Allah arye nunti, dalubuka opsutu bukni, nun opsutu ning nirya ara, Yesus Kristus arye dobuka, el nong deice deipdayukce, wanwanun yo deice delil bisukce dibuk. Nun malye un ning ati dipsuk ning ara, talye ati kume. Ara, sik yupa ninye malye un ning kum teneptingce, kum pataptu touk, nun babye, malye ning patana ap, malye winina ap, pia kum arye, ‘Diksukumuk unamak’ tenen, dibukce lyepsuke. Sikce Yesus ati obikak, dibuk deice arye, nunti akunum teleb ubuka deipsuke.
Efesus 1:7 - Eipomek7 El mi Yesus, el ining biyuk deice aryuk, nun malye wininyap ning nirya namin kipsukce, kum kipdeipsuke. Nun malye winina ati oplopsutu bukni, nun pununa ati dibuksuka deice arye lyepsuke. Nun malye ning tapu kouamsuka noutamak arye, lobuka deksukce, lyepsuke. Winipsuk ning ara, mitik tonun kume. Allah el bico tenesilye ning ap, el kanye aniryuk talye arisilye ning ap, weik arye aulye touk, weik arye areamsuke. Ara, nun malye ning ara, nukmanto kum wamsuk bukni, aning nirya kum kipdeipsukce lyepsuke. Gade chapit la |
Efesus 1:7
67 Referans Kwoze
Aninguk kum bukni, Musa sekamuk yupu, mem yupu noutamak nyasilye touk, aning-aning nirya, teleb ulina ati, ining luptingca dobukapnarye, donoklamik. Aning atonun, ninye arye malye wininyak ning deibuka, mangkau kina ning ati ara, ining kwebuka luptingca dobukapnarye, donoklamik deice aniryuk teleb winilamik. Yuk talye ning deice arye pia kume.
“Anggur mek arepnusina ara, na ining atonun ulula ati, dobuka diplulume. Aminyan na ining atonun nyapmasina ara, lak nyapnusine. Ara, Allah min arye nyalilamsuk touk, ‘Ninye weik arye lyepnirye talinamne,’ tenelamuk touk, dipkoprop na opnikceba, na ining saknamle. Na ining saknamla ara, talya ati kume. Ara na ining deice, ninye mutuku-mutuku nirya, sik malye winilamikce ning ap, malye tenelamikce ning ap ati, kum daneipniba, Allah arye sik malye ning namin kiplirye, na ining deice arye ninye weike lyeplirye, sik kanye talima pia talinamle,” Yesus arye nyabuk.
Sik 24 wisi deiyok nang arye, Domba Mi Atonye el si erena ati, winiryuk mot senmekba, kekepse. Sikce mot nyanmek yupu ara, ani. “Anda pia diksukumuk uminya deice arye, an tonok arye asekna mambul ning dobuka, taplaklamak yo pea atonun ning daklobuka, abuku yokeipsutume. Deiyok ara, sik opkikba, an ining biyuka deice arye, ninye ayala-ayala kan-kan nirya arye, ‘Allah el na tenen ninye unamak’ tenen, ninye weika arye deklume. Akunum dekuka lyeplum ninye ara, im sirya, mutuku sirya nirya ap, ninye ayala-ayala nirya ap, ayupu-ayupu nirya ap, weik mutuku nang (negara-negara) nirya ap, noutamak arye ninye weik dekuka lyepluma ati, ancuk abuku yokeipsutume.
Sik kamto nang ara, narye bico tenesununa ati, na mapu atonun ululume. Anggun malye tenelulum ning ap, malye winilamlum ning ap, Yesus Kristus el si deice, Allah arye, ‘Sik malye winilamik bukni, aning tonok minopce kum opnune’ tenen, batakdongobukce, talye kanye bobuke. Winibukce, anggun malye winilamlum ning nirya ara, akunum namin kipsukce, anggun malye ning ara, kum ubuka deibuke. Ati ara, ayupu seksene.
Ara, Allah arye, Kristus ap, kanye talima dukdongobuka kam bukeipsukce, im deice tam bukeipsuka deiyok ara, ani. Ara, Allah arye, utenyamuk. ‘Aninye lyepnirye, kam bukeibuka im deice deipnyopura, atalak arye, diprongobuka, aminyan doyanamle talak, sirya talak unamak ninye nirya, kel biknikirye, nyanamniyake.’ “Kume, nun lyena ati, Allah arye bico tenepsilirye, el kanye aryuk talye arisilye ning ara, nukmanto kume. Pia weik arye, talima aresulule. Kristus arepsukura, elce pil dobuka, lyepsuka deice arye, akunum laka kipsuka ati, aning akunum bikmabe,” nyabuka, ‘Na si erepnamniyak’ tenen, Allah arye, aning nirya pil dopsukce, lyepsuke.
Allah el kanye aryuk, ‘Aninye ara, Yesus Kristus ap, kanye talima dukdongobuka neika unamake’ tenen, el mapu kipdeipsuke. Yesus Kristus nun kanye noutam pil dosilya deice aryuk, Allah el weik kele arye, pil teleb kibuka dosilye ning ara, moubuka bikinyabe. Kristus elcuk nun malye winin ning kilipsilirye, diksukum un ninye kilisulule. Allah ap, ansinilisulule. Kristus el pil dopsuka deice aryuk, nun malye winin ning kilibuka pununa ato ning punupsukce, nun malye winilamubu noutamak arye, lobuka lyepsukce, Allah el mapu kilisulule.
Se, sik Israel ninye nirya babye, Allah el damuk yanganamlume. ‘Nun ni Allah Yahweh arye, dan talak yanuka melibuka lyepropnamsilam do?’ tenen, anggun ni koprop Allah Yahweh ati, pia moubuka dinauk unamlulume. Winilamunyeura, Allah arye bico tenepsilirye, tuba-tuba melibuka lyelonamsile. Allah arye nun tukwak ninye nirya ati, pia bico tenesulule anya arye, pia kum bataknamsile. Allah arye, ‘Na tenena ninye ati, melibuka lyelonamne’ tenen, tuba-tuba kintinilisulule. Tonda, Allah elda pia mikip weiknye ulula ati, pia ikin ning noutamak utibya babye, melibuka lyesulule. Elda ikin kum uptue.
Aning ara talye ati kum nyapsine. Deiyok ara ani. Nun Deiyoknye Yesus arye nun nirya ati, bico tenelamsukce, weik arye melyamsuk touk, ‘Nun babye atonun wininamap’ tenen, nyapsine. Ara, anggun kele, nun Deiyoknye Yesus, el kanye aniryuk bico tenenyamsukce, melipsuka deice arye, teleb kipdeipsuke. Elda im deice pia weik sisinanye ulamuk bukni, nun melina ati ara, talye bona utotowa talina kum nang atonun dayukce, tukwak mutuku yayuk. Winibuka ulamuk ning ababye, deiyok aupmale. Ara, el talye bona utotoa talina kum nang atonun dayukce, pil dopsuka deice arye, ‘Sik tukwak ninye ara, bona utotowa talina kum ninye atonun unyak bukni, narye aninye lyepnyopura, sikda bona weik talilamak ninye atonun unamake,’ tenebuka wipsuke.
Ura, Allah arye anggun nirya ati, ‘Se, sik malye winin ning bataknamak do?’ tenen, bico tenesilirye, adiparyuk minopce wenebuka kum osulule. Aning kum bukni, tia talak atibuk namin kisilya deiyok ara nyapnusine. Ara, Allah arye nun tukwak unyap ninye nirya ati, ‘Se, na namin asa arye teleb ubuka melipsiniba, lo tuba awaplyopura, adeice arye sik malye wininyak ning moubuka tenebikirye batakikcopura, tamubuka na tam kipropnamak do?’ tenen, kalikuka disulule. Winisulul bukni, anggun dan do? Aning, moubuka kum tenelulumce, ‘Talya luparabuka malye winin ninguk talibuka wininamap’ tenen, ululum do? Anggunce, aning tenelulum do? ‘Allah bico tenesilirye, adiparyuk wenebuka kum osulul ning ara, elce, ‘Lo arepniba, sik malye winin ning bataknamak’ tenen, patalyeba namin kisilya ara, mambul kum ati, dauplye,’ tenemunce malye tuba winilulum do?
Nabi Mika birye, Allah ati nyabuk. Se, na ni Allah. An uminye Allah atonun, ton pia kum ulule. An tonok ulyame. Ati, Allah Yahweh ance wipdeiamsulum ninye, mitik anun sirya tuba aunmab ninye ara, nun malye wininyap ning nirya, namin kipsimince, lyepsilyame. Anda ninye tukwak nang ati, pia ton kum deresilyame. Nun malye wininyap ning dekna ati, adiparyuk wenebuka opsutum bukni, aning kum winimince, nunti tamubuka bico tenesimince, melibuka lyesilyame. Ance ninye ati, weik arye bico tenesilyame. Ance nun tukwak ninye ati, kanye delisilyame. Winibuka ulyamnye ati, moropkine.
Nun malye tenenyap ning ap, malye wininyap ning ap, kum ubuka delina ati, akunum deksukce, lyebuka deipsuke. Allah arye nun malye unyap ning ati wenebuka opsutu bukni, ‘Sik opnyak’ tenen, nun pununa ati, Allah tenyamuk tok, sik malye nang arye, Yesus obikbuk, el ining binmoka deice arye, nun malye winin ning nirya kilibuka, kum danalisulula ak, Allah arye namin kilisulule. Ara nun malye wininyap ninguk kume. Ninye mutuk sirya im sirya nirya sik malye wininyak ning babye kiliplirye, lyelule.
Nun Lyena Deiyoknye Yesus arye, nun lyena ati, el mining nonguk arepsukce, nun pununa ati dipsuke. Malye winin ning noutam akuk ulamupa ati ara, nun wenena ati talye luparabuka oplopsutu bukni, ‘Akili sal ara, deknamne,’ tenelamukce, nun pununa ati, tukwak mutuku yanuka dibuk. Winibuka deksuka deiyok ara, ‘Ninye tukwak kili sal, sik malye un ning nirya kilipnirye, dekuka lopdeipniba, ‘Na’ tenen, ninye pia teleb una ninye unamake. Winibikirye, teleb winin ninguk talibuka, kanye deibuka diksukumuk unamak’ tenen, el nong deice arye deksukce, lyepsuke.
Nyabikura, Peterus arye tamubuka nyabuk. “Anggun nirya ara, anggun malye winilulum ning ap, kanye malye tenelulum ning ap, ‘Allah arye namin kipsilirye, kum daneipnamsil’ tenen, anggun malye ning nirya batakmunyak arye, donga tamubuka, Allah el tam kipropmunyeura, nunda Yesus el si deice aryuk mek dongopnamsiape. Winibibyeura, Allah arye nun bico ati, talye arisulul Dib Kanye ara, arepsilyeura, dopropnalume.
Na unye touk, anggun babye, wininamlume. Na babye Ninye Mi Koprop Atonunye birye, na bidamnye ati patapnilye ning, ‘Ninye nirya melinamniyak’ tenen, kum yase. Narye tukwak ninye nirya, sik patalye ning ati, ‘Melinamne’ tenen, yase. Na unye touk, anggun na mapu babye atonun unamlulume. Nara, ninye nirya sik kanye arye, malye tenelamikce ning ap, malye winilamikce ning ap ati, ‘Allah arye sik wenebuka oplyak’ tenen, na opnikibuk dipnamne deice arye sekdongopnamne. Winipnyopura, ara ninye kisok arena atonun winipnamne. Allah arye tukwak ninye nirya wenebuka optu bukni, sik yok pununa ati, na dipnamne.” Yesus arye nyabuk.
Winibiba, nun ni Allah, nun malye winina ati ara, ance talye lukparabuka, wenebuka opsutum bukni, ance dipkoprob nunti, bico tuba tenesimince, kanye teleb arepkiliba, nun malye winin ning ati, kum kipdeipsimince, nunti namin kibuka, melisilyame. Dipkoprop nunda, pia weik malye winibirye, an nyapdeiamsulum yupu yaninyap nang bukni, bico tenebuka melisilyame.
Amalaikat arye, el anye biti, bico uplyeba, elce nyapnamle, “Allah, ance anye bira, biklyame. El anye bira, ninye dibikirye, weilbanyaka dam binuka ulyame. El anye bira, ‘Sik diplamik nang dam kum bituʼ tenen, el kam una dekna ati arepmanto ning ara asukum,” nyabuka, nyapnamle. Aning areplirye, anye el yok ara punupnamle.
Dipkoprop bico tenena ning ara ani. Ara, nunce mankau ulamuburye, Allah ati kanye kum diamube. Winilamubu bukni, nun malye unyap ning nirya awamukbuk, ‘Sik pununa ati, Na Mi Koprop Yesus obikce deice arye, sik malye ning punupnamle’ tenen, Allah elce bico tenepsukce, el Mi Koprop arepsuke. Winipsuka ara, dipkoprop bico tenena ning ara ati, nyapne.
‘Malye winipnyap’ tenen, anggun kanye talima moubuka umunyak arye melibuka dildanamlulume. Tonda, Allah El Dib Kanye arye, ‘Sik talima melipdakirye dinamak’ tenen, melin nang atonun kipsuk akarye, wibuka deipsuk nang ara, anggunce sikti, sik talima moubuka kalekuka dinamlulume. Allah el mi koprop dibukura, el ining banmok deice arye, Allah dekuka deibuk ninye ara, domba weilamak nang arye sik domba weilamak touk, Allah el diba tenebuka talinyak nang ati, melibuka weinamlulume. Anang ati moubuka dimunce, melinamlulume.
“Nun ni Allah, ance aning-aning nirya talebuka, pia deice tam erebuka, Pia Mikip Weik Deiyoknye ulyame. Nun ni Allah, ance nun moropkiyap yupu ara, kekepsilyame. Tonda, nun malye wininyap ning ara, kum daneipnamsilirye, nunti namin kibuka lyepsilyame. Tonda, nun moropkiyap ning ara, kekepsimince, ‘Anang ap, Yerusalem mutuku ap ara, lyepnune,’ tenepsilyam, na nio. Amoropkiyap ning ara, pia ouku una meme. Adiparyuk, min yuma melipsilyame na nio. Deiyok ara, yuk ninye nirya arye, ‘Allah elda ninye lyenanye ulule’ tenen, akunum kel bikike. Tonda, Yerusalem mutuku noutamak ara, an si deipsulume. Tonda, an mapu Yerusalem mutuku unyak ninye nirya ara, an ‘Naʼ tenen, ninye diamuka. Ati ara, ance lyepsiminba, ‘Ninye nirya arye, an siuk erenamkiyak’ tenen, moropkiyabe na nio.” Daniel birye, Allah ati morobuk.
Atalak arye dipdongobuka doyanamle talak ara, tonoknye birye, el kwit yuknye biti, ‘Anda Allah si kel biknalame,’ nyabuka, peterelamik atonun, tuba kum wininamake. Ara, weik nang babye, mitik nang babye, na siuk akunum kel bikikirye, ‘Nun ni koproba,’ nyabuka, na damuk unamake. Ara, urdem ati kum bukni, deiyok ara, sik malye winilamice ning babye, narye pia kum kipdeipnamne. Aning nirya ara, kilipnirye, kum kipdeipnyopura, tuba tamubuka tonap, sik malye winin ning nirya kum tenepnamne. Ayupu ara, na Allah Yahweh arye, akunum nyapsine ati, dipkoprob nong upnamle,” Allah arye nyabuk.
Narye an Allah Yahweh ati, ‘Melibuka lyepdopnilyame!’ nyabuka, morokununa deiyok ara, ani. Ara, anda aning-aning nirya talimince, deice tam erebuka, mikip weik deiyoknye ulyam bukni, ance kanye deipsimince, nun malye wininyap ning ati, namin kipsimince, kum danalilyame. Anda pia telebnye ulyama atia. Tonda, yata ninye do nirya, sikce antibuk, ‘Naio, ancuk melibuka lyepsilyame!’ nyabuka, morokinyak nang ati, lyepmince, pia teleb kililyame. Tonda, anda, ‘Weik tonun bico tenesimince, pia telebuk kilinamsine,’ nyapdeiamsulum yupu ara, weik tonun nyasilyama ati nyapkine.
‘Malye un ninye ara, ansinibuka Allah ap, talima dukdongobuka unamak’ tenen, pia diksukum unanye, Yesus Kristus arye, nun malye un ninye dekna ati, like tonok talak aryuk dibuk. Yesus ara, ninye nong atonun dayukce ulamuka ani, obikopura dipmok bukni, dibukura, Allah El Dib Kanye mikip deice arye, Yesus ati tuba tamubuka kam bukeibuk.
Na kanye ara, Allah el mapu nirya ara, ilil weik asa unyak bukni, na Paulus ara, ilil pia kumnye unune. Nara, ilil pia kumnye ununa babye, Allah el kanye deipnukce, ‘Paulus ara, Ninye Lyena Yupu, Kristus el pia teleb yupu bobuka, Yahudi yala kum ninye peterelbinamle,’ tenepnukce, wipdeipnuke. Allah arye, Kristus deice kintinipdeipsukce, el ap kanye dukdongobuka upyopura, arenamsil ning nirya ara, nukmanto kum ati, nunce kum biktibye.
Minop talak Allah arye nyalilamukura, sik seklamikce ayupu lak nyalamik nang nabi ulamik. Nabi-nabi nang nirya arye, sik seklamik yupu ara, tuba nyalisulule. Ara, yata-yata nang do nirya, elti, diba tenebiceura, el si deice aryuk sik malye wininyak ning ap, kanye talima malye tenenyak ning ap, nirya kum kipdeipsilirye, namin kisulule. Elcuk lyesulule. Peterus arye ayupu nirya nyabuk.
Yata nang do nirya, sik malye tenenyak ning ap, malye wininyak ning ap ati ara, Allah akunum lyebukce, kum kipdeibuk anya arye, na mapu anggunce aninye ati, ‘Sik malye winin ning ara kum danmale,’ nyapmunyopura, dipkoprop Allah arye amalye winin ning ati, tuba tamubuka tonap kum tenenamle. Ton ninye ara, sik malye tenenyak ning ap, malye wininyak ning ap ati ara, Allah kum lyebukce, kum kum daneibuka anya arye, na mapu anggunce anang ati, ‘Anggun malye winin ning ara, anggun deice tuba upsile,’ nyapmunyopura, dipkoprop aninye, sik malye wininyak ning ara, sik nong deiceuk tuba unamle. Allah arye kum kilipnamle,” Yesus arye el mapu ati ayupu nyabuk.
Anggur mek dinmek talak ara, Yesus arye ayupu nyabuk. “Winipmanto ning ara, amek ara, na ining atonun ulula ati, dobuka diplulume. Amek ara, na ining atonun nyapmasina ara, lak nyapnusine. Ara, Allah min arye nyalilamsuk touk, ninye mutuku-mutuku nirya noutam arye ninye weik arye lyepnirye talinamne. Aning ara, ‘Diba tenepnamniak’ tenen, na opniceura, na ining binamle. Na ining banamla ara, talye ati kume. Ara, ninye mutuku-mutuku nirya, sik malye wininyak ning ap, malye tenenyak ning ap, ati, kum daneipnirye, na ining arye lyepnamna ati, lak bikilina ati aning arepsine,” Yesus arye nyabuk.
Allah arye nyabuk. “Se yu parango, anda bukminyak arye, domba basam weilula deiyoknye ulye touk, Allah na mapu ati, melibuka bobalula deiyoknye bira, na ap neika pil donimnye bukni, an parang arye olbinulyame. Binuka opminyeura, adomba atonun nang, na mapu nirya ara, bai sakikcak arye, mutuku yuk-yuk bibik abuka, bindopnamake. Winipnamak talak ara, na mapu koproba, sik Israel nang nirya ati, wenebuka opnamne.
Allah arye Yehuda tam unyak nang ati, tonap teleb kipdeipnamle talak ara, sik malye ulamik ning ap, tuba malye unyak ning ap ati, kum daneipnamne. Ara, Yerusalem mutuku weik asik noutam unyak nang ap, tonda Daud birye deibukba, dadeipdanin yanamak nang ap ati, narye arepnyeba, weik mek balamle atonun kibuka, banamle. Winipmanto ara, abanamle mek ara, sik malye winin ning nirya, mek likuka lyenamle. Ara, Daud tam nang ap, Yerusalem mutuku noutam unyak nang ap arye, malye wininyak ning ap, isa si erenyakce wininyak ning nirya ara, narye lyebuka, kum daneipnamne.
Yesus elce, ‘Ninye mutuku-mutuku nirya sik malye unyak ning kum daneipnirye, dekuka lyepnamne’ tenen, elce el nonguk arepsukbuk obik. Ara, nun malye winin ning ati, talye oplopsutu bukni, Yesus arye nun pununa ati dipsuke. Allah arye, ‘Teleb talak ara, atalakuk,’ tenyamuk touk winibuk. Allah arye, ‘Ninye nirya lyeptinye’ tenen, patalamuka ara, awinibuka deice arye akunum lak kipdeipsuke.
Ara, anggun Yahudi yala kum ninye ara, anggun malye tenelamlum ning ap, talima malye ulalum ning ap, deice arye, akunum dibilamak ninye atonun ulalume. Minop talak Allah arye, “Den bam bol mouse ning kum seklamik nang, na dam kum yatinge,” nyapdeiamuk touk, anggun Yahudi yala kum ninye babye, anggun malyeuk ulamlum talak ara, Allah el dam kum yanmanto ulamlume. Minop talak noutamak winibuka pia malye ulalum bukni, atalak noutamak arye, Allah arye Kristus kam bukeibuka deice arye, anggun babye, kam bukepsuke. Allah arye, nun malye unyap ning ap, malye tenenyap ning ap, namin kipsukce, kum kipdeipsuke.
Apil donuna ara deiyok, bitinye aupmale. Ton ning ara, anggun Kolose mutuku ninye ap, anyapmasin mutuku ninye ap, ‘Sik talima kwa dilakirye, Yesus diba tenebuka pia kanye lamabuka unamak’ tenen, pil donune. ‘Anggun kanye kwa dilamunce, kanye lamabuka unamlulum’ tenen, pil donune. Ara, anggun kanye talima arepdamunce, talima dukdongobuka una ap, bico tenebuka melilana ap, unamluma deice arye, talima kwa dilanamlume. Deiyok bitinye ning ara, ani. Ara, nun ni Allah arye, el mambul yupu duknupdeiamuk ning ara, ‘Dipkoprop moubuka kekeptingce, weik arye kel kipnamak’ tenen, pil dosunune. Weik mambul yupu, duknupdeiamuk yupu ara, Kristus el yupu ati nyapsine.
Ara, Allah arye, ‘Na mapu unamak’ tenen, akunum wiamsuk ninye ati, utenebuk. Ara, ‘Na Allah arye duknyamse yupu ara, wini talak na mapu ati lakak nyapnamsin,’ akunum tenebuk. Ayupu duknyamuk ani, wini talak lakak nyasilya ara, nyapnusine. Ara, “Allah arye Yahudi yala kum ninye ati, kanye deiplirye, weik teleb kipdeipnamle,” nyasulule. Duknyamuk yupu noutamak, pia teleb ubuk yupu ara, “Yesus Kristus arye Yahudi yala kum ninye babye, sik kanye noutamak, el ap kanye dukdongopnamsile,” nyasulule. Anggun Kolose mutuku ninye babye, anggun talima noutamak Kristus dukdongobuka unamlulume. Winisilye talak nirya ara, anggun nirya arye, ‘Kume sirya talak ara, Allah ereipsilirye, im deice weik dirina noutamak, weik mambul ninye kipdeipnamsil’ tenen, diba tenebuka, kintinibuka dinauk unamlulume.
Malye-malye weik winilamubu ning ap, malye tuba wininyap ning ap ati, wenebuka oplopsutue. Akunum opmasutu bukni, Allah arye, nun nirya ati, pia weik arye, bico tenepsukce, lyepsuke. Lyepsukce, Kristus ap, talima dukdongopsuka deice arye, kam bulina atonun, teleb kipdeipsukce lyepsuke. Allah arye, nun malye winina ati talye oplopsutu bukni, ‘Se sikda bicoe’ tenen, namin kibuka mitang asa arye, kanye talima arisilya ara, mitik tonun arye kume. Weika arye, bico tenesulule.
Kume. Nun tukwak unyap ninye nirya ati, adiparyuk oplopsutu bukni, minop talak ara, ‘Aninye ati, sik malye ning namin kipnirye, namin arye unamne. Winipnyopura, na pia telebnye unye ning, eibuka kel biknamniyake. Sirya talak ara, aninye ereipnirye, pia teleb kipdeipniba, sik ap na ap neika unmabe,’ tenyamsuk. Utenyamsuka ati, adiparyuk wenebuka kum oplomsuke.
Kam buklyopura, el si deice arye ayupu bitinye laka nyabuka peterepra banamake. Ara, ninye nirya sik malye tenenyak ning ap, malye wininyak ning ap batakuka, kanye danguna ap, tonda, Allah arye ninye, sik malye un ning namin kiplirye, kum danipnamle ning ap ara, ayupu bobuka ninye mutuku-mutuku nirya ati peterepra banamake. Ara, Yerusalem mutuku arye deiyok koubuka dana-dana mutuku nirya peterepra banamake. Ayupu nirya ara, na si Yesus deice arye peterelbinamake.”
Allah el si Yahweh arye, el wipdeiamuk ninye ati nyabuk. “Na Allah arye anggunti, ‘Teleb kilinamsine,’ nyabuka, nyalin yupu deice arye nyalilamsise ning ara, dipkoprob nong upnamle. Ara, anggun malye ulamlum ning nirya, namin kina ati, kam ning obuka arelyanganumunya deice arye, ‘Akunum winipsuke,’ tenenamlume. Ayupu nyalilamsise ning ara, dipkoprob nong upnamle. Ayupu ara, min kum winiptue. Ati, narye, ‘Wininamsine,’ nyabuka, nukamsise ning ara, dipkoprob nong upnamle. Pera mutuku nang arye anggunti, tapu koubuka mek dina ati, lukamik pum bisik mek cemuk pum tam, dolkwetelamsikba, imun kanye bobuka, ulamluma noutamak arye, lobuka lyepdopnamsine.”
Nyabukce ayupu ton dukdongobuka nyabuk. “Yatanye birye, anggun malye winilulum ning namin kipsilirye, aning kum kilisulul do? Na Allah aniryuk, anggun malye umunye ning nirya ara, kilibuka namin kisunune. Wininuna deiyok ara, ‘Sik malye wininyak ning deice arye, na si malye kipdeipnicak’ tenen, namin kisunune. Narye anggun malye winilulum ning nirya ara, tuba kum teninune. Akunum namin kipnirye, kum kilinuna ati, aning tuba kum teninune.
Na mapu ati yupa pia weik, kum nukmanto, beribu-ribu ati, batakna kum diparyuk, pia bico tenenune. Sik malye winin ning ati, tuba-tuba namin kinune. Na mapu tukwak ninye arye, malye winipmace ning ap, nati, ‘Nun like’ tenebikirye, na yupu yanibikirye, malye ubica babye, ila tuba tonap namin kisunune. Aning nirya ati, minopce arye yu upniliba, kum wenesunune. Bukni, sik talima pia malye nang, tuba-tuba malye wininyak ninye ati kum bataknamne. Ara, sikce malye winibicopura, anang ap, sikce deipnamak mapu ap, amapu arye deipkirik danin balamica mapu ap, sikce deibuka dadaeipdanen, deipra banamak mapu ap, ninye dika winilye ning ap, ninye dika dumbarye ning ap, sik nirya ati wenepnamne. Ara, sik ni yapu arye, malye ulamica atia,” Allah arye nyabuk.
Aninye ara, sik yupa weik 144.000 unmek ninye ara, tukwak mutuku ulamik talak noutamak nirya ara, malye ning aning-aning nirya talibuka kum ulamika ati, talye yoltaklamek kilapu ap ubula kum yolalamikce, teleb diksukumuk ulamik. Domba Mi Atonye birye menekuka balibuk, el aminyan dobolbalamak ninye nirya ara, sik yupa weik 144.000 unmek ninye ara, adiparyuk elti, dobolbanyake. Tukwak ninye im sirya, mutuku sirya nirya noutamak arye, Domba Mi Atonye birye dekuka lyelamukce, Allah el si erena ati aninye dobuka Allah ati areamuk. Ara, wenye kwaning yongobuka, ‘Allah el si erepnamap’ tenen, arelamak touk, Allah el ap, Domba Mi Atonunye ap, sik bitinye si erena ati, sik yupa weik 144.000 unmek ninye dekuka lyelamukce, Allah ap, Domba Mi Atonye ap ati areamuk.
Aning nirya akunum winipsuka ati ara, ninye nirya kel kibicopura, “Se, Allah bico tenepsilirye, el kanye aniryuk melibuka arisilye ning ara, weik mambule. Allah ara, pia teleb ulule,” nyabuka, el si weik arye, erenamake. Allah bico tenepsukce, talyeuk arisilye ning nirya ara, el mi koprop deice arye, arepsuke. Allah arye, el Mi Koprop Yesus ati ara, kanye talima aribuka pia kanye delilule.
Derebukce, Allah el si Yahweh ati, morobukce nyabuk. “Ance Niniwe mutuku ninye kum opmalam ara, yata ati do? Na ni Allah, an si Yahweh ati nyapkine. Aning ara, na asik batakuka, amutuku yanuse talak ara, ‘Allah arye dipkoprob Niniwe mutuku ninye kum opnamle,’ tenebuka, kum nyalamse do? Adeiyok ati ara, na adiparyuk, bai sakuka, Tarsis mutuku minopce binamse. Nara, an winilyam ning, akunum kel bikamkise. Ara, Allah anda ninye malye ubica babye, adiparyuk kum oltakalyame. An kanye aniryuk, bico tenebuka lyesilyame. Tonda, minopce yu kum ukulul bukni, ninye malye winilamice ning ara, namin kisilyamce, weik arye bico tenesilyame. Anda ninye nirya ati, weik arye bico tenesilyame. Ati ara, malye wininyak nang arye, sik malye winin ning batakicopura, anda, ‘Ninye opnaman,’ tenepmanan ning ara, aning batakuka, teleb ulinanye usilyame,” Yunus birye Allah ati, nyabuk.
Se na nio, nun malye unyap ning ati, wenenauk winilamsutum bukni, anda, ‘Sik malye wininyak ning nirya ara, namin kipnirye, aninye lyepnyopura, sik malye wininyak ning kum kilinamne’ tenen, patakilibuk, bico tenesilyamnye, ulyama anya arye, ninye nirya arye, anti ilil asa unamabe. Ara, ‘Allah elda weik mambulnye ulule. Tonda, Allah elda pia telebnye ulule,’ tenen, an siuk, pia erenauk wininamkiyabe.
Allah arye Kristus ati utenyamuk. ‘Yesus Kristus obikiba, el ining binamla deice arye, ninye tukwak ninye sik malye winilamikce ning nirya kum kipdeipnamle. Ninye tukwak ninye, sik pununa ati dipnamle. Yesus obikiba dipnamal deice arye, diba tenebikcopura, tukwak ninye sik malye wininyak ning pununa ati lyepnamle,’ Allah arye tenyamuk. Minop talak ara, ninye nirya arye malyeuk winilamikba, Allah arye, ‘Dauplye’ tenen, namin kilamuk. Bukni, Allah arye, tukwak ninye nirya ati, ‘Allah ara pia diksukumuk ulule’ tenen, ‘Moubuka kel kipnamak,’ tenebukce, Yesus Kristus tukwak mutuku dopkwetepsuke. Ara, tukwak ninye nirya arye, ‘Kume, Allah elda, malye winilamikce ning ati kum bataktue. Malye winilamikce ning nirya ati, yupu lipsisikuka wenelule,’ tenebikirye, ‘Moubuka kel kekepnamak’ tenen, nun pununa ati, Allah arye Yesus Kristus tukwak mutuku dopkwetepsuke.
Allah El Dib Kanye akunum arepsuk deice arye, nun kanye talima kum boktoptibye. Kume, winipmanto ara, ‘Wa wiyamubu ning nirya lilyanamap’ tenen, minopce winiryuk kwaning deililbalamak touk, Allah El Dib Kanye minopce arepsuk deice arye, nun kele kinyabe. Allah arye, kintinip deiyamsuk ning nirya ara, arepsilyopura, dipkoprop dopropnamabe. Allah arye, nun nirya ati, ‘Na mapu unamak’ tenen, nun malye winilamupa noutamak arye, akunum lopdeksuke. Lobuka deksukba, el Dib Kanye ap, ulamibya ani, aminyan sirya talak ara, pia moubuka teleb kipdeipsilirye, el dam bobinamsile. Aning-aning nirya ati ara, ninye mutuku-mutuku nirya, “Allah ara, pia telebe,” nyabuka, el si weik arye erebikirye, elti, kinamake.
Tonda, aning ton Allah ati morosunune. Ara, Allah arye, anggun kanye talima noutamak, kel kina deiyok ning, dirina arepsilibuk, elce kintenyamsuk ning nirya ati, ‘Pia moubuka kel kinamlum’ tenen, Allah morosunune. Elce kintenyamsuk ning ara, ani. Ara, Allah arye, ‘Na ap, sik ap, aminyan talak ara, pia teleb akuk neika unamabe’ tenen, yukupsukba, anggunce kintinibuka dinauk ululum ning nirya ara, moubuka kele kinamlulume. Tonda, Allah arye, ‘Na mapu ati, pia teleb kipdeipnirye, pia telebuk wininamake. Winibikiba, na ap neika unamabe’ tenen, pia weik arye, kintinpdeiamsuk ning, ‘Aning nirya kele kinamlum’ tenen, Allah morosunune.
Piblisite