Bilangan 34:19 - Eipomek

¹⁹ Amutuku tuku nirya bokuka arena ati ara, sikce wipdeibik nang, sik si ara, ani. Yudah yala nang noutam arye Yefune arye deiamuknye, Kalep wipdeipnulyame.

Bilangan 34:19 Referans Kwoze

Bilangan 26:65

Aning deiyok ara ani. Ara, Allah Yahweh arye, sik anang nirya ati, akunum nyapdeiamuk. Ara, “Sik malye weik ulamika ati, sik atalak kam unyak nang nirya ara, Sinai mutuku buta mutuku, sukum aryuk dipnamake. Otam Kanaan tam pia kum weknamake,” nyapdeiamuke. Anang nirya ara, akunum dibuka sirya dakik bukni, bitinye nanguk, tuba kam ulamdik. Ara, ninye si Yefune, el mi Kalep ap, tonda ninye si Nun, elce deibuk mi Yosua ap, sik bitinye diamuk ara, kum diamdik talakuk, “Kanaan tam weknamlume,” nyapdeiamuka ati, sik bitinye diamuk ara, Yordan mek koubuka, otam mutuku wekdik.

Bilangan 13:30

Sik Kanaan mutuku makameil binamik nang arye, nyabik bukni, sik kan-kan bukni, yuknye el si ara Kalep birye, yuk Israel ninye nirya ati, ‘Yupu nyana ton kume,’ nyabuka, Musa biti nyabuk. “Kume, Kanaan tam adiparyuk wekelbibirye, amutuku unyak ninye ap oplobibirye, malye kibuka amutuku talibuka unamabe. Aning ara dipkoprob winiptibye, nunda mikip weik atia,” Kalep birye nyabuk.

Ulangan 33:7

Nyabukopura, Musa birye, Yehuda yala nang ati morobuk. “Na ni Allah, Yehuda yala nang moropkiyaka ati, kekepnulyame. Minop talak ara, Israel ninye bukni, yuk ayala-yala nirya ap, Yehuda ap, bokuka yuk-yuk kibik bukni, wini talak ara, tuba tonap, sik bidamang nang ap, tonokak tamubuka deipnalyame. Yuk nang kum melibikiba, sik bidamang taruk aryuk, sik mal olan nang ati, opiripnamake. Aning ati, na ni Allah, ance Yehuda yala nang ati, melipminyopura, an mikip deice arye, sik mal olan nang ara, obuka sirya daknamake,” Musa birye nyabuk.

Bilangan 14:38

Ati, Kanaan mutuku dilbinamik nang nirya dibik bukni, tuba kam ulamdik nang ara, Nun el mi Yosua ap, Yefune el mi Kalep ap, tuba ulamdik.

Bilangan 14:30

Bukni, Yefune el mi Kalep ap, tonda Nun el mi Yosua ap, sik uk ara, Kanaan mutuku birikirye eipnamdake. Na taruk erepsirye, sik apu yapu ati, ‘Teleb mutuku arepneba, anggun talibuka unamlume,’ nyabuka nyalamse mutuku ara, abitinye nang sik ap, binuka weknamak bukni, sik yuk Israel kili sal nirya ara, Kanaan mutuku kum weknamake. Sik nirya ara, dipnamake.

Bilangan 14:24

Bukni, na amu tam ubuka melinanye Kalep bira, sik yuk Israel nang atonun kum ulule. Ara, el kanye pum tam tenen ning ara telebuk ulirye, na nyanye yupu kekenilirye, teniltona kumce, na nyanye yupu uk, diba tenebuka winilula ati ara, dilbiyuk mutuku ara, wekelbinamle. Ara, narye melipniba, el ap elce deipliba dadeipdanin, banamak kili sal ap, Kanaan mutuku wekelbikirye talipnamake. Allah arye nyabuk.

Bilangan 14:6

Sik Kanaan tam noutam makameil binamik nang, sik nirya aunmek buk, sik bitinye nang ara, Nun el mi Yosua ap, Yepune el mi Kalep ap, Israel kili sal malye yupu nyalamik ning ati, ‘Se, yata ati malye nyanyak do?’ teneprikce, ikin kanye bobuka, sik ongolamdik baju, kwiribuka kwiliklopdik.

Kejadian 29:35

Aminyan talak, Lea birye, ton mi bomuka ani, sal mi tonok ton deibukce, el si ara, ‘Yehuda,’ nyabuk. Nyabukce, “Wini talak ara, Allah el si Yahweh ati, el si erepnamne,” nyabuk.

Bilangan 13:6

Yehuda yala nang kan-kan ara, Yepune el mi Kalep wipdeibuk.

Bilangan 34:18

Tonda, amutuku dolona ati ara, sik abitinye nang melin ati, sik Israel nang noutam arye, yala yuk-yuk aululuma atonun, tonok yala ati, tonoknye wipdeipnamlyame. Ninye yuk-yuk ton wipdeipmunyeba, sik ap, Eleazer ap, Yosua ap, neika pil donamnyake. Adeice arye Yosua ap, Eleasar ap, sik Israel yala deiyok nang arye, anggun unamlum mutuku tuku ati ara, bokolinamsiake.

Ulangan 1:36

Anggun Israel nang wisi nang nirya ati, nyapsine. Bukni, tonoknye el li koproba Yefune, elce deiamuk mi, el si Kalep, el tonok uk, ateleb mutuku binuka weknamle. Ati ara, Kalep ap, elce deipliba deipdanin banamak nang ap ara, narye amutuku arepniba, binuka unamake. Ara, el Kalep birye omutuku urasin dilbinamuk talak noutam, elce yanibukce, dilbinamuk mutuku-mutuku nirya ara, el ap, el mapu silip ap ati arepnamanarya. Winipnamna deiyok ara ani. Ara, narye nyapdeipse yupu ara, el Kalep birye, ‘Kume, Allah arye dipkoprob yupu nyapdeipsukʼ tenen, ayupu uk moubuka talibukce, anyapdeiamse touk winibuk. Winibukce, ‘Diba Amori mutuku bibirye, otam unyak nang ati malye kiptibye,’ tenebukce, diba tenepnuka atia. Ati ara, narye anggunti, ‘Amutuku bimunce, amutuku urasin ap, ulye ning ap, binuka dipdenamlume,’ nyapdeiamsisiba, dilbinmek mutuku ara, anye Kalep el tonok arepniba, el ap, elce deipliba dadeipdanin banamak nang ap, amutuku binuka wekikirye, daunamake. Allah arye nyapdeiamuk.

Mazmur 60:7

Ati, se nun ni Allah, ‘An mikip weik, sirik taruk deice arye, melibuka lyepsutumba, nunce nun mal olan nang ati, obuka malye kiptibirye, kum kipdeiptibye’ tenen, moropkiyabe na nio. Deiyok ara, ‘Ance bico tenesiminye nang ara, tamubuka tonap mikip arepsutuma deice arye, nun mal olan nang ati, obuka sirya daktibye’ tenen, moropkiyabe na nio.

Kejadian 35:22

Israel ap, el mapu silip ap, amutuku noutamak ulamik talak ara, el mi Ruben birye, el li domuk kil ton, el si ara Bila, duknubuka ubula yobuk. Winibukba, yuk nang arye kekebuka, laka nyabikopura, Israel kekebukce, malye kanye bobuk.

Kejadian 35:23

Ura, Yakub birye delilamuk mapu ara, 12 nang ulamik. Yakub ap, Lea ap arye, delilamrik nang ara, sik si ani. Min yuma ara, Ruben deiprikce, aminyan talak Simeon ap, Lewi ap, Yehuda ap, Isakar ap, Zebulon ap, deiamrik.

Bilangan 13:4

Musa birye wibuka dopreibuk nang si ara ani. Ruben yala nang kan-kan ara, Zakar el mi Syamua wipdeibuk.