Bilangan 6:26 - Eipomek

²⁶ Tonda, Allah anggun dam ulirye, anggunti pia bico tenebuka melipsilirye, kanye dukulongon ning arepsiliba, anggun winin ning nirya pia telebuk unamlume. Anggun ap, Allah ap, yuk nang ap, teleb ubuka neika unamlume. Tonda, ‘Anggun ilil asa una kumce, kanye deibuka, teleb kebuka unamlumʼ tenen, Allah arye anggunti, melipsiliba, anggun kanye nirya dakeiyam asa telebuk unamlume. Israel kili sal dam ati ayupu nyapnamlyame,” Allah arye Musa biti nyabuk.

Bilangan 6:26 Referans Kwoze

Mazmur 4:6

Tonda, anggunce anggun ni Allah elti, teleb arin ning ara, elce, “Winibuka-winibuka kam ulamle ning obuka, arenamnulume,” nyapdeipsuk touk, aninguk kintinibuka deipmunce, el si erenamlum ati, arenamlume! Winipmunyeura, Allah el si Yahweh ati, ‘Diba,’ tenebuka anggun kanye talima nirya ara, el deice dem delinamlume.

2 Tesalonika 3:16

Ara, Allah ara ikin una ap, oldana ap, kum arye, pia telebuk ubuka, kanye deibuka una deiyoknye, elce anggunti, atalak-atalak nirya ap, anggun winin ning noutam nirya ap, ‘Kanye deibuka teleb una deiyok ning pia arenamsil’ tenen, Allah morosunune. Tonda, ‘Allah arye, anggun melipsilibuk, el ap, kanye talima dukdongobuka neika unamak’ tenen, Allah morosenyabe.

Mazmur 29:11

Ati ara, ‘Allah Yahweh arye, ‘Naʼ tenen nang unamakʼ tenen, wipdeiamsuk nang ara, ‘Mikip weik arepnamsil’ tenen, moronyabe. Tonda, ‘Allah Yahweh arye, el ‘Naʼ tenen nang ati, ‘Pia teleb kipdeipsiliba, kanye deibuka, telebuk unamap’ tenen, moronyabe.

Roma 15:13

Ura, na Paulus arye anggun Roma mutuku noutamak diba tenebuka ululum ninye nirya ati nyapsine. Allah el melisilya deice arye, nunce elti, ‘Dipkoprop teleb kipdeipsilirye, lyepsilyopura, pia melinamsile’ tenen, kintinibuka dinauk unyabe. Anggun Roma mutuku ninye ati, Allah morosunun ning ara nyapnusine. Ara, anggunce anggun kanye talima el deiceuk deipmunce, diba tenelulumopura, atalak Allah arye anggunti, mambul kanye bona kumce, kanye deibuka teleb winina deiyok ning ap, pin-pin una deiyok ning ap, ‘Weika arye arisiliba, anggun talima pum tam langdinamsil’ tenen, na Paulus arye anggun Roma mutuku ululum ninye ati Allah morosunune. Tonda, anyapmasin ning ara, Allah arye el Dib Kanye arisiliba, el mikip deice arye melisilyeba, anggun Roma mutuku tam ninye nirya ara, ‘Dipkoprop Allah elcuk, teleb kipdeipsilirye, lyepsilyopura, pia ati melinamsile’ tenemunce, ‘Kintinibuka dinauk unamlum’ tenen, Allah morosunune. Na Paulus arye nyapsine.

Yohanes 16:33

Aning-aning nirya, min nyapmasina deiyok ara, ‘Sikce nati diba tenepnikirye, na ap, na mapu ap, kanye talima dukdongobuka neikauk ubibyopura, sik ikin kanye bona kumce, kanye deibuka telebuk unamak’ tenen, ati nyapmasine. Tukwak mutuku noutamak unamlum talak nirya ara, ikin ning ap, kanye imun ning ap, unamsile. Bukni, bouku sukuna kumce, kanye deibuka lamapdongobuka unamlume. Ara, tukwak mutuku ulul ning ap, tukwak mutuku unyak ninye ap nirya ara, narye akunum malye kibuka bisipsirye, sik deice tam akunum ununa ati nyapsine.” Yesus arye el wipdeiyamuk nang, sik 12 nang ati nyabuk.

Rasul 2:28

Pia kam una ati, “Abisik binalam ning ara, anye,” nyabuka laka nyapnulume. An dam unibuk, kanye deilin ning weika arye arenamnilame.’ (Mazmur 16:8-11) “Daud sekamuk yupu ara akunum nyapsine,” Peterus arye nyabuk.

Yesaya 26:3

Allah ance nyapdeiplum ninguk, ‘Aninguk talibuka unamne,’ teneplirye, talimak deipnirye, moubuka talibuka telebuk uplinye bira, ance anye el talima noutam ara, ilil asa una kumce, teleb kanye deipnirye, tunim nyabuka una deiyok ning areminba, telebuk unyake. Winiminya deiyok ara, sik anang arye, antibuk, teniltona kumce, diba tenekinyaka ati, ance sikti, teleb kililyame.

Roma 15:33

Narye anggunti Allah morosunun ning ara, tonok ning tonap nyapnusine. Ara, ‘Walana ap, olana ap, ikin kanye bona ap nirya kumce, kanye deibuka teleb una ati, deiyok ning arisilya deiyoknye bira, Allah ulula anya arye, el ap, anggun nirya ap, kanye talima dukdongobuka neikauk umunyopura, telebuk unamlum’ tenen, Allah morosunune. Na Paulus arye, anggun Roma mutuku umunye ninye ati nyapsine.

Yohanes 20:21

Yesus arye sikti, tuba tamubuka tonap nyabuk. “Anggun mambul kanye bona kume. Ilil asa una kumce, kanye deibuka telebuk unamlume,” nyabuk. Tonda, “Na Ni Koprop Allah arye, ‘Na yupu dobuka peterelbinamle’ tenen, dopdeipnuk touk, narye anggunti, ‘Na laka teleb yupu ninye lyen yupu dobuka peterelbinamak’ tenen, dopdeipsine,” Yesus arye el wipdeiyamuk mapu ati nyabuk.

Mazmur 42:5

Na ikin unilye talak ara, engena deice arye tuba tenenune. Se, na ni Allah, na ap, ninye weik ap, an si eren aik dam bana ati, narye deiyok koubuka, ninye dobuka balamse. An si eren aik dam balamupu talak ara, na ap, aninye nirya ap, pin-pin kanye bobuka, mot deice arye anti, ‘Telebe,’ nyabuka, balamupu. Wini talak ara, ikin weik unulul bukni, minop talak ulamse ning ara, tuba tenenune.

Pilipi 4:7

Allah pia morolamunyopura, Allah arye kanye teleb bobikirye kanya, lamabuka dakiyam asa un ning arenamsile. Kanye tunim abuka una deiyok ning arisilya deice arye, anggun ap, Yesus Kristus ap, kanye dukdongobuka unamlulume. Atalak nirya ara, anggun ilil una kum aryuk, mankau kanye bobuka telebuk unamlulume. Allah arye, ‘Kanye teleb bopnamak’ tenen, teleb un ning aresilya ara, talye ninye kanye aniryuk kum kel kiptibye.

Lukas 2:14

“Allah weiknye im deice ululnye bira, pia telebe. Yata ninye do nirya, Allah arye kanye deilinamle ninye nirya ara, teleb updeiplibuk, mambul kanye bona kum arye, kanam kanye bobuka telebuk unamake,” nyabik.

Yesaya 57:19

Narye Israel nang nirya, asukum unyak nang babye, pia otam mutuku noutam unyak nang babye nirya ara, narye tuba tonap teleb kipdeipyeba, tenina kum aryuk, talye tunim abuka, pia teleb unamake. Nara, Allah Yahweh arye ayupu nyapmasina ati, aning nirya ara dipkoprob nong upnamle,’ nyapsine. Na mapu koprop nirya ara, narye kwetepnirye, pia teleb kipdeipnamsine.

Yesaya 26:12

Nun ni koproba Allah Yahweh, ance nun an mapu koprop nirya ati, pia teleb kilinamsilame. Deiyok ara, nun pil dolamupu ning nirya ara, dipkoprob ancuk nunti meliamsuluma deice arye, apil teleb kibuka domsulume.

Mazmur 89:15

Allah ance, aning-aning nirya ara, mikip weik arye erebuka dolyamce, dilyame. Ance aning nirya erebuka dopluma amu tam aik, ayukumna yo atonun ara, pia diksukum una ap, pia dipkoprob yupu nyana ap, ulule. Tonda, ance nunti, batakna kum diparyuk, weik arye bico tenesilyam ning ap, ance, ‘Wininamsine,’ nyapsulum touk, winisiminye ap nirya ara, aninguk ulule.

Mazmur 37:37

Sik malye wininyak ninye uk, tenena meme. Teleb ning ara, sik diksukumuk wininyak ninye ati, moubuka dinamlulume. Sikda, malye winin ning, tonok ning babye kum wininyaka anya arye, yuk ninye arye, ‘E, sik malye wininyake,’ kum nyapmanto unyake. Na dipkoprob nyapsine. Kanye talima lamapdongobuka arye ululnye bira, yuk ninye nirya ati, ‘E, kanye deipdabirye, kanye talima dukdongobuka, teleb kibuka neika winiptibye,’ tenelula ati ara, Allah arye anye atonun ninye nirya ati, melilamliba, aminyan talak, sikda pia telebuk unamake.

Rasul 10:36

Allah arye Israel nang ati aning teleb yupu nyabuk. “Anggun malye ululum ning ati, Allah deresilya ara, nun malye winin ning Yesus elcuk namin kipdeipsilya deice arye, nun ap, Allah ap, neika teleb kibuka unamabe. Yesus Kristus arye nun ap, Allah ap, ati teleb kibuka ansinilisulule, Yesus Kristus ara, aning-aning nirya talilul deiyoknye bira, eluk ulule.”

Yohanes 20:26

Tomas arye, nyabukba, sik nirya minggu tonok talye daunmeka ani, like tekbarye sum akunum ubukura, sik mince ulamik aik pumuk bulubuka wekmek. Wekmek ak arye, buplan tirikdongobuka kunci dakmek. Tomas ap, sik nirya anyaik pum neika unmeka ani, buplan tirikdongopmeka babye, Yesus arye sik kan-kan noutamak panabuka tikilyayuk. Panabuka tikilyayukce, nyabuk. “Anggun ilil kanye bona kume. Ilil asa una kumce, kanye deibuka telebuk unamlume,” nyabuk.

Yohanes 14:27

Nyabukce, ayupu ton nyabuk. “Ikin kanye bona kumce, kanye deibuka yuk nang ap neika teleb una ati, deiyok ning aresunune. Sik diba tenena kum, talye tukwak ninye arye, yuk nang ati, tenebuka arye arenyak touk, kum aresunune. Ikin kanye bona kumce, teleb kanye bobuka, teleb una deiyok ning aresunun ning ara, na ninguk aresunune. Aning ati ara, anggunce, ‘Se,’ tenen, ikin kanye bona ap, ilil una ap, ikin kanye bobuka bouku sukuna ap, aning nirya kum unamlulume. Ilil asa kum aniryuk, kanye deibuka telebuk unamlulume.” Yesus arye nyabuk.

Mika 5:5

Atalak ara, Asyur mutuku ninye babye, Nimrod mutuku ninye nirya babye, ‘Israel ninye opnamap’ tenen, sik Israel yala ninye unamak mutuku yanuka weknamake. Bukni, winibuka wekicopura, Israel ninye arye sik Asyur mutuku ninye ap, Nimrod mutuku ninye ap ati, obikirye bisipnamake. Ara, Asyur mutuku nang obuka dakna ati, Allah arye wipdeipnamle mikip weiknye birye deiyok kiplirye, Israel ninye arye Asyur mutuku nang nirya ara, malye kibikirye, parang ya dobuka, sik Asyur mutuku ninye bobuka, amu tam delinamake. Tonda, Nimrod mutuku babye, ayin talin nang arye, parang ya arye obuka sirya dakikiba, aninye sik amu tam deibikirye, sik mutuku talinamake. Winibicopura, sik Israel ninye nirya, telebuk ubikirye darabuka, kat asa unamake.

Mazmur 44:3

Ara, nunti areamsulum mutuku noutam ara, an Allah ati, kum bikamik nang ulamikce, amutuku nirya talilamik bukni, yuk-yuk yala nang nirya ara, Allah an taruk koproba aryuk, anang yakuka dopkwetalamukba, sik nirya balolamik. Bukni, nun Israel yala nang nirya ara, nun apu yapu arye dobuka, amutuku noutam arye, mikip kipdomunce, asukum diamlume. ‘'Amutuku noutam ara, Allah ance, nun apu yapu teleb kibuka, asukum deiamlum bukni, sik yuk-yuk yala nang nirya ara, sik nong deice, weik imun ning delilamukba, sikda, ‘Se’ tenen, amutuku batakuka bindobik. Winilamlum bukni, nun Israel yala nang nirya ara, lobukapsulumce, lyepropsulume.

Efesus 6:23

Telebe, sik dib tenebik ati, nun weit yapu atonun ninye nirya ati, Allah moronun ning ara nyapnusine. Ara, ‘Nun Ni Koprop Allah ap, nun Deiyoknye Yesus Kristus ap, sik bitinye arye, anggun nirya ati, mambul ning arenamsirak’ tenen, Allah morosunune. Arinamsirak ning ara, ani. Ara, yuk nang ap kanye deibuka, nimalye arye neika una deiyok ning ap, yuk nang ati bico tenebuka melildana deiyok ning ap, Allah ati weik arye diba tenena deiyok ning ap, ‘Adeiyok ning nirya arepsirikceura, pia telebuk unamak’ tenen, narye anggunti, Allah morosunune.

Roma 5:1

Aning ati ara, diba tenebupa deice, Allah arye nun malye ning kilipsukce, lyepsuke. Lyepsukce diksukum kipdeipsuke. Nun Deiyoknye Yesus Kristus pil dopsuka deice arye, nun ap, Allah ap ansinibdeipsukba, ilil una kum diparyuk, kanye deibuka el ap kanye talima dukdongobuka neika unyabe.