Pia Teleb Lek Aik noutamak delilamik ning ara, nukuka nyapnusine. Ara, emas arye domika ara, sererem maka aik dolamla atonun ubuka, domikce uku seknarye, nintong teleb ning uku dilamik. Aning ara, anyaik delilamik. Tonda, pia teleb marikna muamikce, emas dobuka, el nong bol deice tilibuka deiyamik. Deiamikce, amarikna pum bisik ara, Allah arye Musa ati, “Wininamlulume, aning ara, kum wininamlulume,” nyabuka, nyalilamuk yupu ara, keil pala deice sekamuk ning ara, akeil pala dobuka, amarikna pum bisik deiyamik. Amarikna ara, Pia Teleb Lek Aik noutam akuk deiyamik. Tonda, Allah arye Israel ninye ati, im deice arye, yo kurun atonun saklamukba, arilamuk din ning, aning el si ara manna, mitik anun bulubuka kintinipmika arye, amarikna pum bisik dongobik. Ara, aning saklamuk talak ara, ton bulubukabikce, emas arye tilibuka, domik mek makau pum dongobik ning ara, aminyan talak amarikna pum bisik dongamikce, dobuka deiyamik. Tonda, Harun el kama bolamukbuk, kwapu silikuk ning ara dobuka, amarikna pum bisikuk dongamikce deiyamik. Amarikna ara, Pia Teleb Aik noutamak deiyamik.
Bilangan 17:10 - Eipomek10 Musa birye, aning nirya yanuka, peterebukba eibikopura, Allah Yahweh arye, Musa biti nyabuk. “Harun el kama kwapu silikmal ning ara, tuba tamubuka boyamince, na Allah arye nyapdeipmase yupu libuka, deiplum marikna damuk yanuka, deipnulyame. Ayanuka deipnamalam kama ara, Israel ninye arye, moubuka bikikirye, ‘E, aning ara, Israel ninye kan-kan bukni, Korah ap, el tam nang ap arye, Musa nyamuk yupu kum kekelamika deice arye, Allah el yupu yaniplobika ati, Allah arye anang nirya ati, wenebuka oplobuk ning ara, eibupu.’ ‘Winyamsuke,’ tenebikirye, Israel yala ninye arye biknamake. Tonda, “Min arye Israel yala ninye malye upmaki bukni, nun atalak unmap ninye ara, tuba malye kum upmabe,’ tenebuka, kanye moubuka unamake,” nyabuk. Gade chapit la |
Bilangan 17:10
23 Referans Kwoze
Na kayapu, talye nang arye, talye-talye yupu, nong kum upnamle yupu talye nyaplobikiba, ‘Mankau arye, tilila ning dib tenebibyak’ tenen, anggun kanye moupnamlulume. Talye ati kum nyapsine. Amalye nyapmasin ning nirya wininyak ninye arye, Allah el yupu yaniplobuka, wininyaka ati ara, Allah yu weik upliba, sik nong deice ikin ning weik deiplirye, weika arye, wenelule.
Nabi Yesaya birye nyabuk. Se, Allah Yahweh arye, mambul yupu akunum nyapmasila ati, anggun nirya kekenamlulume. Anggun tukwak mutuku umunce, malye winimunye ninye nirya ara, moubuka kekenamlulume. Anggunda pia bicoe. Im deice ululum ninye nirya ara, moubuka kekenamlulume. Se tukwak mutuku ululum ninye nirya ati, Allah el si Yahweh arye nyabuk yupu ara, ani. Se, sik Israel ninye ara, ‘Na tenen ninye unamak’ tenen, wipdeiamsirye, pia melinun bukni, mitik mapu arye, talye-talye yupu nyaltakalamak touk, sikce nati batakaninyake. Sikce nati yaniniyake.
Ati ara, Allah anda, im deice ulyamak arye, na melin ning dopkwetepnamnilame. Tonda, ance na melibuka lyepdopnamnilame. Yu nang arye, nati, ‘Anye opnuyap’ tenen, warikininyak nang nirya ara, an Allah arye, anang nirya wenepmince, obuka sirya daknalyame. Winipminyopura, sik nirya alye dakdanamake. Allah arye, ‘Winipnamne,’ tenesilirye, nyasilye touk, batakna kumce, aninguk dipkoprob winilule. Ati, na ni Allah arye, ‘Winibuka pia bico tenekununa ati, pia teleb kipdeipnamkine,’ nyalin yupu deice arye, nyapdeipnuk ning nirya ara, pia nati, dipkoprob melinamnile.
Daud birye kanye deibuka, ‘Telebe,’ nyabuk bukni, Daud ap binamik nang kan-kan bukni, ton tam nang ara, pia kanye talima malye nang ap, tonda malye-malye unmek nang ap arye, sik anang arye, sik kwit capu mitang ubukba, Besor mekinuk ulamik nang ati, “Sik anang ara, Amalek nang olbana ati, neika kum binmeka ati, Amalek nang arye dobuka, delilbinamsikak boyanmap ning ara, sik kum doproptinge. Aning bokuka, sikti, kum arepnuyabe. Bukni, sik kilapu ap, mapu ap ara, ananguk doprobikirye, sik mutuku koproba bobinamake,” nyanmek.
Amoupdeibik ning ara, Israel ninye eibikirye, asum Allah arye, Korah yala nang ati wenebukce, tuku likdobukba, tuku pum bisik biyikce, diplamik nang unyakak sukum biyik ning ap, Allah arye uku dopkwetebukba, Korah tam nang nirya dibuk ning ap, tuba tamubuka tenebikce, bikik. ‘Ara, emas teikuka, mitik pala kibukba, amesba deice deibik ning eibikce, bikinamakʼ tenen, bikilina ati, aning kintinipdeibik. Tonda, Harun tam nanguk, Allah dam yakirye, siltong teleb nyan ning ati, arepnamting bukni, Harun yala kum nang arye, yuk ninye yala-yala nirya ara, apil pia kum dopnamtinge. ‘Aning babye biknamakʼ tenen, aning kintinip deibik. Ura, yuk yala ninye nirya ara, ‘Allah el si erena ati, uku ap, siltong teleb nyan ning ap, el dam yanuka areptibye,ʼ tenebikce nang ara, asum winibuk ning tuba tamubuka tenibikcopura, ‘Ilil weik upnamleʼ tenen, bikilin ning deibik. Yuk yala ninye arye, malye kibikirye arebikcopura, Korah ap, el melin nang ap, obuka kum daneibuk touk, unamake. Ayupu nirya ara, Allah Yahweh arye, Musa el kekenak nyapdeibukba, elce Eleasar biti, binuka ayupu nyabukba, kekebukce, anyapdeipmok touk, ubuka pil dobuk.
Auku dipmalce, seklopmal emas ara, wipnulyame. Ara, uku ap, siltong teleb nyan ning ati deipmek ning ara, wini talak ara, aning pia lekuk ulule ati, aning wipnulyame. Korah tam nang, sik 250 nang arye, aning boyanmangurye, uku dongopmangu siltong teleb ning nirya ara, malye upmangu nang arye, wininmangu ning ati, Allah el uku arye, sik malye nang nirya, akunum dibukba dipmek bukni, emas batakmangu ati, wini talak aning ara, lek ning akunum upmale. Ati, aemas binuka dopmince, memen ning martalok arye teikminyeba, pala mitik tonun uplyopura, kam ning obikirye, uku dongona ati memepdeibik ning, el si mesba deice ara, emas arye kalupdongopnulyame. Ara, sik Israel ninye arye, aning eibikirye, ‘E, aning ara, malye winyamik nang ati, Allah arye, asum wenebuka opmuk ning ara, ani,’ tenebikirye, bikinamaka ati, bikilin ning ati, mesba kalulongona ara, emas arye memedeipnalame.” Allah arye, Musa biti nyabuk.
Tonda, Musa arye nyabuk. “Allah el si Yahweh arye nyapsuke. Akwaneng ning el si ara manna bulubuka, ikin bitinye libukapmunce, dokola deipnamlulume. Telebak deipmunyopura, dapia unamlume. Ara, aminyan doryanamle talak noutamak ara, manna ning deipmalumba, anggunce deiplumbuk dadeipdanin, banamak ninye nirya ara, sik bidamang aning dilyanganamak. Ara, Mesir mutuku noutamak, narye lobuka boyasise talak, yini mutuku noutamak arye manna kwaning arepsiba, dinmalum ning ara, anggun mapu nirya kel kipnamaka ati, nyapsine,” Allah arye nyabuk.
Allah Yahweh arye nyabuk, “Se, anggun Israel nango. Gibea mutuku noutam ulamlum talak arye, deiyok koubuka, malye winin ning talibuka ulamlumce, tuba winilulume. Amalye winilamlum ning ara, sik amutuku tuba unyak Israel nang nirya arye, aning bikna kumce, tuba pia malyeuk wininyakce, na yupu yanininyake. Ati ara, Gibea mutuku ara, anggun mal olan nang dopdeipniba, olyanamsiake.
Tonda, nun apu yapu arye, Allah ati, malye kanye bobuka, “Elce winipmasil ning ara, nun like. Elda yata ati ikin ning arisulul do?” nyabuka, Allah ati wenebuka derelamikce, elti, winildelamik touk, nunda kum wininamabe. Sikce Allah ati wenebuka winildelamikba, Allah arye, yu ubukba, el im deice melinanye malaikat tonok, el si ara, Ninye Ona Deiyok Malaikat, anye bira dobuka sik kan-kan dopdeibukura, ninye yupa weik oplobuk.
Akunum kintinipminyopura, na ap, ninye ap, eldana ati, kambing bol arye dolamak tenda aik boyanuka kintiniplumakuk, boyanamlyame. Tonda, narye, “Aning ara wininamlume, aning ara pia kum wininamlume,” nyapdeipse yupu, keil pala deice sekuka arepsiba, ance libuka deiplum marikna pum tam, amarikna damuk, akama 12 boyanuka delilyanulyame. Amarikna dam ara, atalak-atalak nirya, an ap, na ap, neika epdanuka, yupu sisikinyamak ati nyapkine.
Winipmokopura, Musa birye, akama nirya dobukabukce, Israel ninye dinmekakuk, yanuka peterebuk. Winibukce moubuka peterebukba, awinimuk ning nirya, sik asing arye eibikce, bikik. Winibikopura, Israel ninye yala yuk-yuk, deiyok kiamik nang arye, sik kama yuk-yuk, awinimuk ning nirya eibikce, ‘Se, yata wiripmasil do?’ tenebuka, sik yuk-yuk deiyok talibuka ulamik touk, akama tamubuka doprobik.
Musa birye Israel ninye ati, nyabuk. Anggunda, luba kina meme. Tuba teninamlulume. Mesir mutuku arye batakuka yangalalumce, ninye kum mutuku noutamak balalumce, Yordan mek dam yanuka, keting yangalamle tam, tuba ulalum talak nirya ara, malya kibuka malye-malye winilalumce, Allah el si Yahweh ati, malye kilalumba, anggunti lik ubukba, el yu weik ulamuk. Atalak ara, Musa birye, Yordan mek otam batakuka, Yordan mek koubuka, keting wekelbalamle tam, min kum binamlum tam ati, nyapne. Anggunce Allah el si Yahweh, el yupu yaniptabuka, malye ulamsuk buk, anggun kanye talima erelalumce, el yupu kum kekelalume.