Amsal 24:12 - Eipomek

¹² ‘Aninye daopnyake’ tenen, namin kipmunyeura, anggunce nyalulume. “Aning ara, nun deiyok kume, aninye opnuyak ning ara, moubuka kum kel kepmapa anya arye, yata wiriptibye do, kume. Dauplye,” nyalulume. Winibuka anyuk nyamunye bukni, anggun ni koprop Allah arye, ninye kanye talima nirya dilirye, yupu lipsisikuka bokolisulule anya arye, dipkoprob anggun kanye talima noutamak tenelulum ning babye, elce kum kel biktu do? El bidamnye aryuk anggun talima noutamak usilye ning nirya kel kipsilirye, melibuka kalikisulule anya arye, dipkoprob el kele. Anggun tenelulum ning ap, anggunce winilulum ning ap nirya ara, kum dungnuptume. Allah arye aning nirya dilulnye anya arye, elcuk ninye nirya yuk-yuk winilamice ning ati, tamubuka wenenamsile. Aning ara, luba kina meme.

Amsal 24:12 Referans Kwoze

Ayub 34:11

Aning kum bukni, Allah arye, ninye malye ubikcopura, amalye upmace touk dengna ara, anang ati wenelule. Atonun, ninye malye uplinye bira, amalye upmalye touk, Allah arye wenen ning babye areplyeba, amalye wininanye birye dololule.

Wahyu 2:23

Akil arye deiyamuk mapu nirya ara oplopnamne. Winipniba, amutuku-amutuku diba tenenyak ninye nirya arye, moubuka kel kipnamake. Ara, ‘Se, ninye kanye tenen ning ap, ninye talima pum tam usilye ning nirya ap ara, elce kel kisulule. Nun nirya arye ulamap touk, yupu bokeipsilirye, wenesulule,’ tenebikirye, kel kipnamake.

Roma 2:6

Allah yupu noutamak sekamik touk. ‘Allah arye tukwak unyak ninye nirya ati, yupu lipsisikuka, wenepnamle talak ara Allah arye ninye im sirya, mutuku sirya nirya, sik yuk-yuk wininyak ning ati, moubuka dipdelirye, sik wininyak ning awamlye touk, yupu lepsisikuka bokeipnamsile.’ (Mazmur 62:12)

Amsal 21:2

Ninye nirya arye, sik yuk-yuk unyak ning nirya ati ara, ‘Kume, nunda teleb ubuka unyap,’ tenenyake. Bukni, ninye arye sik talima pum tam arye, ‘Adeiyok ati apil donamne, adeiyok ati ayupu nyanamne,’ tenebikirye, ulamak ning nirya ara, lakak kum ulul bukni, ninye tukwak ninye, sik talima pum tam ara, Allah Yahweh arye kel kisulule. Ati, ‘Sik talima teleb do, malye do?’ tenen, asibuka winilasulule.

Yeremia 17:10

Bukni, na Allah Yahweh aryuk, ninye sik talima pum ulul ning ap, ninye arye teninyak ning ap ara, tukwak arye eibuka bikne ning ara, narye sikti, ‘Teleb wininamak do, malyeuk wininamak do?’ tenen, sik nirya ati winilenune. Narye tukwak nang nirya ati, tonok-tonok nang arye, sik wininyak ning, dawinilamiceba, nong akunum uplyopura, narye eipnyopura, sik winilamikiba, duk mouplyopura, narye sikti, kwang dakanune. Ara, narye sik winilamice touk, deken ning arenune.

Penghotbah 5:8

Tonok mutuku noutam balamlumce, dipdebuka, mikip weik deiyoknye birye, sik talye bona utotoa kum nang nirya ati, sik nong deice ikin weik ning deiplirye, sik anang ati dopropnyopura, aning ara anggunce, ‘Seʼ tenen, Yata upmal do?’ tenen, kanye teniltona kume. Deiyok ara ani. Amalye ulamlye ninye deiyoknye, el deice tam ton, ninye deiyoknye yuknye ton aulule. Atonun, anye el deice tam babye, yuk deiyok nang ton daunyake. Sik nirya arye, amalye ulamlanye ulul ning nirya ara, elikirye akunum bikinyak bukni, sik nirya ara, ‘Yo dauplye,’ tenebikirye, luba kinyake. Ati, sik nirya ara malyeuk unyake.

Mazmur 121:8

Allah Yahweh arye, nun ban talak babye, yangan talak babye, pia teleb ubuka kalikinamsile. Ara, wini talak arye dipdongobuka, yuk dotalak babye, pia ati kalikinamsile.

Mazmur 121:3

Tonda, elce nunti, kum bataknamsile. Teleb ubuka kaliksiliba, nun yan babye, ton alap pitikuka kum opnamsile. Allah arye, nun Israel ninye ati, pia kalikisululnye bira, ton pia kum malule. Elce tuba-tuba nun damak ulirye, kalikuka melinamsile.

1 Samuel 16:7

Utenebuk bukni, Allah el si Yahweh arye tamubuka, Samuel biti nyabuk. “Ancuk eipmince, ‘Anye bira, el urasin teleb, el nong ara, cang weik ati, pia telebnye ulule,’ tenebuka, wibuka erelina kume. Narye, anye akunum batakmana ati, kum wipdeipnune. Deiyok ara, nyapnukine. Ara, na Allah arye, ninye nong ap, sik urasin ap, eipnirye kum erelinune. Ninye arye, nong bol deice ning eibikirye, ‘Aning mambule, anye bira telebe,’ tenelamaka atonun, kum tenenune. Tonda, ninye arye urasin ara, elilalulum bukni, nara Allah, na Yahweh arye, anggun talima pum tam moubuka elisunune,” nyabuk.

Mazmur 62:12

Nun ni koproba Allah arye, uku tonok talak arye akunum nyapdeipsuke. Tonda, uku bitinye ap, tuba weik talak ap, akunum nyapdeipsukba, na ton kekelamse. Allah arye nyapdeipsuka ara, ani. “Dipkoprob mikip weik uning nirya ara, na Allah aryuk talinune. Yuk ning nirya ara, mikip kum ulule,” nyabuka, nyalilamsukba kekelamse.

Mazmur 17:3

Ance, na kanye talima noutam ara, moubuka dipdenimince, tonda, lukunyan noutam babye, ‘El talima noutam ara, malye winin ning aupmal do, kum do?’ tenen, na kanye talima noutam moubuka dipdeniminyopura, ‘Aning ton aubukʼ tenen, eipnamnilame. Na kanye talima noutam ara, malye un ning ap, tonda, ‘Malye winin ning talibuka wininamne’ tenen, ning ton, pia kum eipnamnilame.

Wahyu 22:12

Ayupu kekepseura, Yesus arye ayupu nyapnuke. “Anggun kanye mouplulume. Nara, minopce anggun dam yanamne. Narye tukwak ninye sik dekna ati, menenga ning ap wenen ning ap ara, akunum kintinipse. Ninye im sirya, mutuku sirya nirya ati ara, sik wininyak ning aupmalye touk, anirya dipdenirye, anggunti yupu lipsisikuka bokeipsenirye, wenepnamsene.

Wahyu 2:18

Ninye Mi Koprop Atonunye birye nyapnuke. “Yohanes, ance Tiatira mutuku diba tenenyak ninye, sik melina malaikat ati ayupu sekuka dopdeiplyame. Ayupu ara, ani.” “Nara, Allah el Mi Kopropa arye nyapkine. Na asing ara, weik uku buk dilamle touk unulule. Tonda, na yan ara besi ning dobuka uku noutamak dongobikiba, diplirye, mereng-mereng nyalamle touk unululnye birye nyapsine.

Wahyu 1:18

Minop talak dipse bukni, wini talak ara, kam unye touk, pia kam unamne. Nara, pia Kam Una Deiyoknye ununa ati ara, aminyan doryanamle talak babye, pia kamuk unamne. Nara, Ninye Dibina deiyok ning ap, akunum diamice ninye unyakak ap, talibuka una deiyoknye ununa anya arye, aning nirya ara talibuka unune.

2 Korintus 5:10

Ayupu nyapmasin ara, urdem ati kum nyapsine. Kume, ninye mutuku-mutuku nirya aminyan sirya talak ara, Kristus arye ninye nirya yupu bokona ati, weik ninye deiyok nang arye bulamak ning takta kursi bulamak ning deice buklibuk, el dam binamabe. Kristus arye, ninye nirya dipdesilirye, ninye yuk-yuk bukni, nirya, sik pil dolamak ning ap, yupu nyalamak ning ap, nirya awinilamak touk, yupu lipsisikuka bokeipnamsile. Ara, ninye nong ubuka pil dolamubu ning ati, teleb ning babye, malye ning babye dipdesilirye, yupu lipsisikuka bokeipnamsile. Ati, ‘Yata pil doptibyeba, Allah arye kanye deipsutu do?’ tenenauk unamnyape, nyapsine.

1 Korintus 4:5

Aning ati ara, nun nirya ati nyapsine. Allah arye, ‘Yesus tamubuka tukwak yanamla ati, atalak ani’ tenen, wepdeibuk sum min kum upmalye talak nirya noutamak arye, yata winin ning do nirya ati, “Aning telebe, aning malye,” nyabuka, yupu lipsisikuka kum bokeipnamlume. Aning nirya daupmaliba, ‘Nun Deiyoknye Yesus dan talak yanamle do?’ tenen, dinauk unamlulume. El yalyopura, elcuk yupu lipsisikuka bokeipnamsile. Yesus tamubuka yalyopura, aning-aning nirya ati, yupu lipsisikuka bokeipnamsile. Yata ning do nirya, kunuknak duknulamak ning nirya ara, dirinak deibuka, lak kipdeipnamle. Ninye sik talima noutamak arye, ‘Winipnamne, winipnamne’ tenen, deiyok ning duknulamak ning nirya ara, laka kipdeipnamsile. Tonok ning babye, kum duknupmantoe. Anirya laka danamle. Winibuka akunum laka kipdeipsilyopura, atalak aniryuk, Allah arye, ninye nirya ati, sik winilamice ning auplye touk, yupu lipsisikuka bokeipnamsile. Teleb winin ning ati ara, “Telebe,” nyapnamsile. Malye ning ati ara, “Malye,” nyabuka wenepnamsile.

Roma 2:16

Ura, Allah arye tenyamuk sum akunum uplyopura, tukwak ninye im sirya, mutuku sirya nirya ati, yupu lepsisikuka bokeipsilirye, wenepnamsile. Ara, Allah arye nyapliba, Yesus Kristus arye ninye nirya ati, sik kanye talima pum tam arye duknubuka tenelamice ning babye, nirya lakak kipdeipsilyopura, aning nirya Allah arye dipdelirye, yupu lepsisikuka bokeipsilirye, wenepnamsile. Ton nang ati ara, “Anggunda diksukum kibuka deipsine,” nyapnamsile. Ton nang ara, “Anggunda malye ulamlume,” nyabuka bataknamsile. Awinipnamsil ning nirya ara, narye Yesus el laka teleb yupu, ninye lyena yupu laka nyasununa deice arye peteresunune.

Rasul 17:28

Bukni, dipkoprop ning ara, nun nirya yuk-yuk, unyap bukni, nun dam usulule. Pera ak kum ulule. Ura, nun kam ubyap ap, nun banyaba ap, nun pil dobuka unyap ning nirya ap, Allah arye elcuk melibuka talisulule ati, nun nirya nun damak usulule. Anggun mutuku koprop teleb yupu seklamik nang arye, sekuka nyalilamik touk, ‘Nun babye, el mapu uk unyabe,’ anyuk nyapsine.

Matius 16:27

Ara, talye ati kume. Nara, Ninye Mi Koprop Atonunye, na ni el urasin pia teleb ulirye, dirina weik ulya atonun, na babye atonun upyopura, Allah arye kwepdeibukba, el im deice pil don nang, malaikat ap, ansinibibyopura, tukwak yanamabe. Yanamap talak ara, tukwak ninye nirya wenebuka lipsisikuka bokeipnamne. Yata ninye do nirya, sik winilamikce ning atonun, narye moubuka dipdebuka nuknirye lipsisikuka bokeipnamne. Ara malye winin ninye ati wenebuka opnamne. Teleb winin ninye ati dekna ning arepnamne. Yesus arye awekmek nang ati nyabuk.

Daniel 5:23

Anda, Allah im deice ululnye dinmakukak arye, malya kibuka kanye erepdalumce, Allah ati, ‘Na like’ tenen, yaniltalamlume. Winilamlumce, Allah el si eren aik pum tam, deiamikbuk, boyanamik ning, emas arye memebuka deiamik mek makau ara, ance nyaplumba, an mutuku talibuka unyak deiyok ninye ap, an kilapu ap, an tam kili sal ap, sik nirya ara, amakau arye anggur mek kwebuka dinmalume. Winipmalumce, anggun si erelulum minop kwemdina ning, emas ap, perak ap, tembaga ap, yuk kat ning yo ap, keil ap kintinibuka deiamik ning, Isa Mutuku Dongonye urasin atonun ning ara, sik si nyabuka erepmalumce, mot nyanmalum talak ara, ‘Allah dinmasile,’ tenepmalume. Anggunce, Isa Mutuku Dongonye si erelulum minop kwemdina ning ara, asing arye, ton kum elinyake. Tonda, amul arye kum kekebuka, kel bikinyake. Allah aniryuk, dibin ning babye, kam un ning babye, elcuk, ‘Wininamak’ tenen, kintinibuka deibuknye ulul bukni, atalak ara, ance Allah ati, telebe nyabuka, si kum erepmalume. Tonda, Allah aryuk an kam unamlam ning nirya ara, kintinibuka delikulule. Awinikilye ning nirya ara, ance moubuka kum kel kilaluma ati nyapkine.

Yeremia 32:19

Tonda na nio, ance sikti, ‘Aning ara, winipnamlume, aning ara, pia kum winipnamlume. Teleb winina ara ani,’ nyabuka laka nyasilyam ning ara, ninye arye kum tenipmanto, pia mambul ninguk melibuka nyasilyame. Tonda, ance pil dopminye ning nirya ara, ninye arye pil kum dopmanto ninguk, mikip weik deice arye, an pil dopra ulyame. Ninye nirya arye, pil donyak ning nirya ara, ance disilyamce, apil donyaba atonunuk dengna ara, aresilyame. Malye winin ning ati, ikin ning dolonyabe. Diksukum winin ning ati, teleb dengna ning dolonyabe. Moubuka eipsimince, nun winilamap touk, dengna ning arisilyame.

Amsal 5:21

Ayupu nirya ara, talye ati kum nyanmasine. Deiyok ara ani. Ara, tukwak mutuku-mutuku nirya unyak ninye ara, sikce wininyak ning nirya ara, nun ni koproba Allah Yahweh arye, elisulule. Elisilirye, ninye wininyak ning nirya ati, ‘Teleb ning ani, malye ning ani’ tenen, yupu lipsisikuka bokolisulule. Aning-aning nirya disulula anya arye, tonok ning babye kum batakalule.

Mazmur 66:9

Nun mal olan nang arye, opsitingba, nunda, akunum dipmatibye nang unyap bukni, Allah elcuk nunti, kaliklamsuka deice arye, tuba kamuk unyabe. Tonda, elce nunti, pia batakna kumce, tuba kalikisulula ati, nun dam ara, pia ikin weik ning ton, kum yangasulule.

Mazmur 44:21

Bukni, nun kanye tenenmaba ara, ani. Nun si erenyap Allah, elti, akunum batakuburye, el si luba kiptibyeura, Allah arye aning biktu do? Kum do? Tonda, nunce Allah batakuka, yuk talye ning ati, isa si erelamtibye toura, Allah arye, aning biktu do? Kum do?

Mazmur 7:9

Allah Yahweh, elcuk, nun tukwak unyap nang yala-yala nirya ap, mutuku noutam unyak nang nirya ati, yupu lipsisikuka bokolina deiyoknye ulule. Ati, na ni Allah Yahweh, ancuk kintinipmince, na dipkoprobuk ulamse ning nirya ati, moubuka tenipdemince, ance nati, yupu lipsisikuka bokeipnamnilame. Tonda, na kanye talima noutam tenina deice arye, tilila yupu tonok ning babye kum nyalamse. Na kanye talima ara, dipkoprob uk unulula deice arye, aning dipdemince, na winilamse touk ubuka, yupu lipsisikuka bokeipnamnilame.

1 Samuel 25:29

Winipmanto yuk nang arye, na deiyoknye anti, ‘Opnuyap’ tenen, yanamak nang ara, dipkoprob an ni Allah, el si Yahweh arye, melibuka kalikliba, sik anang arye, kum opnamkiyake. Allah arye moubuka, kalikuka melipkilya deice arye, pia kam unalame. Bukni, akeil deice arye, keil duk deipdongobuka, yukak erebuka dolamak touk, ‘Allah arye, an mal olan nang ati, yukak dopkweteplirye, oplopnamle’ tenen, Allah moronamkine.

1 Samuel 2:6

Allah Yahweh, elcuk kam bulina ap, dibina ap, delina ap, anirya ara, elcuk winililule. Ara, Allah Yahweh elcuk ninye ati, ‘Kam unamle,’ teneplyopura, anye bira kam unamle. Tonda atonun, yuknye biti, ‘Elcuk dipnule,’ teneplyopura, adiparyuk dipnule. Tonda, Allah elcuk, diplinye bira, dibin ninye unyak dam, asukum el si ara Sheol mutuku dolkwetelule. Atonun, elcuk, ‘Kam buknamle,’ teneplyopura, tonye bira, weik kanye imun uk dipliba, dipmanto upmalya babye, Allah aryuk teleb kibuka wetepdeipliba, kam tuba pia unamleʼ. Dipmalya babye, kam bukeipliba, tamubuka telebuk unamleʼ.

1 Samuel 2:3

Ati ara, anggun malye ululum ning ara, talye nyalulum yupu nirya ara, adiparyuk bataknamlume! Anggun erelan yupu deice arye nyalulum yupu babye, asukumuk deipnamlume! Ara, Allah Yahweh elda, dipkoprob aning-aning nirya ati, weik kel bikina deiyoknye ulule. Ati ara, Allah Yahweh elcuk, ninye nirya arye, sik unyak ning nirya ati, ‘Malye ning ani, teleb ning ara, aniʼ tenen, dipdebuka bikilisulule.

Mazmur 94:9

Anggun moubuka tenipdelulume! Nun amul kwepdeipsuk deiyoknye birye, anggunce nyalulum yupu ara, kum kekepsutu do? Nun asing kwepdeipsuka deiyoknye birye, nun tukwak nang wininyap ning, moubuka kum elilirye, kum biksutu do?

Amsal 12:14

Ninye nirya arye, pia pi deibuka, mikip arye teleb piluk dolamikca deice arye, teleb ning ayala-yala nirya, sik dam yangalule. Aning atonun, yata ninye do nirya, teleb yupu uk nyanyaka deice arye, teleb ning ayala-yala nirya, sik dam yanganamle.

Amsal 5:22

Malye unyak ninye arye, sik malye wininyak ning deice arye malye winililanyake. Winipmanto ara, ninye arye wena tapu wemikiba, kapang mana mangkau arye wena pum bisik baliba, youlamle touk, sik malye unyak ninye arye, sikce sik bidamnye ati malye ulilanyake.

Amsal 16:2

Ninye nirya, sik kanye talima noutamak arye, ‘Nun wininyap ning nirya ara, diksukumuk unyabe. Nun babye bisik ara, telebuk unyabe,’ tenebuka banyake. Wininyak bukni, Allah Yahweh arye, ninye kanye talima noutamakuk dilirye, moubuka asilesulule. Ara, ‘Ninye nirya sik wininyak aning ara, yata ning tenekirye, wininyak do? Yata deiyok ati, apil donyak do?’ tenen, asilesilirye, kel kisulule.

Ratapan 3:36

Tonda, nunce malye kum winipmabye bukni, yuk nang arye, tilila yupu nyabikca deice arye, sik yupu lipsisikuka nyanyak deiyok nang kekebikirye, deiyok kum upmalibuk, nunti wenen ning ara, deipsikceura, nun ni Allah Yahweh arye, aning eibuka akunum bikisulule.