Bilangan 25:1 - Eipomek

¹ Israel ninye, sik tia ati Sitim mutuku binuka unmek. Amutuku binuka unmek talak ara, Israel ninye arye, Moab mutuku kilapu, amutuku noutam ulamik kilapu ap, neika epdanuka malamik.

Bilangan 25:1 Referans Kwoze

1 Korintus 10:8

Tonda, nun apu yapu kan-kan arye, bokuka ton nang arye, talye-talye yolalamik touk, kum wininamabe. Sik weik arye, ubula yoldalamikopura, Allah arye, aninye wenebuka oplobukba, tonok sum deice arye, yupa weik, 23 ribu ninye dibik.

Yosua 2:1

Ninye si Nun, el mi Yosua birye, ninye bitinye nang wipdeibuk. Ara, ‘Kanaan mutuku noutamak bukni, mutuku si Yeriko mutuku dilbinamdak’ tenen ati, anang wepdeibuk. Yuk nang ton, laka kum nyabuk bukni, elcuk abitinye nang wipdeibukce, Sittim mutuku arye wipdeibuk. Dopdeibukce nyabuk. “Anggun bitinye nang ara, Kanaan mutuku nirya dilbinamarume. Tonda, weik mambul ning ara, weik ninye asik donyakak ara, Yeriko mutuku dipdenamdurume,” nyabuk. Nyabukura, abitinye nang ara, Yeriko mutuku birikopura, sal arye yo bok arebuka, talye-talye yoldalamik kil, el si ara Rahab, el aik wekdikce, tia talak ati aunmarik. Anyaik wekdika deiyok ara, ‘Yu nang arye opsicak’ tenen, dungnubuka birik.

Bilangan 33:49

Israel nang, sik tenda aik ara, Yordan mek lilunakuk bukni, mutuku si ton Bet-Yesimot mutuku arye dipdongobuka, Abel-Sitim mutuku binuka, sik doltakan tenda, aik deibik. Ara, Moab mutuku lu tam binuka, sik doltakan tenda, aik deibik.

Wahyu 2:14

“Ikin ulamsuka babye, nati kum bataknulumce, teleb winilamlum bukni, ton ning ara, malye winiplum ning ati, wenebuka yupu bokeipnamsine. Tonok ning ara, anggun kan-kan noutamak ara, ton nang arye minopnye Bileam el nyalamuk yupu talibuka dobolbanyake. Bileam birye, yuknye el si ara, Balak biti laka nyabukba, Balak birye Israel ninye sik kanye talima lipdobukba, malye-malye winilamik. Peterebuka deice arye malye winilamik ning ara, Isa Mutuku Dongonye si erena ati, kam ning obuka arilamik ning tup dobuka dilamik. Tonda, ubula yolana ning aning-aning nirya winilamik. Bileam malye yupu peterelamuka deice arye, Israel ninye amalye ning winilamik touk, anggun Pergamus mutuku noutamak ton ninye arye atonun wininyake.”

Mika 6:5

Tonda, na mapu koproba, Israel ninyeo, anggunce akunum luba kiplum do? Anggun tuba tonap, moubuka tenepnululume. Ara, Moab mutuku ninye nirya taleamuknye, Balak birye, ‘Israel ninye nirya ati, wenepnirye opnamsine,’ tenepmasuk buk, Beor el mi Bileam biti yukubukba, yayukce, ‘Israel ninye luba kina meme,’ nyabuka morobuk bukni, Bileam birye, el dam yata yupu nyamuk do? Bileam birye, anggun Israel ninye ati, teleb yupu nyapsuk deice arye, telebuk upsuke. Tonda, minop talak Sitim mutuku arye batakuka, bisik balamlum ani, Gilgal mutuku noutam bilum talak ara, anggun melina ap, kel bikna ap ati, pil weik tonun dolamsise ning ara, akunum luba kiplum do? Kume, anggun Israel ninye ara, ‘Se, nun ni koproba, Allah Yahweh arye, nun lyena ati, pia dipkoprob mambul weik pil dosulul’ tenen, ‘Kel biknamlum’ tenen ati, narye weik mambul pil dolamsise ning ara, akunum luba kiplum do? Anggun aning nirya moubuka tenipdemunce, kel biknamlulume. Na Allah arye, dipkoprob lyepromsise.

Yosua 3:1

Sik nirya damapmeka, berekukopura, Yosua deiyok kibukce, Israel nang nirya, beren tam koprop, maka yupu talamle talak arye, Sitim mutuku doltakna cang kain aik dam arye batakuka, Yordan mekin tam binuka, mek koubuka, otam kum binmek talak ara, asukumuk doltakna aik binuka dobuka, like winilye mabikce, kentininmek.

Penghotbah 7:26

Tonda, aning ton kel bikamse ning ara ani. Ara, ninye akunum dibikcopura, dipkoprob kanye imun ning usulule. Bukni, kanye imun weik usulul ning ara laka nyapnusine. Ara ani. Ninye arye talye yolamak kilapu ara, pia malye weik unyake. Akilapu ara, Ninye ton tomopnuyapeʼ tenen unyake. Winipmanto ara, ninye arye, ‘Ikan tomobibirye, obuka dipnuyapʼ tenen, dolamak ning el si ara jala, kintinibikirye, mekwen pum tam dongobikca deice arye, ikan tomobuka onyake. Aning atonun, sik talye yolamak kilapu babye, Ninye tomopnuyapʼ tenenyake. Akilapu sik kanye ara, basam ona ati tapu arye, wena welamak touk wininyake. Sik taruk ara, rantai tapu atonun ulula ati, anang ara walwal nang arye akilapu ara, epdakirye iribikcopura, akunum tapu koubuka delilanyake. Ati akilapu arye anang akunum tomobikcopura, loplobuka kum binmanto unyake. Yata nang do, sikce Allah el yupu ati moubuka kekebikirye, dobolbanyak nang ara, Allah arye anang ati kanye delilule. Anang ara, diksukumuk unyaka ati, sik talye yolana kilapu arye, anang kum tomoptinge. Aning ara, Allah arye nyalul yupu moubuka kekebikirye, dobolbanyake. Bukni, sik malye ninguk talibuka, malye weik unyak nang ara, akilapu arye, ato nang ara kanam aryuk tomonyake. Ati, ‘Winipsikcakʼ tenen, anggun nirya moubuka tenipmunce, kalikilanamlume!

Keluaran 34:15

Nyabukopura, ayupu ton nyabuk. “Amutuku bimunyopura, ‘Sik amutuku noutamak unyak nang ap, kum opdanamabe. Melina uk unamap’ tenen, ‘Kum opdanamabe,’ nyabuka, anang ap nyalin yupu ton kum nyapdanamlulume. Deiyok ara, winipmunyopura, anang arye sik isa si erena ati, kutam tuku deice deibuka, nong kanupdongobuka kibikirye, sik Isa Mutuku Dongonye arena ati, teleb kam ning obuka arebice talak ara, nyapnamsiake. ‘Anggun neika nun ap dipnuyabe,’ nyabikibuk, anggun Israel nang arye sik isa ati arece ning, dipmunyopura, ara pia malye atia. Ara, sik malye winilamaka atonun, ‘Anggun babye atonun winipmunyak’ tenen, moubuka unamlulume, nyapsine,” Allah arye nyabuk.

Bilangan 25:17

“Midian mutuku unyak nang nirya ati ara, ‘Sikda nun mal olan nang atouk unyake tenebuka unamlume. Tonda, obuka adiparyuk kum kipdeipnamlume. Midian yala nang nirya ara, obuka sirya daknamlume.

Bilangan 31:2

“Midian mutuku nang arye anggun Israel nang obuka sirya dakamsik ati, kwang danamap ati anggun Israel nang arye, Midian mutuku nang opnamlulume. Aning nirya ance akunum winipminye ura, an apu yapu diamikce, binamik touk, Musa an babye adiparyuk dipnamlyame,” Allah arye nyabuk.

Ulangan 3:29

Allah arye ayupu nyapdeiamnukba, nun nirya ara, asukum arye batakuka, asik si Bet-Peor mutuku otam uamukak, nunda atam amek duman banakuk, binuka ulamupu. Musa birye, sik Israel nang ati lak nyabuk.

Ulangan 4:3

Ati ara, anggun asing koproba arye, akunum eiplume. Anggun kele, ara mutuku si Bahal-Peor mutuku noutamak ara, Isa Mutuku Dongonye el si Bahal ati, el si erelamik nang nirya ara, Allah el si Yahweh arye, aisa si erelamik nang nirya oplobuk. Ara, anggun Israel ninye noutamak babye, Bahal si erelamik nang nirya obuk.

Ulangan 32:38

“Anggun Isa Mutuku Dongonye si erena ati, Isa Mutuku Dongonye si erelamlumce, kam ning obuka, meta dobuka arelbalamlume. Tonda, aisa si eren ati, anggur mek ap dobuka, arelbalamlum bukni, wini talak ara, aisa yukupmunba, sik adiparyuk yanuka melipnamsiyak do? ‘Kanye imun ning yangasulul’ tenen, atalye ning yukupmunba, yanuka melipsiting do, kum do?” Allah arye nyapnamle.

Yosua 22:17

Anggun ara, tuba kum bikmalum do? Peor mutuku arye, nun Israel nang malye wamupu ning ara, tuba kum bikmalumce, amesba kintinip deipmalum do? Peor mutuku unmaburye, malye weik winibupu ati, Allah arye nun wenena ati, el mapu koproba bukni, pia weik uk yala arepsukce, ikin nun deice deiamsukba, ninye pia weik dibik. Anyareamsuk ning ara, wini talak babye, tuba ikin ning, nun dam yalyeba dolonyabe. Amalye ning deiyok ara, kum tunim abuke, atuba ulule. Aning tuba dolonyab ning ara, anggunda kum biklum arye, ‘Tonap ikin ninguk dopropnuyapʼ tenen, apil donmalum do?

Yeremia 40:11

Aning mitik tonun, atalak noutam ara, yuk Yehuda tam ulamik nang bukni, Babel mutuku nang arye, Yehuda tam olyayik talak ara, sikce, ‘Se, Babel tam nang arye, yata wiripnamsiak do?’ tenen, ilil ubukba, bai sakuka, yuk-yuk mutuku datikilbanyak nang ton, ayupu kekebik. Ara, Yudea mutuku nang bukni, ilil ubukba, Moab mutuku ap, Edom mutuku ap, Amon mutuku ap, tonda yuk mutuku-mutuku nirya, dabinuka ulamik nang ap, sik nirya arye, ayupu kekelamik. Ara, yuk nang arye, “Kume, Raja Babel birye, Yehuda tam tuba kam unyak bona utotoa talina kum nang ati, Safan birye deibuknye Ahikam, elce deibuknye, el si Gedalya, ‘Elda sik Gubenur unamleʼ tenen, akunum Gubenur kipdeibikba, talibuka ulule,” nyalamikak, kekelamik.

Yehezkiel 20:21

Nyapse bukni, wini talak, sik wel nang arye winilamik. Sik atalak wel Israel nang nirya arye, aweik kata mutuku noutam, padang pasir mutuku noutam arye, tuba ulamik talak nirya ara, ‘Allah nyapsilye yupu, nun like,’ tenelamikce, na yupu moubuka kekena kumce, yaniltanauk ulamik. Tonda narye, “Aning ara, winina teleb ning, aning ara, winina malye ning,” nyapdeipse yupu nirya ap, “Anggun nirya arye, ayupu moubuka taliplumak arye, moubuka tenipmunya deice arye, anggun pia kam tuba unamlume,’ nyapdeiamse yupu nirya ap ara, batakanauk ulamik. Tonda, narye, “Amambul sum, Sabat sum noutam ara, talye pil dona kumce, dikdik sebuka, na siuk erenamnulume,” nyapdeipse sum ati ara, ‘Aning ara, mambul weik,’ tenena kumce, asum noutam arye, malye pia weik winilamikce, malye ulalamik. Malye weik ulamika ati ara, narye, ‘Ura akunuma, akata mutuku noutam aryuk, sik malye winin ning ati, yu weik upnilye ning ara, sik nong deice deipnirye, sikti, weik tonun wenebuka oplopnirye, sirya daknamne,’ tenipsirye, akunum kintinipse.

Hosea 9:10

Allah Yahweh arye nyabuk. Se, Minop talak ara, narye anggun Israel nang ati ‘Melibuka lyepnamne,’ tenepsirye, deiya koubuka melilamsise talak ara, anggunti kanye deiamse. Winipmanto ara, ninye arye, mek pia kum sukum, pia kata mutuku padan gurun noutam balamikca ani, anuotam arye, pia teleb anggur tapu duk moulamlya eibikirye, pia kanye delilamak touk, narye anggunti, kanye deipsise. Tonda, winipmanto ara, arah yo duk minop moulamleba, ninye arye eibikirye, aning dakuka dibikirye, to nyaliba, kanye pia delilamak touk, narye anggun apu yapu ati eipsirye, pia kanye deipse. Bukni, sik adiparyuk, Peor mutuku dup biyik talak ara, isa si Bahal, si erelamik. Winilamikce, isa el si Bahal ati, kanye deiamikce, ‘Elda, nun ni unamsila ati, el siuk erenamabe,’ nyabuka, el siuk erelamik. Bahal isa si erena ati, pia alye daktingce, malye kanye bobuka engepting bukni, aning kum winilamik. Anggun apu yapu nirya ara, isa si erelamika deice arye, sikce sik bidamnye ati, malye kipdeipdayike. Na Allah arye, isa Bahal ap, sik amalye un ning winilamik nang ap ati, ‘Pia na lik,’ tenenune. Ato ning ap, ato nang ap ara, na dam pia kum yatinge.

Keluaran 22:19

Yatanye do, talye kam ulye ning ap, neika tabakuka mapmalinye bira, adibuk wenebuka oplopmunyeba, dipnamlule. Ninye kume.

Bilangan 7:15

Tonda, sapi basam yim winiryuk nepmalye ning tonok ap, domba basam yim tonok ap, tonda yim domba mi keting tamun tonok kiamuk ning ap, kintinibuk. Akam ning nirya ara, ‘Allah si erepnun tenen, aning nirya boyanuka arebukba, imam nang arye uku dabik.

2 Raja-Raja 23:7

Aning atonun, yuk malye ulamik aik ton uluplobuk. Ara, Allah el si eren aik dam bukni, isa si eren aik noutam dobuka wilyamik aik daklobuk. Anyaik ara sik malye nang arye, sal arye, sal mamun talye yoldalamik. Amalye ning winilamik nang, sik ulamik aik nirya daklobuk. Tonda, isa si Asyera si erena ati, kilapu arye, baju wilyamik. Abaju wilyamik kilapu ulamikak uku bulung aik nirya babye, Yosia birye dakuka uluplobuk.

Mazmur 106:28

Yuk-yuk mutuku noutam binuka ulamik talak ara, sik Israel nang arye, sik Peor mutuku nang arye, isa si erelamik ning ati, ‘Nun ni bira, isa si Bahal aulule’ tenen, atalye ning talilamikce, isa Bahal, el siuk erelamik. Tonda, sik yuk-yuk mutuku nang winilamik touk, sik Israel yala nang babye, ‘Akunum diamik nang, sik kanye arye yanuka nunti melipsitinge’ tenen, kam ning obuka, akunum diamik nang ati, arelamikce, anang sik kanye ati, “Melipsululume,” nyabuka morolamik.