Allah ap, ninye ap, ansinilina ati, sapi basam bol arye domik doltakne tenda aik pum tam, pil dona deiyoknye, imam atalak pil donmalinye, elce adomba basam mi obuka deipmunce, bokuka yuk kintinip deipmunye ning nirya ara, el anyaik pil donmalye imamnye birye, aning nirya bobilirye, binuka uku dongopliba, uku arye dipnamle. Adin ning binuka uku dongonamle ning ara, Allah Yahweh, el si erena ati, binuka arenamlule.
Bilangan 28:2 - Eipomek2 “Ance sik Israel nang ati, binuka nyapnulyame. Na Allah Yahweh si erena ap, arena ati, sik adiparyuk din ning nirya ara, yanuka arebikceba, imam nang arye bobuka, uku dongobikceura, uku arye diplirye, siltong teleb ning ara, tulum welepliba, kekepnirye, na kanye delinamne. Aning arepnamniyak ning ara, narye, ‘Aning ara, atalak arenamnulume. Aning ara, atalak ton arenamnulume,’ nyapdeipse touk arepnikirye, pia moubuka kalikikirye, dinmakibuk uku dinamle. Gade chapit la |
Bilangan 28:2
32 Referans Kwoze
Nuh birye, Allah el si erena ati, aning nirya uku dongobukba, uku dinmokce, nintong teleb ning welebukba, Allah el si Yahweh kekebukce, “Telebe,” tenebuk. Utenebukce, Allah el talima pum arye aning ton tenebuk. “Ura, wini talak arye, dipdongobuka doryanganamle talak noutamak nirya ara, ninye tukwak ninye ati, tukwak mutuku tonap ikin ning deibuka, malye kum updeipnamne. Ninye tukwak ninye nirya ara, winiryuk deibikce talak arye, dipdongobuka, sik kam unamak talak noutamak nirya ara, sik kanye tenenamak ning ap, sik talima patalamle ning nirya ap ara, pia malye unamle bukni, tukwak mutuku ara, tamubuka tonap malye kum kipdeipnamne. Tukwak mutuku nirya ati, tonap tamubuka kum supnamne. Tonda, tukwak mutuku kam ulye ning ayala-yala nirya, obuka kum daneipman touk, yuk talak ara, tup tamubuka tonap kum winipnamne.
Anggunce dopdeipnulumba, weik arye akunum dopropse. Aninguk kum bukni, tonda anggunce Epafroditus areplumba, elce dobuka boyanuk ning akunum dopropse ati, na patapnuk ninguk kum bukni, weika tonap, dopropse ning ara, akunum moubuka aupmanile. Nunce Allah arena ati, el kanye deililul ning, kam ning obuka aribibirye, nintong teleb ning uku dongobibiba, nintong arye Allah ulyak welelamle atouk, anggun urdem aryuk arepnulum ning ara, atong teleb ning atouk ulule. Anggunce winilamlum ning ati ara, Allah arye kanye deilisulule.
Ara, minop talak ulamik Yahudi ninye arye, ‘Allah nun malye winin ning namin kipsilirye, nun moronyap yupu kekenamsil’ tenen, Allah el si erena ati, kam ning obuka arena ap, nintong teleb ning dobuka, uku dongona ap, ulamika atonun, Kristus arye nunti, bico tenebuka kanye talima arepsukce, elcuk el bidamnye nong, Allah ati aribukce, nun yok pununa ati dibukura, Allah arye, kanye deibuk. Yesus arye, kanye talima arepsukce, bico tenesilye touk, anggunce yuk ninye nirya ati, bico tenebuka melilanauk unamlulume.
Tonda, nun ap, Kristus ap, talima dukdongobuka ubirye, el yupu peterebibya deice arye, Allah arye kanye delisulule. Allah arye tong teleb ning kekeplirye, kanye deililul touk, Kristus arye, nun dib tenenyap ninye dobuka el Li Koprop Allah ati ariliba, Allah arye nunti kanye delisulule. Bukni, Yesus el teleb yupu peterenyaba deice arye, daunyak ninye kekenyak bukni, sik kanye yuk-yuk tenenyake. Ton ninye ara, kam unamake. Ton ninye ara, dipnamake.
Bukni, anggun Israel ninye arye nati malye kipdeipnulume. Ara, na si eren ati, kintiniplumce aning-aning nirya, malye ninguk dobuka delilyangalulumak, ara, ‘Allah Yahweh el si erenak pia mambul kume,’ teneluluma deice arye, malye winiplume. Tonda, anggunce malye tenelulum din ninguk dobuka, nati arelyangamumnya deice arye, ‘Allah el arena ati, keil lelebuka yangeibupe ning babye, mambule kume,’ tenelulumce, malye ululume.
Narye nyapsine. “Anggunce na si eren ati, kam un ning opmunce, aning bobuka, na arena ati, na si eren aik dam keil yangapdeiplumak, adeice uku dalulum bukni, yata deiyok ati, kam un ning malye ninguk bobuka, na dam boyangamunce, nati arenululum do? Winimunya deice arye, na si ati malye nyanumunce, yaninululume. Bukni, anggunce nati, asinululume. “Ara yata wininyaba deice arye, ‘Allah elda mambulnye kume,’ tenebuka an si ati yanikinyap do?” nyabuka asinululume. Narye tamubuka nyapsine. Kume, ara minop talak arye, narye anggunti, ‘Kam un ning pia teleb ninguk arenamnululume,’ nyapdeiamsise bukni, anggunce kam un ning, nong malye ninguk bobuka, na si eren ati kintinip deibik sukumuk boyanganululume. Winimunya deice arye, na si yaninumunce, ‘E, Allah el ap, el arena ati keil lelepdeibupu sukum ap ara, mambul kume,’ tenemunce, malye ululume, nyapsine.” Allah arye nyabuk.
Narye anggun bobuka, pia teleb sukum deipnamsin talak ara, min talak anggun bai sakuka, yuk-yuk mutuku dana-dana tam, dabinamlum mutuku noutamuk, dobuka boyanamsine. Winipnamsin talak ara, anggunda yata mutuku, im sirya, mutuku sirya nirya noutam arye, yuk-yuk yala nang, kanye wisibuka unamlum noutam arye, anggun dobuka, Israel koproba tam, boyanuka bulupdeipnamsine. Anggun Israel nang nirya bulupdeipsinyeba, unamlum mutuku noutam, akunum umunyeura, na kanye deipnamsine. Winipmanto ara, ninye arye kam ning obuka, uku dabikceba, uku buk arye, meta ap, tup ap, diplyeura, nintong teleb ning welepnirye, ninye nirya kekebikirye, weik tonun kanye deilinyak touk, narye anggunti, kanye deibuka dopropnamsine. Ati, amutuku dana-dana tam unamak nang, yuk yala-yala nirya arye, anggunti eibicopura, biknamake. Ara, ‘Se, Allah el pia teleb ulula ara, anggun anang anggun talima noutam babye, akunum deibuka ati, sikce pia teleb akunum deibuk. Ati, Allah elda pia dipkoprob telebnyeuk ulule. Elda pia teleb leknye ulule,’ tenepnikirye, moubuka biknamniake.
Aning atonun, naryuk anggun dina ati, terigu pia teleb ning ap, mong mek ap, tonda minyak zaitun mek, pia teleb ning ap, areamsise bukni, anggunce aning dobuka, sik talye isa si erena ati, arelamlume. Aryamsise ning nirya ara, anggunce isa mer si erena ati, berhala-hala, el si patung-patung dam, ‘Aning ara, isa eiplirye, nintong kekeplyopura, nunti kanye deipnamsil’ tenen, isa ati areamlume. Nara Allah Yahweh, aning-aning nirya talibuka, Pia Mikip Weik Deiyoknye birye nyapsine. Anggunda, aning nirya dipkoprob malye weik winilulume.
Ara, tonok nang arye do, mangkau arye na arena kum arye, malye upmok bukni, sik yuk Israel ninye arye, aning kum bikikirye, kum tenebikcopura, anye bira, el malye ubuk ning pununa ati, winipnulyame. Sik Israel ninye nirya dukdungonbuka neika, sapi basam yim winiryuk nepmalye ning dobuka, imam nang arebikiba, sik imam nang arye, asapi basam dobuka, uku dongopnamle. Winiplyeura, uku arye diplyopura, siltong teleb ning welepliba, Allah kekeplirye, el kanye teleb deipnamle. Tonda, roti kwaning dana deiyok ning, el si gandum atonun ning ara, aning ton tabakuka arenamninyake. Tonda, aning ap, tabakuka anggur mek ton kintinip deibikirye, 2 liter ton tabakuka deibikirye, aning boyanuka arelyanganamniyake. Tonda, ‘Allah arye nun malye ulamupu ning, kum daneipnamsilʼ tenen, kambing yim tonok ton dobuka, arelyanganamniyake. Aning-aning nirya ara, na Allah arye anggunti, “Wininamlume,” nyapdeiamsise touk ubuka, boyanganamlume. Aning boyamunyeba, uku dongobikiba, siltong teleb ning welepliba, na Allah kekepnirye, kanye teleb unamnile.
Amutuku noutam bikirye unamak talak ara, sik Israel ninye arye, ‘Nun ni koproba Allah Yahweh ati, nun weinyap domba basam do, sapi basam do, maka yala ning do, dobukabibirye, Allah ati arebibyeba, imam nang arye, uku dongonamake,’ tenebikirye, yanuka arepnamak ning do, akumopura, ‘Allah si erena ati, apil ton donamake,’ nyabuka, nyalin yupu deice nyalamak ning do, Allah arye, ‘Na aren ati, winibuka-winibuka arenamnulume,’ nyapdeiamsuk ning ati do, sik kanye aryuk, ‘Allah si erena ati, urdem arepnuyabe,’ tenepnamak do, atalak nirya, el si erena ati, ‘Aning ton obuka arebibyeba, imam nang arye uku dongobikcopura, siltong teleb ning welepliba, Allah kekeplirye, kanye deilinamsileʼ tenen, arenamniyak do, el nyalin yupu deice arye nyapdeiamlinye birye, boyanuka arelyanganamle ning nirya ara, Allah atibuk arelyanganamnyake.
Aning ara, nyapmasin bukni, winipmanto, malye ning kum upmalinye ap, tonda yuk mutuku binuka kum upmalinye ap, akaplibuka binamlum yuna kum melipmalirye batakmalyopura, el ‘Anye bira, na mi koproba kuma,’ tenenamne. Sikda, atonye biti, Israel ninye ulamikak arye, buru tam yakdonokmunyeba, yukak binuka unmali bukni, aminyan dipnamlarya. Ara, el anye birye asum ara narye, ‘Aninguk wininamlume,’ nyapdeipse sum ati, elce ‘Aning ara daupmalyeʼ tenen, kum melipmalya deice arye, na yupu yanipmanila atia. Aning kum winipmalya deice arye, malye upmalye ati wenena ap, dekna ap ara, ikin ning weik arepniba, el mining deice yanganamle.
Biyikopura, “Nunda malye upmabe. Ara, dipmoknye ton bol pipmaba ati, Allah el kanye ara, ‘Sikda akunum malye updeipdanmake,’ tenesulule. Ati el si erena ati, yuna kum kwaliptibye. Bukni, aning ara nun like. Yata deiyok ati, dipmoknye el nong bol pipmapya babye, Allah arye, ‘Atalak ara Kaplibuka binamlum yuna kwalinamlume,’ nyapdeiamsuk touk, yata ati nunda domba mi obuka, nun kayapu nang ap, neika Allah ati, kum arepnamtinye do?” nyabuka asipdeyik.
Israel nang nirya ara, bikinamake. ‘Imam nang nirya ara, Allah arye wibuka deibuk nang unyaka ati, sikda malye winin ning pia kumce, pia teleb ninguk wininyake. Ati sikda, nong teleb, lek nang unyake,’ tenenamake. Deiyok ara, sik imam nang arye, din ning bobuka, na Allah si erena ati, arelyanganamniyake. Nara, Allah Yahweh unune. Nara, Pia Teleb, Lek Weiknye unune. Tonda, naryuk, ‘Naʼ tenen nang, na mapu Israel nang anggunti, pia teleb ubuka, lek nang kilisunune.
Deiyok ara, sik imam nang ara, na Allah ap, ninye ap, elana aik noutam pil don nang unyaka ati, nyapne. Sikda ‘Naʼ tenen, nanguk unamake. Tonda, Israel nang, ‘Allah arye, nun malye winipmap ning, kilibuka lyepnamsilʼ tenen, domba ato ning dobuka obikirye, uku dongolbanyake. Din ning, ayala-yala weike, na Allah, na si erena ati, arelyanganinyake. Ati ara, malye ning dam una do, talina do, ubikce deice arye, nara Allah, na si malye kum kilinamniyake. Tonda, sikce na si erena ati, mambul pil donyakce, nara pia teleb, ektedopnye, leknye biti, si ereninyak ati, ara sikce malye ning, bol pina kum aryuk, pia telebuk unamyake.
Tonda, imamnye birye, maka talibuka, el pol potong sirik ning dana-dana tam taliplirye, delonamlule. Bukni, el potong den talak ara, mitang asa arye, moubuka denamlule. Mikip arye dinmalirye, ‘Potong tuba batakna ap, dila una ap uplyak,’ tenena ati, wininamlule. Imamnye winiplyopura, maka el nong ara, adiparyuk ining ning dana ati, keil pala yangabuka kintinip deiamlumakuk, mesba deiceuk danamlule. Winipliba, el nintong teleb ning ara, Yahweh kekeplirye, kanye teleb unamle. Aning pil donamaka nirya ara, ‘Allah arye, nun malye winin ning kilipnamsilʼ tenen, uku dongobikiba, aning nirya uku diplirye, siltong teleb ning ara, Allah Yahweh el dam welepliba, kekeplirye, el kanye pia telebuk unamle.
Bukni, akam ning opmalinye biryuk, abasam el yan tup nirya ap, el deisuruk nirya ap ara, el anye biryuk, aning nirya dobukaplirye, mek likukaplirye, teleb kibuka kintinilinamlule. Winibuka aning nirya akunum pil dobuka, kintinip deiplyopura, Allah Yahweh ap, ninye ap ansilina ati, cang sapi bol arye domik doltakne tenda aik noutam pil don nang, imam-imam nang, sik deiyoknye biryuk, akintinip deipmalye ning dobuka, uku dongopliba, aning nirya, uku diplirye, siltong teleb ning ara, Allah Yahweh el dam welepliba, kekeplirye, Allah el kanye teleb unamle.
Wininamnimak bukni, aopmalye basam el yan tup ap, deisuruk deice palilamle meta ap ara, el anye biryuk, dobukaplirye, mek likukaplirye, teleb kibuka kintinilinamlule. Apil dobuka kintiniplyopura, Allah ap, ninye ap, ansililina ati, sapi bol arye domik doltakne tenda aik noutam pil donyak nang, sik imam nang aryuk, akintinip deipmalye ning dobuka, keil pala taplakuka yangabuka kintinip deibik sukumuk binuka, uku dongopliba, aning nirya uku diplirye, siltong teleb ning ara, Allah Yahweh dam welepliba, kekeplirye, el kanye teleb unamle. Aning ara, Israel nang arye, ‘Nun malye wininyap ning nirya, Allah arye namin kipnamsil’ tenen, kam ning obuka, nong nirya boyanuka, uku dongonamak ning ara, Allah elti, aning arebikiba, elcuk kanye delinamle.
Ayim domba basam kalipmace ning nirya ara, ance na Allah si erena ati, kam ning obuka, uku dongona ati, keil pala tablakuka, yangabuka kintinibuka deipnulumakuk, el si mesba, adeice binuka deipnulyame. Abinuka deipminyeura, an adiparyuk dobuka, uku uk dongonamlyame. Winipminyeba, uku diplirye, siltong teleb ninguk welepliba, na Allah Yahweh arye, asiltong teleb ning kekepnyopura, na kanye pia teleb kinamnile. Winipnyeura, uku diplirye, kin-kin tong teleb ning ara, na damak welebiliba, na Allah Yahweh kekenirye, kanye delinamsine.
Wala tonoknye, el si ara Abib ati, “Wala si Abib noutam arye asum, atanggal deice arye, weik sum kipnamnulume,” nyapdeiamse touk, uplyopura, anggunce, ‘E Nena Kum Roti Kwaning, dina sum ara kunum aupmale,’ tenepmumce, na si erenamnulume. Atalak ara, narye anggun ati nyapdeipsisi touk, Abib wala noutam like tekbarye sum ara, anggunce nena deiyok ning, el si ragi, tabakuka dapmace roti kum dinamlume. Anggunce dinamlum ning ara, nena kum roti dapmunce, tekbarye sum arye, anena kum roti kwaninguk dinamlume. Deiyok ara, Abib wala noutam aryuk, anggun Mesir mutuku ulamluma batakuka, yanamluma ati, aning ara tuba tenipmunce, wininamlume. Tonda, asum atanggal deice arye, yanabuka na si erenamnulum talak ara, asum-asum nirya, na telebe nyana ati, na aik yanganamlum talak ara, taruk banang yangana kume. Anggun wa wibuka koumunce, limunye ning noutam ara, teleb arin ning bobuka, na si erena ati, na aik yanuka arelyanganamnulume.
Ura atalak ara, amutuku dana-dana tam ulamik ninye, yuk-yuk mutuku ninye ati, Israel nang arye ilil weik ulamukba, apiluk dolamik. Ara, sik malye winin ning namin kina ati, kam ning obuka uku danamikak ati, akeil pala kibuka yangapdeibik. Akeil pala kibuka yangapdeibika ara, minop talak uamukak uk deibuka dalamik. Akunum dobikopura, sik weilamik ning, kam ning bobukabukce, Allah el aik pil melibuka dona deiyok nang arebikba, anang arye aning obuka, akeil pala kibuka yangeiamik deice uku dalamik. Winilamika deiyok ara, ‘Nun malye wininyap ning ati, Allah wenepsilirye, opsilyak tenen ati, nun malye ning, namin kibuka pununa ati, aning obibirye, Allah el si erena ati, uku dabibyeba uku diplyopura, Allah arye aning eibuka kum opnamsile’ tenen, ati winilamik. Aning nirya ara, Allah arye, “Wininamlume,” nyamuk touk, beren tam babye, sintam babye nirya, aning atouk winilamik.
Aning nirya obuka, Allah Yahweh el si erena ati, ‘Weik kwalya kwalina sum ara ani-ani,’ nyapdeipsuk touk, uku dongon pil dona ati ara, anyapmasen touk wininamlume. Ara, kintinip deipmakce din ning ap, anggur mek ap, tonda anggun malye winyamunye ning ara, ‘Allah arye kilbuka lyepnamsilʼ tenen, arelyangan pil dona ati ap, tonda anggun kanye arye, ‘Allah si erena ati, winipnamne nyalin yupu deice arye arenamlum ning ap, tonda, ‘Allah ap, nun ap, teleb kibuka neika unamapʼ tenen, aren ning ap, tonda yuk aren ning dobuka, Allah ati, telebe nyana ap ati, arenamnulum ning ap, aning nirya ara, min arye akunum nyapdeiamsuk touk ubuka, arelyanganamlume. Musa birye, Israel nang ati nyabuk.
Tonda, aning atouk, asum-asum nirya Allah Yahweh el si erena ap, el arena ap ati, pil dona kumce, dikdik sen sum, Sabat sum deice arye, kam ning opnarye, aning nirya boyangalamikce, uku dongolamik talak babye, Lewi yala nang aryuk mot nyalamikce, Allah el si erelamik. Aning atonun, winiryuk wala upmalye talak babye, Allah arye nyapdeiamuk touk,” Awala, atanggal deice arye, mambul weik sum uplyopura, na arena ap, na si erebuka kina ap, na si erena ap ati, aning arenamnulume,” nyapdeibuk touk, sik Lewi yala nang aryuk, aning boyanuka arelamikce, mot nyalamik. Atalak-atalak nirya ara, sik imam deiyok nang arye, ‘Winipnamlum-winipnamlum,’ nyabuka laka nyapdeiamuk touk, sik amu tam ulamik Lewi yala nang aryuk, apil talibuka dolamik. Minop talak ulamik atonun, winiryuk nang nirya babye, sik aLewi yala nang sikcuk, apil talibuka pia dopnin balamik touk, tuba pil donyake.
Obikopura, imam Yoyada birye, Allah Yahweh si eren aik kalikna ati, “Sik imam-imam nang ap, Lewi yala nang ap, sikcuk anyaik kalekuka unamake,” nyabuk. Ara, min talak Daud birye, Allah si eren aik pil talebuka dona ati, imam-imam nang ap, Lewi yala nang ap, sikti, pil yuk-yuk dobuka deibukura, talebuka dolamik touk, ‘Wini talak babye atouk pil dobuka unamakʼ tenen, Yoyada birye anang wipdeibuk. Sik anang arye, Allah si eren ati, kam ning obuka uku dongona ati pil dopnuceura, “Musa birye, ‘Winibuka-winibuka wininamlume,’ nyabuka sekeiamuk touk wininamake,” nyabuk. Tonda, “Sik anang kanye teleb deice arye mot senmakirye, apil donamake,” nyapdeibuk. Ara, min talak Daud birye wibuka deiamuk touk, Yoyada babye, atouk winibuk.
Raja Hizkia bira, ‘Allah arye nun malye winin ning kilipnamsilʼ tenen, domba ato ning obuka, uku dapnarye, Allah si eren ati arelyangan talak ara, el weilamuk domba ato ning dobukapnarye, asum-asum nirya beren tam babye, sintam babye, batakna kumce, yuk-yuk arelyangalamuk. Tonda aning atonun, Allah arye, “Asum ara mem sum anya arye, talye pil dona kumce, dikdik sebuka, na siuk erepnamnulume,” nyapdeiamuk sum, Sabat sum deice arelamik ning ati, tonda, winiryuk wala kipne talak ap arelamik ning ati, Raja Hizkia birye arelyangalamuk. Tonda, min talak Allah arye, “Wininamlume, apil donamlume,” nyapdeiamukba, Musa birye sekeiamuk buku noutam nyapdeiamuk atonun, yuk deiyok talak ap, weik sum ap, pil don ning nirya babye, Raja Hizkia birye, atonun ubuka arelyangalamuk.
Ati ara, akunum deiyok koupnuyika ati, Yosadak el mi Yesua bira, Allah el aik pum tam pil melibuka dona deiyoknye ulamuka anya arye, el ap, el kwit capu nang ap, tonda Sealtiel el mi Zerubabel ap, el kwit capu nang nirya ap, sik nirya arye pil deiyok koubik. Sik minopce dobik pil ara, Israel ninye ati bico tenebuka pia meliamuk Allah, el si erena ati, keil yangapdeibik. Aning deiyok ara, ‘Allah ati si erebibyeba, nun malye winin ning namin kipnamsil’ tenen, kam ning obuka, akeil pala kibuka yangeiamik deice, uku sekuka dongonamikak ati kintinibikce, ila tamubuka dobik. Akeil pala kibuka yangapdeibik ning ap, akeil yangeibik deice uku sekuka kam ning obuka dongobik ning ap ara, minop talak Allah el pil dolamuknye Musa birye, “Allah el si erebuka arena ati, keil pala yangeipmunce, el arin ning aning, aning arenamlulume. Tonda, Allah el arena ati, winibuka-winibuka arenamlulume,” nyabuka sekeiamsukce, el buku noutamak deiamuk touk winibik.
Tonda nun ni koprop Allah, an si eren aik pum tam pil dona deiyok nang ap, nun pil melin nang, sik Lewi yala nang ap, tonda, nun Israel ninye nirya ap ara, nun nirya arye lak kilin ning akunum winipmabe. Ara, ‘Yata yala nang arye, Allah el aik damuk u sekenamakak delina ati, yo webuka boyanganmak do? Tonda dan talak arye, yuk yala nang arye boyanganmak do?’ tenen, lak kilin ning akunum wipdeibupu. Akunum winibupu anya arye, wini talak nun kele. ‘Ayala nang ara, aketing tamun noutam, ton sum wala ara, asum deice arye, Allah el aik damuk u sekenamakak ati, yo toubuka boyanganamake. Tonda yuk talak ara, yuk yala nang aryuk, yo toubuka boyanganamake,’ utenena ati akunum kel bikupe. Winibuka boyacopura, Allah arye nyalamukba, Musa birye Mem Yupu buku noutam sekeipsuk touk, Allah el si Yahweh, el si eren aik dam bukni, kam ning obikirye, keil yangabuka delilamakak, aning deice uku seknamakak ara, ayala-ayala nang yuk-yuk arye, yo boyanamake.
Narye, ‘Winibuka arelyanganamlulume,’ nyabuka, lak nyapsise touk, aning nirya arelyanganamnulum bukni, Israel nang, sik ninye deiyoknye, Raja elce deiyok kiplirye, aning nirya winipnamle. Ara, sik Israel nang arye, malye-malye winilamikce ning ati, ‘Allah arye aning kum kiplirye, teleb kipdeipnamsilʼ tenen, kam ning opnarye, arelyamnil ning ara, kam ning oplirye, uku dongopnamle ning ap, gandum ning arenamniyak ning ap, na arena ati, anggur mek makau kwebuka, arenamniyak ning ap, aning nirya ara, Rajanye, elcuk dekuka arelyanganamnulule. Tonda, narye, ‘Sik Israel nang ara, sik mambul weik sum ara ani,’ nyabuka, lak nyalamsise sum ap, tonda winiryuk wala upnyopura, ‘Awala ani,’ tenena ati, arenamniyak talak ap, tonda talye pil dona kumce, dikdik sebuka, na si erenamsiak sum, Sabat sum nirya ap, tonda Israel nang ati, narye, ‘Sik mambul weik sum ani,’ nyabuka, ‘Kwalya kwalin sum yuk-yuk kipse touk, aning nirya wininamnyake. Atalak-atalak nirya ara, Israel nang sik ninye deiyoknye birye, na Allah ati aren ning ara, buluplirye, arelyanganamnulule. Ara, sik anang nirya arye, malye unyap ning kum kipsuturye, bikuka lyepdopsutueʼ tenen, kintinibuka deilinamak ning ap, gandum arenamak ning ap, kam ning obuka, uku dongonamak ning ap, ‘Nun ni Allah ap, teleb ubuka neika uptibyeʼ tenen, arenamak ning ap, sik Israel nang malye winin ning pununa ap, dukungolona ap ati ara, Israel mutuku Rajanye birye kintiniplirye, aning nirya, arelyanganamnulule. Winiplyopura, na Allah arye, Israel yala nang nirya arye, malye-malye wininyak ning ati, kum kipdeipnirye, biklyopura, anggunti lyepdopnamsine.
Piblisite