Daniel 4:19 - Eipomek

¹⁹ Aning lake nyabukba, Daniel el si ton Beltsasar, el ton akunum kekebuk. Kekebukce, nyapmok ning ara, kanye imun ning anya arye, ilil ubuk. Ilil ubukba, aninye deiyoknye birye, Daniel, ara el si ton Beltsasar biti nyabuk. “Na lengdar mapsa ning, nong lak lena ati, anda talima daksakuka, ilil una meme,” nyabuk. Nyabukba, Beltsasar birye tamubuka nyabuk, “Naio. Se, alengdar mapmalam ning, an mal olan nang deice upnamtu ning ati, mapmatumopura, ara teleb bukni, an bidamnye ati, lengdar mapdeipdanmalame. Ati, kanye ikin upnamkile.

Daniel 4:19 Referans Kwoze

Daniel 8:27

Atalak ara, na Daniel bira, na nong mikip kum upnuk talak ara, like bitinyeto, winilyeto, sum ton, uk weik dilamnuke. Winilamnukba ulamsa ani, tamubuka buksopura, ninye deiyoknye Raja arye, nati, ‘Apil dopnilyame,’ nyabuka, arepnuk ninguk donmase. Bukni, lengdar deice mapmasiba, awinimukba, na asing arye eipmase ning ati, ‘Se, aning ara, el nong ara, yata ati do? Yata winipnamle do?’ tenen, ilil upnukba, teniltonauk ulamsirye, pia moubuka, ‘Deiyok atiaʼ tenen, bikmanto kum uamse.

Daniel 7:28

“Ayupu nirya ara, na Daniel lengdar mapsirye, dinmasiba, wininmokak eipse ning ap, anye birye laka nyapnuk ning ap ati, kanye imun upnuk. Winipnuka anya arye, akekepse yupu ara, narye ninye yuk nang dam kekena ati, kum laka nyapse. Aning eipse ning ap, kekepse ning ap nirya ara, akunum laka nyapne. Akunuma,” Daniel birye nyabuk.

Daniel 4:24

Ayupu nyabukopura, Daniel birye Nebudkadnesar biti, ayupu ton nyabuk. Alengdar deice maplumce, eiplum ning nong ara, nyapnune. Ara, na deiyoknye, an bidamnye atibuk, Allah aning-aning deice tam, Pia Mikip Weik Deiyonye ulirye, im deice ulinye arye, nyapkukba, eiplume.

Yeremia 4:19

Se, na imun kanye bobuka unamne! Nara namin asa arye kum uptinye ati, na kanye imun upnilyeba, pia ikin deice uk unune. Nara kanye darapdongobuka kum uptinye. Ara mal olalbinuca ati, terompet lelim nyabikce talak ara, kekepnirye, na talima duk-duk anulule. Na talima noutam ara, duk-duk anulule. Aning wininilya ara, ninye onyak nang arye, terompet deice lelim weik tonun yupu nyabikceba, na kekepnirye, talima uk dinulule.

1 Samuel 3:17

Nyabuk buk, Eli birye tamubuka asipdeyuk. “Allah arye yata nyapmaku do? Ayupu nirya ara, na ton laka nyapnilyame. Allah arye nyapmaku yupu nirya, kum laka nyapmanilamce, ton ning ara, kunusa dopminyopura, el weika arye wenepnamkile tenepne,” Eli birye, Samuel biti nyabuk.

Habakuk 3:10

Winiplum talak ara, Allah an yalumopura, mutuku-mutuku nirya luluklamukba, amutuku arye elilamik. Tonda, tukwak mutuku balamuk mek ap, laut mekwen ap nirya ara, anti ilil ubukba, mek nirya longteng-longteng abuk. Winilamuk talak ara, mek nirya obuka balamukce, weik lelim nyabuka balamuk. Laut mekwen deice tam ara, anti dilamkukce, mekwen longteng-longteng abuka, mek keit weik arye welebuk.”

Daniel 7:15

Daniel birye nyabuk. “Lengdar deice mapsirye dinmasiba, winibuk ning nirya ati, epsirye, ‘Aning ara, yata winipnamala ati upnil do?’ tenen, na kanye talima boktopnukba, kanye imun kanye bobuka unmasirye, pia teniltonauk ulamse.

Daniel 5:12

“Anye bira, pia kum winipmanto ning, kel weiknye koproba ulule. Ara, Allah el Dib Kanye mikip arebuk deice arye, nong noutamak weik kel bikin ning ap, lengdar mapmace ning nong laka nyananye ap, duknun ning lak lenanye ap, tonda, ninye ikin kanye bopmace ning nirya ati, lipsisikilinanye ulule. Anye el si ara, Daniel nyalamik bukni, an ni birye elti, winiryuk si dobuk ara, Beltasar nyabukba nyanyake. Wini talak ara, ance anye yukupminba yalirye, asekukak eiplum ning, nong laka nyapnukile.” Ayupu nirya ara, Raja Beltasar el kil arye nyabukba, Raja kekebuk.

Daniel 2:26

Anye birye nyabukopura, Babel mutuku ninye deiyoknye birye, Daniel biti asipdeyuk. “Anda Daniel, ton si ara Beltasar, ance kel kipmamu ning ara, na lengdar mapsi ning, lak nyapniminba, kekepnirye nong biktinye do?” nyabuka asipdeyuk.

Daniel 1:7

Atalak ara, ninye deiyoknye, el amu tam ulamuknye, Aspenas birye, anang sik si nirya punubuka sisibuk. Asi ara, ani. Daniel bira, Beltsasar nyabuk. Hanania bira, Sadrak nyabuk. Misael bira, Mesak nyabuk. Asarya bira, Abednego nyabuk.

Yeremia 29:7

Aning kum bukni, narye anggun bobinuka donoksiseba, binuka unamlum mutuku noutam, weik asik dopmunce, unamlum mutuku nirya ara, ‘Aunamap mutuku ara, teleb unamleʼ tenen, moubuka teleb piluk donamluma deice arye, amutuku-amutuku nirya telebuk kinamle! Tonda, asukumuk daumunyak arye, anggunce na Allah ati, ‘Nun aunmab mutuku teleb uptueʼ tenen, moropnumunye ning ara, narye anggun Babel mutuku noutam bukni, daunamlumak ara, teleb kipdeipnamsine. Anggun unamlumak teleb kipdeipsiniba, anggun babye, dipkoprob uk teleb kibuka unamlume.

1 Raja-Raja 18:7

Obaja el binuyuk ati, bisik bayuk talak ara, Elia yangayukba sik bitinye epdarik. Obaja birye moubuka dipdeyukce, Elia binyuk eibuka ati ara, ‘E ara dipkoprob Elia’ tenen, bikukce, el si erena ati, binuka kanipdongobukce, “Na ni Elia dipkoprob an akunum epdanam do? Yuknye eipkin do?” nyabuk.

1 Samuel 26:15

Asibukura, Daud birye tamubuka, Abnar biti derebukce, nyabuk, “Ance, Israel mutuku noutam ara, nauk mikip weiknye unune,’ tenelalyam do? Yuk nang ton aunyak bukni, an mikip weik unmalam touk, yuk nang ton kum unyaka anya arye, anda yata deiyok ati, an deiyoknye, Raja Saul biti, kum kalikmamum do? Alukunyanuk, ninye ton, anggun tenda aik doplum noutam wekukaburye, ‘Raja Saul, anggun deiyoknye ‘opnamanʼ tenen, yanmo bukni, bataka bindopmoe,” nyabuk.

1 Samuel 24:8

Bai bisik binmokba, aminyan Daud birye akeil deiya pum tam arye bai biyukce, Saul obanmokak ati, weik yupu deice arye yukubuk. “Raja Saul, na deiyoknye ulyame,” nyabuk. Nyabukba, Saul kekebukce, tamubuka el aminyan tam dilamukak, Daud bita eibuk. Daud bira, Saul el si erena ati, kisok tukwak kanupdongobukce nyabuk.

1 Samuel 1:15

Nyabuka wenebukopura, Hana birye tamubuka nyabuk. “Kume na nio, nara ninye kanye wangan mek aning-aning nirya, kum dinune. Nara, ikin kanye bopmana ati, ikin unilye ning ati engenmance, na ni Allah el si Yahweh ati, na talima pum tam unulul ning arye, elti, nyanmance, moronmane.

Keluaran 32:32

Winipmek bukni, wini talak, ‘Ance sik malye winipmek ning ati, namin kiptum’ tenen, moropkine. Na moropmakin ning ati, winipminyopura, teleb uka. Bukni, ‘Namin kum kipnamsine,’ tenepsiminye ning ara, Israel nang sik pununa ati, kam unamak ninye sik si sekelin buku, kam unamak nang buku noutamak sekeipnulum ning ara, kilipnilyame,” Musa birye Allah ati, nyabuka morobuk.

Kejadian 32:18

‘Kume, an amu tam atonye Yakub, el ninguk ulule. Bukni, anda el deiyoknye atonun ulama ati, elce anti, aning nirya urdem arepmakile. El Yakub bira, nun aminyan tam tuba yanganmale.’ Ayupu nyapnamlyame,” Yakub birye minopce binamoknye biti nyabuk.

Kejadian 31:35

“Na nio, anda na deiyoknye, ance nati uapniminyake. Narye tikuka, anti teleb kum nyapmakine. Anda akunum na aik wekmalamce, an isa si eren ning ara, kum eipmalame bukni, tuba atalye bukmane ati ara, ‘Yata ati do?’ tenen, kume. Deiyok ara, atia. Na ining ban wala upmanila atia,” nyabuka, kwinisa dobuk.

Kejadian 40:12

Nyabukopura, Yusup birye nyabuk. “Ura, anyapmanilam yupu, el nong ara, laka nyapnune. Ara, taruk winilye eipmamu ara, like winilye.

Daniel 2:37

Na ni koproba Raja ninye deiyoknye, anda pia telebnye. Yuk ninye deiyok nang atonun kume. Yuk ninye deiyok nang daunyak bukni, anda sik nirya talibuka deice tam ulyame. Allah im deice kwepdeibukce, eitam ululnye birye, na ni anti, ‘Amutuku nirya taliplirye, mikip weik ap, weik mambul una ap, urasin pia teleb una ap unamle’ tenen, wipdeibkukba ulyame.

Daniel 5:18

Tonda, Allah aning-aning nirya talibuka deice tam, Pia Mikip Weik erena deiyoknye birye, an ni koproba Nebukadnesar biti, ‘Ninye deiyoknye unamle’ tenen, erepdeiamuke. Erepdeiamukce, an ni koproba Nebukadnesar biti, ninye deiyok nang nirya, aulamika deice tam deiamukba, ulamuk. Tonda, an ni koproba si ara, yuk mutuku nang nirya arye, kel bikamik. Tonda, el tibuk si erebuka, kilamikce winilamik.”

Daniel 5:19

“Winyamuka ati, ninye ayala-ayala nirya ap, yupu yuk-yuk nyalamik ninye nirya ap, elilamikce elti, weik ilil ulamukba, yok sirim talilamuk. Ara, talye ati kume. Elce, ‘Opnun’ tenepne nang ara, atalak aniryuk, obuka bataklamuk. Tonda, ‘Kum opnune,’ tenepne nang ara, kum olamuk. Tonda, ‘Lyepropnun,’ tenepne nang ara, lyelolamuk. ‘Ereipnun,’ tenepne nang ara, erelilamuk. ‘Amu tam kipdeipnun,’ tenepne nang ara, amu tam kililamuk.”