Ayub 33:28 - Eipomek

²⁸ Tonda, anye birye, “Nara walamnik nang unyakak binmanto uapsebuk, Allah elce nati, Anye bira akunum diplamik nang unyakak ara, bana kume,” nyabuka lyepropnuke. Winipnukba, wini talak nara kam tuba unamne. Tonda, dirina ara tuba dinauk unamne,” nyanamle.

Ayub 33:28 Referans Kwoze

Ayub 33:24

Amalaikat arye, el anye biti, bico uplyeba, elce nyapnamle, “Allah, ance anye bira, biklyame. El anye bira, ninye dibikirye, weilbanyaka dam binuka ulyame. El anye bira, ‘Sik diplamik nang dam kum bituʼ tenen, el kam una dekna ati arepmanto ning ara asukum,” nyabuka, nyapnamle. Aning areplirye, anye el yok ara punupnamle.

Ayub 33:22

Winibicopura, anye bira dipmace nang weilbalamak sukum akunum binmanto ulule. Ninye dibikceura, weilbalamak nang, sik sambala binuka unyakak bana ati ara, akunum dam binmanto ulule.

Ayub 3:16

“Na nin mun pum tam arye, dadiamtiniba deipkwetamnutue. Winipnutuba, keting dirina el lina kum aniryuk, tuku lukamnitinge. Mun pum tam lyulamle mapu tuku lukikiba, keting dirina kum elilamak touk, winyamtinye.

Ayub 3:9

Adeice wanalu kurya yanuka, panabuka tiklye talak, dirina kilul ning ara, asum, asum tanggal deice arye kum wamtue. Tonda, keting sinarya babye, lak kina kum wamtue. Winyamtuba, kunukna uk danamturya. Winyamtuba, doryanamle talak unamak nang arye, atanggal deice, ‘Beren tam talak keting dirina yanganamle,’ tenepting bukni, kum yanamtua.

Yohanes 11:9

Nyabikura, Yesus arye tamubuka domon yupu deice arye nyabuk. “Berentam talak arye diprongobuka keting dukduk ap, inin talak ap, keting kum ulamle talak noutamak ara, keting 12 jam usulule. Yatanye do nirya, keting dukduk noutamak bisik balinye bira, keting dirina deice arye, balule. Anye bira keting dirinarye, dilirye, balula ati, yan dum kum dukulule.

Yesaya 9:2

Minop talak, ikin ning weik ulamukba, pia imun kanye bobuka unyakakuk ulamik ninye ara, atalak noutam, dirin weik ulul ning akunum eipmake. Ikin ning ap, ninye dipna ap, weik ulamuk mutuku noutam ulamik ninye ara, wini talak ara, weik dirina ning akunum eipmake. Ara, beren tam talak keting panaplirye, dirina weik ulamle touk, aninye arye dirina atonun ning, weik mambul ning akunum elinmake.

Mazmur 69:15

Ati ara, na weik bental mekwen noutamak dongolbinamnil talak ara, na yanibuka tikmantoak, ton kum upnamle ati, ance lyepnamnilyame. Tonda, weik karu mekwen deiamlya noutamak weknye talak ara, ‘Mek oplya mikip arye weleplirye, na dobuka weik mekwen deibuka, num-num noutamak dongolbinilyak’ tenen, “Lyepropnilyame,” nyabuka moropkine. Nati, yu weik upliba, mal pininyak nang arye, ‘Opnuyabe’, tenepnice talak ara, Allah ance na kum bataknamnilyame. ‘Adiparyuk lyelonamnilame’ tenen, na ni koproba Allah ati moropkine.

Mazmur 55:23

Na kayapu nang, anggun nirya ara, kekepnululume! Anggun ikin usulul ning nirya dobuka, nun ni Allah Yahweh, el deice deipnamlume! Winipmunyeura, bico tenepsilirye, el mikip deice arye, melibuka lyelonamsile. Pia dipkoprob nyapsine. Allah arye, ‘Aning ara, wininamlume, aning ara, pia kum wininamlume,’ nyabuka, yupu talibikirye, pia diksukum kibuka wininyak nang ara, pia kum bataknamsile. Elce melisilya deice arye, nunce elti, ‘Diba,’ tenenyap ning ara, min kum upsutue. Tuba diba tenenauk unamabe.

Mazmur 49:19

Atonun, sik bona weik nang ara, sik kam tuba unyak talak arye, ‘E, nunda pia teleb kibuka unyabe. Nunda pia teleb nang uka,’ tenelanyak bukni, sik babye talye dadipnamakca! Diba, tukwak mutuku noutam, tuba kam unyak talak ara, yuk nang arye, sikti, “Se, anggunda, kel weik bikimunce, teleb pil dobuka bona pia weik tonun talimunya deice arye, pia teleb ululume,” nyabuka, sik anang ati, eibuka si erebikirye, teleb yupu nyanamak bukni,

Ayub 33:20

Weik uk dilulnye bira, din teleb ning babye ton, ‘Adin ning dobuka diptinyeʼ tenen, patan pia kum ati, aning pia kum dobuka dilule. Piato nyalamle din babye, anye bira adin ning eiplirye, adiparyuk dukmanto ulule.

Ayub 33:18

Tonda, Allah arye tenesulula ara ani. Ara, Allah elce, ‘Kume, amalye unyak nang ati, lake kiplopyeba, sikda malyeuk ulamikca ani, akunum dibikceura, tuku palibuka dongonamake. Aning atonun, malyeuk daulamikca ani, akunum dibikceura, weik balamle mek koubuka otam ara, akunum diamik nang unyakakuk, binuka unamake,’ tenesulule. Ati, Allah arye, ‘Malye unmacebuk, dibicakʼ tenen, Allah elce nun tukwak nang ati, lengdar arye yupu nyasilya deice, melibuka lyelosulule.

Ayub 22:28

Ance, ‘Winipnamne, winipnamneʼ tenen, moubuka tenipmince, akunum tukwak arye nyapminyopura, aning nirya dipkoprob tuba-tuba nong upnamle. Ati, ance pil donalam ning nirya ara, tuba nonguk unamkile. Tonda, an binalamak ap, daunalamak ap nirya ara, Allah arye arekilyeba, an dam tuba kam ulikilirye melinamkila ati, tenina kum unalyame.

Ayub 17:16

Winipmanto, nara akunum dipnyeura, sik mince akunum diamik nang, binuka unyakak akunum wekelbinyeura, akunuma tenepne. Na kam tuba unye talak ara, ‘Narye wininamne,’ tenebuka patapnilyeba, kanye tenenun nirya ara, pia ton kum bopnamne. Akunum diamik nang bobanyakak, el si ara Sheol mutuku noutam ara, akunum binuka unyeura, akunuma. ‘Na tenyamse ning nirya ap, na ap, pia kum danamle,’ teninune. Ayub birye, ayupu nirya nyabukba, el kwitcapu winilye nang kekebik.

Ayub 3:20

“Yata deiyok ati, nun ni koproba Allah, ance namin kisimince, nun nirya imun kanye bopmabibuk, an dirina nun deice delisiminba, dirina kisulul do? Tonda, yata ati, imun kanye bobuka unyak nang ara, kam una deiyok ning areseminba, kam unyap do? Talye diptibye toura, teleb uka. Kanye imun weik unulula anya arye, kunuknak uk daulamtinye.

Mazmur 107:20

Aninye ara, sik kanye imun uk dilamuk ning arye, sirya dakmanto ulamik bukni, Allah elce nyabuk yupu, adiparyuk, auk loprobukce, aninye ati kam bulilamuk. Uk arye dipmanto ulamik bukni, Allah elce, ‘Na tenena ninye kum ubicak’ tenen, kwetepdeibukce, tuba tonap, teleb kipdeibuk.

Yunus 2:6

Nara, pia mekwen karu noutamak weksiba, laut mekwen pum tam bukni, weik mutuku amu tam dam, laut pum wekse. Laut mekwen karu koproba dopkotepnulumce, bublan tirikdongopnulum touk, unya ati, kum yanmanto upse. ‘Pia daunamne,’ tenepse. Utenepsebuk, na ni Allah, an si Yahweh arye, mekwen karu koproba arye dopropnulume. Ara, na dipmanto upmasi bukni, kam bukeipnulumba, laut mekwen pum ikan arye, mekwen kup-kup duklopnuke. Allah an si Yahweh ati, an si erekunune.

Mazmur 103:4

Aninguk kum bukni, Allah arye kum melipnutopura, dipkoprob malye wininyak ninye dibikiba, balamak sukumuk, el si ara Sheol, betinye bukni, Allah ati, diba tenenyak ninye ara, amutuku kum wekinyake. Allah elcuk nun diba teneyap ninye lyesulule. Anya arye, dipnyopura, diplamik ninye unyakak ara, kum binuka unamne. Nara, kamuk unamne. Tonda, Allah arye, bico tenenilirye, ‘Narye anggun, ‘Naʼ tenen nang ati, ‘Winipnamsine. Pia teleb kilinamsine,’ nyabuka, nyalin yupu deice nyapsise yupu nirya ara, pia dipkoprob wininamsine. Tonoknye babye, pia kum bataknamne. Winibuka nyapsuka ati, lyesulule. Adeice melilnamsilya deice arye, tuba-tuba teleb kilisulirye, pia kamuk unamyabe.