Bilangan 12:6 - Eipomek

⁶ Birik talak ara, Allah el si Yahweh adiparyuk sik bitinye ati nyabuk. Kekenurume! Anggun noutamak nara Yahweh, na yupu laka nyalulnye ton aulyopura, el kel kina ati, kum mapmalye talak ara, el kanye talima noutamak laka nyaniba kekelule. Tonda, lengdar maplya deice arye, na wininye ning laka nyaniba, eibuka kel bikilule. Tonda, kum mamlye talak bukni, mambul yupu nyapnyopura, kekenulule. Tonda, yuk talye nang nirya ara, aning nirya kum eibuka kel biksiting bukni, narye arepneba, na pil donye birye mambul ning dilyalirye, narye elti, na yupu laka nyalinune.

Bilangan 12:6 Referans Kwoze

1 Raja-Raja 3:5

Winilamuka ati, tonok lukunyan noutam ara, Salomo lengdar mabukba Allah el si Yahweh arye, Gibeon mutuku deice lak kibukba, Salomo eibuk. Atalak ara, Allah arye, “An tenepmalam ning nyapminba, dipkoprob arepnamkine,” nyabuk.

Kejadian 46:2

Arebukopura, alukunyan noutam arye, Allah arye Israel binyak, lengdar mapmoka deice arye nyabuk. “Yakub, Yakubo,” nyabukura, Yakub birye, “Naie, na aunmane, kekepkine,” nyabuk.

Lukas 1:22

Sik teniltonmek karen ara, Zakaria aik pum arye kutukuka, buru tam tikilbiyukura, yupu ton pia kum nyapmanto ubuk. Yupu kum nyapmanto ubukce, ‘Na yupu nyapnun’ tenen, taruk kununmok. Taruk kununmoka ati, anang nirya arye, ‘E lengdar mapmakirye, lengdar deice elilamak ning atonun, Allah arena aik pum arye eipmala ati, unmala’ tenen, kel bikik.

Lukas 1:11

Moronmekura, Zakaria arye anyaik pum pil donmokbuk, nintong teleb ning uku dongopnuyuk talak sirik tam, Allah el nyapdeipne ning pil dolbananye ap, Allah ati yupu lak lelbananye ap, malaikat tonoknye talye karin arye kutukuka tikilyayuk.

Daniel 10:8

Sik anang ara, bai sakuka biyikce, bataknikopura, asukum ara, na yuk tikmase. Winipmasirye, talye karin arye, alak upmokba eipmase ning ati, ‘Se, yata wiripmal do?’ tenen, dinauk unmase. Dinauk unmase talak ara, na babye, mikip ton kum upnukba, mitang pia upnuka deice arye, na urasin babye, ninye dipmanto ubikiba, urasin mitik tonun kurun ulamle touk, upnuke.

Yehezkiel 1:1

Ara, atalak ara, keting tamun yupa weik, yupa tonok kepdopnye pamubarye (tiga puluh tahun 30) ubuk. Dumu wala arye, like pamu sum (tanggal 5) ubuk sum ara, Atalak ara, Babel mutuku ninye deiyoknye, Sisinanye Nebukadnesar ap, el yin talin nang ap arye, Israel ninye tongobuka tapu koubikce, Babel mutuku bobinamsikba, daulamua ani, keting tamun pamubarye, akunum kibukopura, mek si Kebar mek lelun unmase. Ara, na Yehezkiel ap, Babel mutuku nang arye, yuk Israel ninye bobuka delilbalamik ninye ap, Kebar mek lilunak unmapu. Atalak ara, Allah arye, im deice bublan kukibukba, weik mambul ning ton, laka kipsukba, narye eipse.

Rasul 10:11

Im deice arye im dana-dana likdobukura, dinmokbuk, pala baju arye yangabuka mouse dana-dana talipmok akarye nimalye kulukuyanganmok.

Matius 1:20

Utenyamuk bukni, Yusuf aning ati, kanye talima ikin kanye tuba ubuk talak ara, mapmokak, Allah el im deice pil donye malaikat arye, Yusuf el lengdar mabuka deice arye yanuka laka nyabuk. “Daud el yala nang arye deipkuknye, Yusufo, Maria el mi bobuka ara, ninye arye kuma. Allah El Dib Kanye mikip deice arye mi bobuke. Aning ati ara, ilil una kume. Maria talya mangkau asa dopnalame.

Daniel 8:2

Aning like bitinye talak, lengdar mapsirye eipse ning ara, ani. Na una ati dopropse mutuku ara, Persia mutuku noutam bukni, provinsi si ara, Elam unmase. Anoutam ara, Susan mutuku uk, lak kibukba eipse. Ara, Susan mutuku noutam tikmasirye, natikmase mekin, el si ara, Ulai mekin tikmase.

Matius 2:19

Yusuf bira, Mesir mutuku noutamak daulamuka ani, Herodes akunum dibukopura, Allah el im deice pil donanye malaikat, lengdar deice Yusuf ati nyalyayuk.

Daniel 7:1

Babel mutuku ninye deiyoknye, Belsiyasar taleamuk talak bukni, keting tamun tonok deice, Daniel birye mapmok talak ara, lengdar mabukce, lengdar dib eibuk ning ara, nong kum ubuk bukni, el kanye noutamak ara, Allah arye el kel bikna ati, arebukba, moubuka bikuk. El tenebukce, lengdar deice eibuk ning deiyok ara, mitik tonun sekdeibuk.

Yeremia 23:28

Ati nyapsine. Sik tilila nabi-nabi nang arye, ‘Lengdar mapsa deice, Allah arye yanuka nyapmanu yupu ara, ani,’ tenebikirye, nyapnamak nang ara, danyanamakca. Bukni, ton nabi-nabi nang ara, dipkoprob narye yupu nyapdeipniba, laka nyapnamak nabi-nabi nang ara, ‘Narye, nyanamlyame,’ nyapdeiamse touk, kum bataknamaka ati, sikce diksukum yupu uk nyalamtinge. Winipmanto ara, ninye arye dipmanto ning, el si gandum ara, talye palamle ning mutmuta atonun kum ulule. Aning bitinye atonun kum ulule. Atouk, narye nyasinye yupu ap, tilila nabi-nabi nang arye talye nyaltakanyak yupu ap, atonun kum ulule. Ati, ‘Sikce nyasikce yupu ara, dipkoprob do, tilila ning do?’ tenen, pia moubuka teninamlume. Na Allah Yahweh arye nyapsine.” Allah arye nyabuk.

Mazmur 105:15

Allah arye yuk mutuku ninye deiyok nang ati nyalamuk. “Sik Israel yala ninye ara, narye wepdeipse nang anya arye, sikti, ton kum dupnamlulume. Tonda, na yupu nyapdeipniba, laka nyan nang, nabi-nabi nang, sik dam ikin ning ton kum delinamlume,” nyabuka yupu seklamuke.

Mazmur 89:19

Aning ati ara, nun ninye deiyoknye Raja ara, nun ni Allah Yahweh, ance wibuka deiplumce, arepsulume. Atonun, nun Israel ninye wibuka akwamsuluma deiyoknye bira, nun ni Allah, an tonok Weik Erena Deiyoknye ulyame. Allah an dam ara, malye winin ning tonok babye, pia kum ukulule. Anda, pia Telebnye dem aniryuk, nun Israel ninye ati, kalikuka melisilyame.

Ayub 33:15

Winipmanto ning nyapnukine. Nun ninye ara, lukunyan wi talipsilye ati, mabipye talak ara, Allah elce lengdar deice ap, lengdar mana deice arye, nun dam yanuka, yupu nyalisulule.

Ayub 4:13

Pia lukunyan noutam, ninye nirya ara, pia malamak talak, na dam yayukce nyapnukba, kekesirye, mambul kanye bobuka, mapmase. Winipmasa deice arye, lukunyan malye lengdar mapsa.

Keluaran 7:1

Musa arye ayupu nyabuka ati, Allah el si Yahweh arye Musa biti, tamubuka nyabuk. Teneipdelyame, na dipdekisirye ereipkise. Aning ati, narye anti yupu nyapkiniba, ance an du Harun biti, laka nyapminba, elce Firaun dam nyapnamle. Firaun arye anti, ‘E anye Musa birye nyanulul yupu ara, Allah arye nyapnamnutua atonunuka,’ tenenamkile. Tonda, an du Harun bira, na tenepnye yupu nyapkiniba, ance elti, nyapminyopura, elce an melina ati, Firaun el dam nyanamle. Ance nyapminba, Harun birye, ‘Allah arye nyapsile,’ nyabuka, Firaun ap, yuk nang ap ati, laka nyanamle. An melina ati, elda nabi atonun kibuka unamle. Anirya ara, na Allah winipnamnarya.

Kejadian 20:7

Wini talak ara, anye Abraham ati, el kil dobuka tuba tamubuka arepnulyame. Elda, na yupu lak nyana deiyoknye ulula anya arye, elce nati moropnilyeura, kum opnamakine. Tuba kam unalame. Bukni, ance akil dobuka tuba tamubuka el akanye biti, kum arepminyopura, na pia dipkoprob nyapkine. Narye wenebuka opsiniba, an babye an asik nang babye, nirya dipnamlume.” Allah arye Abimelek biti nyabuk.

Kejadian 15:1

Aminyan talak ara, Allah arye, Abram wimabukba, lengdar deice arye, ayupu nyabukba kekebuk. Allah el si Yahweh arye nyapdeibukba, Abram kekebuk yupu ara, ani. “Abramo, an ilil una pia meme. Nara anti, weik deiyoknye ununa anya arye, pia kalikuka dinamkine. An bona pia weik talinanye ulalam ning ara, bona kume, ara natia. An menenga atonun dopropnalam ning ara, na uka.” Allah arye, Abram biti nyabuk.

Wahyu 11:10

Aning kum bukni, tukwak mutuku im sirya, mutuku sirya nirya, atalak unamak ninye nirya arye, abitinye nang obuk ning ati, “Merekuka opmale. Ati nun kanye deipmabe,” nyabuka kanye deibikirye, kil-kil upliba, sik kayapu nang ati, urdem arin ning yuk-yukak nirya babye arilanamake. Deiyok ara, Allah el yupu laka nyan nang, kam ulamrik talak ara, kanye imun uk dina ap, tukwak mutuku mek nirya, ining ubuk ning ap, yuk ikin ning ap, ‘Nun nong deice wenebuka deipsirika ati, merekuka’ tenen, kanye deibuka arelanauk unamake. Aning nirya ara, like winilye sum ap, tonok sum noutamak ap arye wininamake. Awininamak ning nirya ara eipse.

Wahyu 11:3

Tonda, na yupu laka nyana deiyok nang bitinye ati ara, na mikip weik sik deice deipnyopura, yupa weik keting tamun winilye ap, tonda noutam ning tonap, atalak noutamak nirya arye (1.260 seribu dua ratus enam puluh sum) na yupu laka nyanamrake. Ayupu nyanamdak talak ara, pia malye baju, karung goni atonun ongonamrake. Ara, ‘Imun kanye bobuka, ninye nirya arye engenamak’ tenen, amalye baju ongonamraka ati nyapkine.

Efesus 4:11

El Kristus aryuk, ‘Apil, yala-yala nirya donamak’ tenen, el mikip deice arye, pil dona deiyok ning yala yuk-yuk bokuka, tukwak ninye ati arepsuk ning ara, ani. Allah yupu dobuka peterelbana ati, deiyok koupnamik Rasul nang ap, “Allah yupu ani,” nyanyakce, aminyan winipnamle ning lak lena nabi nang ap, Allah ati dib kum tenenyak ninye, ‘Dib tenepnamak’ tenen, peterelbana nang ap, Allah ati dib akunum tenebik ninye, sik deiyok nang ap, Allah yupu sekik ning peterena nang ap, apil dona deiyok ning nirya, el mikip deice arye, bokuka yuk-yuk arepsuke.

Rasul 10:17

Welebukura, Peterus arye el lengdar atonun dinmok ning ati, ara ‘Yata wirina ati do? Aning eipmana anya arye yata wiripnaman do?’ tenen, pia tenenauk unmoka ani, Kornelius arye dopdeibuk nang ara, ‘Simon aik ani,’ nyabikura, kekebikce, Simon asik dam poka buplan bisik dam tikilyayik.

Lukas 20:6

Bukni, amutuku noutam unyak nang nirya arye, ‘Yohanes ara, dipkoprop Allah yupu lak nyananye nabi ulamuk,’ tenenyaka ati, ‘Ninye arye,’ nyabibyopura, awekmak nang nirya kekepsikirye, yu uplibuk keil dobukapbikirye nun opsicake.” Nyapdayikce, aYahudi yala deiyok nang arye ilil ubuk.

Matius 23:37

Ura, anggun Yerusalem mutuku ululum ninyeo, Allah yupu laka nyabuka peterenyak nang, narye nabi-nabi weike anggun dam dolkwetelamsise bukni, anggunce anabi sik nong deice keil dobuka ona ap, tonda, talye oltakana ap ulalume. Narye anggun Yerusalem mutuku ululum ninye ati, ‘Ayam el mapu irilamle atonunuk, na wiamse ninye kalikuka melinamsin’ tenen, patanululba, anggunti tuba tenesunun bukni, anggunce, ‘Anye Yesus ara, nun like’ tenen, tuba batakanululume.

Matius 23:34

Anggun lyepdanmanto kum nang ululuma ati, aminyan talak na dopkwetepnamsin ning ara nyapnusine. Ara, Allah yupu lakak kibuka nyan nang, nabi nang ap, weik kel nang ap, Allah yupu peterena kel nang ap, anggun dam dopdeipnamsine. Dopdeipsinyopura, ton nang ara, oltakanamlume. Ton nang ara, wanwanun yo deice onamlume. Ton nang ara, anggun Allah yupu peteren aik pum arye, kama arye kulanamlume. Ton nang ara, ‘Optibye’ tenen, mutuku-mutuku nirya dobolkirikinamlume.

Matius 23:31

Nyalulum bukni, anggunce anang ati, “Nun apu yapu unyake,” nyanmalum deice arye akunum malye yupu nyaldalulume. Anggun apu yapu malye winilamik touk, anggun babye atonun, talima malye nang umunce, malye winilulume. Diksukum ulamik nang ati olamik deiyok nang ara, anggun apu yapu anya arye, anggunda sik mapu ululuma atia. Ayupu nyamunya deice arye, Allah yupu laka nyalamik nang, nabi-nabi nang olamik deiyok nang ara, “Sik mapu ara, nun unyabe,” nyabuka, anggunce anggun bidamnye arye, malye yupu nyaldalulume.

Matius 27:19

Pilatus arye, ‘Yesus yupu lipsisikuka bokeipnun’ tenen, ninye yupu lipsisikuka bokolinanye bunak deice bukmokak, el kil arye yupu nyapdeibukura, yuknye birye ayupu nyalyayuk. “Kao, anye Yesus ati ara, ninye yupu bokuka kum wenepnulyame. Na lengdar mapmanu deice arye pia ikin upmanila ati, anye bira el malye ning ton dipkoprop kum ubuka anya arye, bataknauk upnulyame. Tonap elti, yupu talibuka kum bokeipnulyame,” nyabuk.

Ibrani 1:1

Minop talak ara, Allah arye nun apu yapu nang ati, yupu nyalamuk ning ara, elce nyalamukba, el yupu laka nyalamik nang, sik nabi-nabi nang kekelamikce, nun apu yapu nang ati, laka nyalamik. Allah arye, el yupu laka nyalamik nang deice laka nyabuka nyalamsuk ning ara, like yupa weik ap, pil yala yupa weik ap dolamuka deice arye, laka nyalamsuke.

Kejadian 28:12

Asukumuk mapmok talak ara, lengdar deice arye, weik yo morona atonun ning eibuk. Aning ara, yo moromna urasin atonun ubuk. Ton tukwak mutuku anyapce, im deice tam dukdongobuka winipmokba, eibuk. Ayo morona eibukce, Allah el im deice pil don nang malaikat ara, welebina koulukuka, yana kinmekak eibuk.

Bilangan 24:4

Tonda, Allah arye nyaplye yupu kekenunye bira na unune. Allah elda, mikip weiknye ati ara, aning-aning nirya talibuka deice tam ulirye, Weik Erenanye ulule. Ati, elce lengdar mabuka atonun winipnya deice arye, mambul yupu yanuka laka nyaniliba, kekebuka elinune. Allah el si erena ati, tuku deice poulbinuka mapnyopura, na asing labuka dinyopura, aniryuk yanuka nyalinulule. Wininululba elinune, tonda kekenune. Ati, ayupu nyapnusine.”

1 Samuel 3:15

Nyabukba kekebukopura, Samuel mapmoka ani, beren tam arye bukuka, Yahweh el si eren aik bublan kukuka biyukopura, ilil ubukba, Allah nyapdeipmok ning nirya ara, Eli dam binuka nyalina ara, kum nyabuk.

1 Samuel 28:6

Winibukba, Saul birye, Allah el si Yahweh ati, moron deice arye, “Naio, yata wiriptinye do?” nyabuka asipdeyuk. Asipdeyuk bukni, Allah arye elti, yupu tamubuka lak kum nyabuk. Tonda, ‘Yata wiripnaman do?’ tenen, dililamik ning, el si Urim aning ton dipdeyuk bukni, aning bisik arye, Allah arye yupu ton, laka kum nyabuk. Aning atonun, lengdar mana deice arye ton, yupu laka kum nyabuk. Tonda, aminyan winipnamuk ning, laka lena deiyok nang, Allah el nabi nang babye, Allah arye kum melibukba, anang arye Saul biti, yupu lak kum nyabik.

1 Raja-Raja 3:15

Nyabukura, atalak aryuk Salomo bukukce, ‘E aning nirya ara, lengdar mapmanu deice arye, eipmanue,’ tenebukce kel bikuk. Kel bikukce tuba tamubuka Yerusalem mutuku biyuk. Biyukopura, Allah arye ‘Wininamlyame, aning ara kum wininamlyame,’ nyapdeiamukba, sekeiamik ning dobuka dongolamik marikna dam tikilbiyukce, Allah ati si erebuk. Ara, ‘Allah ap na ap teleb ubuka neika unanam’ tenen, teleb ning dobuka Allah ati arebuk. Tonda, Allah el si erena ati, kam ulamle ning obukabukce uku dabuk. Aning nirya akunum winibuka dakdongobukopura, el amu tam pil dolamik nang ati, weik kwalina yubuka arebuk.

Yeremia 23:25

Tonda, tilila yupu nyana nabi-nabi nang arye, nyanyak yupu nirya ara, akunum kekenune. Ara, sikce nyanyake, ‘Nun lengdar mabupu deice arye, Allah arye yanuka nyapdeipsukba, anggun dam yanuka nyapsiyabe,’ nyabuka, nyaltakanyake. Talye nyaplobuka, tilila yupu nyalinyak ning ara, na ton kekenune. Narye ayupu kum nyapse bukni, sik tilila nabi-nabi, nang arye, talye nyaltakanyake.

Daniel 2:19

Nyabukba, kekebikce, Allah morobikopura, alukunyan noutamak aniryuk, Allah arye Daniel biti, lengdar wi dung-dung anmok talak arye arebukba, duknyamuk yupu nirya, lakoprop kibukba, Daniel birye eibuka bikuk. Bikukopura, Allah im deice ululnye ati, si erebuk.

Kejadian 28:16

Allah arye, Yakub el lengdar mapmoka deice arye nyabukba, Yakub bukukce nyabuk. “Se, na ni koproba Allah, el si Yahweh, amutuku noutamak unulul bukni, na talye mangkau kanye bobuka unmanue ati, kum tenipmanue,” nyabuk.

Kejadian 37:5

Atonok lukunyan noutamak ara, Yusup bira, lengdar mapmoka deice arye eipmok ning, el du yapu ati, laka nyabuk. Aning nirya laka nyamok ning ati, sikce elti, ‘Elda nun pia like,’ tenelamik.

Kejadian 37:9

Aminyan talak, Yusup birye, lengdar deice ton mabukce, el du yapu ati nyabuk. “Na du yapu anggun kekepnululume. Na lengdar mapmanu talak eipmanu ning ara, ani. Ura, keting ap, wala ap, kurya sebelas ap, sik nirya arye nati, kisal dopmaniakce, nong kanupdongopmake,” nyabuk.

Ulangan 18:15

Ati, aning kum bukni, nun ni koproba Allah Yahweh arye, minop talak na Musa wipdeiamnuk atonun, nun ni koproba Allah, el si Yahweh arye, nun Israel ninye noutamak arye, na unya atonye, tonok ton wipdeipnamsile. Ara, Allah el nyalye yupu kekeplirye, sikti, laka nyanamla deiyoknye wipdeipnamsile. Wini talak, na Musa unye atonun, aminyan talak anye bira, Allah el yupu laka lena deiyoknye unamsile. Anye akunum wipdeiplyopura, anye nyaplye yupu kekebuka, unamlulume.

Ulangan 18:18

Musa an wipdeipkise touk, anggun Israel ninye noutamak arye, na yupu laka nyana deiyoknye, tonoknye ton wipdeipnirye, na yupu el dam nyapdeipniba, ayupu nirya dobuka, Israel ninye ati, laka nyalbanamle,” Allah arye nyabuk.

1 Samuel 3:21

Atalak noutamak ara, Allah Yahweh ara, el si eren aik, Silo mutuku damak arye yanuka, deiyok kouna talak ara, el nyalamuk yupu deice arye, Samuel dam laka kipdeibukura, adeice Samuel birye, Allah el si Yahweh ati, moubuka tenelamukce, weika arye kel biklamuk.

2 Samuel 7:4

Nyabukura, asum lukunyan aryuk, Allah el si Yahweh arye, el yupu lak nyana deiyoknye, nabi Natan biti nyabuk.

Hosea 12:11

Tonda, minop talak ara, naryuk anggun nabi-nabi nang ati yanuka, ‘Winipnamlume. Tonda ayupu nyapnamlume,’ nyabuka laka nyamse. Tonda, lengdar deice arye, lak kilin ning babye, pia weik tonun, sik nabi nang ati areyamse. Winipsa ati, wini talak babye, nabi nang dam laka nyapnyopura, sikce aminyan talak, imun weik upnamle ning yanuka laka nyapniba, sik nabi-nabi nang kekebikirye, na mapu anggun Israel nang ati, laka nyanamsiake.

Yoel 3:1

Allah Yahweh arye nyabuk. “Na tenepse sum akunum dam uplyopura, Yehuda yala ninye ap, Yerusalem mutuku unyak ninye ap nirya, bulubuka deipnirye, sik ap, sik unamak mutuku nirya ara, teleb kipdeipnamne. Na Allah Yahweh arye nyapsina ati, dipkoprob nong upnamle.

Zakaria 1:8

Ara, Allah Yahweh, el im deice pil donanye, tonok malaikat arye, ining bi kuda basam deice bukmokce yanmokba, narye eipse. Ara, yo si, murad yo, tikamuk mutuku, atam binuka, tunim abuka tikukba, eipse. Binuka tunim abuka tikmoka ani, el balye tam ara, yuk kuda basam yata barye ton, yuk ning neika tikmek. Atikmek ning, sik bol nirya ara, ining bi ning ap, tonda ining bi ning bukni, mitik yala yuk ning ap, kurun ning ap, yanuka neika tikmek.