El tonok ara, kum diptue, pia kamuk unamle. El ulya ara, ninye tukwak ninye kum binmanto ak, weik dirina noutam ulule. Yata mutuku ninye do nirya, el nong pia kum elilamik, tonda, pia kum eiptinge. Na Paulus arye nyapmakine. Na pia patanulul ning ara, ninye mutuku-mutuku nirya, el siuk pia erenamake. Tonda, el weik mikip arye aning-aning nirya ap, ninye nirya ap, talibuka unamle. ‘Aning ara, dipkoprop upnamle’ tenen, Amin nyapne. Na Paulus arye sekeibkine.
Ayub 37:23 - Eipomek23 Dipkoprob nun ni Allah elda, pia deice tam erebuka, aning-aning nirya talibuka, mikip weiknye ulule. Nun tukwak mutuku nang arye, ‘Se, Allah el weiknye ululak binuka eiptinyeʼ tenen, pia eptibya babye, Allah el dam ara, nunce binmanto kum usulule. Allah elda pia diksukum telebuk ulule. Elda mikip weiknye ulirye, ninye tukwak nang ati, yupu bokosulul bukni, talye yupu nyaltakana kum bukni, pia diksukum kibuka yupu nyasulule. Allah elce nun tukwak mutuku unyap nang ati, deiyok kum upmalye ning ati, ton ikin ning ara, nun deice ton pia kum delisulule. Diksukum un ning ara, pia kum batakalule. Gade chapit la |
Ayub 37:23
38 Referans Kwoze
Se, na kwit capu. Allah elce kel kiyamuk ning ap, elce, ‘Deiyok ani’ tenen, moubuka tenelye ning ap ara, mambul weik ning ulule. Allah arye kel bikamuk ning nirya ara, kum nukmanto ulule. Elce, ‘Winipnamne. Teleb una ara ani,’ tenebuka yupu lepsisikuka bokolisilya ara, nun talye tukwak unyap ninye arye moubuka kum teneptibye. Allah el pil dolye ning ap, el winilul ning nirya ap, nun bidamang aryuk kum kel biktibye.
Tonda, Allah ara, Pia Mikip Weik Deiyoknye, Raja ulule. Tonda, el Allah arye, “Aning ara, wininamlume. Aning ara, pia kum wininamlume,” nyapdeiamsuk yupu nyasilye touk, ninye tukwak nang ati, yupu lipsisikuka bokeipsilirye, dengna aresulule. Elce nyapdeiamsuk yupu ati, kanye delilule. Allah elcuk, ninye yupu lipsisikuka bokolina ati, “Talye yupu ap, nong kum talye nyan yupu ap, minin yupu ap, nyana kumce, diksukumuk ubuka, yuk nang ati, ninye yupu lipsisikuka bokolinamlume,” nyapdeipsuke. Allah arye, “Aning ara wininamlume. Aning ara, pia kum wininamlume,” nyapdeiamsuk yupu nyasilye touk ubuka, nun Israel nang ati, diksukum kibuka, melibuka teleb kilisulule.
Dipkoprob nun nirya kele. Allah elda, Mikip Pia Weiknye Ulule. Elce tukwak mutuku, im sirya, mutuku sirya nirya, ululum nang nirya ara, anggunti bico tenesulule. Allah ara, el mikip weik ulye ning ap, pia weik tonun kel bikamukce, nong nirya akunum tenilul ning ap ara, weik ulule. Ati ara, ninye tukwak nang nirya ara, talye lukparabuka kum batakasulule.
Allah el kanye talima noutam nirya ara, pia kel weiknye ulule. Tonda, elda pia mikip weiknye ulula ati, ninye arye Allah ati, malye kanye kibikirye, ‘Elce nyalul ning dauplyeʼ tenen, Allah ati, malye kum kiptinge. Ninye arye, Allah ati malye kiptibyeʼ tenen, piriptinga babye, pia kum winiptinge. Ara anye kum winipmanto atia.
Ayupu nyapmasina ara, urdem ati kume. Nara, Allah Yahweh, aning-aning nirya tenepnye touk wininune. Nara, Pia Mikip Weik Erena Deiyoknye unirye, ‘Winipnamne,’ tenepnye touk, wininune anya arye, narye nyapsine. Yatanye do, yata kil do? Tukwak mutuku ninye malye ulamice ati, wenebuka opneba, dibicopura, aning ati na kanye kum delinune. Aning ara, na like. Teleb ning ara, tukwak ninye nirya arye, sik malye wininyak ning bataktingirye, diksukumuk winitingopura, kam pia unamtinge. Aning atouk, anggun Israel ninye babye, anggun malye winimunye ning batakmunce, diksukumuk winimunyopura, kum dipnamlume. Kam pia unamlume. Na Allah Yahweh, im deice tam uninye, aning-aning nirya tenepnye touk wininune. Nara, Pia Mikip Weik Erena Deiyoknye birye, ayupu nyapdeipsine.
Tonda, el malye ninguk winilamlye, adiparyuk diplirye biti, na Allah arye kanye deilinun do? Kume, malye wininyak ninye dibicopura, na kanye kum delinune. Aning ara, ‘Se sik bicoe,’ tenenune. Kume, narye tenenun ara, ani. ‘Sik malye unyak ninye nirya ara, sik malye ning bataktingce, dipkoprob pia diksukumuk ubicopura, kam ulamtinge,’ tenenune. Nara Allah Yahweh, aning-aning nirya talibuka, deice tam Pia Mikip Weik, Erena Deiyoknye unirye, ‘Winipnamne,’ tenepnye touk wininuna anya arye, na nyanye yupu, nong dipkoprob ulule. Nara, Weik Erenanye birye nyapsine.
Allah bico tenelamsukce, ‘Israel ninye lyenamne,’ tenelamsuka ati, Israel ninye nun dam ikin ning yangalamsukba, ikin weik ulamupu talak noutam nirya ara, el babye ikin kanye bolamuk. Winilamuka ati, ikin ulamsuk bukni, lyepsuk ning ara, ara el dam ulamuk malaikat dopdeipmokba, kum lyepropsuke. Tonda, yuk melin nang ton dolilamukba, kum lyepromsike. Aning kum bukni, nun ikin ulamsuk ning nirya ara, Allah elcuk lyelolamsuke. Allah arye, ‘Na mapu bicoe, minopce kum wenepnamne’ tenen, melibuka lyelolamsuke. Minop talak keting tamun yupa weik noutam nirya, Allah arye nun apu Yapu Israel ninye ati, melibuka bobalamsuke.
Anggun talye ning si erelulum ninye ara, yupu talipmunce, dotalak wininamle ning laka nyapnamnulume. Tonda anggunce anggun bidamang ati asipdanamlume. Ara, ‘Dotalak winipnamle ning ati, min yuma talak yatanye birye nyapdeiamsuk do? Minop talak arye yatanye birye nyapdeiamsuk do?’ nyabuka asipdanamlume. Ayupu ara, na Allah Yahweh arye, nyapdeiamsise. Diksukum koprop telebuk ulirye, ninye lyelula deiyoknye bira, yuknye ton kum ulule, na Allah tonok unune.”
Amapo, Allah ati, batakna kumce, pia diba tenebuka, eluk tuba talilum nang nirya ara, nun ni koproba Allah Yahweh ati, kanye delin mot nyapmunyakarye, el siuk erenamlume. Tonda, nun ni Allah ara, malye un ning tonok babye kum ulirye, pia teleb, Leknye ulula ati ara, elti, ‘Telebe,’ nyabuka, si erebuka kinamlume.
Allah el kanye talima noutam tenilul duknun ning nirya ara, ance aning tenebuka, kel biktum do? Kume. Tonda, Allah ara, aning-aning deice tam erebuka, pia mikip weiknye ulula ati, el mikip weik sirya duknululak ara, aupmal do, kum do? Allah arye kum winipmanto ning winilul do, kum do? Elce, ‘Aning winipnamne bukni, aning ara kum winipnamne,’ tenilul ning ara, ance eibuka, kum biktume.
Nun ni yapu kopropa arye, ‘Aning teleb,’ tenyamsik touk, wenebuka peterelamsik bukni, nun Ni Kopropa Allah arye, ‘Na mapu pia teleb kilinamne’ tenen, asilesilirye, wenebuka peteresulule. Winisilya ara, talye ati kume. Ara, ‘Na malye ning tonok babye kum upniliba, pia diksukumuk unye touk, na mapu babye atonun neika unamak’ tenen, wenebuka peteresulule.
Allah morobukopura, el yupu kekenmek nang ati, ayupu ton nyabuk. “Aning-aning nirya ara, na ni Allah arye akunum arepnuke. Ninye nirya tonoknye ton, Allah el Mi Koprop arye, el kanye talima noutamak tenelul ning ara, kum kel kiptinge. Allah el Mi Koprop kanye talima ulul ning ara, Allah elcuk kel kilule. Ninye nirya tonoknye ton, na ni Allah el kanye talima noutamak tenelul ning ara, kum kel biktinge. Na ni Allah, el kanye talima noutamak tenelul ning ara, nara, el Mi Koprop arye kel bikinune. Bukni, yuk nang ton kum biktinge. Tonda, ‘Narye laka nyabuka peterenyeura, na ni kel kipnamak’ tenen, wibuka deipse nanguk, na ni Allah arye tenelul ning kel biktinge.” Yesus arye nyabuk.
‘Malye upnamak do?’ tenen, ‘Weik ikin winilden ning kum arepnamsilam’ tenen, moropkiyabe. Aning kum bukni, tonda, Pia Malye Uning Deiyoknye, ara Isa Mutuku Dongonye arye, ‘Malye ulisulul anya arye, malye winibibyak’ tenen, ‘Ance kalikuka disimince melinamsilam’ tenen, moropkiyabe. Ayupu nyabuka, Allah moronamlulume. Yesus arye el yupu kekenmek nang ati nyabuk. Nyabukce ayupu tonap nyabuk.
Aning-aning nirya, ikin ning babye, kanam ning babye, Allah arye, ‘Aning nirya ara, atalak teleb upnamle talak ara ani,’ tenelamle talak uk teleb ulisulule. Allah arye tukwak ninye nirya ati, patana deiyok ning arepsiliba, nunce, ‘Se, doryanamle talak, na babye dipna kumce, kam pia uptinye’ tenen, patasulule. Elcuk kel bikna ning arepsiliba, kel biknamap bukni, Allah arye kwepdeibuk talak arye dipdongobuka, aminyan sirya daknamle talak pil dolye ning nirya ara, ‘E, dipkoprob apil dolule, el deiyok ara ani,’ tenen, pia moubuka kum kel biktibye.
Allah el si Yahweh arye, aning-aning deice tam ulirye, aning nirya talibuka weik deiyoknye ulule. Winipmanto ara, tukwak mutuku ninye deiyok nang, Raja weik nang arye, pia urasin teleb baju ongobikiba, ninye eibikirye, “Se, elda telebe,” nyalamak touk, Allah elda, pia teleb ulirye, pia mikip weiknye ulule. Winibuka ulula ati, ninye mutuku-mutuku nirya unyak ninye arye, ‘Elda weik mambulnye ulule’ tenen, unyake. Allah Yahweh arye, aning-aning nirya ap, tukwak mutuku nirya ap, kwepdeiamukce, talibuka, aning nirya, pia darapdongobuka unamle.
Tonda, anggunce Allah ati, ‘Allah ance, pia ninye dopman kum pil dopminyopura, nun tukwak mutuku noutam unyap nang nirya arye, kanye lopsiliba, kil-kil asa unyabe,’ nyabuka, mot nyanamlume. Tonda anda, Pia Mikip Weiknye ulyama ati, anti, ‘Nun lik,’ tenekinyak nang nirya ara, ‘Se, Allah arye, nun malye wininyap ning ati, wenebuka opsilyak’ tenen, ilil weik upliba, banyake.
Allah ance pia kum batakasilyame. Nunce, ‘Nun ni koproba Allah melinamsil’ tenen, moronyap yupu nirya ara, ance kekebuka melisilyame. Ance nunti, ‘Dauplye’ tenen, pia kum batakasilyame. Anda, dipkoprob nun Lyena Deiyoknye ulyame. Tonda, Allah ancuk ninye arye kum winipmanto pil domince, nunti lyesilyame. Tonda, yata ninye do nirya, dan aunyak ninye babye, pia pera mutuku noutamak daunyak ninye nirya babye, ‘Allah elcuk melibuka, lyebuka dolyanamsile,’ tenekinyake. Ara, mutuku sirya, im sirya, daunyak ninye babye, weik laut mekwen deice, kapal laut deice bukuka balamak ninye nirya babye, aninguk tenekinyake.
Tonda, ‘Yata ning arye melipnutu do?’ tenen, ‘Yuk nang ati, ikin ning, sik nong deice deipnyopura, sikce namin kin yo bok weik arepnitinga deice arye, aning melipnamnile,’ tenena kume. Atonun, ‘E, yuk nang, sik bona, ‘Naʼ tenen delinyak sukum weknirye, aning nirya ubula dopropnyopura, aning nirya arye melipnamnile,’ tenena kume. Tonda, aning atonun, aminyan talak sik bona weik upnin baliba, bona talin nang umunyopura, ‘E, na yo bok ap, bona ap, weik aupmanilba, talinuna deice arye, bona talinanye akunum ununa ati, aning arye melibuka lyelonamnile,’ tenena pia kume.
Allah arye nunti wenebuka, yupu bokeipnamsil talak ara, el dam nyan yupu ara, ance nunti, “Ayupu tamubuka nyapminyopura, kekepnululume,” nyabuka, peterepsutum do? Nunce, ‘Atalak ara, yata yupu nyaptibyeba, kekepsutu do?’ tenen, pia kum bikupu. Aning nirya ara, nunce kum biktibye ati, aning kum laka nyaptibye. Na kanye ara, an babye, aning nirya pia kum teniptume.
Bukni, aning-aning nirya laka nyapmakin ning ara, mikip weik aulul bukni, ‘Allah el mikip arye pil dolul ning ara, akunum,’ tenena kume. Aning nirya ara, mitik tonunuk nyapmane. Nun ninye arye, Allah el winilye ning ara, mitik tonunuk kel bikinyabe. Winipmanto ara, Allah arye winilul ning ara, ninye arye, nun amul pum tam ara, mur-muran yupu uk nyasinyak ning atonun ulule. Nunce elinyap ning ara, Allah el mikip weik ulye ning kel bikina ati, laka kililule. Weik ning ara, kum laka nyapmanto. Allah elda, pia mikip weik arye winilul ning ara, nunce kum kel biktibye.
Bukni, kel weik bikna deiyok ning ap, nong noutam deiyok ning ap, mikip weik una ap ara, Allah el deice uk ulule. Tonda, Allah elcuk nun tukwak mutuku unyap nang ati, “Teleb winin ning ara, ani. Anggunce wininamlum ning, teleb ning ara ani, malye ning ara, ani,” nyabuka, kel weik bikamuknye bira, Allah el tonoka. Elcuk moubuka teniplirye, nyapsutue. Yuknye birye kume.
Ura, tenipdelulume! Nunce, ‘Yatanye mikip weik ulul do? Allah do, Ayub do?’ tenen, piripnamap do? Kume aning ara, nun akunum kele. Allah ara, mikip pia weiknye ulule. Nara, pia mitang asa uk unune. Tonda, nunce, “Ninye yupu bokolina ati, bulupnuyabe. Ara, ‘Yatanye birye, pia teleb, diksukumuk ulamuk do? Allah arye do? Ninye arye do?’ Aning babye, nun akunum kele. Allah el tonok, pia teleb diksukum winina deiyoknye ulula ati, nunce mandipna kanye bobuka, elti, yukuptibirye, ‘Anda yalyame. Aning-aning ara, yata ati winiplum do?’ nyabuka, pia kum asiptibye! Aning babye, pia kum winiptibye.
Allah ara, ninye wenena ati, talye-talye ubuka, tilila yupu deice arye bokeipsilirye, wenesulul do? Tonda, aning-aning deice tam erebuka, pia mikip weiknye birye, diksukumuk ululnye ulula ati, el Allah arye, ninye wenesulul talak ara, pia kwalin bisik banmalirye, wenesulul do? Kume, aning ara, kum winipmanto. Deiyok ara, elda malye winin ning ton pia kum ululnye biti, pia diksukumuk ulule.
Allah elda, pia mikip weiknye ulula ati, elce winiptu ning ara, ance eibuka kum biktume. Ara, Allah el mikip ara, im deice tam, pia erebuka ubuk atonun ulula ati, nun tukwak nang arye, aning kum biktibye. Tonda, Allah el bikilulce, mikip weik arye pil dolul ning nirya ara, ance moubuka kum biktume. Aning nirya ara, ninye dibikirye, koulukuka wekelbanyak pum tam ara, pia kaurwe weik, duknuna uk ulula ati, nunce kum eiptibye. Bukni, aning babye mitik tonun ulule. Allah el bikin ning ara, pia amu noutam atonun, kum nukmanto ulule. Ati, dipkoprob ance Allah tenilul ning ara, dipkoprob kum biktume.
Dirina urasin pia teleb ning ara, dabu tam arye panubuka yalyeba, dengna weik ning emas urasin pia porolul touk uplyeba, ‘Se, aning ara, urasin pia teleb ulule,’ tenebuka nyanyabe. Tonda, Allah el dam dana-dana tam nirya ara, el dirina weik ap, el mikip weik ulye ning ap, el pia teleb ulye ning ap, nun bikuka kum laka nyaptibye. Kanye lopsilya ati, nunce, ‘Seʼ tenenauk unyabe.
Nyapminyopura, an Yeheskiel birye, sikti, ayupu ton tabakuka nyapnalame. “Na Allah ara, dipkoprob pia kam unune. Aning ara, dip ulamle touk, adeice arye, adipkoprop yupu ton nyapsine. Na Allah Yahweh, aning-aning nirya talibuka, deice tam erebuka, mikip weik ununye birye nyapsine. Sik malye wininyak nang ara, sik tuba malyeuk unyak talak aryuk, dekenyak nang ara, na kanye kum delinune. Kanye teleb unulul ning ara, ‘Sik malye unyak nang arye, sik malye winin ning ara, bataktingirye, tamubuka na dam yakirye, teleb aryuk ubikirye, kam unamakʼ tenen, kanye deibuka teninune. Ati ara, “Se, anggun Israel yala nango, anggun tuba malye winilulum ning ara, adiparyuk batakmunce, tamubuka na damuk yalulume! Yata ning deiyok ati, malye winipmunye deice aryuk, anggunda dipnamlum do?” nyabuka laka nyapnalame.
Nun ni koproba Allah arye, uku tonok talak arye akunum nyapdeipsuke. Tonda, uku bitinye ap, tuba weik talak ap, akunum nyapdeipsukba, na ton kekelamse. Allah arye nyapdeipsuka ara, ani. “Dipkoprob mikip weik uning nirya ara, na Allah aryuk talinune. Yuk ning nirya ara, mikip kum ulule,” nyabuka, nyalilamsukba kekelamse.
Ara, talye ati kume, na ni Allah Yahweh, anda Weik Erenanye uminya ati, antibuk, “Telebe,” nyabuka, kibuka si erenamne. Allah an mikip weik arye tenebuka, pil dolyam ning ap, weik mambul winilyam ning ap ara, anirya moubuka kel kibuka, sirya kum daktibye. An winiminye ning nirya ati, ninye nirya arye, kanye deibuka, an siuk erenamkiyake.
Piblisite