Ayub 1:1 - Eipomek

¹ Ninye tonok Us mutuku ulamuknye, el si ara, Ayub nyalamiknye bira, Allah ati, ‘Elda weik mambulnye’ tenen, Allah el siuk erelamukce, Allah nyapdeiamuk ninguk talibuka ulamukce, el tibuk moubuka tenelamukce, malye un ning dam arye batakuka, pia diksukumuk ulamuk.

Ayub 1:1 Referans Kwoze

Yakobus 5:11

Anggun kele, ikin ning weik ulamu bukni, sik batakna kum arye, diba tenelamikce, pia pi dobuka, pil dolamik nang ulamik. Winilamika ati, Allah arye sikti, teleb ubuka kipdeiamukbuk, kanye deibuka ulamik. Tonda, nunce, ‘Anang ara, weik mambule, sik pia telebuk ulamik,’ tenenyabe. Anggunda ayupu akunum kekelamlume. Ayub ara, el nong deice ikin ning pia weik ulamu bukni, teniltona kum arye, pia palibuka tunim abuka ulamuk. Daulamukba, Allah arye ila tamubuka aribuk ning ara, akunum kekelamlumce kel biklume. Nun ni Allah ara, pia bico tenepsilirye, nun malye wininyap ning ati optapsitu bukni, lubakipsilirye, nun patapsilye ning nirya ati, talye arisulule.

Yehezkiel 14:14

Winipmanto ara, pia ikin weik aulamuk bukni, na batakna kumce, pia diksukumuk winilamik nang, sik punun nang, winilye nang ara, Nuh ap, Daniel ap, Ayub ap nirya ara, amutuku noutam ulamtinga babye, sik awinilye nang, sikce pia teleb dolamika deice arye, sik nong koproba lyepdeiptinye bukni, yuk ning ton teleb kum kipdeiptinye. Yuk nang ap, yuk ning nirya ap, kum kipdeiptinye. Nara Allah Yahweh, pia deice tam erebuka, aning-aning nirya talibuka, Pia Mikip Weik Deiyok ununye birye, nyapsine.

Ayub 28:28

Allah arye, nun tukwak mutuku unyap nang nirya ati, nyasulule. “Dipkoprob, weik kel bikna deiyok ning ara, ani. Ara, anggun ni koproba Allah, el si Yahweh ati, ‘Se, elda pia mambule,’ tenepnulumce, nati ilil unamsile. Tonda, Allah arye, “Teleb winin ning ara, aniʼ tenen, kel bikin ning bukni, el nong noutam ara, ani. Ara, yata malye winin ning do nirya, anggunce aning bataklumce, anang dam arye kisik dakuka, yukak bimunyopura, kel weik nang unamlulume,” nyapdeipsuke. Ayupu nirya ara, Ayub birye, el kwit capu sik winilye nang ati nyabuk.

Ayub 2:3

Nyabukopura, Allah el si Yahweh arye tamubuka, Isa Mutuku Dongonye ati nyabuk. “Anda na pil donanye Ayub bira, elilyam do? Anyapkenanye bira, talye ati kum nyapkine. Ninye mutuku-mutuku nirya unyak nang ara, na pil donanye Ayub pung telebuk ulul atonun, ton kum unyake. Elda na siuk erenilirye, malye un ning tonok ning babye kum winilule,” nyabuk. Aning ati ara, ance elti, ‘El deiyok ton una kum diparyuk, malye kipdeiptinye’ tenen, yanuka nyapnulumba, ‘Aning ara dawiniplyame,’ nyapkisiba, winiplum bukni, kanye imun weik ubuk babye, elce nati malye yupu kum nyapnuke. Diksukumuk tuba ulirye, na siuk tuba-tuba erenulule.

Ayub 1:8

Nyabukopura, Allah el si Yahweh arye tamubuka Isa Mutuku Dongonye ati nyabuk. “Anda na amu tam pil donanye Ayub bira elilyam do? Anyapkenanye bira, talye ati kum nyapkine. Ninye mutuku-mutuku nirya unyak nang ara, el Ayub atonun kum unyake. Na pil donanye Ayub pung telebuk ulul atonun ton kum unyake. Elda na siuk erenilirye, malye un ning tonok ning babye pia kum winilule,” Allah arye nyabuk.

Kejadian 6:9

Anyaka ara, Nuh el winilamuk ning ati sekeipsine. Nuh bira, pia diksukumuk ulamukce, el ulamuk talak ulamik nang arye, elti, ‘E, el malye ulye ning ara, ani, ani’ tenen, nyapmanto kum ulamik. Tonda, Allah arye, tenyamuk touk, Nuh bira diksukumuk ulamukce, Allah ap kanye dukdongopbuka telebuk ulamuk.

Lukas 1:6

Zakaria ap, el kil Elisabet ap, Allah yupu nyalilye atouk ubuka diksukumuk ulamrikce, Allah arye, “Wininamlulume, aning kum wininamlulume,” nyapdeiamuk yupu, moubuka talyamrikce, dolbalamrik. Ayupu nyalul touk ning nirya atonun, sirya dakuka pil dolamdik, malye una deice tenebuk ning ababye, kum winilamrik ara, Allah arye sikti, kanye deiamuk.

Amsal 8:13

Allah Yahweh ati, ilil upliba, el siuk erenyakce, el tam uk si erenyak ninye nirya ara, ‘Malye winin ning nirya ati, nun like,’ tenekirye, batakanyake. Nara pia weik kel bikna deiyok ning arena deiyoknye ununa ati ara, narye, ‘Aning ara na like,’ tenenun ning ara ani. Ara, malye winin ninguk, talibuka unyakce, sik talima erelanyak ninye ap, erepdanuka kwalibuka kwalina deice uk unyak ninye ap, tenen arye malye yupu nyaltakanyak ninye ap, malye ning ayala-ayala nirya, talibuka unyak ninye ap, sik nirya ati, yu uniliba, ‘Na pia like,’ tenenune.

Kejadian 22:12

Nyabukura, Allah arye Abraham biti, nyabuk. “An mi ona meme. An mi ara, tonok ulul ati, ance, ‘Kume, elda na mi koprop ati, Allah arye nyapnila babye, kum arepnamne’ tenen, kum batakmalamce, ‘Ami opnun’ tenen, kintinipmalam deice arye, pia moubuka dipkoprob kel bikmakine. Anda, ‘Allah ara, weik mambulnye anya arye, el siuk erebuka, el nyanilye yupu nirya kekenamne,’ tenenilyamnye ulyama ak, kel bikmakine,” Allah arye, Abraham biti nyabuk.

Kejadian 17:1

Sik nirya daulamika ani, aminyan talak Abram bira, keting tamun weik, 99 tahun nukuka wisi akunum dayuk talak ara, Allah el si Yahweh arye, el dam yanuka tikukce, elti, ayupu nyabuk. “Nara, aning-aning nirya deice tam unirye, Pia Weik Mikipnye unune. Anda, batakna pia kum dipkoprop, na yupu moubuka talipmince, dobolyangalamnimince, malye winina pia kum, teleb-telebuk unamlyame.

Ratapan 4:21

Anggun Edom mutuku tam ululum nang ap, Uz mutuku ululum nang ap ara, sikce nunti, ‘E moubuka, sik Israel nang ara, akunum ikin weik deice arye unyake,ʼ tenebuka, akutusululum nang ara, aminyan talak kum kipnamlarya. Ara, Allah arye, teleb karin lo areplyeba, anggun dam babye, ikin ning ton areplyeba, dopropnamlum ca. Sik babye, yu mek dibikceba, mikip arye pil doplyeba, nong banang malamak touk upnamlum ca.

Amsal 16:6

Ninye ton teleb ubuka ukirye, Allah atibuk batakana pia kumce, elti, ilil tenebikirye, dib tenebuka telebuk ucopura, Allah arye sik malye unyak ning nirya, namin kipnamle. Bukni, pia teleb ning tuba tenenamle ning ara, ani. Yata ninye do nirya, dipkoprob Allah ati, ilil tenebikirye, el si erebuka kinamak ninye nirya ara, Allah el amu tam telebuk unamake. Aning atonun unyak ninye nirya arye, ‘Malye un ning tonok ning babye, kum unamabe,’ tenebikirye, pia telebuk upnin banamake.

2 Raja-Raja 20:3

Raja Hizkia engen dol-dol deice arye nyabukce, Allah ati morobuk, “Na ni Allah Yahweh, ance nati tenepnulume. Na nimalyap arye, kanye amu tam kibuka unirye, antibuk tuba talikunune. Yuk talye ning ati, si pia kum erelamse. Tonda, ance nyapdeipsulum yupu uk, moubuka talipsirye, an piluk akunum donune. Tonda, na ni Allah, yuk ning tenina kumce, an teneminye piluk, pia pi deibuka donune,” nyabuka morobukce, engenmok.

1 Peterus 3:11

Sik adiparyuk, ‘Malye un ning nirya batakuka, diksukum winin ninguk unyakce, ninye nirya ansinibuka, teleb ubuka neika unamap’ tenen, pi dobuka pil donamake.’

Yeremia 25:20

Tonda, Us mutuku Raja kibuka, taleamik ninye deiyok nang nirya ap, Pilistin mutuku noutam, weik asik dobuka, unyak nang ati, talinyak Raja-Raja nang nirya, ara, Askelon mutuku ap, Gasa mutuku ap, Ekron mutuku ap, tonda, Asdod mutuku tuba unyak nang nirya ap,

1 Tawarikh 1:42

Seir birye deiamuknye, Ezer el birye deiamuk nang ara, ani. Bilhan ap, tonda Yaakan ap, deiamukak ulamik. Tonda, Seir birye deiamuknye, Disyon birye deiamuk mapu sik si ara, ani. Us ap, Aran ap, deiamukak ulamdik.

1 Tawarikh 1:17

Sik deipkirikropnye Nuh, elce deibuknye bira, Sem ulamuk. Sem birye mapu ton deiamuk nang, sik si ara, ani. Elam ap, Asyur ap, Arpaksad ap, Lud ap, Aram ap, Us ap, Hul ap, Geter ap, tonda Mesek ap, deiamukak ulamik. Sik anang ara, Sem birye deiamukba, dadeipdanin yangalamikce, ulamik nang, sik nirya, sik deipkirikrop nang ulamik. Ati ara, Sem birye deiamukba, dadeipdanin yangalamik nang nirya ara, sik deipkirikrop nang si atonok dolamik.

Keluaran 18:21

Bukni, wininamlam talak nirya ara, ‘Na yupu nyan pil ati, na melin nang unamakʼ tenen, ance dipdebuka, ninye ara, yata wiribuka nang do? Ninye ton wipdeipnulyame. Sik anang ara, kanye moubuka tenebikirye, yupu nyapmanto nanguk wipnamlame. Ara, ‘Teleb arye pil dopmanto nang ara, anye tenepmince, ananguk wipdeipminba, yupu lipsisikin pil talibuka unamake. Ara, sik anang noutam arye bokdeipminba, ton deiyok nang arye, ninye yupa ara, pia weik seribu (1.000) nang ati, yupu lipsisikuka talinamake. Ton deiyok nang arye, ninye yupa ara, 100 nang ati, yupu lipsisikuka talibuka unamake. Atonun, ton deiyok nang arye, 50 nang melina ati talinamake. Ton deiyok nang arye, ninye 10 nang melina ati, yupu lipsisikuka talibuka unamake. Ance, ‘Yupu lipsisikin pil talibuka donamakʼ tenen, adeiyok nang wipdeipnamlyame. Tonda, ance awipdeipnalam nang ara, talye nang kum wipdeipnamlyame. Anang ara, ‘Malye ubibya ati, Allah arye wenepsilyakʼ tenen, Allah ati, ilil kanye bobuka, elti, dib tenibuka unyakce, tilila yupu talye kum nyalamak nang ap, tonda ‘Sikda, yo bok weik dopropnamapʼ tenen, namin kin yo bok ton, pia kum dolonyakce, telebuk unyak nanguk wipdeipnamlyame. Tonda, yuk nang arye, sik anang ati ara, ‘Sikda, telebuk unyak nang ati, anang ati dipkoprob tenepnamap,’ tenenyak nanguk wipdeipnamlyame.

Kejadian 36:28

Seir, el mi Disyan birye deiamuk mapu, sik si ara, ani. Us ap, Aran ap, ulamrik.

Kejadian 10:23

Sem el mi Aram birye deiamuk mapu, sik si ara, ani. Us ap, Hul ap, Geter ap, Mesek ap deiamuk.

Kejadian 42:18

Mapmekbuk, like winilye sum akunum ubukura, Yusup birye, anang ati nyabuk. “Nara, Allah el si erebuka elti, si erenuna anya arye, na nyapnusin yupu sunubuka winipmunyopura, kum opnamsine.

Ulangan 18:13

Ati, na anggun ni koproba Allah Yahweh unun ati ara, anggunce na dam unamlum talak nirya ara, malye winin ning, tonok ning babye, talibuka pia kum wininamlulume. Na anggun ni koproba Allah ap kanye talima dukdongobuka upmunce, pia diksukum winin ninye uk unamlulume. Allah arye Israel ninye nirya ati, nyabuk.

Ayub 4:6

Aning ati ara, anda Allah ati tuba dib tenenmalam do? Tonda diksukumuk tuba unmalam do? Aning nirya tuba ulamluma anya arye, yata ati teniltona upmakilba, mikip arye dib kum tenepmalam do? Allah arye diksukumuk unyak nang ati, ‘Dipkoprop kalikuka melinamle’ tenen, dib kum tenelyam do? Allah ati dib tenebuka, diksukumuk ulalum ninguk, talibuka ulamtumopura, adeice uk an kanye deibuka ulamtum bukni, aninguk kum unamlam do?

Ayub 9:21

Na kanye arye, ‘Nara malye kum wininune,’ teneptene bukni, dipkoprob ara, na talima noutam unilye ning nirya ara, na walwale. Narye akunum winilamse ning babye, tuba kum bikinune. Ati ara, na bidamnye ati, kum bikdatinye. Na kam unye talak ara, na lik ati, ‘Nara kam tuba kum unamne,’ tenenune.

Amsal 3:7

Angguncuk tenebuka, kel bikamlum ning atibuk, ‘Nunda pia weik kel nang’ tenen, kwalina meme. Ati ara, malye winin ning nirya ara batakmumce, anggun ni koproba Allah Yahweh ati, ‘Elda pia weik mambulnye,’ tenebuka ilil unamsile.

Amsal 14:2

Ninye nirya ara, Allah arye nyalye yupu moubuka kekenyakce, teleb ubuka diksukumuk unyak ninye ara, sik ni koprop Allah Yahweh ati ilil tenekirye, el tibuk si erenyakce, el siuk kinyake. Bukni, ninye ton diksukum ubuka kum ulirye, talye tilila yupu ap, tenepce nyana yupu ap, talye mangkau kibuka nyaltakalulnye bira, dipkoprob Allah ati, ‘Na like,’ tenelirye, Allah el si ati yanilirye, Allah ati alye dakalilule.

Amsal 14:16

Weik arye kel kinyak nang ara, Allah atibuk ilil tenebuka ukirye, tuba-tuba el siuk erebikirye, malye winin ning ap, malye wininyak nang ap unyakak nirya batakuka, teleb winin ninguk unamake. Sikce, ‘Malye ubipyak’ tenen, malye un ning ap, malye unyak nang ap unyakak nirya, pia leilonyake. Bukni, ninye ton walwal uk ululnye bira, moubuka tenipdelirye, yupu kum nyalula anya arye, ‘Yuk talak ara, yata wiripnamnil do?’ kum tenelule. Lik uk ulula ati, el kanye talima noutamak minopce yu welepliba, yuk nang ati, weik arye derelirye, sikti, malye ulilule.

Amsal 16:17

Ninye ton malye un ning nirya batakikirye, teleb ubuka pia diksukumuk unyak nang ara, amalye un ning tonap pia kum unamake. Sikce, ‘Kume, tuba tonap malye ubipyak’ tenen, pia leilonyake. Adiksukum unyak ninye ulamak touk, yatanye do nirya, ‘Malye un ning nirya bataknirye, diksukumuk unamne’ tenen, pia moubuka ululnye bira, el kam unamle talak noutamak nirya ara, telebuk unamle. Ikin ning, el damak kum yanganamla anya arye, el pil donamle ning ap, unamle ning nirya ap, teleb ubuka upnin banamla ati, pia telebuk unamle.

Amsal 20:7

Malye ning nirya bataklirye, pia diksukumuk ululnye bira, malye ning tonok ning babye, talibuka kum ulule. Teleb uk ulule. Ati ara, elce deipnamle mapu ara, teleb un ninguk talibuka unamake. Allah arye anye ap, elce delinamle mapu nirya ap ati, Allah arye sikti, teleb kibuka delilula deice arye, diksukum unyakce, telebuk unamake.