Biblia Todo Logo
Bib sou entènèt

- Piblisite -




Efesus 5:11 - Eipomek

11 Malye yo arye, malye yo duk moulamle atonun, sik malye wininyak ninye, sik talima kunukna deice arye, nong kum upnamle ning, malye ninguk wininyake. Sik wininyak ning nirya ati ara, pia memepdopmunce, aning kum wininamlulume. Talye kanye bobuka, aninye ap, ansinibuka una kum bukni, sik malye wininyak ning ati, laka deice arye, yupu nyapmunce, batakanamlulume. Ara, yuk nang nirya ara, moubuka kel kiptingce, ‘Amalye winin ning bataknamak’ tenen, anggunce, “Kume, sik malye winin ninye ara, kunuknak atonun malye wininyak ning ara ani-ani,” nyabuka, laka arye, laka nyapmunce, yupu sekelongonamlulume.

Gade chapit la Kopi




Efesus 5:11
48 Referans Kwoze  

Wini talak ara domon yupu ton nyapnusine. Ara, lukunyan inipmalye talak, ninye mapmaca bereklamle touk, akunum unmala ati, kunukna noutam arye malye-malye winilamikce ning nirya ara, batakibirye, dirin ninguk talibuka diksukumuk winipribapya deice arye, ting ongolamak touk kibuka ubirye, pia kaliknauk unamabe.


Allah dib tenen ninye, sik deiyok nang kan-kan arye, dipkoprop tuba malye winibikcopura, anang ati yuk ninye nirya lak kekenmacak arye, malinye nyanamlulume. Wininamluma deiyok ara, sik yuk deiyok nang kekebikirye, ‘Se, nun babye, talye arye malye winibibyak’ tenen, ‘Moubuka dilanamabe, tenepnamak’ tenen, wininamlulume.


Ara nun kayapu, anggunda nun du weit atonun nang ululume. Nun Deiyoknye Yesus Kristus, el si deice arye, ayupu nyapdeipnusiyabe. Ara, yatanye do nirya, dib tenenyak bukni, dipkoprop pil talibuka dona kum bukni, talye-talye wininyakce, nunce peterelamsupu atonun winina kum bukni, yuk winibikirye, malye winikcopura, anang ap, neika kum unamlulume. Lokaren akuk unamlulume.


Amapo, winira yuk yupu ton nyapnusine. Ura, nunce Yesus el dipkoprop yupu peterepsupuba, kel kiluluma atonun ning kum bukni, yuk nang sik malye winilamaka deice arye, adipkoprop yupu yanibikirye, anggun Roma mutuku diba tenelulum ninye noutamak ara, talima wililanauk usinyake. Sikce malye updeipsikiba, Yesus el diksukum bisik teleb ubuka kum bitume. Winibuka unyak nang ati, moubuka kel kipmunce, memelonamlulume. Sik ap neika una meme.


Kekepsopura, im deice tam arye ayupu ton nyabukba, kekepse. “Na Allah arye nyapsine. Babel mutuku noutamak tuba ululum bukni, nati diba tenenululum ninye ara, adiparyuk amutuku batakuka yukak bindoplulume. Ara talye ati kume. Amutuku batakuka yukak kum biminyopura, amutuku ninye arye, malye unyak ning ara bikmunce, anggun babye atonun winipmunyopura, Allah arye amutuku ninye sik wenena ati, weik kanye imun ning, sik nong deice dopkwetepnul ning ara, ‘Anggun ton tabakuka opsilyak’ tenen, nyapsine. Ati, na Allah ati diba tenenululum kili sal ara, ‘Babel mutuku ninye arye malye weik wininyak ning, anggun babye winipmunba, narye Babel mutuku kili sal sik wenena ati sik nong deice kanye imun ning weik deipnun ning, anggun nong deice babye deipsinirye opsinyak’ tenen, adiparyuk Babel mutuku batakmunce, memebuka moupdopnamlulume.


Winipsuka ati ara, arup akunum nyapmakin yupu nirya ara, yuk ninye nirya ati, pia moubuka peterenalyame. Ninye kanye barina ap, malye winin ning lipsisikuka peterena ap, Allah arye pil deiyok ning aribkuka deice arye, mikip arye pil donalyame. Yuk nang arye, ‘Titus bira, talinye ulule’ tenen, kum kekebikirye, sik amutamuk kipkicopura, ance, ‘Se, yupu tonap kum nyapnamne’ tenen, anyapmakice ning ati, kekebuka batakana meme. Winipkiki bukni, aninye nirya ati, ‘Ayupu bataklulume,’ nyabuka, wenenamlyame. Aning yan yanibuka peterenamlyame. Na Paulus arye sekeibkine.


Yatanye birye do, nunce asurat noutamak sekeipmap yupu kum kekeplirye, batakuka yaniplyopura, anye biti moubuka tenenamlulume. El ap, neika una kume. Leipropnamlulume. Ura, winipmunyopura, elce, ‘Se, na malye wininmanabuk, wininmaniake’ tenen, ‘Alye upnamle’ tenen, nyapmasiabe.


Atalak winilamlum ning nirya ara, ila tuba tonap teneipdelulume. Amalye winin ning aning-aning nirya winilamluma deice arye, anggun kanye talima ap, anggun winin ning nirya ap, teleb kililamsuk do, kum do? Wini talak ara, anggun minop winilamlum ning tenepmunyopura, alye dakalalulume. Aning nirya talibuka winipra balamibya ani, sirya talak dibibyopura, Allah ap neika kum uptibye. Malye ninguk pia talibuka winipmunyopura, dipkoprop dipnamlume. Malye ninguk talibuka wininyak ninye ara, sirya talak, Allah ap neika kum unamake. Sik yuk-yuk unamake.


Ara, yuk ninye arye kanye deibuka, “Peterepsilyame,” nyanyak talak babye, lik uplibuk, “Peterena nun lik,” nyanyak talak babye, anda, ‘Yata tenepnuniak do?’ tenena kum arye, ‘Allah yupu peterepnaman’ tenen, kintinilinauk unamlame. Malye upmakce talak ara, ance, “Aning bataklulume, teleb una ara, ani,” nyabuka lipsisikuka peterenamlyame. Tuba malye unyak ninye ati, “Aning ara, meme. Bataklulume,” nyabuka, yupu sekenamlyame. Teleb akunum wininyak nang ati, “E, aning ara, telebe, aning ara, pia atonun wininamlulume,” nyabuka, sik kanye moulinamlyame. Anyapmakin pil donamlam talak nirya noutam arye, pia moubuka tenepmince, Allah el yupu nyasilye touk, teleb ubuka peterenamlyame. Tonda, aninye nirya ati, minopce wana ap, lik una ap kum bukni, nimalye aryuk peterenamlyame.


Allah el si erena ap, elti, kina ap, ati ara, talye nong bol deice ninguk unamak bukni, sik kanye noutamak ara, ‘Allah el yupu ap, el winilul ning ap, atonun winiptibya babye, anirya deice arye, el mikip weksuturye, mikip kum keipsutue’ tenen, wininamake. ‘Allah el mikip ara, kum ulula anya arye, aning nirya ara, nong kum upnamle ninguk,’ tenebuka wininamake. Sirya talak unamak ninye arye, anyapmasuk touk winipnamaka anya arye, Timotius anda, anang atonun nang ap, neika una kume. Leibuka yuk akuk unamlame. Na Paulus arye nyapkine.


Anyapmasin yupu ara ani. Yatanye do nirya, el kanye talima noutam malye winilye ninguk tenebuka, pil dopnin balamlyopura, aminyan talak Allah arye anye biti, weneplirye, oplopnamle. El talima noutam ara, malye ninguk ulamliba, malye unauk winilamlye deice arye, aminyan talak babye, wenen ninguk dopropnamle. Bukni, yatanye do nirya, ‘Allah El Dib Kanye arye kanye deipnamnil’ tenen, Allah El Dib Kanye arye nyalul yupu uk kekebuka, pil dopnin balamlinye bira, aminyan talak ara, kam una deiyok ning doproplirye, pia kam unamle. Ara, Allah El Dib Kanye arye, kam pia un ning arepliba, pia kam unamle.


Yatanye do, malye uplye talak ara, ninye deiyok nang arye, “An malye unmalam ning ara, bataklyame, winina meme,” nyabuka wenenyak bukni, el mandipna kanye uplirye, ‘Kume, sik deiyok nang arye nyaninyak yupu ara, pia kum kekenamne’ tenen, sik yupu yaniltalulnye bira, aminyan ara Allah arye elti, tonok talak aryuk wenepliba, kum upra deipnamle. Akunum weneplirye, kum kipdeiplyopura, anye bira, yata wiribuka lipsisikuka deiptingba, tamubuka teleb uptu do? Ara, pia kum winipmanto.


Yata ninye do nirya, yuk pia weik kel bikamikce nang arye, sikti, “Teleb wininmalum ning ara ani, malye unmalum ning ara ani,” nyabuka, lipsisikuka nyan yupu ap, wenen yupu ap nyabikiba, ayupu kekena kumce, ‘Kume, lipsisikuka nyana yupu ap, wenen yupu ap ara, nun like,’ tenebikirye, batakanyak ninye ara, aminyan talak, sik dam anyuk ikin ning weik yanganamle. Ato wininyak ninye ara, sik talinyak ning nirya, kum upra banmalya ani, aminyan talak ara talye bona utotoa talina kum ninye uk unamake. Yuk ninye nirya arye, anggunti, “Kume aninye ara, malyeuk winilamika ati, anang ara dauplye,” nyabuka, yep-yep abikirye, anggunti bataknamsiake. Bukni, yata ninye do nirya, wenen yupu ap, lipsisikuka peteren yupu ap ati, ‘Kume ayupu ara, nun dam peterenamsulume,’ nyabuka pia weik kel bikna ning pataliba wininyak ninye ara, telebuk upra banamake. Yuk ninye eibikirye, “Aninye ara telebuk unyake,” nyabuka kanye delinamsiake.


“Tonda yata nang do nirya, anggun kwit capu nang ati, anggun kanye talima pum tam ara, ‘Anang ara na like,’ tenen, yu kanye bolana meme. Tonda, anggun kwit capu nang arye, malye winibicopura, adiparyuk “Aning ara, meme, bataklyame,” nyanamlulume. ‘Dauplye’ tenena meme. Kumopura, sik talye lukparabuka, malye winipmakca deice arye, anggun eipmamun bukni, kum wenepmunyopura, ‘Anggun babye, malye winipmunyak’ tenen ati, nyapne. Malye winin ning ati, ‘Aning ara meme,’ nyabuka, lakak aryuk laka nyalanamlulume. Winipmunyopura, malye kum upnamsile,” na Allah Yahweh arye nyapsine.


Sik malamak ninye ara, lukunyan talakuk malamake. Tonda, yu weik mek, kanye wangalamak mek dibikceura, kanye wangaplibuk malye wininyak ninye ara, lukunyan talak noutamak aryuk wininyake.


Ara, aninye kekelamik bukni, amutuku pemerintah weik ninye deiyoknye Herodes, el malye winibuk ning ati, Yohanes arye wenebukba, Herodes arye nyapdeibukura, Yohanes tapu koubukabikce, wenena aik dongobik. Yohanes arye Herodes wenebuk ning ara deiyok ara ani. Ara Herodes el weit koprop kil Herodias, ubula dalubuka doprobukce, doprobuk ning ap, ton malye ning pia weik ulamuk ning ap ati, Yohanes arye Herodes ati wenebuk.


Ati, amalye wininyak ninye atonun ninye nirya ap, anggun ap, ansinibuka una meme. Sikce malye wininyak ning yala-yala nirya ara, anggun Yesus ati dib tenelulum ninye arye, pia kum wininamlulume.


Ara, anggunda peterelamsikba, kel bikamlum ning ara, tuba tamubuka tonap nyapnusine. Ara, anggun minop talak dib kum tenyamlum talak ara, anggun kanye talima noutamak malye ning patalamsuka deice arye, anggun winin ning nirya malye kililalalume. Pia malye anya arye, “Pubundanalamle baju kwiribuka bataklamak touk, anggunce minop talak malye winin ning min arye winilamlum ning ara, aning nirya bataklulume,” nyabuka peterelamsike. Malye winin ning patana deice arye, teleb tenen ning ara, kum kipnin balamlya ani, sirya dakalule. Winiplyopura, teleb kibuka kum teneptibye.


Tonda, ninye yupu lipsisikuka bokolin ati bulubikce talak ara, deiyok kum upmalibuk, sikce yuk nang ati, ‘Sikda malye winipmake,’ nyabuka, lululanyak nang, tonda, malye winipmak nang ati, ‘Sikda teleb winipmake,’ talye nyanyak nang ap ara, Allah arye, anang wenepnamle. Tonda, sik mutuku wekelbana ati, bisik bublan dam bulubikirye, ninye yupu lipsisikuka bokolin ati, pil teleb kibuka kum donyak deiyok nang ati, ‘Aning opnuyabe’ tenen, malye yupu tanyaka deiyok nang ap, Allah arye, sikti, kum kipdeipnamle. Tonda, malye kum winipmacebuk, ‘Sik anang arye morobikce yupu ara, pia kum kekenamabe,’ nyabuka, yanibikirye, lululanyak nang babye, Allah arye, anang ati wenebuka, kum kipdeipnamle. Aminyan talak ara, Allah arye malye wininyak nang nirya ara, obuka sirya daklyeba, kum danamake.


Ninye deiyok nang arye nyanyak yupu kekepmantonye, mangkau arye malye uplyopura, weik kel nang arye, “Malye unmalam ning ara, ani. Teleb uk unamlam ning ara, ani,” nyabuka wenebicopura, ayupu kekepmantonye bira, kekeplirye teleb unamle. Winina ara, pia teleb uka. Aning atonun, weik kel nang arye, dekna weik ning emas dobuka, amul dongona ning memebicopura, urasin pia teleb ulule.


Allah Ance, “Aning ara wininamlume. Aning ara, pia kum wininamlume,” nyapdeiamsulum yupu, pia moubuka talilulnye birye nati, “Anda malye winipmalame,” nyabuka, wenepnutua babye, aning ara teleb uka. Ara, elce bico tenenulula ati, anyanulul yupu ara, teleb uka. Atonun, Allah ance, “Aning ara, wininamlume. Aning ara, pia kum wininamlume,” nyasilyam yupu, pia batakna kumce, tuba talibuka winilulnye birye nati, “Wininmanilama ara, bataknulyame. Aning ara, kum wininamlame,” nyabuka, wenepnutua babye, aning ara, pia telebe. Tonda, sik malye winin ninguk talibuka wininyak nang arye, nati, “E anye bira, nun kwit koproba ulula ati, elti, si erenamabe,” nyabuka, ‘Sikce aning nyapnikcak’ tenen, ‘Na lik,’ tenenuna ati, na ilil unmanile. Deiyok ara ani. Ara, sik anang arye, pia malye-malyeuk wininyaka ati, narye an Allah ati, “Anang ara, wenebuka opminyakarye, sik malye wininyak ning nirya ara, kum kipdeipnalyame,” nyabuka, tuba morokunune.


Nyabukce, Sarahak ayupu nyabuk. “An du koproba ati ara, dekna weik ning, el si ara perak, 11.5 kilo urdem arepne. Adekna weik ning bobuka deipman ara, talye ati kume. Ara, narye anti, mangkau kanye bobuka, malye winipkise ning ati, arepmakine. Ati, an ap, neika ulalum ninye nirya ap arye aning eipmake. Ati ara, yuk ninye nirya arye, ‘Akil malye winibuke,’ kum nyapnamkiyake. Adeice arye akunum teleb kipdeipkine,” Abimelek birye, Sarah ati nyabuk.


Ninye ton kwalina uk ulirye, yep-yep ana ap, ngilik-ngilik ana ap, weik nyalulnye bira, obuka wenepnamlulume. Winipminyopura, yuk nang, sik walwal atonun unyak ninye eibikirye, kanye moubuka tenebikca deice arye, kel kipnamake. Bukni, teleb ubuka ululnye ati ara, malye uplye talak ara, wenebuka ona kum diparyuk, yupu uk lipsisikuka peterepmunyeba, elce ayupu moubuka kekeplirye, dobolbanamla deice arye, weik kel bikna ning, tonap tabakuka kel kiplirye, telebuk unamle.


Ninye ton, yuk nang ap, Allah el yupu ap ati, ‘Na like,’ tenebuka, malye yupu nyalulnye bira, yuk kel nang arye elti, “Winina kume,” nyabuka lipsisikna yupu nyanmace talak ara, anye birye, sik kel nang ati, kanye yu ulule. Aning atonun, yatanye do nirya, yuk ninye ati, talye yep-yep aplirye, malye kilulnye birye, yuk kel bikamikce nang ati, “Anggun ton melibuka peterepnululume,” nyabuka, pia kum moropnamle. Kume, sik bidamang kanye ereldanyak nang arye, sik bidamnye ati, ‘Nunda kele weik nang akunum unyap,’ tenenyake. Pia kwalina uk unyak ninye anya arye, sik bidamang kanye noutamak tenenyak ninguk, talibuka unamake. Tonda, ‘Yuk nang arye nyanyak yupu nirya ara, nun like,’ tenenyake.


Yesus arye nyabuk. “Dib tenenyak ninye, anggun ap neika ululum nang arye, anggunti malye winipsicopura, yuk nang ap kume, anggunce sik malye winipmasice nang damak bimunce, ‘Kao malye winipmanulum ning ara, anye,’ nyabuka, malye winipmasice ning ati, laka nyalbinamlulume. Malye kipdeipmasilinye kekepsilirye, ‘Telebe,’ nyapsilyopura, kanye deipdamunce, neika ansinibuka unamlulume.


Nara, ninye yuk nang bulubuka wekmakirye, kanye deibuka, pia teleb-teleb yupu nyanmacak ara, na kum unune. Anda, weik mambul yupu nyapnulumce, mambul pil arepnuluma deice, na ikin kanye bobuka unune. Talye kanye bobuka unyak ninye ap, sik ap kum unune. An taruk arye, na deice deipnulumba, mambul kanye bobuka, na yuk uk unune. Ara, sik amutuku ninye arye, malye winin ning weik wininyaka ati, na babye, ‘Se, sik Israel ninye ara, malyeuk wininyake,’ tenen, mambul kanye bobuka unune.


Aning ati ara, anggunce winilamluma dekna ara ikin ning dopropnamlume. Tonda anggunce, ‘Winibuka malye wininamabe,’ tenepce arye, ‘Malye winin ninguk talibuka unamabe’ tenen, malye piluk dolamluma deice arye, dekna dopropnamlume. Aning deiyok ara, talye ati kume. Anggun bidamnye arye, anggun bidamnye ati, malye winililalulume.


Wininyak deice arye, kanye deibuka teleb ubuka neiktoto una pia kum arye, malye teneldana ap, waldana ap, oldana ap, wininyake. Awininyak ninye ara, sik kanye talima pia malye ubuka anya arye, dipkoprop moubuka kum teneptinge. Allah el dipkoprop yupu batakuka yaninyaka ati ara, wini talak ara, teleb ning kum teneptinge. Deiyok ara, sikce. Tonda, anang sik malye tenenyaka ara, ‘Allah yupu dobuka yuk nang ati peterebibyopura, aminyan ara, yuk nang arye yo bok arepsikce deice arye bona weik talin nang mapu unamabe,’ tenenyake.


Se, na mio, malye un ninguk talibuka unyak nang arye, ‘Ami el kanye talima arukdeibiba, malye unamle’ tenen, an dam yanuka yukupdopkicopura, sik yupu pia kum kekenamlyame.


Yatanye do nirya, sik ninye deiyok nang arye, “Aning ara wininamlulume, aning ara kum wininamlulume,” nyalice yupu ati, ‘Ayupu ara nun like’ tenen, yaniltalamak nang ara, winilamice deice arye, dipkoprob pia malye winin nang ati erenyake. Ara, talye ati kume. Ninye neika teleb ubuka una ati, “Wininamlulume, aning ara ton pia unamlume,” nyabuka delinyak yupu ati, yaniltana uk unyak ninye ara, pia malye ninguk, talibuka unyak nang arye, wininyaka ati nyapne. Bukni yata ninye do nirya, ninye neika teleb ubuka una ati, “Wininamlulume, aning ara ton wininamlume,” nyabuka delinyak yupu ati kekebikirye, ayupu uk talibuka diksukumuk unyak ninye ara, wininyaka deice arye, wenena yupu yaniltana uk unyak nang ap, malye ning talibuka unyak nang ap ati, yupu sekenyake.


Narye aning ati dopkwetepnamkin deiyok ara, ‘Sik asing laipnalama’ tenen, dopdeipnamkine. Tonda, ‘Sik kanye talima yuk punubiceura, sik kanye talima kuna atonun unyaka ati, dirinak tamubuka dobuka, delilyanganalam’ tenen, dopkwetepnamkine. Tonda, Isa Mutuku Dongonye, el mikip arye talibukak arye tamubuka, ‘Allah el mikip arye talipnamle ati dobuka, delilyanganalama’ tenen, dopkwetepnamkine. Ara, yata deiyok ati kume. Ance anang ati aning nirya akunum winipminyeura, nati diba tenebikca deice arye, sik talima ak malye tenenyak ning ap, sik malye unyak ning ap, Allah arye meliplirye, aning kum kipdeipnamle. Tonda, na Yesus ati diba tenepnika deice arye, Allah arye akunum wipdeiamuk ninye ap, ansinibuka unamake. Allah arye aning ati winipnamle. Yesus arye na Paulus ati nyapnuke, Paulus arye nyabuk.


Sikti, yupu sekenamluma deiyok ara, ani. Ara, sik pia malye winikirye, Allah yaninyak ninye arye, yuk nang kum elinyak ak, dungnubuka wininyak ning ara, pia malye anya arye, nun teleb nang arye, yupu deiceuk laka nyabibyopura, alye upsute.


Tonda, weik arye kanye pia deibuka, pin-pin asa arye, nun ni Allah ati, ‘Teleb, nyanamak’ tenen, Allah morosinyame. Nun ni Allah ati, tuba-tuba, ‘Telebe,’ nyanamlulume. Nyanamluma deiyok ara, ani. Ara, Allah arye, ‘Na mapu nirya akunum teleb kipdeipnirye, im deice dekna weik ning arenamne’ tenen, kintiniamsuk ning ara, ‘Sik Kolose ninye im deice ukirye, sik babye teleb ning dopropnamak’ tenen, akunum teleb kipdeipsuke. ‘Im deice dekna ning dopropnamak’ tenen, teleb keipdeipsuka ati, nun ni Allah ati, ‘Telebe’ nyabuka, weik arye kanye delinamlulume. Nun ni Allah arye, aning-aning nirya talilirye, im deice weik dirina noutamak pia unamlak ara, nun ap, anggun ap, dib tenen ninye nirya ap, neika unamabe. Anggun Kolose ninye ap, ‘Im deice unamlum’ tenen, Allah arye akunum teleb kipdeipsuke.


Tonda, ‘Aninye ara, Allah el piluk donamak’ tenen, ‘Sik nong deice na taruk deibuka, Allah moropnirye dopkwetepnamne’ tenen, minopce kum winipnalyame. Ara, talye ati kume. Deiyok ara, anang arye malye winibikce babye, moubuka tenena kum arye, minopce an taruk sik nong deice deibuka, Allah moropminyak arye, minopce dopkwetepminya deice arye, an babye, malye upminyak tenen ati, nyapkine. Yuk nang malye winin ning ara, an ap, neiktoto malye winina kume. Anda malye winina pia kum diparyuk, diksukumuk unamlyame.


Swiv nou:

Piblisite


Piblisite