Ayub 35:14 - Eipomek

¹⁴ Ati ara, Ayub ance mania kanye bobuka, pia talye-talye yupu nyaminya deice arye, “Allah ara kum elinune. Na dam yanuka kum melinulule. Tonda, nara ikin weik ununa ati, ‘Allah arye, dan talak aning nirya eibuka, na melibuka lyana ati, na dam yanuka melipnamnil do?’ tenen, tuba-tuba dinauk unune. Tonda, dan talak, Allah arye na dam yanuka, diksukum ubuka, yupu bokeipnilirye, tonap teleb kilinamnil do?” nyabuka, malye nyalyame. Ati moubuka tenipnulyame. Sik talima erepdakirye, maknya kintinibuka wininyak nang arye, Allah ati morotinga babye, sik malye un ning ati kum kekelule. Sikda mitikto malye wininyake. Bukni, ance pia malye yupu nyalyama ati, anda malye weik winilyame.'’ Ati, ance Allah ati pia talye-talye yupu ara, tuba-tuba nyalyam bukni, dipkoprob Allah arye, pia kum kekenamkile.

Ayub 35:14 Referans Kwoze

Ayub 9:11

Allah arye, na Ayub urasin dam yanukba, narye el nong ap, urasin ap ara pia kum eipse. Aning atonun, elda, na dam yalirye, otam banmaliba, narye el ton eibuka kum bikse.

Yesaya 54:17

Bukni, dan ninye do nirya, ‘Israel ninye optibye,’ tenen, ninye on ning kintinibikirye, olyasiting bukni, kum winipmanto upnamake. Aning atonun, dan nang do nirya, anggun Israel ninye ati, ‘Malye kum winipmakibuk malye yupu sik deice nyapnuyabe,’ tenepnamsiyak nang ara, urdemuk unamake. Sikce nyanamsiak yupu ara, talye urdemuk nyanmatinga babye, nong kum upnamle. Tonda ayupu nyanamsiyaka deice arye malye kum kipdeipsitinge. Narye melipsiniba, anggun Israel nang arye amalye yupu talamak nang ati, yupu sekmunyeba, yupu kum asa unamake. Nara Allah Yahweh arye anggun Israel ninye ati nyapsine. Arup nyapmasin yupu nirya ara, na amu tam unamlum nang melipsiniba, dolonamlulume. Yuk ninye arye anggunti, malye yupu nyanamsiak bukni, na Allah arye anggunti pia melipsiniba, teleb upmunyopura, yuk mutuku ninye nirya arye, kel biknamake. Ara, ‘Se, Israel ninye ara, dipkoprob Allah el ‘Naʼ tenen, ninye unyake,’ tenen, kel biknamake. Narye dekna arin ning ara, pia teleb una deiyok ning arepsiniba, telebuk unamlume. Allah arye Israel ninye ati nyabuk.

Yesaya 50:10

“Anggun noutamak noutam ara, yata nang arye Allah Yahweh ati, ‘Se el weik mambulnye’ tenen, el si erelulum do? Tonda Allah arye wipdeibukba, el pil dolulnye nyalul yupu ara, anggun noutamak arye, yata ninye arye ayupu kekebuka diksukumuk ululum do? Yata ninye do nirya, kunukna bisikuk bamunyeba, dirina kum usilye ninye ara, Allah el si Yahweh ati diba tenebuka unamlume. Tonda, ‘Nun ni koproba Allah elcuk melinamsil’ tenen, anggun kanye nirya el deice uk delinamlulume.

Yesaya 30:18

Nyabukce, ayupu ton dukdongobuka nyabuk. “Anggun malye winimunye ning ati, kanye imun weik ning yanamsil bukni, na Allah Yahweh arye anggunti, tuba tenesununa ara, ‘Aninye ara bicoe, na kanye aniryuk melibuka lyepsitinye,’ tuba tenesunune. Na Allah arye tenelamsinya ani, ‘Atalak winipnamne,’ tenyamse talak akunum kiplyopura, bico tenepsinirye, melibuka lyepnamsine. Winipnamsitinya ara, talye ati kume. Deiyok ara, Na Allah Yahweh, pia diksukumuk ununye birye nyapsine. Ati, yata ninye do nirya, ‘Allah el dem arye melibuka lyepnamsil’ tenen, diba tenebuka dinauk unyak ninye ara, narye teleb kipdeipnamsine. Winipsinyopura, telebuk unamlume.” Allah arye nyapdeibukba, nabi Yesaya birye sekeipsuke.

Mazmur 97:2

Allah el dam ara, weik dua ap, kuna ap aulule. Ara, ninye arye, el urasin kum elinamaka ati upnamle. Bukni, Allah arye aning-aning nirya talibuka ulula deiyok ara, diksukum winin ninguk talibuka winilule. Tonda, ninye nirya winilamice touk, akunum elilula ati, elce dipkoprob diksukum kibuka, yupu lipsisikuka bokeipsilirye, dengna arepnamsile.

Mazmur 62:8

Ninye tukwak nang arye kum bukni, ikin upmanilibuk na ni Allah arye, lyepnilyopura, teleb kibuka erepdeipniliba, yuk nang arye, nati, si erebuka kininyake. Allah ara, elcuk melibuka kalikinulule. Yata ikin ning do nirya, el dam kum yanuka opnutua ati, el dam ara, na telebuk unune. Elda pia mikip weik keil aik atonun, tonda weik mutuku kon keil atonunye ulule.

Mazmur 62:5

Sik yu weik nang ara, ‘E, yuk nang arye, aninye deiyok nang ati, ‘Telebe,’ nyabuka, si erebuka kinyaka ati, ‘Aning ara nun likʼ tenen, ‘Ati ateleb nanguk opnamabe,’ tenebikirye, pia tenenauk unyakce, yupu talinyake. Tonda, talye yupu nyana ap, kwinisa don yupu ap ara, sikce, ‘Aning ara, telebe uka,’ tenebikirye, kanye deibuka, pin-pin kanye bonyake. Sik si bambol arye nyakce yupu ara, tenepce arye, kekena teleb yupu nyanyak bukni, dipkoprob sik kanye talima noutam ara, ‘Anang ara, nun pia lik,’ tenebikirye, lik yupu nyanyake.

Ayub 23:3

Se, ‘Allah el ululak ara dan do?’ tenen, na kel bikamtinye toura, na kanye deipnutue. Tonda, ‘Na adiparyuk el ululak kel biktinirye, el dam bitiniba epdatinimnye,’ tenenune. Utenenuna deice arye, elti, weik tonun patanulule.

Ayub 19:7

Winipnuka ati, dipkoprob na pia dobuka moropsiba, Allah arye, ton yanuka kum melipnuke. Ara, nyabuka moronune. ‘Nara diksukumuk pil donanye ununa anya arye, ikin ning yanmanila ara, na malye winipsa deice arye kume. Malye kum winipse bukni, na nong deice ikin ning deipnuka ara, Allah el ja.’ Narye, “Yanuka melipnilyame,” nyabuka moropne bukni, pia ton kum kekenulule. Diksukum yupu nyabuka kum bokeipnilirye, teleb kum kilinulule.

Ayub 9:19

Ura, tenipdelulume! Nunce, ‘Yatanye mikip weik ulul do? Allah do, Ayub do?’ tenen, piripnamap do? Kume aning ara, nun akunum kele. Allah ara, mikip pia weiknye ulule. Nara, pia mitang asa uk unune. Tonda, nunce, “Ninye yupu bokolina ati, bulupnuyabe. Ara, ‘Yatanye birye, pia teleb, diksukumuk ulamuk do? Allah arye do? Ninye arye do?’ Aning babye, nun akunum kele. Allah el tonok, pia teleb diksukum winina deiyoknye ulula ati, nunce mandipna kanye bobuka, elti, yukuptibirye, ‘Anda yalyame. Aning-aning ara, yata ati winiplum do?’ nyabuka, pia kum asiptibye! Aning babye, pia kum winiptibye.

Ayub 31:35

Se, na patapmanil ning ara, yuk telebnye birye, na nyanye yupu kekepnutopura, na kanye deiptinye. Bukni, na yupu kum kekepmantonye ulula ati ara, naryuk, na nyanun yupu, ‘Dib yupu nyapmale, tenepnamak’ tenen, urasin lak kilina ati, na si sekeipne. Aminyan talak ara, aning-aning nirya deice tam, mikip weik ululnye, Weik Erenanye Allah arye, yupu nyapdeipnamnuturya. Allah arye nati, ‘Elda malye ulule,’ tenepnutopura, aning nirya lak sekuka nyapdeipnutuba, eiptinye.

Ayub 35:15

Aninguk kum bukni, na kwit Ayubo, ance atalye-talye yupu ton nyalyame. Ara, ance, “Kume, ninye tukwak nang arye, malye un ninguk talibuka, malyeuk wininyak talak ara, Allah arye aning nirya moubuka, kum elilula ati, anang ati, kum wenelule. Allah arye, anang malye unyaka ati, bataknauk ulula ati, sik malye winin ning ati, kum weneplirye, anang ati kum olule,” nyalyame. Nyapminya deice arye, Allah ara dipkoprob ulye ning ara, moubuka kum biklumce, yaninauk ulyame.

Mazmur 37:7

Ati ara, malye wininyak ninye nirya, sikce pil dopra bakce talak arye, ‘Aning winipnamabe,’ tenelamik touk, nong akunum uplyopura, anggun diba tenelulum ninye arye, ‘Se, yata deiyok ati, sik tenenyak ning, nong upliba dolonyak do?’ tenen, malye kanye bobuka, kum unamlulume. Sik malye nang arye, ‘Malye winin ninguk talibuka unamabe,’ tenebikirye, yupu sisikinyak ning, akunum winibikcopura, anggun diba tenelulum ninye arye, ‘Se,’ tenen, malye kanye kum bonamlume. Aning kum wininamlum bukni, anggunce tuba diba tenemunce, ‘Allah ara, dan talak yanuka melipnamsil do?’ tenen, kanye talima lamapdongobuka arye, amu tamuk umunce, kintinibuka dinauk unamlume. Ulamunya ani, dipkoprob Allah el tenebuk sum, akunum uplyopura, el tenebuk touk, nong upnamle. Anggun diba tenelulum ninye arye, ‘Allah arye minopce melipsutuba, telebuk uptibye,’ tenena kume. ‘Allah el tenebuk talakuk, teleb kipdeipnamsile’ tenen, teleb kanye bobuka, unamlume.

Yesaya 8:17

Yakub birye deibukba, dadeipdanin balamika ani, deibik ninye nirya ara, Allah el si Yahweh arye, ‘Sik malye wininyak ning ara na like’ tenen, balye tamubuka, akunum batakmasile. Bukni, ‘Nun ni Allah Yahweh, dan talak tamubuka melipnamsil do?’ tenen, diba tenebuka, dinauk unamne. Nara, ‘Allah elcuk melipsutu’ tenen, Allah atibuk, diba tenebuka, el dam anyuk banamne. ‘Yuk ning arye, ton melipnutue,’ tenebuka, kum unamne,” nabi Yesaya birye, nyabuk.

Ratapan 3:58

Na ni Allah Yahweh, ance aning-aning nirya talemince, mikip weik deiyoknye ulyama ati, ance na ikin weik ulamse ning ara, lipsisikuka akunum teleb kipdeipnulume. Winipnuluma deice arye, ance na nong ara, akunum lyepropnulume.