Bilangan 24:19 - Eipomek

¹⁹ Aning atonun, Yakub el yala ninye danoutam ara, tonoknye, ninye deiyoknye ton tiklirye, sik Israel olan dam ninye asik dolulumak, noutamak unyak ninye nirya obuka sirya daknamle. Elce nyapliba, el tam nang arye, amutuku mal olan nang nirya obuka sirya daknamle. Bileam birye Balak biti nyabuk.

Bilangan 24:19 Referans Kwoze

Matius 28:18

Yesus sik dam yayukce ayupu nyabuk. “Im deice ulye ning ap, tukwak mutuku ulye ning nirya ara, Allah arye na amu tam akunum deipnuke. ‘Aning-aning nirya talibuka weik ninye deiyoknye unamle’ tenena ati, Allah arye el mikip weike akunum arepnukba, talinune.

Mika 5:2

Allah arye ayupu ton nyabuk. Ati anggun Israel ninye ara, Allah el si Yahweh arye namin kipsiliba, anggun mal olan nang arye, tapu koubuka bobisicopura, ikin pil aryuk unamsiyak bukni, anggun ni koproba Allah tenebuk talak akunum dam uplyopura, lyepnamsile. Ara, Israel ninye kan-kan arye, Allah elcuk wel kil tonok wipdeipliba, mi bomlya ani, aminyan talak el mi deipnamle. Tonda, akam kil arye, el mi akunum deiplyopura, el kayapu Israel yala nang, sik wenena ati, yuk pera mutuku ninye arye, tapu koubuka bobinamik mutuku noutam unyak ninye, ninye yupa weik ning nirya ara, Allah arye lyebuka doproplirye, ila tamubuka sik min arye ulamik mutuku uk, yanuka deipliba, tonok kanye bobuka, teleb kibuka unamake.

Kejadian 49:10

Weik ninye deiyok nang arye, kwalin kama talibikirye, sik yan dana-dana deibikirye, akama noutam tuku dipdongobuka talibikirye, ninye nirya ati yupu bokolinyake. Winilamak touk an ap, ance deipminyeba dadeipdanin balamikca ani, do unamak ninye, Yehuda yala ninye noutam arye, ninye deiyok kibice nang babye tuba wininamake. Ninye deiyok nang kina ati talilamak kama ara, an yala nang arye pia talinamake. Yehuda yala nang arye akama pia talilyamica ani, aminyan sirya talak ara, akama pia talinamlanye bira, ninye deiyoknye yalyopura, akama ara el ning anya arye, el bidamnye dopropnamle.

Wahyu 19:16

Allah Yupu Deiyoknye, el keil deice ap, el baju deice ap ara, el si ton sekeiyamik. Asi ara, ani. Raja nang nirya deice tam ulul Raja. Tonda, weik ninye deiyok nang nirya deice tam ulul Deiyoknye. Asi bitinye sekuka deiamik ning deiyok ara ani. Ara, tukwak mutuku weik ninye deiyok nang, Raja-Raja nang nirya el amutamukiba, sik Weik Ninye Deiyoknye Raja ulirye, sik yuk Raja nang nirya talilule. Aning atonun, sik yuk deiyok nang nirya el amutamukirye, sik Weik Deiyoknye ulirye, sik yuk deiyok nang nirya talilule. Yata deiyok nang nirya, el amutamuk unyak ati, elce sik nirya talilule. Elda weik eitamnye ulule.

1 Peterus 3:22

Allah arye, Yesus Kristus kam bukeibukura, ila tamubuka im deice welebukce, Allah el sirik taruk tam bukukce ulule. Bukukce eitamuk uplibuk, Allah el im deice pil don ninye, malaikat ap, tukwak ninye deice tam unyakce weik deiyok nang atouk, im deice unyak ninye ap, tonda tukwak mutuku noutamak unyak isa mer nirya ap, yata mikip ning do nirya, Yesus el amutamuk unyake. Yesus ara, weik mikip weik ulirye, aning yala-yala nirya deice tamuk ulula atia.

1 Korintus 15:25

Ara, Kristus arye, aning-aning nirya deice tam ulirye, aning-aning nirya talibuka daulamlya ani, sikce, ‘Yesus ara, nun like’ tenen, elti, yaninyak ning ap, yaninyak ninye nirya ap ara, obisiblirye, malye kipnamle. Malye kibuka bisiplyoura, malye deiyok nang nirya kum kipdeiplyopura, Allah arye, aning nirya dobuka, Yesus el amu tam deipliba, Yesus arye, aning nirya yanipnamle. Aning nirya akunum winiplya deice arye, Yesus el talilye ning nirya dobuka, el Li Koprop Allah ati arepnamle. Aning nirya ara, el li Allah ati arepnamla anya arye, minopce apil nirya donamle.

Lukas 19:27

Bukni, ‘Anye bira, nun weik ninye deiyoknye Raja kum unamsile,’ tenepnikce, ‘Anye bira, nun like,’ tenelamnik nang ara, na dam boyanumunce, oplopmunyopura eipnune. Aninye deiyoknye birye el pil don nang ati nyabuk.” Yesus arye nyabuk. Yesus arye awinipmanto yupu nyabukura, el ap unmek nang arye kekebik.

Matius 25:46

Nyapnyopura, adiparyuk, sik malye unyak ninye ara, dopdeipniba, Allah arye wenebuka pia opnamle bukni, sik diksukum unyak ninye ara, telebukirye kam pia unamake. Yesus arye el mapu ati ayupu nirya nyabuk.

Mika 5:4

Tonda, Asyur mutuku ninye arye, ‘Israel ninye malye kibibirye, opnamabe’ tenen, nun mutuku noutam yanuka weksetingce, nun mutuku tuku yanuka yanipsitingopura, Israel ninye nirya mikip kibikirye, sik tekbarye kalikna deiyok nang ton, wibuka tekeipnamake. Sikda, gembala atonun nang kibuka, Israel yala nang melinamake. Aning atonun, anggunti, ‘Teleb bisik ara ani, teleb winin ning wininamlum ning ara ani,’ nyabuka peterenamsiaka ati, weik deiyok nang pinbarye arye, ton wibuka deipnamake. Winibicopura, apinbarye deiyok nang arye, Israel ninye talibikirye, kalikinamake.

Yesaya 11:10

Allah arye tenyamuk talak akunum kiplyopura, Daud birye deibukba, deipdanin yangalamikca ani, deibikceba, aminyan talak Raja kipnamlanye biti, im sirya, mutuku nirya unamak nang arye, el tibuk dinamake. Sik im sirya, mutuku sirya nirya, unamak nang nirya ara, el anye ulamlyakuk yakirye, ‘Se, anye nun ton biktibyeʼ tenen, el dam yakirye, el tibuk, si erenamake. El anye unamla ak ara, pia telebuk upnamle ati, ninye mutuku sirya, im sirya nirya eibicopura, ‘Se, el ulyak ara, pia telebe,ʼ tenenamake.

Ibrani 1:8

Allah arye, el im deice pil don nang malaikat ati, ayupu nyapdeibukba, el amu tam talye pil don nang atonun unyak bukni, el Mi Kopropa ati ara, yupu yuk nyabuke. Allah arye el Mi Kopropa ati, nyabuk yupu ara, asukum deipnusine. Ara, Allah arye nyapdeibukba, Mazmur buku noutamak arye, sekamik yupu ara ani. ‘Anda Allah ulyame. Ance ninye nirya ap, aning-aning nirya ap talibuka, weik deiyoknye unamlam talak ara, an talipnamlam ning ara, pia kum dankunamle. Sirya dakna kum, pia aunamle. Aning-aning nirya talibuka, weik deiyoknye unamlama deiyok ara, pia teleb ubuka diksukumuk unamlama atia. Aning nirya talipmince, pia diksukumuk unamlame.

Lukas 19:12

Tonok talak ara, ninye yala deiyoknye, el amu tam tuba ulamuk talak ara, utenebuk. ‘Yuk karin mutuku binyopura, omutuku ninye arye, ‘Nun raja unamsil’ tenen nati, ninye deiyoknye una ati, erepdeipniceura, tamubuka na mutuku yanirye Raja unamne,’ tenebuk. Utenebukce, el pil melin nang nirya ati yukubuk.

Bilangan 24:18

Tonda Edom mutuku ninye nirya obuka sirya daknamle. Tonda el mal olan nang, sik si Seir mutuku ninye ara, dotalak yanamlanye, Israel ninye sik deiyoknye birye obuka sirya dakliba, sik Edom mutuku nang ara el amu tamuk unamlume. Edom mutuku nang ara, amu unamlum bukni, sik Israel ninye uk ara, mikip weik upre bakirye, erena ninye unamake.

Bilangan 24:20

Bileam birye Amalek ninye ulamik mutuku dinmokce, tabakana ati, ayupu tonap nyabuk. “Aminyan dotalak winipnamuk ning ati, yupu tonap dukdongobuka nyapnusine. Amutuku-amutuku nirya ara, anggun Amalek ninye aryuk talibuka umumce, weik mambul ninye ululume. Bukni wini talak akunuma, sirya talak ara, anggun obuka yaknamsiake. Ara, talye ati kume. Amalek ninye obuka sirya dakikiba, kum danamake.” Bileam birye nyabuk.