Ayub 5:2 - Eipomek

² Nyabukce, ayupu ton nyabuk. Bita moubuka kum teneplirye, walwal uk ululnye bira, kanye talima noutamuk, yuk nang arye elti, malye winibik ning ara, tuba-tuba teneplirye yu uplyopura, adeice arye dibilule. Aning atouk, moubuka kum tenenyak nang ara, yuk nang unyak ning ap, talinyak ning ap ati, ‘Se, aning ara, na uk doproptinye,’ tenen, kanye talima uk dilya deice dibinyake.

Ayub 5:2 Referans Kwoze

Penghotbah 7:9

Ati ara, moubuka teninamlulume. Anggun talima noutam ara, minopce derena ap, yu tenina ap ara, meme. Deiyok ara, sik walwal kanye bobuka, malye unyak nang arye, sik talima noutam teninyaka ara, yu weik upliba, pia malye ning teninyaka ati nyapsine. Sik talima noutam ara, yu weik tenen ninguk tenebikirye, walwal un ninguk wininyake.

Roma 2:8

Bukni, yata ninye do nirya, Allah el dipkoprop yupu batakikirye, sik bidamang patan ning atibuk tenebuka unyakce, malye wininyak ninye ati, Allah el yu weik upliba aninye ati, weika arye wenepnamle. Sik aninye ara kam pia kum unamake. Allah arye yu weik upliba, aninye ati weik arye wenepnamle. Aninye ara, kam pia kum unamake.

Hosea 7:11

Israel mutuku noutam unyak nang bukni, Efraim birye deiamukba, dadeipdanin yangalamik nang, sik dabu tam (arah utara) unyak Israel yala nang nirya arye, ‘Yata mutuku nang arye melipsiting do?’ tenen, otam binapna, atam yanamana kinyak nang unyake. Ara, mitik maka el si merpati maka arye, ‘Dan binuyap do?’ tenen, kanye tenina kumce, talye lukparabuka lakuka, otam lakuka binapna, atam lakuka yanamana kilamle touk, sik Israel nang babye atonun kiltonyake. Wininyaka ara, walwal arye unyake. Dipkoprob aning atouk, ‘Yu nang arye yanuka opsicakʼ tenen, anggunce Mesir mutuku nang ati, ‘Se nun kayapu, anggunda yanuka melipsululume,’ nyabuka morolamike. Atonun ton, Asyur mutuku unyak nang ati, binuka ‘Se nun kayapu, anggunda yanuka melipsululume,’ nyabuka morolamik. Winibuka morolamik bukni, sik yuk mutuku nang arye, kum melilamike.

Amsal 12:16

Yuk nang arye, wenen yupu nyabikiba, walwalnye birye kekeplyopura, adiparyuk yu teneplirye, minopce tamubuka yu yupu talye lukparabuka nyalule. Bukni, sik kel bikne nang arye, kanye moubuka teninyaka anya arye, yuk nang arye sikti, wenen yupu do, malye nyan yupu do, sik nong deice deibica babye, adiparyuk yupu tamubuka kum nyanyake. Sik kel bikne nang arye, ‘Kume, teleb ning ara aning do, aning do, moubuka tenipdekirye, aminyan talak uk yupu nyapnamabe,’ tenenyake.

Mazmur 107:17

Tonda ton ninye ara, sik babye malye ulamika, dekna deice arye, pia walwal nang winilamak touk winilamik. Winibuka ulamikba, sik malye weik winilamika deice arye, weik ikin uk dilamukba, weik ikin ning dololamikce, pia imun kanye bobuka ulamik. Ara, sik bidamang malye winilamik ning deice arye, sik aninye dam, weik ikin uk ap, ikin ning ap, yayukba dopdobikce, weik kanye imun ulamik.

Mazmur 92:6

Se, nun ni Yahweh, an weik mikip deice mambul pil dosiminyeba, eibipye ning ara, nunce ‘Se,’ tenen, kanye losulule. Nun akunum bikinyabe. An kanye talima noutam teneplum ning ara, pia mambul ulula ati, nunce pia kum biktibye. Weik mekwen kaurwe, kum wekmanto ulye touk, ance teneplum ning ara, kum bikmanto ulule.

Mazmur 75:4

Tonda, na tenyamse talak akunum yalyopura, tukwak mutuku im sirya, mutuku sirya nirya, lulukunamle. Winipyopura, ninye tukwak nang nirya arye eibikirye, ‘Se’ tenen, ilil weik unamle. Winipnamne bukni, dipkoprob naryuk, ‘Tukwak mutuku luluknamle’ tenen, tuku amu tam deipse ning ara, pia mikip kipdeipse.

Mazmur 14:1

Allah ati, diba kum tenenyak nang ati ara, ‘Allah dipkoprob kum ulule,’ nyanyak bukni, ayupu nyanyak ninye ara, sik pia walwal nang arye nyanyake. Adeice, sikce wininyak ning aning-aning nirya ara, malye ninguk wininyake. Sik anang ara, tonoknye babye, teleb kum ulule. Sik nirya malyeuk wininyake.

Ayub 18:4

An yu upkilyeba, wenen kanye teneminye ning ara, an deiceuk yakilyeba, ikin dolominyeba, uk talikule. Anda yatato ning tenelyama ati, winilyam do? Ance, ‘Na ti yu deice arye malye yupu nyapnyopura, tukwak mutuku nirya ara, luluknamle,’ teneplumce nyanululum do? Tonda, ance winiminye ning ati, amutuku noutam nirya, weik mutuku kon ap, mutuku kon mulamle keil ap nirya ara, amutuku lodakuka, yuk mutuku bitu do? Kume, aning ara, winipmanto kume.

Kejadian 30:1

Ura, Rahel bira, mapu pia kum deiamuka anya arye, el du kul Lea biti, malye kanye bobukce, kanye talima bintinip dayukce, Yakub binyak nyabuk. “Se, ance mi ton arepnilyame. Ara, nun bitinye arye, mi ton kum deipnimyopura, na dipnamnarya,” nyabuk.

2 Timotius 3:6

Arup nyapmasinto nang arye wininyak ning ton nyapnukine. Sik tenepce arye teleb yupu nyabuka yukulakirye, yuk nang aik wekuka neika unyake. Yuk nang aik yupu teleb nyabuka yukulakirye, akunum bikcopura, anyaik unyak kilapu ati, talye yupu nyana deice arye kekebikceura, sik anang kilongonyake. Akilapu ara, ‘Aning winipnun do, kum do? Teleb ning dan do?’ tenen, teniltonauk unyak kilapu ati, anang arye akilapu sik kanye talima lilon yupu nyabikibuk, kekebikirye, anang tamuk kilongonyake. Sik nyanyak yupu ara, akilapu arye talye luba kibuka kekebikirye, diba tenenyake. Akilapu ara, sik malye winin ning weik arye unyaka ati ara, diksukum bisik ara, kum banyake. Tonda, sik kanye talima noutam malye ninguk pataplibuk, aninguk tenenyaka deice arye, sik kanye lipdongoplibuk, yuk malye bisik kirikuka banyake.

Yunus 4:9

Nyabukba, Allah arye tamubuka nyabuk. “Anda deiyoknye kume ati ara, akolupmal yo ati, talye kum derepnutume,” nyabuk. Nyabukura, Yunus birye, tamubuka nyabuk. “Na yu upnil ning ara, teleb uka. Aning ara, kum bataknamne. Pia derelamkinya deice arye, dipnamnarya,” nyabuk.

Amsal 8:5

Anggunda moubuka weika arye, kel bikna nang ara, min kum kel bikilulum ninye ara, na yupu moubuka kekepmunyopura, teleb un ning, moubuka kel bikinamlulume. Aning atonun, anggun tuba walwal uk ululum ninye babye, na nyasinye yupu moubuka kekepmunyopura, ‘E, teleb kibuka un ning ara ani’ tenen, nong bol deice ning kel bikna kum bukni, nong noutam ning ton, moubuka kel bikinamlume. Anggunda, yupu kekena kumce malye pia weik ninye ululuma anya arye, na nyasinye yupu moubuka tenenamluma deice arye, pia moubuka tenepmunce, teleb kibuka kel bikinamlulume.

Amsal 27:3

Keil ap, keil wininga ap, sik ikin ara dipkoprob ikin bukni, moubuka tenen ning kum teneplirye, walwal kanye uk bobuka ululnye birye, elce yuk ninye ati, malye ulilamle ning ara, pia ikin weik uliba, talima noutamak pia weik arye uk dilule. Ati keil ap, keil wenengna ap ara, kanamto ulul bukni, walwalnye birye malye ulilamle ning ara, pia weik ikin ulule.

Kejadian 38:9

Yehuda birye, el mi Onan biti, nyabuk bukni, Onan birye utenebuk. ‘Kume, akil ap, neika mapnimnyeba, mi deiplyopura, ami ara, dipkoprob na ninguk kum upnamle,’ tenen, ulamuk. Ara, el ap, Tamar ap, neika malamrik talak nirya ara, el den yung kum weklamuk, bai tam puruldonoklamuk. Winilamuka deiyok ara, ‘Na du koproba, el domuk kil youwak daknamne bukni, akil ap, na ap arye, mapu ton kum deipnamname’ tenen, winilamuk.

Amsal 19:16

Yatanye do nirya, Allah el nyalilye yupu uk talibuka ululnye bira, el bidamnye nong uk, kalikilalule. Elda telebuk unamle. Bukni, Allah el nyalilye yupu ati, ‘Na like, ayupu kum kekenamne,’ nyabuka, ayupu yaniptaplirye, malye yupu uk nyalulnye bira, dipkoprob dipnamlarya. Aminyan talak, Allah arye aninye wenebuka oplopnamle.

Amsal 19:19

Ninye ton minopce yu tenebuka derebicopura, elce pia yu unamle. Yu deice arye malye uplyopura, aminyan talak ara, amutuku talina deiyok nang arye, elti, tomobuka tapu koubikirye, “An malye ulamluma anya arye, dekna ning ara, pia weik ning arepsilyame,” nyabuka, wenena aik dongopnamake. Sikce el melina ati ara, ‘Se, nun mi ara, kum wenepnamlulume’ nyabuka, wenena aik pum tam arye loplobuka lyepmunya babye, dipkoprob ami ara, moubuka kum kel kipnamle. Kum kel biknamla anya arye, dipkoprob yuk aminyan talak babye, amalye winilamlye ning ara, tuba tamubuka tonap, tabakuka upnin baliba, tonap tomobuka tapu koubikirye, wenena aik dongobikiba, tuba tamubuka, ton lyelona uk unamlum do, kum do? Aning ara, pia moubuka tenenamlulume.