Weik ikin yupu nyapnusin ning ara ani. ‘Weik kel bikna deiyok ning, moubuka tenepnirye, telebuk unamne’ tenen, patalul ninye ara, minopce nun ni koproba Allah, el si Yahweh ati, ‘Elda pia weik mambulnye’ tenen, ilil upliba, el siuk erebikirye, el amu tamuk unyake. Bukni, kanye bona kumce, pia walwal asa unyak ninye ara, diksukum un ning nirya ati, ‘Nun like,’ tenenyake. Sikce pia weik kel bikna deiyok ning ap, tonda talye mangkau asa una kum bukni, ‘Malye ubipyak’ tenen, moubuka tenebikirye, diksukumuk un ning ati, ‘Nun like,’ tenenyake. Ara, pia walwal uk unyak ninye ati nyapne.
Amsal 18:2 - Eipomek2 Ninye ton, walwal kanye bobuka malye winin ninguk tenelul ning ara, weik kel bikamikce nang arye, laka nyanyak yupu ap, “Teleb ubuka un ning ara ani,” nyabuka, nyanyak yupu ap, pia moubuka kum kekelule. Anye bira, ninye yuk nang arye nyanyak yupu kum tenelirye, elcuk, ‘Na akunum bikamse ning laka nyapnusin ning ara ani. Narye winiptinye, tenenun ning ara ani,’ tenelul touk, aninguk tenebuka nyalula anya arye, elcuk, ‘Na kele,’ tenebuka ulule. Bukni, dipkoprob anye bira, weik kelnye kum ulule. Ati ara, pia dipkoprob el kel kum kinamle. Gade chapit la |
Amsal 18:2
14 Referans Kwoze
Weik kel bikamuknye birye, el kel bikamuk ning ap, pia weik kel arye tenelul ning ap ara, lakak aryuk weik arye kum nyalule. Ara elce, ‘E yuk nang nirya ara nati, se elda pia weik kel bikilulnye ulule, tenenamniyak’ tenen, min kum nyalule. Elce weik kel bikne ning kel bikamuk ning ara, duknuna atonun ulule. Bukni, dipkoprob walwalnye birye, ‘Yuk ninye nirya ati, nati, elda weik kel bikinanye tenepnamniak’ tenen, yupu weik arye nyalule. Bukni, elce nyalul yupu ara, dipkoprob walwal aryuk nyalula anya arye, ayupu kekenamak ninye ara, ‘Dipkoprop anye bira, walwal uk ulule,’ tenenamake.
Ninye ton, malye winin ninguk upnin balulnye birye, “Kume, na yo bok weik arepnumunya deice arye, weik sekolah binuka kel kipnirye, weik kelnye unamne,” nyabuka nyaptu babye, el yupu kekena pia kume. Anye bira, el kanye talima noutamak ara, ‘Weik kel bikna deiyok ning, pia patanulule’ tenen, kum ululnye anya arye, ayupu ara talye nyaltakalule. Ati, anggunce, ‘Sekolah wekenamle’ tenen, atonye biti, yo bok arepmunyopura, talyeuk ititilalulume. Aning ara, dipkoprob nong ton pia kum upnamle.
Kel pia weik kiamuknye bira, min kum winiplye talak, moubuka tenepdelirye, ‘Aning winipnaman do, aning winipnaman do?’ tenen, akunum moubuka teneplyopura, el winin ning ap, el pil ap dolule. Bukni, sik walwal asa uk unyak ninye ara, min kum winibice talak pia kum tenenyake. Sik bidamang kanye aryuk tenenyak ninguk, talye lukparabuka wininyake. Tonda, sik moubuka kum tenilenyak ninye ara, malye kiplirye winipliba, yuk ninye kekenak ara, “Nun tenepmapu ninguk, talye lukparabuka winipmabe,” nyabuka erepdanuka kwalibikirye talye nyaltakanyake. Aning ara, walwal asa aryuk, ‘Malye winipmap do?’ pia kum tenenyake.
Ara, na kayapu, aning ara, talye ning bukni, anggunce, ‘Nun ni koprop anya arye, si erebuka kipnamap’ tenen, tup ning kalibuka arilamak ning ara, yupu nyapnusine. Anggun Allah ati, dib tenelulum ninye arye, “Diptibye do, kum do?” nyabuka, asipdenulum yupu ara, nyapnusine. Aning nirya ati ara, nun nirya kel bikamupe. Bukni, luba kina kume. ‘Nunda weik kel ninye unyabe,’ tenelamak ninye ara, weik kanye erebuka kwalinyake. Wininyak bukni, yuk ninye ati, ‘Bico tenebuka melilanauk unamabe,’ tenelamak ninye ara, yuk nang ati, talima kwa dibuka melibikiba, nun nirya teleb upnin banyabe.
Sik malye un ning talibuka unyak nang ara, teleb karayong bisik deice banmace talak babye, sikda, moubuka kum tenipmanto nang unyakce, pia walwal nanguk unyaka ati, sik walwal unyak ning arye, lak upliba, yuk nang nirya eibikirye, akunuma, ‘Se, anang ara, pia dipkoprob walwal nang unyake,’ tenebikirye, bikinyake.
Ara, ton nang ara, Kristus el yupu peterenyak bukni, nati talima wilipnikce, ‘El yupu kekenyak ninye ara, Paulus el batakuka, nun tam kepropsitinge’ tenen, tenepce arye, Yesus el yupu peterenyake. Yuk nang ara, aning atouk kum bukni, tenepce arye tenena kum, ‘Telebuk neika unamap’ tenen, talye luba kibuka, Yesus Kristus el yupu teleb ubuka peterenyake.
Anyapmasina atonun, anggunce anggun ap neika ululum ninye ati, Allah El Dib Kanye mikip deice arye, yuk mutuku yupu diribuka nyapmunyopura, anggunce anggun bidamang nang ati, “Sikda, yuk mutuku ninye atonun unyake,” nyalanamlulume. Anggun Korintus mutuku ninye arye, ‘Se, Allah el pil dona ati, el mikip deice arye, pil dona deiyok ning aning-aning nirya arepsutue’ tenen, patasilibuk, ululuma anya arye, ayupu nyapsine. Allah dib tenenyak ninye nirya, sik talima kwa dina ap, mikip kilina ap, ati, moubuka kel biknamting ning uk, ‘Allah arye, apil dona deiyok ninguk arepsutuba, nun neika unyap ninye ati melimdatibye’ tenen, pia patasiliba, unamlume. Yuk ninye ati kum melipmanto ning ara, patana kume.
Se, anggunda walwal ninye uk ululume. Kanye bona kumce, pia walwal deice aryuk umunye ning, pia malye weik ulamunye ning atibuk, kanye deibuka ululume. Yata talak tonap, amalye winin ning ati, kanye deibuka unamlum do? Anggun yep-yep alulum ninye ara, yata talak arye, yata karin arye tonap, talye kanye deibuka, yep-yep tuba nyanamlum do? Anggun kel bikna deiyok ning ati, ‘Nun like’ tenen, walwal kanye bobuka umunye ninye ara, yata talak karin arye tonap, walwal un ninguk winiltakanamlum do? Aning atonun, dan talak na nyasinye yupu ati, moubuka kekepmunce, kel biknamlum do?
Ninye ton, pia tuba malyeuk upnin balulnye birye, yuk ninye damak yanuka ulirye, dipkoprob nimalya arye kume. Minopce aninye ati, malye ulilule. Winipliba, sik yuk mutuku unyak ninye nirya arye, anye ap, el neika dukdongobuka unyak ninye ap nirya ati, ‘Sik pia malyeuk unyaka anya arye, nun like,’ tenebuka, aninye bataknamake. Ara, amalye un ning ati, “Yanuka winiplulume,” nyalya deice arye, amutuku ninye nirya, malye unyakba, yuk mutuku ninye arye, ‘Nun like,’ tenebikirye, bataknamake. Akunum batakikirye, leipdobicopura, amalinye ap neika unyak ninye arye, ‘Se, yata ati do?’ tenen, alye weik dakaldanamake.
Piblisite