Amsal 24:16 - Eipomek

¹⁶ Aning ara, talye ati kum nyapsine. Deiyok ara ani. Diksukumuk wininyak ninye ara, yuk nang arye, sikti, malye kipdeibikiba, ikin upmatu babye, aminyan talak, tuba tamubuka tonap, teleb upnamake. Aning atonun, yu nang arye, like tekbarye ubuka, sik teleb unyak ninye ati, malye winibicopura, mambul kanye bobuka ikin upmatu babye, aminyan talak tuba tamubuka dukdongobikirye, telebuk upnin banamake. Diksukum wininyak ninye ara, teleb wininyak bukni, malye wininanye bira, weik kanye imun ning, el damak yalyopura, atalak aryuk, malye kanye bobuka batakalule.

Amsal 24:16 Referans Kwoze

Mazmur 34:19

Ninye ikin ning dopdobikirye, kanye talima uk dipliba, imun kanye bobuka unyake. Wininyak talak ara, kanye lamapdongobuka unyak ninye arye, tenelamak ning kum winipmanto kibikirye, ‘Se’ tenen, malye kanye bolamak talak ap, pia engenauk ulamak talak ap, Allah Yahweh arye, ‘Sik talima pum tam melipnamle’ tenen, sik aninye dam, ulirye lyelolule.

Mazmur 37:24

Winipmanto ara, Allah arye melibuka talinamle ninye ara, banamak bisik noutamak arye, yan dum keil duknamle bukni, tukwak sakuka, poulbikiba kum opnamle. Deiyok ara, ‘Aninye sakuka oplyak’ tenen, Allah arye anang ati, sik taruk moubuka talilule.

Ayub 5:19

Anya arye, tuba-tuba ikin ning nun damuk like nakub barye uplyopura, lyesulule. Atonun, like tekbarye talak usilye ning babye, lyepdopsiliba kam uk unamlume.

1 Tesalonika 5:3

Ninye nirya arye, “Kume, wini talak ara, ikin una ap, oldana ap kum aryuk, kanye deibuka, pia teleb kanye lamabuka unyabe,” nyanyak talak aniryuk, kilapu mi deiyok, ‘Atalak dipnusile,’ kum tenepmace talakuk, talye karin arye mi deiyok dilamle touk, Allah arye sikti, weik arye wenebuka opnamle. Winiplye talak ara, sik adiparyuk kum lyepdatinge.

Amsal 14:32

Malye un ning ayala-yala nirya talibuka unyak ninye ara, sik mining malye unyak ning deice aryuk, talibuka deiplirye olilule. Allah arye anye bira, el malye ulul ning dekna ati, weik arye wenebuka oploplirye, sirya daknamle. Bukni, ninye ton tuba-tuba malye un ning kum unyakce, Allah el nyalye yupu kekebuka, talinyakce, aninguk moubuka dobolbanyak ninye ara, dipnamak bukni, Allah sik damak ulirye, tuba-tuba melipliba, telebuk unamake. Deiyok ara, sikce teleb winin ninguk unyak ninye atia.

Amsal 13:17

Malye un ninguk talibuka ululnye bira, ‘Nun mambul yupu lak nyalbinamle’ tenen, wipdeipmumnyopura, moubuka kum tenepdelye diparyuk, talye lukparabuka wininamla ati ara, aminyan talak ara, ikin ninguk bobuka anggun dam tamubuka boyanganamsile. Bukni, moubuka tenenanye wipdeipmunce, ‘Nun mambul yupu laka nyalbinamle’ tenen, dopdeipmunyopura, moubuka teneplirye, telebuk unamla ati ara, aminyan talak ara, ninye teleb ulina ninguk, bobuka anggun dam tamubuka boyanganamsile.

Amos 5:2

Ara, anggun Israel ninye ara, wel kilapu atonun, pia teleb ulamlum bukni, wini talak ara, anggun akunum sakmalume. Anggun mutuku koprop noutam akunum saklum bukni, yatanye birye, melibukba tikdeipsutu do? Kume, na Allah arye, tonap tamubuka, kum bukeipnamsine. Luba kipsiniba, anggun unamlum tuku deiceuk unamlume.

Mazmur 52:5

Anda, malye weik winin ning ati, ‘Ara teleb uka,’ tenelyam bukni, teleb winin ning ati, ‘Na like,’ tenelyame. Aning atouk, anda, tilila yupu talye nyaltakna ati, ‘Aning ara, telebe’ tenen, kanye delilyam bukni, dipkoprob yupu nyan ning ara, ‘Na like,’ tenen, malye kanye bolyame.

1 Samuel 26:10

Nuncuk kum opnuname. Allah Yahweh, kam pia ululnye, el si deice arye, dipkoprob nyapkine. Na kele, yuk talak ara, Allah elcuk, ‘Wini talak Saul opnune,’ teneplyopura, opnamlarya. Aning kumopura, narye, ‘Atalak ani,’ kum teneptinye bukni, Allah el kanye aryuk, ‘Saul bira, asum dipnamle,’ tenebuk talak kiplyopura, dipnamlarya. Aning kumopura, mal olan dam banmalye talak ara, ‘Yuk mutuku nang arye, obikiba dipnamle,’ tenyamlyopura, mal olan dam arye obikiba, dipnamlarya,” Daud birye nyabuk.

Mazmur 7:16

Sik malye unyak nang arye, ‘Yuk nang tomobibirye, opnamap’ tenen, ninye balamak bisik noutam arye, tuku palipmakca pum tam sinilongonyake. Bukni, aminyan talak ara, sik bidamnye tuku palyamice pum bisik saknamake.

Ester 7:10

Nyabukura, sik deiyoknye Raja arye nyabuk touk, Haman el nong dobukabikce, ‘Mordekai kirikuka deipnamne’ tenen, Haman elce yo ikuka kintinip deiamukak uk, el mining nong bobuka binuka diripkwetebikba, el ngang yok cebuka dibuk. Winibik talak ara, Raja Ahasyweros el yu tenelamuk ning nirya ara, namin kibuk.

Rasul 12:23

Anang arye nyanmekbuk, Herodes arye, ‘Kume, na teleb unmana ara, na mikip deice aryuk unune,’ tenebukce, Allah si kum erebuka ati, adiparyuk im deice Allah melinanye birye malaikat arye Herodes ati, uk ning aribukura, kuluma weika arye el deiplyu potokukura, minopce dibuk.

Amos 8:14

Na Allah arye, Israel ninye ati, wenenamsin talak ara, sik Samaria mutuku noutam unyak ninye arye, Isa Mutuku Dongonye, el si ara Asima, si erenyak ninye nirya dipnamake. Tonda, Bersyeba mutuku unyak ninye ap, Dan yala ninye mutuku unyak ninye ap arye, Isa Mutuku Dongonye si erebikirye, ‘Nun ni koproba, dipkoprob kam ulye touk, unamabe,’ nyabuka, Isa Mutuku Dongonye si erenyak nang nirya ara, tukwak sakuka pulbanamake. Narye anang nirya obuka, sirya dakniba, dipnamake. Aoplopniba, sakuka pulbinamak ninye ara, tuba tonap tamubuka, kam kum buknamake.” Allah arye, Amos biti nyapdeibukba, laka nyabuk.

1 Samuel 31:4

Dipna dam ubuka ati, Saul birye, el mapu yin talinanye, el ninye olan ning bobana ati, melibuka balamuknye, tonok ati nyabuk. “Wini talak ara, an bopmalam parang ya arye, dobuka lukdongobuka, opnilyame. Kum opniminyeura, sik Pilistin yala nang, pia malye unyakce, den bol mouse kum sekenyak yala nang arye, opnicake. Sikce opnicopura, na nong dobuka, arikal dolamaka atonun, winipnicake. Tonda, ‘Na nong dobuka, pia malye kipdeipnicak,’ tenepne. Aning ara, pia malye ati, nun babye nun yalanye, ancuk an parang ya dobuka, opnilyame,” nyabuka morobuk. Nyabuka morobuk bukni, el melinanye, ilil weik ubuka ati, Saul kum obuk. Tonda, anye birye, Saul biti, weik arye si erebukce, ‘Na ni kum optinye,’ tenebuk. Winibukba, Saul el bidamang aniryuk, cang parang ya dobuka, tukwak ikdeibukce, itam arye sakuka, lumupdayukba dibuk.

Mazmur 34:21

Allah arye, sik diksukumuk wininyak ninye ati, sik nong nirya ara, melibuka dilule. Tonda, ‘Sik yok babye, tonok ton kum copnamle’ tenen, Allah arye aninye ati, pia moubuka kalikilule.

Mazmur 79:12

Tonda, sik yuk-yuk mutuku nang ara, anti, diba tenebuka kum bikikinyak nang ara, nun Israel nang dana-dana tam unyak nang ati, weik tonun wenepnalame. Na nio, anda aning-aning nirya talibuka, nun weik deiyoknye ulyama ati, sik yuk-yuk mutuku nang arye nunti, nalibuka, malye yupu weik nyalamsikce, akutulamsika atonun bukni, ‘Ance tabakuka, like tekbarye tabakuka, pia weik tonun, sik nong deice ikin ning delinalam’ tenen, moropkiabe.

Amsal 6:15

Aning winilya ati ara, malye un ning talye karin arye, el deice uk yalirye, amalye un ning aniryuk, teikuka opliba, el nong ara kum danamle. Weik imun kanye bon ning anye, el nong deice akunum yalyopura, ila tuba tonap teleb kum kipdeipdatue.

Amsal 24:22

Ayupu ara talye ati kum nyapsine. Allah ap, ninye deiyok Raja nang ap ati, sik yupu yaninyak ninye ati ara, minopce wenebikirye, talye karin arye, weik kanye imun ning, sik amalye ninye nong deice delinyake. Yatanye do nirya, Allah ap, ninye deiyok nang ap arye, malye unyak ninye wenena ati, sik damak weik kanye imun pirilen ning yanuka delinamle ning ara, laka nyapsiting do? Kume, Allah ap, ninye deiyok nang, Raja nang ap arye, sik yupu yanibicopura, amalye winin ninye wenena ati, arenamak ikin ning ara, laka kum nyapmantoe. Bukni, weik ikin weik upnamle. Mitik anun kume.

Yeremia 8:4

Allah Yahweh arye, na Yeremia biti, “Ance na mapu Israel nang, sik dam nyalbinalam yupu ara, ani,” nyapnuke. Ara, “Anggun ton tenenipdelulume! Nong cebuka tukwak saklinye bira, ila tamubuka bululul do, kum do? Tonda, bisik balamnak talak arye, tamubuka yuk bisik bilyeba, bisik walwala ululnye bira, akunum biklirye, adiparyuk ila tamubuka, min banmalye teleb bisikuk yangalul do, kum do? Kume, dipkoprob min arye banmalye bisik telebuk banyake.

Yeremia 18:17

Winipmanto ara, keting yangan tam arye, kumanya yangalirye, pu abuka, sung-sunga bobuka balamle touk, na mapu Israel ninye, sik on talak dam uplyopura, narye dobuka, sik oldan nang dam deipnamne. Winipnirye, ‘Aninye ara, daopnyake’ tenen, donga anipnamne. Winipnamne talak ara, sik aninye kum melinamne. Sik wenena ati, sik nong deice ikin ning weik deipnirye, kanye imun ning arepnamsin talak ara, anggun ton kum eipnamsine,” Allah arye nyabuk.

Kejadian 19:35

Nyabuka ati, aning atonun sik bitinye arye, sik ni koproba Lot biti, anggur mek kanye wangalamak mek areprikba, weik dipmokba, kanye bona kum ubuk ati, weit kil arye el li dam biyukce, sik neika mapmarik. Alukunyan babye, sik neika mapmarik talak babye, akilmu bukuka buru bindobuk talak babye, el li koprop arye, bita kum bikmok. Ara, kanye wangapmoka arya.

Bilangan 32:23

Bukni, anggunce, ‘Wininamabe,’ nyabuka nyalin yupu deice arye nyapmalum ning ara, tuba tenenamlume. Anggunce aning nirya ara, kum winipmunyeura, Allah el dam malye unamlume. Aning atonun malye kipmunyeura, dipkoprob nyapsine. Amalye kipnamluma ati, menenga ara, ikin ning weik dopropnamlume. Allah arye wenepnamsilarya, nyapsine.

Amsal 13:21

Aning ara, talye ati kum nyapsine. Deiyok ara ani. Malye winin ninguk talibuka ululnye bira, el donga tam arye, malye una deiyok ning ton dobolyanganamle. Ati anye bira, ikin asa uk unamle. Aning atonun, diksukumuk ululnye bira, el donga tam arye teleb winin deiyok ninguk, tuba-tuba doryanganamle. Ati, adiksukum ululnye bira, teleb ninguk dololirye, kanye deibuka unamle.

Yehezkiel 7:5

Nara, Allah Yahweh, aning-aning nirya deice tam erebuka, Pia Mikip Weik ununye birye, anggun Israel tam ululum nang nirya ati, nyapsine. Kanye imun weik ning yanamle! Ara, minop talak ulamik nang arye, akanye imun ning ato ning ton, kum eiyamikce, kum biklamike. Tonda, yukak ton winyamukak, anggun ton kum kekelamlume. Bukni, wini talak ara, anggun dam yanuka, upnamsile.