Amsal 6:12 - Eipomek

¹² Tonda, sik yu uplirye mun delina ap, ubula dona ap wininyaka deice arye, minin yupu nirya bobuka balsusunmakirye, ayupu uk nyapra banyake.

Amsal 6:12 Referans Kwoze

Matius 12:34

Anggunda, kwatima duknupmalya ani, ninye olamle touk winilulum nang. Anggunda kanye talima pia malye winilulum nang anya arye, yata ubuka teleb yupu nyaptum do? Yata nang do nirya, sik talimak wamlye ning deice, si bam bol arye yupu nyanyake.

Amsal 16:27

Ninye ton pia yu kanye bobuka, malyeuk ululnye birye, malye winin ninguk tenebuka, patalula anya arye, el kayapu nang ap, yupu tanamak talak nirya ara, malye un ning atibuk, yupu talinyake. Malye winin ninguk nukuldakirye, kanye delildanyake. Bukni, sik malye winin ninguk pataliba, malye yupu uk nyanyak nang arye, sik kayapu nang damak ati, amalye yupu nukunmakiba, yuk ninye kekebiceura, malyeuk ulinyake. Winipmanto ning ara, uku buk arye, aning-aning nirya dilolamle tonun, sik malye yupu nyanyaka deice arye, amalye yupu kekenamak ninye nirya ati, malye ulinyake.

Amsal 4:24

Winibuka ulamince, talye peteren yupu nirya ara, an si bam bol deice, ‘Ayupu ara nyanune,’ tenena meme. Aning nirya ara, minina yupu nyana ap, an kwit biti, ‘Lik’ tenena yupu nyana ap, nyabuka nyalamikirye, ulamicak dam ara, batakmince, leibuka pia yuk sukumuk, unamlame.

1 Timotius 5:13

Aninguk kum bukni, ton malye wininyaka ara, nyapnukine. Ayouwak kilapu kam ulamice kilapu ara, dipkoprop pil dona kum, talye-talye unyakce, yuk ninye aik talye wekelbanyake. Sikda, talye nong ati kwalibikirye, yuk ninye wininyak ning pia eibikirye, yuk aik ninye ati, talye laka nyalbanyake. Ayupu nyanyak talak noutamak arye sik teleb ninye kum nyapmanto yupu, akilapu arye kanye lulubuka malye-malye yupu nyanyake.

Rasul 20:30

Ara, yukak anyuk kume. Tonda, anggun umunya noutamak nang arye ton, erebuka tikikirye, Yesus el yupu kekenyak ninye, ‘Nunti dobolyanganamsiake,’ tenebikirye, dipkoprop Allah yupu dobikirye, talye wamlibuka talye-talye kiplopsikcopura, telila yupu kwalibuka peterenamsiake.

Amsal 17:4

Ninye ton, ‘Malye winin ninguk tuba-tuba wininamne,’ tenebuka ululnye bira, yuk nang arye, malye-malye yupu uk nyanyak talak ara, elce kanye deibuka, anyapmace yupu uk kekelule. Malye yupu uk kekelirye, malye winin ninguk ulule. Aning atonun, tilila yupu nyapra banyak nang nirya arye, yuk ninye ati, malye kilina yupu uk, nyanmakiba kekenyake. Tonda, deiyok ton kum upmalibuk, lulundana yupu nyakiba kanye deibuka kekenyake. Ayupu kekebikirye, malye ninguk unyaka deice arye, yuk nang ati malye ulinyake.

Amsal 8:13

Allah Yahweh ati, ilil upliba, el siuk erenyakce, el tam uk si erenyak ninye nirya ara, ‘Malye winin ning nirya ati, nun like,’ tenekirye, batakanyake. Nara pia weik kel bikna deiyok ning arena deiyoknye ununa ati ara, narye, ‘Aning ara na like,’ tenenun ning ara ani. Ara, malye winin ninguk, talibuka unyakce, sik talima erelanyak ninye ap, erepdanuka kwalibuka kwalina deice uk unyak ninye ap, tenen arye malye yupu nyaltakanyak ninye ap, malye ning ayala-ayala nirya, talibuka unyak ninye ap, sik nirya ati, yu uniliba, ‘Na pia like,’ tenenune.

Mazmur 59:7

Na mutuku noutam ara, akunum ipnamalye talak ara, sik amalye unyak nang arye, tamubuka yanganyake. Yakcopura, bai tam yu kam arye, ‘Yata ning obuka dipnun’ tenen, weik yupu arye, yu nyalamle touk, amalye winin nang babye, Yerusalem mutuku dana-dana tam nirya ara, cang keil arye deibuka domik poka, deice tam yanibuka banmakirye, ‘Amutuku nang ara, yata wiribuka optibye do?’ tenenyake.

Yakobus 3:6

Aning atonun, malye yupu nyanyaba deice arye, uku buk dilamle atonun usulule. Nun nong noutamak ara, nun sitang deice arye malye un ning yala-yala weik welepsilirye, nun nong ap, nun winin ning nirya ap, malye ulisulule. Winira, yo noutam weklirye, uku buk weik arye dilamle touk, nun sitang deice arye, nun winin ning nirya malye ulisulule. Sirya talak ara, amalye yupu nyanyak ninye ap, sik sitang ap ara, uku din mutuku uku arye pia dinamle.

Amsal 11:6

Aning atonun, ninye ton el talima diksukumuk ululnye bira, ikin ning el dam yatua babye, el diksukumuk ulye deice arye, aminyan talak telebuk unamle. Bukni, ninye ton malye winin ninguk tenebuka ululnye bira, el malye ulul ning deice arye, malye kililalule. Winipmanto ara, ninye arye, ‘Bai basam tongopnamap’ tenen, wena tapu deibikceba, basam mangkau arye banmalebuk, wena tapu youlamle touk, sik malye unyak ninye arye, sik mining atibuk, malye winililanyake.

Amsal 6:14

El kanye pum tam ara, yu kanye bona ninguk ulula ati ara, el talima pum tam lyuna uk ululba, tilila ninguk panalule. El tenelye ning nirya ara, malye un ninguk tenelula anya arye, el balamle mutuku nirya ara, el malye ulye deice arye, yuk ninye nirya babye, kanye wilibuka bokolanyake.

Amsal 2:12

Aning winipmunyopura, anggun adiparyuk malye bisik balamak ning batakuka, diksukum bisik ban tam uk kinamlulume. Ninye sik si bam bol deice arye, tilila yupu nyanyak nang ara, sik ap neika una pia meme. Anggun leibuka yuk sukumuk unamlume.

Mazmur 36:3

Wininyaka deiyok ara, sik bidamnye ati, ‘Nunda pia teleb nanguk unyabe,’ tenelanyake. Tonda, sikda, ‘Kume, nunce malye-malye winin ning, pia weik arye wininyap ning ara, yatanye birye biksuturye, wenepsiting do? Ton kum disinyakeʼ tenen, talye luparabuka, malye-malyeuk wininyake.

Mazmur 10:7

Sik anang ara, ninye sulongon yupu ap, talye yupu nyana ap, weik tonun nyanyake. Tonda, yuk nang ati, ‘Sik nong deice ikin weik tonun delinamabe,’ tenenauk unyake. Atonun, yuk nang nirya ati, ‘Anang ara, nun pia like,’ tenebikirye, pia malye winin ninguk talibuka, talye unamabe!’ tenenyake.

Mazmur 10:3

Malye winin ninguk talibuka wininyak nang ara, ‘Nun patapmasilye ning ara, ani-ani,’ nyabuka maknya kintinibikirye, kwalinyake. Ati, ‘Sik malye wininyak ning ara, tamubuka sik nong deice yanuka, malye kipdeipdating’ tenen, morokinyabe. Tonda, sikce, ‘Nun bona weik tonun doprobibirye, bona talin nang unamab’ tenenyak nang ara, Allah Yahweh ati, ‘Allah ara, nun lik,’ tenebikirye, batakanyake. Tonda, yuk nang nirya ati, ‘Malye kipdeipnamap’ tenen, pia sunyake.

Yakobus 1:21

Aning ati ara, anggun kanye malye tenelulum ning nirya ap, anggun kan-kan malye un ning weik aupmalye ning nirya ap, batakanamlulume. Batakmunce, Allah arye, ‘Na yupu sik talima noutam duk moupnamle’ tenen, arepsuk ning ara, kanye talima dukdongopmunce, nimalye umunyak arye, kekebuka dolonamlume. Allah el yupu arepsuk ning ara, lyepnamsila atia.

Yeremia 24:2

Kwarang yo duk lin aling tonok ning ara, duk pia teleb ninguk, wibuka lipmok. Tonok ning ara, kwarang yo duk malye ning, dipmanto kum ninguk wibuka, lipmok ning deiamokak eipse.

1 Samuel 17:28

Daud el du Eliab bira, Daud ap, sik yin talen nang nirya ap arye, yupu neika talipmekce, nyanmek yupu nirya ara, moubuka kekenmok. Kekebukce, Eliab bira, el weit Daud biti, wenebukce nyabuk. “Anda yata deiyok ati, amutuku yanmalam do? Tonda, an yatanyebak moropmomba, nun domba weik tonun dobuka, pata mutuku noutam deiamlumba, yuknye birye kalikinmal do? Na kele, an ikin kum asa, malye tenepmalam ning ara, bikmane. Anda, ilil kum deice aryuk, asukum yanmalamce, an talima noutam arye, ‘Winipnamne,’ tenepmalam ning babye, na kele. Na kanye ara, an amutuku noutam yanmalama deiyok ara, ‘Ninye olanmakcak ton, narye eipnamneʼ tenen, an akunum yanmalame.

Amsal 10:32

Ninye ton sik talima diksukumuk unyak ninye, sik si pum tam arye nyanyak yupu ara, ninye nirya kekebikirye, sik kanye talima nirya, kil-kil upliba, kanye delinyake. Bukni, malye winin ninguk ulamak nang arye, nyanyak yupu ara, tilila yupu ap, minina yupu ap, lululan yupu ap, tenepce arye nyan yupu ap nirya, ansinibuka nyanyakba, yuk ninye kekekirye, sik kanye talima like ulule.

Mazmur 101:3

Narye talye-talye ning ap, nong kum upnamle ning ap, malye winin ning ap, yuk-yuk ning nirya ara, pia kum elinamne. Aning nirya ara, narye ton, pia kum teninamne. Yuk nang do nirya, Allah arye, “Aning ara, telebe, aning ara, pia malye,” nyapdeiamsuk yupu nirya ara, sikce aning yanibikirye, malye winin ninguk talibuka, pia malye wininyak ning nirya ara, nara ‘Pia likʼ tenenuna ati, aning nirya ara, pia kum elinamne.

Amsal 3:32

Aning ara, urdem ati kum nyapsine. Deiyok ara, anggun ni koproba Allah, el si Yahweh arye, sik malye winin ninguk talibuka unyak ninye nirya ati, ‘Na like,’ tenelule. Bukni, ninye ton diksukum winin ninguk, ulamak nang ara, Allah ap dukdongobuka unyakce, kam pia unamake. Winibuka unyak ninye ati, Allah arye tenelye ning laka nyalule.

Amsal 16:30

Ninye ton, sikce yuk nang ati, sik kanye talima noutamak ara, yu ninguk tenebikirye, ‘Anang ati malye upnamabe,’ tenenyak bukni, ‘Aning ara, yuk nang arye kum kel biknamsiyak’ tenen, urasin etek-etek ana uk unyake. Tonda, anang ara, sik malye tenenyak ning laka nyana kum bukni, si bama mur-mur ana ap, asing ngikilongona ap, nong urasin nirya bamnalakana uk unyake. Bukni, sik kanye talima noutamak ara, pia malye winin ninguk tenebuka, dungnubuka unyaka anya arye, yuk ninye nirya kum kel bikinyake. Winibuka tenenyaka deice arye, yuk ninye nirya ati, malye ulinyake.