Anggun Israel yala ninye deiyok nang ara, winibuka, pia malyeuk winilamluma ati, Israel nang, sik domba basam atonun unyaka ati, sik weina deiyok nang ton pia kum ati, sik adomba basam atonun nang nirya ara, bikbik abuka, bai tam yuk-yuk dabindomik ning ara, adomba basam nirya ara, talye bai tam daukirye, yu pia weik ulamle kam ning arye, adomba ara, talye luparabuka, obuka dilamikce, sirya dakmanto ulamik. Mangsa basam atonun ulamik.
Bilangan 27:17 - Eipomek17 Ati ance wibuka deipminba, anye birye minopce menekuka balibuk, sik Israel ninye eibikirye, el bilye bisikuk aminyan binamake. Aning atonun, el tamubuka yangaliba, sik eibikirye el amu tam kibuka tamubuka yanamake. Ara, el balye tam ara, sik nirya melibuka abisikuk dobolbanamake. Winipra banamlanye ‘Wipdeipnusilam’ tenen, moropkine na nio. Atonye kum wibuka deipminba, aninye ara, ance batakminba, domba basam wein nang kum ati, sik domba talye urdemuk unyakce, ‘Dan binuyab do?’ tenen, talye-talye ayanapna, obinapna winilamak touk, Israel ninye babye wininamake.” Musa birye Allah ati, nyabuka morobuk. Gade chapit la |
Bilangan 27:17
19 Referans Kwoze
Mek liya yo lukuka delilbiyikce, Yesus tukwak sakukopura, yupa weik wekmek nang ara, eibuk. Eibukce, awekmek nang ara, ninye arye weilamak domba, sik apu yapu dam kum ukcopura, ‘Ortam binun do, atam binun do?’ tenen, kanye walwal uplibuk, teniltolamak touk, aninye babye, wininmek. Ura, aninye ara, ‘Yatanye birye teleb yupu peterepsutu ak, diksukumuk unamap do?’ tenen, teniltona ap, kwelana ap, unmeka ati, Yesus arye anang ati bico tenebukce, ayupu-ayupu yala nirya weik peterenmok.
Nyabukaura, nabi Mikha birye tamubuka nyabuk. “Na dinmasiba Israel yin nang ara, domba basam wein nang kum ati, ulamikirye, talye-talye yuk-yuk mutuku balamak atonun wininmekba, eipse. Ara, nun ni koproba Allah el si Yahweh arye nyapnuke. ‘Wini talak ara, Israel nang sik weik deiyoknye kum unmala ati ara, sik talye kanye bobuka, sik mutuku tamubuka yuk-yuk binamake,’ Yahweh arye nyapdeipnuke,” Mikha birye nyabuk.
Amutuku-amutuku nirya balamuk talak ara, ninye yupa weik yangalamikba elilamuk. Dilamukce, ayangalamik nang ara, ninye arye weilamak domba, sik apu dam kum ulyopura, ‘Ortam binun do, atam binun do?’ tenen, kanye walwal upliba, teniltolamak touk, aninye unmeka ati, Yesus arye aninye ati bico tenebuka talima aribuk.
Tonda, ninye arye si erenyak Isa Mutuku Dongonye si ara, deiyok kum ubukba, talye-talye yupu uk nyanyake. Isa arye ninye ati, tilila yupu uk nyanyake. Tonda, dibilamice ninye, dib kanye ap yupu talilbanyak ninye ara, tilila ati nyanyake. Wininyak ati, sik asing keten nang arye, tamubuka nyanyak yupu ara, dipkoprob yupu ton kum nyanyake. Aning atonun, Isa Mutuku Dongonye si erenyak nang arye, “Lengdar manyaba deice arye eilinyap ning ara ani, ani,” nyabuka laka nyanyak yupu babye, talye yupu uk nyanyake. Anang arye, ‘Aminyan talak aning-aning nirya, telebuk unamsile,’ nyanyakba, kanye deibuka kekelulum bukni, anang ara tilila ati nyaltakanyakce, nong kum yupu uk nyaltakanyake. Tonda, lengdar mapmace ning ati, talye nukultakanyake. Atilila yupu nyabice nang, sik yupu kekemunya ara, winipmanto ara, domba basam ara, sik weina deiyoknye kum ati, ‘Dan bisik binuyab do?’ tenen, kanye walwal upliba, talye-talye balamak touk ululume.
Ati ara na nio, ance nati kel weik bikina deiyok ning ap, Teleb uning ara, ani,’ tenen ning ap, tonda, Teleb uning ara ani, malye ning ara ani,’ tenebuka diksukum un ning arepniminyeba, na talima pum weknutu ura, ance wipdeiamlum nang ati, ‘Winipnamabe,’ tenebuka nyaptinye. Na binamne talak babye, tamubuka yanamne talak babye, Teleb un ning ara ani,’ tenepnirye, nyaptinye. Aning atonun ance moubuka kum nyapnutumopura, an mapu koproba ance wipdeiamlum nang nirya ati ara, yata nyaptinye do? Ati, ‘Naryuk kum winiptinye,’ nyabuka, Salomo birye Allah ati morobuk.
“Wini talak ara, na unun keting tamun ara, yupa pia weik, dumbarye kepdopnye nakub dikin (120) keting tamun akunum mapsa. Ati, anggun deiyoknye tonap kum kiptinye. Ton ning ara, Allah el si Yahweh arye, nati akunum nyapnuke. ‘Musa anda, Yordan mek ara, koubuka otam kum binamlame,’ nyapdeiamnuke,” nyabuk.
Nyabukce ayupu ton dukdongobuka nyabuk. “Na ni Allah, an si Yahweh ulyame. Ance meliamsuluma deice arye, na ni koproba Israel ninye taleamuka atonun, na babye Israel nang talibuka sik Raja unune. Bukni, na nio, ance melipnilyame. Nara, mitikop aryuk sik deiyoknye kipse. Ati ara, ‘Yata wiribuka pil doptinye do?’ tenen, pia walwal upnile. Ati ara, ance melipnilyame.
Saul bira, winibuka tenelamuka ati ara, Saul birye nyapdeibukba, Daud el dam arye, leibuka yukak biyukce, Saul dam ton kum ulamuk. Tonda, atalak ara, Saul birye, ‘Daud bira, yin talin nang, sik deiyoknye ulirye, yupa-yupa seribu nang talinamle,’ tenebukce, wipdeibuk. Winibukba, Daud birye, ayin talin nang dobuka, sik yuk mutuku mal olan nang ati, olbalamik talak ara, el dem arye, melibuka balamik.
“Nun tenenyaba ara, yuk mutuku nang nirya, sik deiyok nang, Raja arye talinyaka atonun uptibye. Ninye deiyoknye, Raja talipsuturye, nun wininamap ning nirya, laka nyapsutuba, kekebuka unamabe. Tonda, sik mal olan nang yace talak, ‘Nun ninye deiyoknye, Raja menekuka biturye, el ap, el yin talin nang ap arye, anang optingce, lyepnamsiyake’ tenen, ‘Aninguk se,’ tenebabe,” nyabik.
Minop talak ara, anggun nirya domba teleb bisik batakuka, malye bisik kwekdanin balamak touk ulalum bukni, wini talak ara, sik domba weilamak Deiyoknye damuk tamubuka yangalamak touk, akunum yanuka ululume. Ara, anggun kanye talima ap, kanye ap, melipsilirye, ‘Malye ubicak’ tenen, dilesilya Deiyoknye dam, akunum yanuka ululuma ati nyapsine.
Tonda, nara domba poka buplan bisik atonun unune. Yata ninye do nirya, na deice aryuk, na bisikuk wekelbice ninye nirya ara, Allah arye lyepnamle. Lyeplirye, aninye ati kalekuka meliplyopura, telebuk unamake. Domba basam bai tam bakirye, dina teleb ak eibuka dibikirye, tuba tamubuka tonap poka pum bisik yangalamak touk, na mapu koprop ara, dabanmakirye telebuk unamake.
Nyabikopura, Yesus arye tamubuka sikti, nyabuk. “Akil ara, Israel yala kum kil bukni, na ni birye dopkwetepnuka ara, Israel yala kum ninye dam bobana ati, kume. Israel ninye bukni, domba basam weilamlanye kum upliba, domba basam talye balamak touk, ‘Kanye walwal unyak ninye, Israel ninye lyepnamle’ tenen, na ni birye dopkwetepnuke,” Yesus arye nyabuk.
Yahudi yala ninye ara, sik dam kum binamlum bukni, domba basam wein ninye kum unyakba, domba, ‘Na apu kopropa ara anye,’ tenena kumce, talya yukak balamak touk, Israel tam ninye, aning atonun wininyak ninye ati, ‘Nun deiyoknye, dan do?’ tenen, talye-talyeuk unyaka anya arye, Israel yala ninye sik damuk peterepra banamlulume.
Allah arye nyabuk. “Se yu parango, anda bukminyak arye, domba basam weilula deiyoknye ulye touk, Allah na mapu ati, melibuka bobalula deiyoknye bira, na ap neika pil donimnye bukni, an parang arye olbinulyame. Binuka opminyeura, adomba atonun nang, na mapu nirya ara, bai sakikcak arye, mutuku yuk-yuk bibik abuka, bindopnamake. Winipnamak talak ara, na mapu koproba, sik Israel nang nirya ati, wenebuka opnamne.
Nyabukura, nabi Mikha birye tamubuka nyabuk, “Dipkoprop ning ara ani. Na dinmasinak Israel mutuku yin talin nang ara, domba basam weinanye, ton kum ati bokwalwalap danuka, talye-talye mutuku yuk-yuk balamak touk unmekak eipse. Aning eipmaseba, nun ni koproba Allah Yahweh arye nyapnuke. Wini talak ara, sik Israel tam unyak nang ara, sik weik deiyoknye bira akunum kum kipmala ati, sik anang nirya ara, sik talye kanye bokuka, sik mutuku uk tamubuka binamake. Teleb ning ara, ton ap olana kum arye, talye kanye bobuka sik mutuku uk tamubuka binamake Allah Yahweh arye nyapdeipnuke” Mikha birye Ahab biti nyabuk.
Pia minop talak, Saul birye taleamsuk talak babye, ance ninye mal deiyoknye ulalumce, Israel yala ninye ap, yin nang ap bobuka, yuk mutuku nang, nun opmanto nang ati, ninye olbana deiyoknye ulamsulume. Tonda, Allah el si Yahweh arye anti, ‘Na mapu Israel nang, domba basam weilamak atonun umince, sik ninye deiyoknye kipnalame,’ nyamkuknye ulyame,” nyabik.
Anyaik dam kalikinamlum talak ara, anggun ninye ona ati, yu ning parang ya ap, cang parang ya ap, bopnamlume. Aning ara, tia babye, kum deliltakanamlume. Aning anggun taruk deiceuk, pia talipmunce, aminyan talak tiknamsilanye, anggun deiyoknye, Raja Yoas, elti, pia kalekinamlume. Anggun deiyoknye, el mutuku binulya babye, minopce anggun ap, neika melibuka banamlume. El dam batakuka yukak bana meme. Wininamlum talak nirya ara, yatanye do, anggun dam yalirye pirinamsilanye bira, adiparyuk opnamlulume. Ayupu ara, imam Yoyada birye nyabuk.
Piblisite