Bilangan 1:50 - Eipomek

⁵⁰ Tonda, Allah arye nyapdeibuk. “Sik Lewi yala nang ara, yin talin nang kum unamak bukni, na ap, ninye ap, eldana aik ap, anyaik pum tam unamle ning ap ara, kintinilil bilulume. Anyaik ning nirya ati, kalekinamlume,” nyapnamrurume. Tonda, sik anang pil ara, na si erena ati dolamik aik dona ap, anyaik noutam un ning nirya ap ati, kintinilin nang unamlume. Anggun Israel ninye, ton mutuku batakuka, yuk mutuku binamlum talak ara, sik Lewi yala nang arye, anyaik ap, anyaik pum tam unamle ning ap, kintinipmunce, aning nirya dopmunce, bobinamlume. Tonda, sik Lewi yala nang aryuk, Allah si eren aik dam ara, anggun tenda aik dobuka, antanap dongopnamlume. Allah arye nyapdeipsuke,” nyabuka, laka nyanamrume.

Bilangan 1:50 Referans Kwoze

Keluaran 38:21

Allah ap, ninye ap, eldana aik, el si erena ati, tia doltakna tenda aik ara, dekna ning weik tonun arelamika deice arye, anyaik dobik. Anyaik pum tam ara, Allah arye, “Aning ara, wininamlume, aning ara, pia kum wininamlume,” nyapdeiamuk nyalin yupu, elce sekamuk keil pala bitinye kintinip deibuk ning ara, anyaik pum tam noutamuk deibik. Anyaik dona ati ara, Musa bira, “Dekna weik ning, winibuka arepnamlume,” nyabuka, atonun ubuka arebik. Aning arebik talak ara, Musa bira, sik Lewi yala nang ati, “Arepmak ning nukmunce, aning nirya sekuka deipnamlume,” nyabuk touk, aning nirya sekuka deibik. Aning nirya sekik talak ara, imam Harun el mi Itamar birye, deiyoknye kibukura, yuk nang ap apil dobik.

Bilangan 4:15

Allah Yahweh arye, Musa ap, Harun ap ati nyabuk. Na ap, ninye ap eldana ati, donyak tenda aik ulubuka bobanukce talak ara, arup nyapmasin touk, min yuma ara, Harun ap, el mapu anyapce, na si eren aik buru tam ning ap, anyaik pum tam ulye ning nirya ap, kintinip deibikirye, teleb ning arye siknipdongobikirye, kitipnamnyake. Winibicopura, sik Israel ninye bisik banukce talak ara, Harun ap, el mapu ap, sik minopce anyaik noutam delilamak ning ap, anyaik pum tam una ati, kintinip deiamikce ning nirya ap, minopce kintinip deibikirye, kalulongonamnyake. Akunum kintinip deibicopura, sik Kehat yala nang, sik pil ati, ayala nang yakirye, aning nirya bobanamyake. Bukni, sik Kehat yala nang arye, ‘Aning ara, nun ton eiptibyeʼ tenen, dilina ap, tonda anyaik pum tam delilamak ning dam bana ap, aning bol pina ap ara, kum winipnamnyake. Aning nirya ara, na Allah Yahweh ninguk unamle bukni, aning sik anang ton eibikirye, ‘Nun ton winiptibye,’ tenebicopura, atenebice nang nirya ara, dibinamake.

Keluaran 31:18

Ura, Allah el si Yahweh ap, Musa ap, Sinai mutuku deice yupu talipmarik ani, akunum sirya dakrikopura, Allah arye, ‘Wininamlulume, aning ara kum wininamlulume,’ nyalamuk yupu nirya, keil pala bitinye dobuka akeil deice el taruk koproba arye dana-dana sekukce, Musa biti arebuk.

Nehemia 13:22

Tonda narye, sik Lewi yala nang ati nyapse. “Anggunda abublan dam kalikna ati, anggun nong ap, anggun baju ap mek likinamlulume. Tonda, Allah arye, ‘Anggun nong teleb kilina ati, apil-apil donamlume,’ nyapdeiamsuk touk, apil ton donamlume. Winipmunyopura, tuba tamubuka yamunce, abublan nirya kaliklamunya ani, Sabat sum ara, pia malye ton kum unamsile. Teleb uk unamsile. Asum ara, Allah el siuk erenamabe,” nyapse. Nyapsa ati, narye Allah ati moropse. “Se, na ni Allah, narye, ‘Sabat sum tuba-tuba telebuk unamsil’ tenen, aninye arye malye winilamik ning nirya ati, kum daneipse ning ara, kum luba kinalyame. Awinipse ning ati, ance nati weik arye bico tenebuka melinamnilame,” nyabuka moropse.

Bilangan 20:11

Nyabukabukce, Musa el kama dobukabukce, akeil deice like bitinye deplobukba, mek kutukuka sakukba, Israel ninye ap, sik weilamik ning ap, basam ayala-ayala nirya ap, amek kwebuka dibik.

Mazmur 122:4

Amutuku ara, Israel nang yala-yala nirya yanganamake. Tonda, Allah el si Yahweh arye wipdeiamuk nang, Israel yala nang ati, “Winibuka winipmunce, anggun nirya ara, na siuk erenamnulume,” nyapdeiamuk touk yangakirye, Allah ati telebe nyabuka, si erenamake.

Nehemia 13:5

Tobia ap, dukdongobuka ulamdika anya arye, Elyasib birye weik kamar aik ton Tobia biti nukuk. Minop talak ara, ‘Anyaik ara Allah ati arenamak ning bulubuka delinamak’ tenen, kintinip deiamik. Ara, Allah el aik pum tam pil don nang ap, Allah ati arelamik gandum ap, nintong teleb ning el si ara, kemenyan ap, delina ati anyaik kintinip deiamik. Tonda, ‘Lewi yala nang ati arenamap’ tenen, persepuluan ning gandum ap, anggur tapu duk mek ap, zaitun yo duk mek ap, bulubuka anyaik delilamik. Tonda, aning noutam arye bokuka, sik pong-pong ana talibuka, mot sena deiyok nang ap, Allah el aik pum tam wekelban bisik bublan dam kalikna deiyok nang ap, sik yuk imam-imam nang ap ati, aning bokuka arelamik. Winilamika ati, aning-aning nirya dobuka, delinak ati anyaik kintinibuka delilamik. Bukni, Elyasib birye el kwit Tobia biti, anyaik nukuk.

Nehemia 12:47

Tuba ulamika ati, Gubenur Nehemia ap, tonda Zerubabel ap, ulamdik talak babye, sik Israel ninye nirya arye, asum-asum nirya sik taleamik ning noutam bokuka, sik Allah mot sen nang ap, Yerusalem mutuku dana-dana domik poka bublan domika, abublan dam kalikin nang ap ati, aning-aning nirya boyanuka arelamik. Aning atonun, sik Lewi yala nang patan ning melina ati, sik Israel ninye arye, sik taleamik ning noutam bokuka, arelyangalamik. Akunum arepnopura, sik Lewi yala nang arye, aning bokukapna arye, Harun birye deiamukba, dadeipdanin yangalamik nang ati arelamik. Ara, Allah el si eren aik pum pil dona deiyok nang, sik melina ati arelamik. Apil-apil nirya ara, Allah arye, “Aning ara wininamlume, aning ara kum wininamlume,” nyapdeiamuk touk winilamik.

Nehemia 12:22

Lewi yala nang sik du weit ati, deiyok kiyamik nang ap, imam nang sik du weit ati, deiyok kiyamik nang ap, sik nirya nukuka bikna ati si sekik. Asi sekna deiyok kiamik talak ara, imam nang nirya, sik ninye deiyok nang ara, ani. Ara, Elyasib ap, Yodaya ap, Yohanan ap, Yadua ap, sikce imam nang ninye deiyok nang kibuka, talibuka ulamik talak arye, si sekna pil babye, deiyok kibuka si seklamik. Wilamik bukni, Persia mutuku ulamik nang nirya ati, Darius birye ninye deiyoknye Raja kibuka taleamuk. Ataleamuk talak arye, imam nang ap, Lewi yala nang ap, si seklamik ning ara, atalak arye batakik.

Nehemia 12:8

Allah el si eren aik pum tam pil dona deiyok nang, sik melilamik nang, Lewi yala nang sik Yerusalem mutuku tamubuka yayik nang si ara ani. Ara, Yesua ap, Binuai ap, Kadmiel ap, Serebya ap, Yehuda ap, Matanya ap, ulamik. Matanya ap, el kayapu nang ap arye, Israel yala ninye yuk-yuk bulubuka wekmanak uk, mot sepra bana deiyok nang ulamik.

Bilangan 10:21

Gad yala nang akunum deiyok kibuka biyikopura, Kehat yala nang arye, Allah el si eren aik pum tam moubuka deiamik ning, Allah si erena ati, pil dolamik ning, weik mambul teleb ning ara, Kehat yala nang arye, aning dobuka banmek. Sik Gerson yala nang ap, Merar yala nang ap arye, Allah el si eren ati, cang kain bol aik dakuka bobikce, akunum menekuka banmeka anya arye, utenebik. ‘Anyaik uluplomik ning yuk mutuku binuka, minopce aning akunum kintinibuka deipmacopura, Kehat yala nang arye, anyaik pum tam moubuka deiamupu mambul ning dobuka, aminyan talak yakirye, aning anyaik pum tam, ila tuba tonap dongopnamake,’ tenebikce, yuk-yuk biyik.

Bilangan 2:17

Israel ninye yala yuk-yuk nang, sik akunum minop menekuka bacopura, anoutam ara, sik Lewi yala nang, sik aminyan dukdongobuka banamnyake. Ara, sik Lewi yala nang arye, Allah ap, ninye ap, eldana ati dolamak tenda aik ara, sik ayala nang aryuk bobanamnyake. Allah arye, “Sik Israel yala ninye aik nirya, dopnamlum noutam ara, sik Lewi yala ninye dem, sik asik koproba dobikirye, na si eren aik dana-dana tam doupnamnyake,” nyapdeiamuk touk, aninguk winilamik. Tonda, sik bisik balamikce talak ara, yuk-yuk aik dolamik touk winilamikce, anyaik-anyaik nirya, atonun dopnin balamik. Sik bisik ban talak ara, sik yupa yuk-yuk ulamik touk, sik bikilin ning ikamik ning ati, elilamikce, abisikuk balamik.

Bilangan 1:53

Sik Lewi yala nang tonok ara, na ap, ninye ap, eldana ati, tenda bol aik dobice, dana-dana tam, sik aik babye, antanap dongobuka donamake. Winibica deice arye, na ap, ninye ap, eldana aik ara, ‘Malye nang arye, malye ubicakʼ tenen, sik Lewi nang arye kalikinamake. Kalekinamak deice arye, sik yuk ninye ton, kum banamnyake. Winipmanto ara, yuk yala ninye ton, anyaik dam yacopura, na yu upnilirye, anggun Israel ninye nirya, anggun deiceuk, anggun wenena ati, ‘Ikin ning deipsinyakʼ tenen, nyapsine.

Wahyu 15:5

Aning nirya eipsopura aning ton eipse. Allah el si erena aik, im deice tam ulul ning pum bisik ara, Pia Teleb Aik, Allah tia talak ati yanuka ulamuk aik ara, talye nang nirya arye, wekmanto kum uamuk aik ara, kuklobukba lakak kibuka ak eipse.

Bilangan 17:7

Winibikopura, Musa birye, akama obarye (12) nirya ara, boyanuka, Allah Yahweh ap, ninye ap eldana ati, domikce, Allah arye, “Aning ara, wininamlume. Aning ara, pia kum wininamlume,” nyapdeiamukce, areamuk ning, Musa birye, keil pala deice sekdeiamuk yupu, boyanuka marikna pum libuka deiamuk ning, amarikna dam yanuka deibuk.

2 Tawarikh 24:6

Lewi yala nang arye, nimalyap dolamik ati, Raja Yoas birye, imam nang, sik deiyoknye Yoyada biti, “Yalyame,” nyabukba, yayukura, asipdeyuk. “Allah Yahweh el pil donanye Musa birye, Allah si eren aik dona ap, lipsisikuka memena ap ati, amutuku unyak Israel nang nirya ati, ‘Pajak yo bok bulubuka deiplulume,’ nyapdeiamuk ning ara, amutuku nang arye tuba kum delinyak do? Yata deiyok ati, sik Lewi nang arye, ayo bok bobuka, na dam kum boyanganyak do? Wini talak ara, ance Lewi yala nang nyapminyeba, sikce Yehuda tam unyak nang ap, Yerusalem mutuku weik aik noutam unyak nang ap, sik dam bicak arye, apajak yo bok bobuka boyanamake. Ayo bok ara, talye ati kum bukni, Allah arye, ‘Aning wininamlume, aning ara kum wininamlume,’ nyapdeiamuk ning, weik pala keil deice sekuka arebukba, el si eren ati, tenda bol aik pum tam dongobuka deiamik ning lipsisikuka dona ati, arenamsiake.” Raja Yoas birye nyabuk.

Bilangan 4:3

Tonda, sik ayala nang nirya, akunum si sekdum nang ara, mapu uk, sik umur tiga puluh tahun nemice nang arye, dipdongobuka, itam umur lima puluh tahun (50) kiamlye nang ara, sik si yuk ton seknamdurume. Sik anang ara, Allah Yahweh ap, ninye ap, eldana ati tenda aik noutam, pil yuk-yuk bokuka, dopmanto nang ati, sik si yuk bokuka seknamdurume.

Bilangan 8:19

Aninguk kum bukni, tonda sik Lewi yala nang ara, na Allah arye dobuka, sik imam nang, ara Harun ap, el mapu ap, sikti, arepne. Ara, sik Lewi yala nang ara, Israel ninye kan-kan unyak bukni, sikak wipdeipne. Ara, na ap, ninye ap, el dan aik pum tamuk talibuka, pil donamniyake. Tonda, sikcuk Israel ninye malye ubikce nang ati, ‘Allah arye wenebuka oplyak ati, namin kibuka meliplirye, aning nirya kum kipdeiptue,’ tenebuka, na dam yakirye, moronamniyake. Winipnikcopura, Israel ninye mangkau arye, na si eren aik dam yatumopura, adiparyuk opnamsitinye bukni, aning kumce, luba kipnamne. Aning ara, sik Lewi yala nang arye, pil donamaka deice arye, Israel ninye arye malye unamak ning ara, namin kibuka melipnamnarya. Sik wenena ati, mambul weikuk boyanuka, sik dam kum deipnamne. Sikda wenebuka kum opnamne.

Bilangan 8:20

Aning ara, Musa ap, Harun ap, sik Israel yala ninye anyapce, sik Lewi yala nang ara, ‘Allah el ninguk unamakʼ tenen, Allah ati arebik. Awinibik ara, Allah Yahweh arye Musa biti, “Winipnamlyame,” nyapdeiamuk touk, pil dobukabice, anang Allah ati arebik.

Bilangan 8:22

Aning ara, atalak arye dipdongobuka doupnin balamuk talak nirya ara, Allah Yahweh arye Musa biti, ‘Sik Israel ninye arye, Lewi yala nang wibuka dibikiba, na si eren aik pum tam ap, anyaik dam ap ara, winibuka pil dopnamnyake,’ nyapdeiamuk ning ara, anyapdeiamuk touk winibuka pil dopnin balamik. Winibuka, pil dobika deice arye, Lewi yala nang nirya ara, Allah ap, ninye ap, eldana aik pil dona deiyok nang kipdeibike. Anyaik noutam ap, anyaik dam ap pil dona ati, “Sikda winipnulyame,” nyana deiyok nang ara, Harun ap, el mapu ap, sikuk ulamik.

Bilangan 18:5

Ati ara, Harun an ap, an mapu ap, angguncuk, “Na si eren aik, pia noutam koprop, Teleb Lek Aik noutam ap, siltong teleb ning uku dongonak ap, pil dona ati ara, anggun dem aryuk wekuka, pil donamlume. Ara, ‘Talye nang arye, anyaik wekuka, pil dobikcopura, narye sik Israel nang ati, yu upninliba wenepnyakʼ tenen,” nyapne.