Efesus 1:20 - Eipomek

²⁰ Allah el mikip weika arye, melibuka arisilye ning ara, yuk mikip kume. Ara, Allah el mikip deice arye, Yesus kam bukeibuk. Amikip deice aryuk nun ton arisilirye, melisulule. Yesus Kristus dibukopura, Allah el mikip deice aryuk Yesus kam bukdeibukce, ‘Weik Deiyoknye unamle’ tenen, Allah el sirik taruk tam im deice bobinuka deibukba, bukuk. Yesus ara, Allah el sirik taruk tam bukukce ulule.

Efesus 1:20 Referans Kwoze

Ibrani 10:12

Sik tukwak ninye arye winibuka pil donyak bukni, anye Yesus ara, sik pil dolamak touk kum winibuke. Aning ara kume. Elda, dipkoprop Allah ap, ninye ap, dana-dana ansinilina weik deiyoknye ulula anya arye, minop talak ara, ninye malye winin ning kum kilina ati, tonok ninguk aribuk. Aning like tonok talak arye, aribuka deice arye, akunuma. Ninye malye winin ning minop ning babye, wini talak ning babye, aminyan doryanamle talak ning babye, amalye winin ning nirya ati, akunum kum daneipsukce sirya daksuke. Winibukce, adiparyuk Allah el taruk sirik tam bukukce, el ap Allah ap, aning-aning nirya talinamrake.

Markus 16:19

Nun ni Yesus arye ayupu nyabukopura, el mapu adinmek bukni, Allah arye Yesus el nong dobuka bobiyukura, im deice welebuk. Yesus welebukopura, ‘Allah ap, aning-aning nirya pia talinamnam’ tenen, Allah el taruk sirik tam bukukce im deice tuba ei ulule.

Mazmur 110:1

Allah Yahweh arye, na ninye deiyoknye ati nyabuk. “Anda na sirik tam yanuka bukminba, narye an oldan ninye nirya obuka bisipnirye, aninye nirya dobuka, an yan amu tamuk deipnamkine. An oldan ninye nirya dobuka, an yan amu tam deipkiniba, aninye sik nong deice yanipdongopnalame.” Allah arye nyapdeibuk.

Ibrani 1:3

Allah ara pia teleb ulirye, weik erenanye ulule. Ulirye, weik mambule ulul touk, el Mi Kopropa babye, pia atonun ulula anya arye, weik dirina ap, weik mambul weik ap ulule. Aning atonun, Allah ap, el kanye tenen ning ap, el ulul ning nirya ap, aulul atonun, el Mi Kopropa babye, el ulul ning nirya anisibuka ulule. Allah el Mi Kopropa arye, el weik mikip yupu nyalya deice arye, yata ning do nirya, teleb ulilulba, aning-aning nirya kum kum danalule. El nyalul yupu deice aryuk aning-aning nirya talilulba, teleb ubuka tuba kam ulule. Ninye mutuku-mutuku nirya, sik malye unyak ning kum ubuka delina ap, ninye weik lyena ap, teleb kinilina ap ati, mambul pil akunum dopsukce, ila tamubuka im deice welebukce, Allah el taruk sirik tam bukuke. Aning-aning nirya deice tam ulirye, weik erenanye ulule. Allah ara, Weik Mambulnye, im deice ululnye bira, el Mi Kopropa arye, el taruk sirik tam bulbiyuke.

Matius 28:18

Yesus sik dam yayukce ayupu nyabuk. “Im deice ulye ning ap, tukwak mutuku ulye ning nirya ara, Allah arye na amu tam akunum deipnuke. ‘Aning-aning nirya talibuka weik ninye deiyoknye unamle’ tenena ati, Allah arye el mikip weike akunum arepnukba, talinune.

Kolose 3:1

Ara, Allah arye Kristus kam bukeibuk talak ara, anggun ap, neika kam bukeipsuke. Ara, diba teneplum ati, Allah arye bol kobuka pia kam una deiyok ning akunum areamsuk ning ati nyapsine. Anggun ap, Kristus ap, akunum arepsuka anya arye, im deice ulul ninguk tenebuka, aning deiceuk anggun kanye talima delinamlulume. Im deice ara, Kristus arye Allah el sirik taruk tam bukukce, aning-aning nirya talibuka, im deice tam Deiyoknye ulule.

Pilipi 3:10

‘Se, aning winiptinye’ tenen, pia patapnil ning ara, nyapnusine. Ara, dipkoprop Kristus ap, talima dukdongobuka unirye, Allah arye, Kristus kam bukeibukura, winira Kristus mikip weik ulye touk, ‘Na babye, winiptinye’ tenen, patanulule. Tonda, Yesus el kanye imun ning weik ulamuka ani, nun malye winina ati dibuk touk, na babye ikine upnutopura, akunum diamik ninye atouk uptinye. Akunum diamik ninye atonun uptinye nyanmana ara, diamik ninye, malye winin ning nirya kum patalirye, malye kum winilamak touk, ‘Na babye, malye ning kum patapnutu ura, malye kum winipnamne’ tenen, patanulule. Ara, Kristus arye, el mikip weik arinulula deice arye, ‘Malye ning arye, na talima kum lilonamnile’ tenen, nyapne.

Roma 8:34

Aning atonun, yatanye birye, nunti wenebuka oplopnamsil do? Kume. Yesus Kristus arye nun lyena ati dibuk. Yesus dipsuka ara aupmal bukni, weik mambul ning ara, Yesus dibukba, Allah arye tamubuka kam bukeibukba, Yesus ara Allah el sirik taruk tam bulbiyuk. Allah el dam bul biyukce, Yesus nun melina ati, melibuka Allah ati morosulule. Aning ati ara, yatato nang arye, nunti, “Anggun malye winimunye ning ati, Allah weik arye wenepnamsila ati, el ap neika pia kum unamlume,” nyabuka wenepsitingce, yupu lepsisikuka bokeipsiting do? Kume, aning ara kum nyapsiting.

Rasul 5:31

Yesus ara, Weik Ninye Deiyoknye una ap, ninye mutuku-mutuku nirya, Lyena Deiyoknye una ap, ‘Unamle’ tenen, Allah arye Yesus dobuka, el sirik taruk tam erebuka deibuk. Ara Allah arye, Yesus pil dobuk deice arye, Israel ninye lyeplirye, sik malye wininyak ning batakikirye, balye tamubikcopura, ‘Na Allah arye, sik malye wininyak ning nirya kum kipdeipnamne’ tenen, Allah arye el sirik taruk tam Yesus erepdeibuk.

Markus 14:62

Asipdeyukopura, Yesus arye tamubuka nyabuk. “Anyapmanilamnye bira, natia. Na Ninye Mi Koprop Atonunye, Allah el Pia Mikipnye, el sirik tam bukniba eipnamnulume. Eipnamnulum talak ara, im deice arye dua kan-kan koulukuka yanganye talak eipnamnulume.” Yesus arye nyabuk.

Matius 26:64

Asipdeyukbuk, Yesus arye tamubuka nyabuk. “Diba, ance nyapmanilam touk na aunune. Ara na uka. Bukni, na dipkoprop nyapsine. Aminyan talak ara, nara Ninye Mi Koprop Atonunye, Allah el Pia Mikipnye birye ereipniliba, el sirik taruk tam bukniba eipnamnulume. Eipnamnulum talak ara, im deice arye dua kan-kan koluka yanamne talak eipnamnulume.”

Wahyu 1:17

Anye epsirye, mambul kanye bobuka, ‘Si erebuka kipnun’ tenen, el yan dam bisirye, gutam ap, kisok ap, tuku deice dipdongobuka buksirye, pia yupu kum asa bukse. Winibuka buksibuk, anye el sirik taruk arye, na nong deice deibuka talipnukce, ayupu nyapnuke. Ara, ani. Anda ilil una meme. Aning-aning nirya, min kum uamuk talak ara, na akunum ulamse ati, nara Deiyok Kina Deiyoknye unune. Tonda, aning-aning nirya, akunum kum uplye talak babye, na pia kam unamne anya arye, nara Sirya Dakna Deiyoknye unune.

1 Peterus 1:3

Nun Deiyoknye Yesus Kristus, el Li Koprop Allah ati, “Telebe,” nyabuka, el si pia erenamabe. ‘Telebe’ tenen, nun malye winina ati, adiparyuk wenebuka opsutu bukni, bico tenepsukce namin kipsuke. Winipsukce, winiryuk ninye atonun akunum kipdeipsukce, pia kam una deiyok ning akunum arepsuke. Winiryuk ninye kipsuka ara, Yesus Kristus dibuk bukni, kam bukeibuka deice arye, el mapu kilisulule. Winisululbuk, nun kanye talima Allah el deiceuk deibuka, kam pia unamabe. Wininap ning ati, kanye teniltona kum aniryuk, ‘Aning ara, pia dipkoprop unamabe’ tenen, kanye deibuka unyabe.

Ibrani 13:20

Allah arye, ‘Ninye nirya, olana kum arye, teleb kanye bobuka, yuk ninye ap, neika teleb unamak’ tenen, teleb una ati deiyok ning arisululnye ulula anya arye, elcuk melisilyeba, yuk ninye ap teleb ubuka neika unamabe. Allah arye, “Na ap, ninye ap, teleb ubuka neika unamabe,” nyabuka nyalilamsuk yupu, ninye lyena yupu ara, Yesus el ining biyuka deice arye, sirya dakuka ansinipdeipsuke. Yesus obikba dibuk bukni, Allah arye Yesus tamubuka kam bukdeibukba, Yesus ara, kam tuba ulule. Allah arye nun lyena ati, nyalilamsuk yupu ara, kume kum danamle. Aning ara, pia aunamle. Winipmanto ara, sik domba weina deiyok nang arye, sik domba ati, teleb-teleb kibuka weilamak touk, Yesus arye nun diba tenenyap ninye ati, pia teleb kibuka melibuka kalikisulule.

Ibrani 2:9

Aning ara, min kum ululba kum dibinyap bukni, Yesus elda akunum kel bikupe. Allah arye tia talak ati, malaikat deice tam deibukba, daulamika ani, Yesus dobuka, mitik anun sik amu tam deibuk. Min arye, mitik anun arye amutamto deiyamuk bukni, Yesus dibuka anya arye, wini talak ara Allah arye Yesus ati, ‘Weik mambulnye unamle’ tenen, erepdeibukba, ninye nirya arye, elti, weik arye si erenamake. Yesus dibuk ning deiyok ara ani. Ara, Allah el kanye aryuk ninye ati, bico tenyamsukce melipsuka deice arye, ‘Ninye nirya dibikceba kum dakcak’ tenen, nun pununa ati, Allah arye Yesus arepsukba, Yesus arye nun malye winin ning ati kilipsukce, dibuka deice arye lyepsuke.

Efesus 1:3

Nun Weik Deiyoknye Yesus Kristus, el li kopropba Allah ati, “Telebe,” nyabuka pia nyanamabe. Kristus ap, kanye talima dukdongopsuka deice arye, akunum teleb kipdeipsuke. Ara, nun kanye talima teleb kilina ati patasilye ning nirya ara, im deice arye, akunum kintinibuka deiamsuke.

Roma 1:4

Yesus Kristus ara akunum dipmok bukni, Allah arye Yesus ati tamubuka kam bukeibuka deice arye laka kipdeipsuke. Ara Allah El Dib Kanye mikip deice arye nyapsuke. “Yesus ara Allah el Mi Kopropa ulule. Allah el malye winina kumce, pia telebuk ulul touk, el mi kopropa Yesus babye, malye un ning tonok babye kum winilirye, pia diksukumuk ulule. Elda pia mikip weik unamle,” nyabuka, laka kibuka ayupu laka nyapsuke. Lakak kibuka deipsuknye bira, yuknye kume. Elda, nun Deiyoknye Yesus Kristus el tonok ulule.

Rasul 26:8

Anggun nirya ara, ‘Allah arye akunum diamice ninye kam kum bukeiptue. Ara, kum winipmanto ning,’ teneluluma ara, yata deice arye atenelulum do? Yata ati ayupu diba kum teneptum do?

Rasul 10:40

Akunum dibukopura, weipmek bukni, like bitinye mabukce, winilye sum Allah arye kam bukeibukce, el mikip arye Yesus nun dam peterepdabisuke.

Rasul 4:10

Nasaretnye Yesus Kristus, anggunce wanwanun yo deice oplumura, dipmok bukni, Allah arye kam bukibuknye bira, el si mikip deice aryuk, yok kwanyamuk bukni, atikmalanye kwetepmal ak, pia teleb kibuka unmal anyak anggun elinmalume.

Yohanes 10:30

Na ap, na ni kopropa Allah ap nun tonoka.” Yesus arye nyabuk.

Yohanes 10:18

Na kam ununa ara, ninye arye dalubuka kum dopropnitinge. Bukni, na kanye aryuk, na nong arepnibuk, opnamniake. Na kam una ara, ninye lyena ati, arepnamniak ap, tuba tamubuka tonap na kam una dopropnamna ap ara, naryuk unamne. Adeiyok ning talibuka unune. Na Ni Koprop Allah arye, adeiyok ning arepnukbuk, dopropse. Na dipna ap, na kam una ap deiyok mikip ara, nauk talinune. Ninye arye na kam una dalubuka kum dopropnitinge. Yesus arye nyabuk.

Daniel 7:14

Winibukba, pia minop talak donirye, Kam Ulamuka ani, Pia Tuba Kam Unamle Deiyoknye, abukmoknye birye, el anye bira, Ninye Mi Atonunye ati, weik mambul ning weik arebuk. Elti arebuk ning ara, ani. Ara, ‘El mikip weik arye, aning-aning nirya talinamle’ tenen, deiyok ning ap, weik dirina ap arebuk. Tonda, ninye im sirya, mutuku sirya nirya ap, aminyan winipnamle ning nirya ap, ‘Elcuk tenelye touk unamle’ tenen, deiyok ning ton arebuk. Tonda, anyarepnya deice arye, ninye ayala-ayala nirya ap, yupu yuk-yuk nyanyak nang nirya ap, tonda im sirya, mutuku sirya nirya unyak ninye nirya arye, ‘El siuk erenamak’ tenen, adeiyok ning ton dobuka, Ninye Mi Atonunye biti arebuk. Tonda, el anye mikip weik arye talinamle ning ap, talibuka pia unamle ning ap nirya ara, ninye yuk nang arye, pia kum kum kipdeipnamake. Elce aning nirya talinamla ara, apia unamle.” Daniel birye nyabuk.

Kolose 1:16

Aning-aning deice tam ulirye, pia weik mambulnye ulula ati ara, lilibuka nyapnusiname. Yata ulye ning do yuk-yuk yala nirya ara, elcuk kwepdeiyamuk. Im deice ulul ning nirya ap, tukak mutuku noutamak ulul ning ap, ninye asing arye elinyak ning nirya ap, aupmal bukni, ninye asing arye kum eipmanto ning ap, aning-aning nirya ara, elcuk kwepdeiyamuk. Tonda yata mikip ulye ning do nirya, ninye weik nang deiyok nang, Sisinanye Raja nang nirya ap, deice tam weik nang unyak nang ap, sik amutamukirye, mitik pil talibuka donyak nang ap, talye nang bukni, yuk nang arye anang ati, ‘Nun ni yapu,’ tenebuka, deiyok yupu nyanyak nang ap, anang-anang nirya babye, Allah el Mi Koprop arye kwepdeiyamuk. Yata ulye ning do, yuk-yuk yala nirya ara, elcuk aning nirya kwepdeiamukce, ‘Aning talipnibuk, aning ap, aninye nirya ap, sikce na si erebuka kinamniyak’ tenen, kwepdeiyamuk.