Bilangan 31:8 - Eipomek

⁸ Aonmek talak aryuk, Midian mutuku ninye deiyok kibuka taleamik nang, sik pamubarye weik nang babye obik. Anang sik si ara ani. Hewi Rekem ap, Zur ap, Hur ap, tonda Reba ap obik. Atalak uk Beor el mi Bileam babye, parang ya arye obikba dibuk.

Bilangan 31:8 Referans Kwoze

Bilangan 25:15

Tonda, Simri birye domuk kil, Midian mutuku kil ara, el si Kosbi ulamuk. Akil ara, Midian mutuku kil ulamuka ati, Allah el si eren aik dam yayukura, Pineas birye cang tace ning arye akil lukuka obukba, dibuk. Bukni, akil el si ara Kosbi. Kosbi bira, el li koproba, Zur ulamuk. Zur bira, Midian mutuku yala nang, sik ninye deiyoknye ulamuk.

Wahyu 2:14

“Ikin ulamsuka babye, nati kum bataknulumce, teleb winilamlum bukni, ton ning ara, malye winiplum ning ati, wenebuka yupu bokeipnamsine. Tonok ning ara, anggun kan-kan noutamak ara, ton nang arye minopnye Bileam el nyalamuk yupu talibuka dobolbanyake. Bileam birye, yuknye el si ara, Balak biti laka nyabukba, Balak birye Israel ninye sik kanye talima lipdobukba, malye-malye winilamik. Peterebuka deice arye malye winilamik ning ara, Isa Mutuku Dongonye si erena ati, kam ning obuka arilamik ning tup dobuka dilamik. Tonda, ubula yolana ning aning-aning nirya winilamik. Bileam malye yupu peterelamuka deice arye, Israel ninye amalye ning winilamik touk, anggun Pergamus mutuku noutamak ton ninye arye atonun wininyake.”

Yudas 1:11

Sik anang ara, pia bicoe, Allah arye anang wenepnamla ati, sik anang ikin upnamle. Sikda Kain arye Allah nyabuk yupu kum kekebukce, malye winibuk touk wininyake. Tonda, minop talak Bileam arye, ‘Ayupu ara, tilila yupu,’ akunum bikmokcuk, “Yo bok weik arepnukiabe,” nyabikura, kekebukce, ‘Yo bok weik doproptinye’ tenen, patabuka ati, tilila yupu peterebuk. Tilila yupu peterebuk touk, sik anang babye, ‘Yo bok weik dolonamap’ tenen, malye wininyake. Tonda, minop talak Korah arye, ‘Allah arye nyapdeibukura, Musa nyalamuk yupu kum kekepnuyap’ tenen, deiyok koubuka, el yanibuk touk, sik anang babye, Allah arye nyasulul yupu yaniltanyake.

Wahyu 19:20

‘Kurun kuda basam deice bukuka balulnye, malye kipnuyap’ tenen, pirilenmek bukni, kum winipmanto unmekak eipse. Ara, kurun kuda basam deice bukuka balulnye, el yin talin nang arye, Kam Ulirye, Pia Malinye ati tomobikce tapu koubik. Tonda, Tilila Nyana Deiyoknye ton tomobikce, tapuko koubik. Anye bira, tilila nabi ulamuk. Elce, ‘Malye Kam Ulul Ning, na ni kopropa ulula ati, el melipnun’ tenen, min arye ninye kum winipmanto ning mambul pil dolamuknye, el si ara, Tilila Yupu Nyana Deiyoknye tomobik. Minop talak ara, aTilila Nyana Deiyoknye birye, ninye kum winipmanto pil dolamukba, ninye weika arye tilila ninguk diba tenelamik. Elti diba tenelamik ninye ara, Kam Ulirye, bukni, Pia Malinye el pitin kilina ning, el nomor sik nong bol deice sekikce, el urasin aton ning puturubuka deiyamikba, elti, si erelamik nang ati nyapne. Kurun kuda deice bukmoknye ap, el tam nang ap arye, Kam Ulirye, bukni, Pia Malinye ap, Tilila Yupu Nyana Deiyoknye ap, tilila nabi ap tomobikce, uku pia dilamukak pum tam dopkwetebik. Uku pia dilulak ara, mek kwen urasin atonun ulule. Bukni, amek kwem ara, mek kwen sirika kume. Ara kumasan bol keil, akeil si ara belerang, uku buk weika arye dipliba, keil but-buta tong ara, sikin tong atonun tong weik nyalamle ning ap, tin ap, welelamukce, mekwen atonun deiamukce, uku buk paklamukce, uku pia dilamukak noutamak dopkwetebik.

2 Peterus 2:15

Aninye ara, diksukum un bisik batakuka, yuk malye-malye un bisik akunum banyake. Wininyaka ara, minop talak ulamuknye el si ara Beor, el mi Bileam arye, malye winilamuk touk wininyake. Bileam arye, ‘Malye pil dopnebuk, yo bok weik arepnitinge’ tenen, patanmokura, malye pil dobuk touk wininyake.

Mazmur 10:2

Tonda, sik yu weik nang ara, kwalibuka maknya kintininyakce, sik talye bona uto-toa talina kum nang ati, ikin pia weik, sik nong deice delinyake. Wininyaka ati, sikce yuk nang ati, ‘Anang ara, malye kipdeibibiba, ikin kanye pia weik tonun bobuka unamak’ tenen, talye yupu nyabikirye, malye un ning kanye uk tenebicopura, ‘Aning deice arye, tuba tamubuka, sik nong deiceuk yanamle’ tenen, morokinyabe.

Mazmur 9:16

Sik mutuku sirya, im sirya nirya, yala yuk-yuk unyak nang nirya ara, ‘Ninye opnamap’ tenen, kintinibik ning ara, aning sik nong deiceuk tamubuka yanamle. Winipmanto ara, ninye arye ‘Kam ning opnuyap’ tenen, tuku palyamikca pum tam bukni, mangkau kanye bobuka, banmalya ani, sik mining lukamice tuku pum tamuk sakuka olanyake. Atonun, ninye arye ton, ‘Bai basam do? Yua basam do? Youpnamleʼ tenen, tapu dungnubuka welamak touk, ayu nang babye, sikce yuk nang ati, malye ning dobuka deilinyak nang ara, tamubuka yalirye, sik nong deiceuk upnamle!

Bilangan 25:18

Aning winipnamluma deiyok ara, sik Moab yala nang arye, ‘Israel yala nang ara, nun mal olan nang atouk unyaka ati, sik deice, ikin ning deipnuyabe,’ tenebik. Tonda, ‘Sik Israel nang ati, malye ulina ati wininamabe,’ tenebik. Ara ‘Akil arebipyeba, sik Israel nang arye, Peor Bahal isa, el si ton erepnamake,’ tenebikce, Midian mutuku kil tonok, el si ara Kosbi, arebikopura, Simri birye akil dobuka, Allah el si eren aik dam boyanmoka deice arye, pia malye kipdeipsike. Akil Kosbi bira, Midian mutuku nang ati, sik ninye deiyok kiamuknye, el kilmu ulamuka atia. Tonda, anggun Israel nang arye, isa si Bahal-Peor el si erelamluma deice arye, uk dina weik ning arepsiseba, ninye weik arye diplume. Ati, akil ap, el dobuknye Simri ap opmalumba, dipmarake. Deiyok ara, ‘Adipmal kil isa si erelamuk touk, anggun Israel nang arye, isa si erepmunyakʼ tenen, Pineas birye akil oplobuke.

Bilangan 24:25

Bileam birye ayupu nirya nyanmoka ani, akunum nyabukopura, el mutuku koproba tamubuka biyuk. Biyukopura, atalak aryuk Balak babye, el mutuku koproba tamubuka biyuk.

Bilangan 22:10

Nyabuk buk, Bileam birye tamubuka nyabuk. “Kume, Zipor el mi Balak bira, Moab mutuku ninye deiyoknye birye, wipdeipmalba, yanmak nang ap unmabe. Tonda, Balak birye nyapnuk yupu ara, ani.

Bilangan 22:4

Aning ati ara, sik mutuku sirya utam ara, Midian ninye ulamika anya arye, sik Moab ninye arye, Midian mutuku talibuka ulamik deiyok nang ati nyabik. “Israel ninye, pia weik yanganyaka anya arye, kum bataknamsiake. Nun nirya obuka, sirya daknamsiake. Sik dinge weik yakirye, nun mutuku noutamak koulamap ning ap, yuk teleb ulul ning nirya ap ara, dipnamsiake. Winipmanto ara, sapi basam ap, domba basam ap arye, maning nirya dibikibuk, tuku laka ulamle atonun, sikce nun nirya opsikiba, nun mutuku ninye ton, kum upnamabe,” nyabuka malye nyalamik. Nyalamik ning ara, Zipor el mi Balak kekebuk. Anye bira, Zipor, el mi Balak, Moab mutuku weik deiyok akunum kekebuk. Ayupu kekebukopura, ‘Tonoknye, el si Bileam ati, yupu nyapdeipnamne’ tenen, el mapu dam yupu nyapdeibukba, laka nyalbiyik.

Bilangan 24:14

Nyabukopura, Bileam birye ayupu ton dukdongobuka Balak biti nyabuk. “Wini talak ara na mutuku uk tamubuka binune. Bukni, na mutuku min kum binmanye talak ara, Israel ninye arye, Balak an taliplumba unyak ninye ati, aminyan talak ikin ning sik nong deice deipnamak ning ara, laka nyapnukine,” Bileam birye Balak biti nyabuk.

Bilangan 31:9

Aning nirya akunum obuka sirya dakik ura, Israel ninye arye Midian mutuku kilapu nirya ap, sik akilapu arye deiamik mitik mapu nirya ap, tomobuka boya yayik. Tonda, sik Midian mutuku nang arye taleamikce weilamik kam un ning, sapi basam ap, kambing basam nirya ap, tonda, sikce weilamik ayam maka atonun ning nirya ap, sikce talibuka ulamik dekna weik ning nirya ap ara, alubuka doprobik.

Bilangan 31:16

Akilapu arye malye winilamika deice, Bileam birye, ‘Sikda winibuka-winibuka sikti, nyabukba, atalak ulamlum Israel nang kekeplumce, malye weik winilalumce, anggun ni koproba Allah Yahweh ati, pia malye weik kiplume. Atalak ara, sik Midian mutuku kilapu arye Israel nang ati, sik taleamik ning, el si isa Peor, ‘El siuk erepnuyabe,’ nyabuka yukubik ati, Israel yala nang malye weik ulamik touk, wini talak babye, akilapu arye kum yukupnamsiyak do? Kume, nyabuka yukupsik ura, atalak ara, Allah arye sik malye winilamik ning dekna ati, uku weik areamukbuk, Yahweh arye yanuka, ‘Na tenen nang unamakeʼ tenen, wipdeiamuk ninye bukni, auku sik deice sakukba, ninye weik arye deiamik. Aning ati, aMidian mutuku kilapu ap, anggun ap neika ulamunyopura, sikce yupu nyabuka yakirye yukupdopsikcopura, atalak arye Allah el si eren ning batakmunyeura, ikin ning anggun dam yanamsile.

Habakuk 3:7

“Nun Israel ninye lyebuka boyanamsulum talak ara, Kusyan nang, sik cang kain bol arye, doltakne aik dolamik ning noutamak ulamikce, sik ilil weik ubuk. Aning atouk, atalak aryuk, sik Midian mutuku ulamik ninye babye, anti ilil weik ubukba, ikin kanye bolamikak, narye eipse.”

Bilangan 22:5

Balak birye wipdeibuk nanguk, ninye si Beor, el mi Bileam dam yupu nyalbiyikce, elti yukubik. Bileam bira, el mutuku koproba, Petor mutuku bukni, Efrat mek dam ulamuka ati, asukumuk yupu nyalbiyik. Winibik talak ara, Balak birye nyapmok yupu nirya, Bileam dam binuka nyabik. Ayupu ara, ani. “Balak birye anti nyapmakile. An kekepnulyame. Tonok yala ninye yupa pia weik, sikda Mesir mutuku noutamak ulamik bukni, batakuka bisik daupnin yangalamik ani, wini talak ara, na unye mutuku dam akunum doltakna aik yanuka, dobuka unmake. ‘Aninye ara, mitik anun aryuk yanmaka,’ tenena kume. Sikda ninye kum nukmanto anya arye, nun mutuku yacopura, nun nirya obuka sirya danamsiake.

Bilangan 23:10

Yakub birye deiamukba dadeipdanin, deipkirik danin yanganyak ninye, sikda kum nukmanto, pia weik unyake. Winipmanto ara, tuku bisik bakibuk, uku sice butbuta welelamla atonun kibuka yanganyake. Ati, yatanye birye, aninye nirya nukturye, laka nyaptu do? Kume, sik ninye yupa ara, pia kum nukmanto atia. Aning atonun, asukum atikmance, sik Israel ninye nirya, kum eiptinye. Sik cang kambing bol doltakna aik deipmekak, noutamak bokuka dumbarye deipmekbuk, amutuku deice arye, tonok ninguk eiptinye. Israel ninye, sik yupa ara, kum nukmanto unyaka ati, sik dipkoprob mambul weik. Allah arye sikti, weika arye meliamuka ati, ‘Sik diksukum unyak touk, na babye uptinye’ tenen, patapnile. Sik diksukum unyak touk, unmanya ani, aminyan talak, ‘Sik dipnamak touk, na babye atonun diptinye’ tenen, se, tenenune. Sikda, pia teleb ninye unyaka ati, na kanye ara, ‘Sik unyak touk, na babye uptinye,’ nyapmana ati, aninye ati ara, yata malye yupu nyaptinya kume.” Bileam birye nyabuk.

Amsal 11:3

Ninye ton pia diksukumuk unyak ninye ara, sik talima pum tam ara, ‘Tilila yupu kum nyanamabe. Tonda, dipkoprob ninguk talibuka unamabe,’ tenenyaka deice arye, sik pil donamaka ap, sikce wininamak ning nirya ap ara, ‘E, teleb kin ning ara, ani,’ tenebikirye, moubuka unamake. Ara, sik talima pum tam ara, diksukum ninguk ulula deice arye, pia weik kel bikinyakce, telebuk unyake. Bukni, yuk nang ara, malye winin ninguk talibuka wininyaka ati ara, sik talima noutam ara, pia malyeuk unyake. Kanye talima malye nanguk unyaka ati ara, adeice arye, malye winin ning ap, tilila yupu nyanyak deice arye, sik bidamnye arye, sik bidamnye atibuk, malye winililanyake. Aminyan talak ara, sik winin ning ap, sik ap, kum upnamake.

Amsal 13:17

Malye un ninguk talibuka ululnye bira, ‘Nun mambul yupu lak nyalbinamle’ tenen, wipdeipmumnyopura, moubuka kum tenepdelye diparyuk, talye lukparabuka wininamla ati ara, aminyan talak ara, ikin ninguk bobuka anggun dam tamubuka boyanganamsile. Bukni, moubuka tenenanye wipdeipmunce, ‘Nun mambul yupu laka nyalbinamle’ tenen, dopdeipmunyopura, moubuka teneplirye, telebuk unamla ati ara, aminyan talak ara, ninye teleb ulina ninguk, bobuka anggun dam tamubuka boyanganamsile.