Winipnamsil ning ati ara, anggun talye tukwak ninye malye upsilye ning nirya ara, pia batakanamlulume. Akunum diamik ninye arye, aning-aning nirya kum pataplirye, pia talye wininamak atonun, malye winin ning nirya ara, batakanamlulume. Ara, yuk kilapu talye dalubuka yolana ap, pia yuk talye kanye bobuka ninye kum winipmanto ning, pia malye-malye yolalamak ning ap, malye winin ning ati weik patana ap, aning nirya batakuka, diksukumuk wininamlulume. Amalye winin ning yala nirya ara, pia kum wininamlulume. Tonda, ‘Aning-aning nirya bona weika arye doproptinye’ tenen, weik arye patapsilyopura, ara pia malye winina ati, aning babye, kum wininamlulume. ‘Bona weik doproptinye’ tenen, kanye talima engelul nang ara, Allah batakuka yuk talye ning si erenyak atonun wininyak anya arye, aning babye kum wininamlulume.
Efesus 5:3 - Eipomek3 Ara, anggunda, Allah arye, wipdeipsukura, el mapu akunum ululuma ati, anggun kan-kan noutamak ara, talye yolana ap, malye-malye winin ning yala-yala nirya ap, ‘Aning-aning nirya, weik arye, dobuka taliptinye’ tenen, kanye talima pum tam ‘Se,’ tenena ap, anirya ara, mitikto babye pia kum unamlulume. Allah arye, ‘Na ninye, pia pung diksukum nanguk unamak’ tenen, wibuka delilul ninye ara, ato malye winin ning pia kum wininyaka anya arye, anggun babye, amalye ning nirya kum wininamlulume. Kum winipmunyopura, yuk nang arye, anggun Efesus mutuku ululum ninye ati, ‘Sikda winibuka, winibuka malye wininyak’ tenen, kum nyapsitinge. Gade chapit la |
Efesus 5:3
58 Referans Kwoze
Amalye winin ning nirya, “Kum wininamlume,” nyapmasina ara, urdem ati kum nyapsine. Pia dipkoprop tenenamlulume. Anggun talye yolana ap, malye-malye winin ning yala-yala nirya ap, ‘Aning-aning nirya, weik arye, taliptinye’ tenen, kanye talima pum tam ‘Se,’ tenenauk, unyak ninye ara, Allah ap, Kristus ap, neika kum uptinge. Ara, Allah ap, Yesus ap lyepsirikirye, nun talima talisirikceba, pia teleb kibuka unamabak ara, amalye winin ning wininyak ninye tonok babye, ansinibuka kum unamabe. Allah arye, amalye wininyak ninye dobuka, pia yukak deipliba, talyeuk unamake. ‘Aning-aning nirya weik arye doproptinye’ tenen, mun tululul nang ara, ‘Dip’ tenena, kum nang arye, ‘Nun ni koprop’ tenen, talye ning ap, Isa Mutuku Dongonye si erelamak nang atonun unyake. Aunyak ninye babye, Allah arye, arenamsil ning dobuka, el ap, neika kum unamake.
Ton nang arye, nyalamak yupu ara, ani. “Allah arye, ‘Din ning aning-aning nirya ara, ninye arye, dinamak’ tenen, kwepdeipsuke. Tonda, ninye mun ara, ‘Din ning aning-aning nirya dinamak’ tenen, nun mun kwepdeibuke,” nyanyake. Nyanyak bukni, aminyan talak ara, Allah arye, din ning yala nirya babye, ninye mun ababye, kum kipdeipnamle. Allah arye, nun nong kwepdeipsuka deiyok ara, ‘Sik nirya arye, talye yoldanamak’ tenen, kum kwepdeipsuke. Aning kum bukni, nun nong kwepdeipsuka deiyok ara, ‘Na siuk erebuka, na mapu ukirye, diksukumuk unamak’ tenen, kwepdeipsuke. Aning atonun, Allah arye, nun nong ati tenesilye ara, ‘Na lyepnirye, pia talinamne. Tonda, kanye talima dukdongobuka neika unamabe,’ tenesulule. Ati, talye yoldana meme, nyapsine.
Ninye talima malye upliba, anoutam arye elelamle ning ara, ani. Malye tenena ap, ninye ona ap, sik ninye dolana ninye batakukabikirye, yuk nang kil alubuka dona ap, kil talye-talye yona ap, ubula dona ap, yuk nang ati malye-malye yupu nyabuka minina ap, tilila yupu nyana ap, anirya ara, anggun talima noutamak malye una deiyok ning aupsilya deice arye malye kililalulume.
Bukni, anyaik noutamak pia kum wekmanto ninye, bai tam atonun unamak ninye ara, pia malye-malye ninguk talibuka wininyak ninye. Ara, kir dona ap, bai mal ona ap, isa mirye tenekirye, aning ayala-ayala nirya pil donyak ninye ap, talye yolanyak ninye ap, ninye oltakanyak ninye ap, talye ning ati, ‘Nun ni kopropa’ tenen, si erenyak ninye ap, tilila winin ning aning-aning nirya ati kanye deibuka tilila pil donyak ninye ap, sik nirya ara, Yerusalem Winiryuk mutuku pia kum weknamake.”
“Bukni, weik uku buk dilamukce, tin ap, kumasan bol keil el si ara belerang ap, ara uku tin weika arye dipliba, keil but-buta tong ara, sikin tong atonun, weik lelamle ning nyalamukce deiyamse mekwen, uku din mutuku noutamak dopwketepniba, asukumuk pia daunamak ninye ara nyapnune. Sikda, diba tenena kum ninye ap, ‘Yu nang arye opsicak’ tenen, ilil upliba, nati batakaninyak nang ap, kir dona ninye ap, ninye bai mal ona nang ap, amalye pil donyak ninye nirya ap, talye ning ati, ‘Nun ni kopropa’ tenen, si erenyak nang ap, tilila yupu nyanyak ninye ap, aninye nirya ara, uku din mutuku, noutamak dopwketepniba, apia unamake. Uku din mutuku unamaka ara, Dipna Bitinye ning ati nyapkine.” Allah arye nyapnukba, na Yohanes arye kekepse.
“Ikin ulamsuka babye, nati kum bataknulumce, teleb winilamlum bukni, ton ning ara, malye winiplum ning ati, wenebuka yupu bokeipnamsine. Tonok ning ara, anggun kan-kan noutamak ara, ton nang arye minopnye Bileam el nyalamuk yupu talibuka dobolbanyake. Bileam birye, yuknye el si ara, Balak biti laka nyabukba, Balak birye Israel ninye sik kanye talima lipdobukba, malye-malye winilamik. Peterebuka deice arye malye winilamik ning ara, Isa Mutuku Dongonye si erena ati, kam ning obuka arilamik ning tup dobuka dilamik. Tonda, ubula yolana ning aning-aning nirya winilamik. Bileam malye yupu peterelamuka deice arye, Israel ninye amalye ning winilamik touk, anggun Pergamus mutuku noutamak ton ninye arye atonun wininyake.”
Winira yuk yupu ton nyapnusine. Se, na kayapu, sik yuk nang arye, nyapnikba, kekepse ara, pia malye yupu nyanike. Ara, “Kume, sik Korintus mutuku dib tenebik ninye kan-kan bukni, tonoknye birye kil talye yobuk ning ara, sik dib kum tenenyak ninye ababye aning atonun kum wininyake. Anye birye, el li koprop arye, domuk kil ubula yobuk,” nyapnikba, kekepse.
Dan mutuku do nirya winilamak touk, amutuku unyak nang babye, ‘Mambul weik yupu kekepnuyapʼ tenen, ninye weik tonun bikbik abuka bulubikirye, anang arye, an dam yanuka bunyake. Wininyaka ara, na Allah, na mapu koproba atonun winibikirye, weik tonun an dam yakirye, an yupu nyanamlam ning ara, pia moubuka kekenamake. Amol deice arye kekenyak bukni, ance, “Aning ara, winipnamlume. Aning ara, kum winipnamlume,’ nyabuka, nyapminye ning ara, sikce moubuka talibikirye, kum dobolbanamake. Deiyok ara, sik anang ara, sik si bam bol deice arye, ‘El kanye deipnamsilʼ tenen, kekena teleb yupu nyapnamak bukni, sik talima noutam arye teninamak ning ara, pia yuke. Ara, sikce, ‘Nun tenina deice arye, tilila yupu nyabibiba, yuk nang arye arepsikiba, nun diamuk teleb kipdeipdatibye. Nun dem aryuk, teleb ning dopropnamabe,’ tenenyake.
“Yuk nang sik ning nirya ati, ‘Se, na uk doproptinye,’ tenena meme. Ara sik aik ap, sik kilapu ap, sik pil melina nang ap, pil melina kilapu ap, el sapi basam ap, el keledai basam ap, el weilul ning yuk ning ap, tonda, yata ning do, el talilye ning nirya ati, ‘Na doproptinye,’ tenena meme,” Allah arye nyabuk.
Amalaikat ap, sik melibuka yin talin nang ap arye, kum obik ninye ara, sikce yuk ninye oltakalamik ning ap, kir dolamik ning ap, bai mal olamik ning ap, kilapu talye ubula yolalamik ning ap, yuk nang bon-bona ubula dolamik ning ap ati, “Se, nun malye unyabe,” nyabuka, kum batakik. Kekena kumce, malye kibuka pia malyeuk winibik. Aning nirya eipse touk, na Yohanes arye nyapsine.
Atilila yupu peteren nang arye, ‘Aning-aning nirya weik doproptibye’ tenen, patalye ninye unyaka anya arye, sik badamnye kanye arye tenenyak ning, talye yupu uk, peteresinyak deice arye, ‘Sik ning weik dolonamap’ tenen, yum yupu nyabuka, anggun ning ubula dolonamsiyake. Minop talak ara, Allah arye, ‘Atilila peteren nang ara, wenebuka oplopnamne,’ tenyamukce, akunum kentenlamuk anya arye, aning ara lubakiplirye, kum bataknamle. Dipkoprop aminyan talak ara, aninye oplopnamlarya.
Aning atonun, anggun kan-kan noutamak ton ninye arye, ‘Ubula talye-talye neika mabicak’ tenen, moubuka kalekelanamlulume. Tonda, minop ulamuknye Esau birye, ‘Allah el ulul ning ap, diksukum un ning ap ara, mambul kume,’ tenyamukce, malye ulamuk touk, anggun kan-kan noutamak yuk nang ton tenebikirye, ‘Malye winibicak’ tenen, moubuka kalekelanamlulume. Esau bira, ‘Allah el ulul ning ara, mambul kume,’ tenyamuk. Winibuka tenyamuka anya arye, elda minyuma du mi ulamuka ati, el li birye talyamuk ning nirya dopromtu bukni, tonok sum deice aryuk el din patabukba, el weit kopropa Yakup dinmok ning dekuka doprobuka deice arye, el talipmanto ning nirya dekukba, el weit kopropa doprobuk.
Tonda, anggunce amalye ning tuba winilamunyebuk, eipnyopura, ‘Se’ tenen, malye kanye bopnyopura, adeice arye, ‘Allah arye kanye imun kanye arepnilibuk, alye dakdanamne do?’ tenen, ilil upnile. Sik Korintus mutuku noutamak unyakce, malye-malye winilamik ning ati, “Se, nun malye wininyabe,” nyabuka, sik malye winin ning kum batakik ninye eipnyopura, malye kanye bopnirye, na talima ikin unamnile. Sik malye unyakce kum batakanyak ning ara, ani. Ara, talye ubula yolana ap, Allah el winilul ning tenena kumce, pia malye-malye winina ap ati, ‘Mambul’ tenena kumce, talye kanye bobuka wininyaka anya arye, na alye dakdanamne.
Aning atonun, sik wisi kilapu ati, ayupu nyabuka peterenamlyame. Sik wininyak ning noutamak nirya ara, ‘Allah el mambule’ tenen, malye winin ning nirya batakikirye, diksukumuk ubikirye, pia mingne teleb kili-saluk unamake. Ati ara, yuk nang arye sikti, ‘Sik malye winipmake,’ kum nyapmanto. Teleb ninguk wininamaka atia. Tonda, sikce yuk ninye ati, malye yupu nyabuka, pia kum lulunamake. Tonda, sikce yu mek, kanye wangalamak mek pataplibuk, weik arye kum dinamake. Anirya kum wininamak bukni, pia teleb winin ninguk tenebuka, mitik kam kilapu ati, peterepnamake.
Ninye mutuku-mutuku nirya arye pia malye wininamak ning ara, nyapnukine. Ara, sik bidamnye arye, sik bidamnye ati tenenauk unamake. Yuk nang ati bico tenebuka kum melinamake. Tonda, ‘Yo bok weika arye doproptibye’ tenen, kanye engeplibuk, unamake. Aninye nirya arye, “Nunda pia teleb nang,” nyabuka kanye erena ap, sik babye kanye aryuk erepdeipdakirye, dilana ap, yuk nang ati yu uplirye, sik nong deice malye yupu nyabuka delinamake. Winibikirye, sik ni yapu ap, sik nin yapu ap, nyanyak yupu ati, yanibuka kum kekepnamake. Tonda, yuk nang arye teleb kipdeipsikibuk, anang arye, “Telebe,” nyabuka, kina kum unamsiake. Allah winilul ning nirya ati, ‘Nun lik’ tenen, pia malyeuk wininamake.
Aning kum winipnamap bukni, teleb ninguk winipnamap ara, surat sekibirye sik dam dopkwetepnamabe. Pia kum winipnamak ning ara, winibuka nyapnamabe. Yata din ning do, ninye arye si talye erenyak ning ap, ‘Talye si erepnamabe’ tenen, obuka arinyak ning ap ara, nun kum dipmanto ning ara, sik Yahudi yala kum ninye babye, adin ning yala nirya pia kum dinamake. Tonda, ubula arye talye yolana nirya pia kum wininamake. Tonda, minop ngang colopdongobuka obikcopura, ining kum saklamle ning nirya nong kalibuka pia kum dinamake. Tonda, ining mek yala nirya pia kum dinamake. Winibuka nyapnamabe,” Yakobus arye nyabuk. Nyabukce, ayupu ton nyabuk.
Bukni, wininamlam talak nirya ara, ‘Na yupu nyan pil ati, na melin nang unamakʼ tenen, ance dipdebuka, ninye ara, yata wiribuka nang do? Ninye ton wipdeipnulyame. Sik anang ara, kanye moubuka tenebikirye, yupu nyapmanto nanguk wipnamlame. Ara, ‘Teleb arye pil dopmanto nang ara, anye tenepmince, ananguk wipdeipminba, yupu lipsisikin pil talibuka unamake. Ara, sik anang noutam arye bokdeipminba, ton deiyok nang arye, ninye yupa ara, pia weik seribu (1.000) nang ati, yupu lipsisikuka talinamake. Ton deiyok nang arye, ninye yupa ara, 100 nang ati, yupu lipsisikuka talibuka unamake. Atonun, ton deiyok nang arye, 50 nang melina ati talinamake. Ton deiyok nang arye, ninye 10 nang melina ati, yupu lipsisikuka talibuka unamake. Ance, ‘Yupu lipsisikin pil talibuka donamakʼ tenen, adeiyok nang wipdeipnamlyame. Tonda, ance awipdeipnalam nang ara, talye nang kum wipdeipnamlyame. Anang ara, ‘Malye ubibya ati, Allah arye wenepsilyakʼ tenen, Allah ati, ilil kanye bobuka, elti, dib tenibuka unyakce, tilila yupu talye kum nyalamak nang ap, tonda ‘Sikda, yo bok weik dopropnamapʼ tenen, namin kin yo bok ton, pia kum dolonyakce, telebuk unyak nanguk wipdeipnamlyame. Tonda, yuk nang arye, sik anang ati ara, ‘Sikda, telebuk unyak nang ati, anang ati dipkoprob tenepnamap,’ tenenyak nanguk wipdeipnamlyame.
Sikti lila yupu peteren nang arye, yuk nang kilapu eibikirye, ‘Se, akilapu ara, dalubuka yoptibye’ tenen, pataplibuk, pia tenenauk unyake. Malye winina pia tuba-tuba wininyakce, sik kanye teniltonauk unyak ninye ara, ‘Nun tam kipropsiting’ tenen, sik nyanyak yupu deice arye, benbenepdongbuka lilonyake. Atilila yupu nyanyak nang ara, ‘Yuk ninye, sik ning weika arye dalubuka doproptibye’ tenena ning ara, weik arye kel kiyamik bikamik. Anang atonun wininyak ninye nirya ara, Allah arye dipkoprop wenebuka oplopnamle.
Ninye arye, sik ‘Na’ tenen ning, delilamak touk, weik wenena ning tia talak ati, tenepce deililul bukni, ‘Aminyan ara pia oplopnamne’ tenen, pia weik arye malye ning tenenyak ninye ati ara nyapnusine. Ara sik nong pataplye ning, malye ninguk tenebuka, talima ap, nong ap, pia malye winin ninguk unyake. Winibuka unyakce, sik deice tam unyaka deiyok nang nirya ati, ‘Nun like,’ tenebuka yaniltanyake. Aninye ara, pia lik tenebuka, sik kanye weik arye erenyaka anya arye, sik ilil-ilil una kum arye, Allah el im deice pil donyak ninye malaikat ap, yuk ninye deiyok nang atouk, im deice unyak ninye ap ati, talye luba kibuka, sik nong deice malye yupu nyabuka, ikin ning sik nong deice delinyake.
Domba basam weina deiyok nang arye, sik domba basam ati bico tenebuka, teleb ubuka weilamak touk, anggun babye, Allah el mapu sik amutamak unyak ninye ati, bico tenebuka nimalye arye melinamlulume. Ara, sik amutamak unyak ninye ati, ‘Sik kanye malye ubicak’ tenen, melipmunce, ‘Kalikuka dilanamlulum’ tenen, nyapsine. Wininamluma ara, ‘Na lik,’ tenenun bukni, ‘Allah arye pia pi donilya ati, wininamne,’ tenena kume. Aning kum bukni, Allah arye, ‘Na mapu melina ati teniltona kum arye, kanye deibuka melinamak’ tenen, ‘Patalul ak tenesilye touk wininamlum’ tenen, nyapsine. Tonda, ‘Yo bok weik arepsiting ak, teleb ubuka utibye,’ tenena kum arye, kanye deibuka talye luba kibuka melilanamlulume.
Atilila yupu nyanyak nang ara, sik malye yupu peterenyaka deice arye, anyasik-anyasik ninye akunum diba tenelamik bukni, tonok-tonok ton kum, sik nirya arye, dib tenebik ning, Allah yupu batakuka, weik kanye mambul kilinyake. Ara, atalye yupu nyanyak nang arye, yuk nang ati, peterenyaka deice arye, tonok-tonok kum bukni, anang weika arye minop talak kunum diba tenelamik ning, bataknamyak ati, atilila yupu nyanyak nang arye, yuk nang ati, weik kanye mambul kilinyake. Aning ati ara, atilila yupu, tenepce arye nyanyak ninye ati, “Amalye winin ning ap, tilila yupu nyanmalum ning ap, adiparyuk bataklulume,” nyabuka, yupu sekenamlyame. Amalye nang talye yupu peterenyaka deiyok ara, ‘Yo bok weik arye dolonamap’ tenen, tilila yupu tenepce arye, nyanyake.
Aning ara, talye ati kum nyapkine. Allah yupu peteren nang, sik melina deiyok nang ara, dib tenen nang, sik kanye melipdakirye dinamak anya arye, talye pil kum donyake. Sikda, Allah el pil talibuka donamaka ati, sik adiparyuk maknya kintinibuka dina ap, yuk nang yanina ap, kum winiptinge. Tonda, yuk ninye ati minop derelana ap, wenena ap, kanye wangalamak mek pia pataplibuk, weik arye dina ap, kum winiptinge. Tonda, yu weik ubuka, yuk nang oldana ap, bona talin ning yo bok ap, weik arye dolona ati, tenepce arye, minin yupu nyana ap, anirya ara, sik adiparyuk pia kum wininamake. Amalye-malye winin nang ara, ‘Allah ati diba tenen nang, sik melina deiyok nang unamak’ tenen, wibuka pia kum delinamlyame. Aning kum bukni, ‘Allah yupu peteren nang, sik melina deiyok nang unamak’ tenen, diksukum unyak nanguk, wibuka delinamlyame.
Aning kum bukni, Allah arye, ‘Na si erebuka, nati kanye deibikirye, na melin kilapu ara, wininamake,’ tenesilye touk, ninye melina ati, teleb pil dona ap, ninye bico tenebuka melina ap, diksukumuk unamake. Yuk ninye, aunyak ning eibice, deice arye, ‘Akilapu ara, telebuk,’ tenepnamake. Kwerya weik ning donyak deice arye kume. Allah si erebikirye, diksukumuk unyak kilapu ara, amalye winin ning kum wininyake.
Bukni, atalak-atalak nirya ara, anyapmasin atouk do, yuk winipnamsil ning do, yatato winipnamsil do nirya, weik mambul tenenamlum ning ara, nyapnusine. Ara, ‘Kristus el laka teleb yupu, ninye lyena yupu nyasilye touk, pia moubuka kekebibirye, ayupu uk teleb-teleb ubuka, diksukumuk unamabe,’ tenenamlume. Winipmunyopura, na dilyasitinye talak babye, dilyangana kum arye, kekenauk upsitinye talak babye, na biknamsine. Ara, ‘Sik Pilipi mutuku ninye ara, sik kanye talima ap, kanye ap, ansinibuka kanye lamabuka unamak’ tenen, kel biknamsine. Tonda, anggun nong ara, yuk-yuk ululum bukni, tonok kanyeuk bobuka, tonoknye ato kibuka, Yesus el laka teleb yupu pil dona ati, pia pi dobuka, neika pil donamlume.
Nun ka kil el si Febe nyapmasina deiyok ara ani. Ara, ‘Anggun Roma mutuku ninye arye akil ati, pia teleb kibuka taruk arepmunce, “Telebe,” nyabuka melinamnulum’ tenen, nyapsine. Winipnamluma deiyok ara, ani. Akil ara diba tenebukba, nun Deiyoknye Yesus ap, kanye talima dukdongobuka ulula anya arye, Allah el mapu nirya ati, sik patan ning ati, teleb kibuka melilamubuto uk, akil babye atonun melinamlulume. Tonda, akil Febe bira, yuk diba tenenyak ninye ap, na ap nun nirya ati, weika arye melyamsuka ati, elce anggun mutuku yalyopura, ‘El pataplye ning nirya ati, melibuka arepnamlum’ tenen, akil el si nyapsine.
Tonda, anggun kanye tenen ning ap, anggun taruk ap, anggun nong nirya ap arye, malye winin ning aning-aning nirya talibuka kum wininamlume. Aning kum bukni, ‘Allah aryuk talinamsile’ tenen, anggun kanye talima ap, nong nirya ap, Allah ati arenamlulume. Ara anggunce anggun bidamang ati, ‘Kume, nunda akunum diamupa ani, Allah arye kam bukeipsukce, winiryuk ninye atonun kibuka, akunum teleb kipdeipsuke’ tenen, anggun nong nirya ara, Allah ati arepmunyeba, Allah arye anggunti melipsilya deice arye, diksukumuk wininamlume.
Aninye arye pia malyeuk ulamik touk, wini talak babye aninye atonun unyak ninye arye, tuba malyeuk wininyake. Yata malye winin ning do nirya, malye winin ning aning-aning nirya talibuka wininyake. Sik kanye talima pum tam nirya ara, malye ninguk langdibukba, ninye kum winipmanto, pia malye winin ning weika arye wininyake. Tonda yuk malye wininyak ning ara ani. Yata bona ning do nirya, sikce aning-aning nirya ati, ‘Se, nuncuk aning yala-yala nirya weika arye doproptibye’ tenen, kanye talima lilolulba unyake. Tonda, yuk nang arye talinyak ning ati, ‘Se nuncuk taliptibye’ tenen, kanye talima engena ap; yu upliba ninye oltakana ap, walana ap; tenepce arye tilila yupu nyaltakana ap; yu upliba yuk ninye ati malye ulina ap; yuk nang arye wininyak ning ati, malye yupu nyabuka murmur ana ap; awininyak ning nirya ara malyeuk wininyake.
Sik amalye ning wininyak nang arye, bona utotoa talina kum ninye nirya arye, sik wa tonok wiamikce ning ati, ‘Nuncuk ubula dopropnamabe’ tenen, talipmace yupu ara, kum batakanyake. Adiparyuk dekna kumce, lukdanuka ubula dolonyake. Atonun, sik malyeuk tenenyak nang arye, bona utotoa kum ninye arye tonok, wiamikce wa win dam ati, ‘Alubuka doproptibye’ tenen, mikip donyake. Aning atonun, bona utotoa kum ninye, sik aik tonok babye, ‘Adiparyuk dalubuka dopropnamabe,’ tenenyake. Utenelamica ani, tilila yupu nyanyaka deice ap, sik anyasik ninye nirya obikirye, bona utotoa talina kum ninye, sikce aik pum tam deiamikce ning nirya, talye dalubuka, ubula dolonyake. Yata ninye do nirya, sik talye yuk ninye, sik aik ap, sik aik deiamice ning ap, sik aik neika ulamikce, kili sal ap nirya ara, ‘E, nun mapu silip ap, nun talenyap ning ap ara, telebuk unamle,’ kum tenepnamake. Sik malye deiyok nang arye, talye bona utotoa talina kum kili sal, talinyak ning nirya ara, ubula don nang arye dalubuka dolonyake. Aning nirya dopdobikcopura, sik anyaik ulamikce ninye nirya arye, teleb kanye ton kum bonyake. Sik aninye nirya arye, malye kanye bobuka unyake.
Bukni, anda Raja Yoyakimo! An winiminye ning ara, pia urasin yuk ulule. Ance teniminya ara, ‘Kume, tilila yupu nyaptinya deice arye, aning-aning nirya ara, naryuk bona weik doproptinirye, bona talinanye uptinye,’ tenelyame. Tonda, ninye malye kum winipmakibuk, talye olyame. Winibuka ance talilyam mutuku nang nirya ati, sik deice ikin ning ap, yu weik ning ap, malye kililyame. Yuk daunyak nang ati, yaninauk winilyame!
Sik mutuku noutam uceba, anggunce, ‘Se aning ara, weik kel nang unyake,’ nyalulum nang ati ara, wenepnirye, narye lo arepnyeba, yuk nang arye, sik akunum domik kilapu nirya, narye yuk nang ati arepyeura, anang arye akilapu alubuka dopropnamake. Aning atonun, sikce wa tuku wilamice mutuku ara, na Allah arye dobuka, yuk nang ati arepnamnarya! Winibuka wenepnamsina deiyok ara, ani. Ara, anggun amutuku noutam ululum nang nirya ara, weik bona talin nang babye, amu tamuk mitikto unyak nang babye, ‘Se, aning-aning nirya, nun ton weika arye doproptibye,’ tenen, pia patasilyeba, enauk ululume. Tonda, anggunce, tenebuka aryuk nyabibyeba, ‘Yuk nang ning pia weika arye alubuka doprobibyeba, bona talin nang uptibyeʼ tenen, tilila yupu nyalulume. Ara talye daunyak nanguk kum bukni, anggun mutuku noutam, Allah si eren aik pum tam pil donyak nang, sik imam-imam nang babye, na yupu ap, aminyan upnamle ning ap ati, laka nyana deiyok nang, sik nabi-nabi nang babye, tilila yupu deice aryuk, nyabikirye, enyake.
Amutuku unyak nang nirya ara, weik nang babye, mitik nang babye atonun, ‘Nun ton yo bok uang weik dobuka, bona talin nang uptibyeʼ tenen, eibuka dolonyak ning ara, diksukum pil dona deice arye, kum dolonyake. Aninguk kum bukni, tonda, sik imam nang babye, nabi nang babye, sik nirya arye, yuk nang ati, tilila yupu nyabikca deice arye, yuk nang, sik yo bok uang ubula dolonyake.
Ninye deiyoknye, el mapu arye do, yuk ninye deiyok talibuka ulamice nang arye do, sik amu tam ulamice ninye ati, yaniltalamaka deiyok nang ara, dipkoprob pia walwal aryuk unyake. Bukni, yata weik deiyok Raja nang do, sik tenepce yupu nyana ap, tilila yupu nyana ap, uang yo bok ubula dolona ap, pia kum ubikirye, diksukumuk ubicopura, sik talinamak mutuku ap, sik ap telebuk upnin banamake. Sik diksukumuk unyaka deiyok nang arye, ‘Kume, malye una ap, tilila ninguk winina ap nirya ara, nun like,’ tenenyaka anya arye, yuk nang arye, ‘Nun deiyoknye duknubuka melinamsil’ tenen, yo bok dungnubuka arepdetinga babye, teleb ubuka unyaka deiyok nang arye, “Kume, aning ara kum dopropnamabe,” nyabuka, amalye winin nang ati wenenyake. Wininyaka ati ara, sik ninye deiyok nang talibuka unamak talak ara, lo pia weik arye unamake. Yuk deiyok nang arye minopce kum punupnamake.
Allah ance na kanye talima noutamak, pil dopniminyeura, ance, “Aning ara, wininamlume. Teleb winina ara, ani,” nyapdeiamsulum yupu nirya ara, aninguk pataniliba, an yupu talibuka wininamne. Na kanye talima noutamak, an yupu uk pia pataniliba, aninguk talibuka, wininamne talak nirya ara, yuk talye ning nirya ati, ‘Aning weik arye doproptiniba, bona weik talinanye unamne’ tenen, kum patanamnile. Na kanye aryuk tenen ning, talibuka kum wininamne.
Malye winin ninguk talibuka wininyak nang ara, ‘Nun patapmasilye ning ara, ani-ani,’ nyabuka maknya kintinibikirye, kwalinyake. Ati, ‘Sik malye wininyak ning ara, tamubuka sik nong deice yanuka, malye kipdeipdating’ tenen, morokinyabe. Tonda, sikce, ‘Nun bona weik tonun doprobibirye, bona talin nang unamab’ tenenyak nang ara, Allah Yahweh ati, ‘Allah ara, nun lik,’ tenebikirye, batakanyake. Tonda, yuk nang nirya ati, ‘Malye kipdeipnamap’ tenen, pia sunyake.
Bukni, sikda sik ni birye, pil teleb kibuka dolamukce, diksukumuk ulamuk touk kum ulamdik. Yuk nang arye, “Malye winibibye ning ara, wenena kum diparyuk, namin kipsurumunyopura, dengna arepnusiyabe,” nyabuka morolamik. Winilamikba, Yoel ap, Abia ap arye, kekelamdikce, yo bok dololamdika deice arye, amalye un nang kum wenelamdik. Tonda, tilila yupu nyana ap, tenepce arye, duknuna yupu nyana ap, yupu kekelamdikce, dekna ning duknubuka dololamdikce, Israel ninye ati, teleb kibuka kum talilamdik. Tilila ninguk talibuka ulamdik.
Nunce nun mal olan nang akunum olanmabu talak ara, sikce batakmek bona, aning-aning nirya ara, ninye deiyok nang nong deice ongolamak cang jaket ap, tonda kain sarong cang ning atouk, urasin teleb ning tonok eipse. Aning ara, mutuku si Babilon, tonda Sinear nyanyak mutukunye birye, wiamuk ning ara, ubula dopropse. Tonda, aning ara dekna weik ning, perak ton, nukuka ikin ara, bitinye kilo gram eipsirye, dopropse. Tonda, dekna weik ning, emas ton, el ikin ara, tonok kilo gram bukni, noutamuk wilibuka deiamik ning, aning ton aupmokba, eipsirye, ubula dopropse. Aeipse ning nirya ati, na patapnukura, na ton dopropse. Aning nirya ara, dopropsirye, na cang baju arye pakubuka deipse ara, na tenda aik pum tam bukni, tuku palibukapsirye, atuku pum tam dongopse. Ara, na tenda aik pum tam tuku pum tam uk dungnubuka deipsirye, siknipdongopse. Akunuma kat weik ning emas ara, alip tam deipse bukni, perak ap, emas ap ara amu tamak moubuka deipseba, atuba ubuke. Akan birye, Yosua biti laka nyabuk.
Narye anggunti, “Winipnamlume, aning ara, kum wininamlume,” nyapdeipmasin yupu, mem yupu nirya ara, moubuka talipmunce, unamlume. Tonoknye babye, kum bataknamlume. Tonda, yuk talye ning nirya ati, ‘Nun ni koprobaʼ tenen, si kum erenamlume. Atonun, yuk ninye arye, sik si erenyak ning si nirya ara, sik si ton, pia kum sinamlume. ‘Aning arye melipsitingʼ tenen, kum yukunamlume. Na Allah Yahweh arye nyapsine.
Anyapmakin yupu ara, talye ati kume. El deiyok ara, yata ninye do nirya, ‘Se, bona weik talinanye utibye’ tenen, yo bok do, dengna weik ning do, weik arye patalyopura, adeice arye malye winin ning yala weik wininamake. Anyapmakin touk, ton nang ara, ‘Yo bok weik doproptibye’ tenen, patabuk deice arye, Allah dib tenelamak ning batakuka, talye yuk bisik balamakbuk, aminyan ara, weik kanye imun ning ap, ikin ning weik ap, kanye bokoltona ap, weik ulule. Sik ikin ulilalamik. Na Paulus arye nyapmakine.
Nyabukopura, awekuka kekenmek nang nirya ati ayupu nyabuk. “Anggun nirya, anggunce anggunti, ilil una ap, anun una ap, upsilya ati, kanye talima kalekuka dildanamlulume. Ninye kam una ap, ninye teleb una ati, mambul ning ap ara, aning-aning bona talinanye kina deice arye teleb kum updeipsute.” Yesus arye nyabuk.
Aning atonun ton, kil tonok ap, sal ap epdadicak arye, mapmarice buk, anye el lin bisik arye, lin lapmarice bisik, aning balyopura, sik amsunak saklyopura, kil babye, sal babye teleb kibuka mek kekenamake. Aning winipmalye ning ati, mek kekenmarice buk, keting kumulbinamle. Deiyok ara, aning sik nong bol pipmalye, atalak arye dipdongobuka, keting noutam talak nirya aupmalya ani, keting kumulbalye talak ara, Allah el kanye ara, ‘Anang ara, akunum malye kipdeipdanmaraka ati, na dam ton kum yanganamdake,’ tenenamle. Bukni, keting kumul balyeura, Allah el kanye ara, ‘Winida, tuba tonap tamubuka, akunum teleb kipmarake,’ tenelule.