba unyakce, yuk nang ati, talye lukparabuka opsikcake. Malye-malye weik usinyake na nio. Ati ara, ‘Ancuk lyepropnamsilam’ tenen, moropkiabe na nio.
“Anggun noutamak noutam ara, yata nang arye Allah Yahweh ati, ‘Se el weik mambulnye’ tenen, el si erelulum do? Tonda Allah arye wipdeibukba, el pil dolulnye nyalul yupu ara, anggun noutamak arye, yata ninye arye ayupu kekebuka diksukumuk ululum do? Yata ninye do nirya, kunukna bisikuk bamunyeba, dirina kum usilye ninye ara, Allah el si Yahweh ati diba tenebuka unamlume. Tonda, ‘Nun ni koproba Allah elcuk melinamsil’ tenen, anggun kanye nirya el deice uk delinamlulume.
Nyabikura, Yesus arye domon yupu deice arye tamubuka nyabuk. “Wini talak ninye moubuka kel bikna ati, dirina upsil ning ara, anggun ap mitik anunuk, anggun neika unamsile. Dirina tuba wapsilye talak ara, teleb bisik adiparyuk banamlulume. Aminyan talak ara, kunuknauk unamsila ati nyapsine. Kunuknak balinye bira, el bisik banmalya ara, moubuka kel kum biktue.
Wini talak ara domon yupu ton nyapnusine. Ara, lukunyan inipmalye talak, ninye mapmaca bereklamle touk, akunum unmala ati, kunukna noutam arye malye-malye winilamikce ning nirya ara, batakibirye, dirin ninguk talibuka diksukumuk winipribapya deice arye, ting ongolamak touk kibuka ubirye, pia kaliknauk unamabe.
Tonda, weik arye kanye pia deibuka, pin-pin asa arye, nun ni Allah ati, ‘Teleb, nyanamak’ tenen, Allah morosinyame. Nun ni Allah ati, tuba-tuba, ‘Telebe,’ nyanamlulume. Nyanamluma deiyok ara, ani. Ara, Allah arye, ‘Na mapu nirya akunum teleb kipdeipnirye, im deice dekna weik ning arenamne’ tenen, kintiniamsuk ning ara, ‘Sik Kolose ninye im deice ukirye, sik babye teleb ning dopropnamak’ tenen, akunum teleb kipdeipsuke. ‘Im deice dekna ning dopropnamak’ tenen, teleb keipdeipsuka ati, nun ni Allah ati, ‘Telebe’ nyabuka, weik arye kanye delinamlulume. Nun ni Allah arye, aning-aning nirya talilirye, im deice weik dirina noutamak pia unamlak ara, nun ap, anggun ap, dib tenen ninye nirya ap, neika unamabe. Anggun Kolose ninye ap, ‘Im deice unamlum’ tenen, Allah arye akunum teleb kipdeipsuke.
Piblisite