Amsal 18:10 - Eipomek

¹⁰ Ninye arye, ‘Yuk mutuku ninye ati yanuka opsicak’ tenen, weik cang keil aik dolamikak, pum tam dungnubuka wekelbalamak touk, Allah Yahweh elda, mikip weiknye ulula anya arye, elce elti, dib tenenyak ninye, pia melibuka kalikinamle. Yata ninye do nirya, sik malye unyak ning nirya batakikirye, ‘Allah el yupu nyasilye touk, aninguk talibuka diksukumuk unamabe’ tenen, teleb ubuka unyak ninye arye, Allah el damuk yanganamake. Allah el damak akunum yacopura, Allah arye sikti, pia melibuka kalikinamle.

Amsal 18:10 Referans Kwoze

2 Samuel 22:3

Na ni Allah, na ilil unilye talak nirya ara, keil deiya wekuka, dungnunye touk, ikin unilye talak nirya ara, ancuk melibuka lelildongonilyama anya arye, an aminyan tam dungnubuka banune. Yin talin nang arye, ‘Mal oldan talak ara, mal dobikceura, biklyak’ tenen, kelapye lilibuka winilamak touk, ance melibuka kalikinilyame. Na melina ati, kelapye atonun lelinilyame. Na lyena deiyoknye bira, an uka. Na ni Allah, anda keil bukamlye mutuku dup amu tam dungnul banun atonun, an mikip deice arye lelilamnilame. Pia yu nang arye, ‘Anye bira opnuyap,’ tenebikirye, mal wiyanganinyak bukni, na ni koprop ance lyenilyame.

Mazmur 91:2

Narye, na ni Allah el si Yahweh ati nyanune. Na ni Allah ance nati winipmanto, weik keil aik domica noutamak ulamak touk, nara an erebuka uminyeba, nara an amu tam unamne. Aning ara, talye ati kume, narye an Allah ati, ‘El bidamnye aryuk, melibuka kalikniliba, ikin ning na damak, kum yanamnila anya arye, elce pia lyelonamnile,’ tenebuka unune.

Yesaya 26:4

Pia ati Allah Yahweh, el tibuk diba tenebibirye, el tibuk talibibirye, el deiceuk nun kanye deilinamabe. Ara talye ati kuma. Deiyok ara, nun ni koproba Allah Yahweh, aning-aning deice tam erebuka, Mikip Weiknye ulula anya arye, pia melibuka kalikisiliba, el amu tamuk unamabe! Winipmanto ara, weik mutuku bukamlye keil, dama duknul bitibirye, pia teleb kibuka utibye touk, Allah aryuk nunti, melibuka kalikisulule. Allah ara, pia kum bataknamsile!

Mazmur 144:2

Weik mutuku bulamle keil, deiya dam duknuptibye do, tonda, weik cang keil aik pum tam wektibyeba, sik yu nang arye, kum opsiting touk, narye Allah el dam binyopura, Allah arye, nati, pia melibuka kalikinulule. Tonda, na pia mikip kilinulula ati, na mal olan nang arye olyanganinyak talak ara, Allah arye, na lyelona deiyoknye unulule. Cang keil aik, el si ara benteng, pum tam wektiniba, yu nang arye, kum opnitinga atonun, unulule. Yin talin nang ara, ‘Sik yuk nang arye, mal dobikiba, opsikcak’ tenen, sik nong lelin ning, el si ara perisai, talilamaka atonun, Allah arye nati melibuka kalikinulule. ‘Yu nang arye, na dam yanuka opnikcak’ tenen, Allah el damuk binuka unune. Tonda, Allah el mikip deice arye, sik yuk mutuku nang, yuk-yuk nang nirya ara, na amu tam deipnilyopura, narye sik anang nirya ara, mikip unirye, talinune.

Mazmur 27:1

Daud birye nyabuk. Allah ance na dirina kilina ap, na lyena ap, Deiyoknye ulyame. Ara, weik kat poka cang arye erebuka dolamak touk, Allah Yahweh ance erebuka uminyeba, nara an amu tam unune. Ati ara, yuk nang nirya ati, ton birbir apnilirye, ilil kum unamnile.

Mazmur 18:2

Daud birye, “Se, na ni Allah Yahweh, ance na mikip arepnulumnye biti, na kanye nirya, an deiceuk delikunune,” nyabuk.

Kejadian 17:1

Sik nirya daulamika ani, aminyan talak Abram bira, keting tamun weik, 99 tahun nukuka wisi akunum dayuk talak ara, Allah el si Yahweh arye, el dam yanuka tikukce, elti, ayupu nyabuk. “Nara, aning-aning nirya deice tam unirye, Pia Weik Mikipnye unune. Anda, batakna pia kum dipkoprop, na yupu moubuka talipmince, dobolyangalamnimince, malye winina pia kum, teleb-telebuk unamlyame.

Wahyu 1:8

Aning-aning deice tam unirye, weik mikipnye unune. Nara, pia weik Ninye Deiyoknye Allah arye nyapsine. Aning-aning min kum uamuk talak ara, na akunum ulamse ati, na si ton, Alpa nyaninyake. Tonda, aning-aning nirya akunum kum uplyopura, nara pia kam unamne ati, na si ton Omega nyaninyake. Nara, minop talak ulamsa ani, anoutam talak unirye, aminyan doyanamle sirya talak ara, yanamne. Na Allah arye nyapsine.

Matius 1:23

Yesaya arye nyalilamuk yupu ara ani. ‘Ninye dona kum kil arye, mi bomlya ani, sal mi deipnamle. Deiplyopura, el si ati Imanuel nyanamake. Imanuel nyanamaka ara, ‘Allah ap, nun ap, neika unyapnye’ tenen, nyanamake.’ (Yesaya 7:14)

Yesaya 9:6

Aning nirya ara, talye ati kum nyanyabe. Aminyan talak, pia telebuk wininamsil ning deiyok ara ani. Ara, Allah arye tenelamsuk touk, wini talak ara, nun lyena ati, sal mi tonok akunum deipmasirake. Allah arye weik mambul mi akunum kintinibuka arepmasile. Nun lyena ati, ami akunum arepmasil mi elda, aminyan talak aning-aning nirya talibuka, nun ninye deiyoknye unamsile. Winibuka daulamepya ani, ninye nirya arye, el si erebikirye, el si ati nyanamak ning ara, ani. Pia Mambulnye ulule. Ninye melina ati, Kanye Talima Kwadina Deiyoknye ulule. Pia Mikip Weiknye Allah ulule. Nun Ni Allah, Pia Kam Unamlanye ulule. Allah ap ninye ap, neika teleb una ati, Ansinilina Deiyoknye ulule. Aning-aning nirya, ninye arye el si tenibuka nyana ati, ayupu nyanamake.

1 Samuel 30:6

Aning nirya winipmekba, Daud el melina nang, sik yin talin nang ara, weik kanye ikin ubukce, ‘Se, nun kilapu ap, nun mapu kilmapu nirya ap, Amalek nang arye, akunum dobuka bobinmake. Winipmasiaka ati ara, nun deiyoknye Daud biti, keil dobuka, opnuyap do?’ teninmek. Utenebikba, Daud birye, ‘Se, yata wiriptinye do?’ tenen, tenipdeyukce, ikin kanye bobuk. Bukni, Allah el si Yahweh arye talima pum tam mikip arebuk deice arye, Daud el talima melibukba, Daud el mikip tuba ubuk.

Yeremia 23:6

Narye wibuka deipnamne Diksukum Una Deiyoknye birye, amutuku talinamle talak ara, Yehuda yala ninye nirya lyepnamle. Tonda, Israel ninye ayala-yala nirya ara, ‘Nun oldan nang arye olyanamsiyak do?’ tenena pia kum diparyuk, talye kanye bobuka, kanye deibikirye, teleb ubuka neika unamake. Ilil una ap, oldana ap, kum unamake. Ninye deiyok kipnamlanye biti ara, nyanamaka ara, ani. Ara, ‘Allah Yahweh ara, nun Diksukum Ulisulul Deiyoknye ulule,’ nyanamake.” Allah arye nyabuk.

Mazmur 91:14

Allah el si Yahweh arye nyabuk. Dipkoprop, na wipdeiamsinye birye, natibuk kanye deilinulula ati, narye el anye bira, lyelonamne. Lyepropniba, elda na amu tamuk uliba, nara el damuk, pia unamne. Ara, el anye birye, na siuk erenulula anya arye, narye elti, pia melibuka kalikinamne.

Habakuk 3:19

“Na ni koproba Allah, anda aning-aning deice tam, Weik Erena Deiyoknye umince, an tenepminye touk, winilyamnye anya arye, anda Allah Yahweh ati, si erenamkine. Ance lyelonilyamce, na nong ap, na kanye talima ap ati, mikip arenilyame. Winipmanto ning ara, rusa basam yanuka, pia telebuk ulirye, mutuku konak keil si deice, talye mangkau kibuka balamle atonun, ance melipnimince, mikip weik kibuka areniminyopura, nara telebuk unune. Pia weik mutuku dup babye, welebuka bitinye.” “Ati, kanye imun ning yanilya babye, ilil kum unamnile. Na Habakuk birye, ayupu nyapne. Nun mutuku mot sena deiyoknye, el kekena ati, akunum nyapne. Amot senman talak ara, binggong lena, el urasin ara, gitar atonun ning arye, mot sepmane.” Nabi Habakuk birye nyabuk.

Yesaya 57:15

Nara Allah, aning-aning nirya deice tam erebuka ununye birye, nyapsine. Tonda, aning-aning nirya deice tam ununa ati, na siuk weik tonun ereninyaknye birye, nyapsine. Nara min talak akunum kam ulamsirye, aminyan doyanamle talak babye, na pia Kam Una Deiyoknye unune. Na ap, na si ap, Pia Teleb, Lek Ululnye unune. Nara, pia weik erenak, im deice unune. Na ununak ara, dipkoprob malye ning tonok babye kum ulula ati, pia teleb kurunak unune. Bukni, nara yata nang do nirya, sik talima amu tam kibikirye, sikce, ‘Se, nun malye unyap ning ati, alye dakdanuka unyaba ati, aning nirya batakabe,’ tenebikirye, talima erena kumce, malye kanye bobuka, sik kanye talima namin unyak nang ap, neika unamne. Na ap, sik epdanuka neika unamap deiyok ara, narye sik malye kanye bobuka talima lamapdongobuka unyak nang ara, mikip arepnyeba, sik kanye deipnamake. Tonda, sikce, ‘Se, nun malye unyap ning ati, alye dakdanuka unyaba ati, aning nirya batakabe,’ tenebikirye, engenyak nang ati, sik talima kwa dipnyeba, sikce kanye deibuka teleb unamake. Sik ato unyak nang, sik dam ara, na aunamne, nyapsine.

2 Samuel 22:51

Allah ance, ‘Anye bira Raja unamle’ tenen, wibuka ereiyamnulumnye biti, meliamnuluma deice arye, na mal olan nang nirya, opnin balamsa ani, Israel ninye yala nirya ati, sik ninye deiyoknye Raja una ati, tuba tamubuka ereipnulume. Tonda Allah ance, ‘Anye bira, Raja Israel unamle’ tenen, bico tenebuka wiamnulumnye bira, na Daud biti, batakana pia kum aryuk, tuba nati, teleb ubuka melinilyame. Tonda, na ap, na mapu silip ap, dadeipdanin banamak ninye nirya ap ati, batakana pia kum aryuk, bico tenebuka winisiminba, telebuk pia unamake. Ayupu nirya ara, Raja Daud birye, mot sebuka, Allah el si ati erenmokce, nyabuk.

Kejadian 32:11

‘Na du koproba Esau birye, yanuka opnilyak’ tenen, tonda, ‘Na kilapu ap, sikce deiamrik mapu ap, Esau birye oploplyak’ tenen, na ilil weik upmanile.

Keluaran 6:3

Nara sik minop talak ulamik nang, sik si ara Abraham ap, Isak ap, Yakub ap, yuk-yuk bukni, sik dam talye karin arye tikuka nyalyangalamse. Sik dam nyalyangalamse bukni, sik dam binuka yupu nyalamse talak ara, ‘Nara, Allah unune. Tonda, narye aning-aning nirya talibuka, pia deice tam unirye, pia Mikip Weik Deiyoknye unune,’ nyabuka yangalamsiba, sikce bikamnik. Asi deice arye sikce bikamnik bukni, sik dam nyalyangalamse talak ara, ‘Sikce na si koproba moubuka biknamniak’ tenen, na si Yahweh ara, lak kibuka min kum nyalamsa ati, sikda na si koproba, Yahweh deice arye, kekebuka kum bikamnik. Na si Yahweh ara, sik dam lak kibuka kum nyalamsa atia.

2 Samuel 22:2

Raja Daud birye, mot deice sebuk yupu ara, ani. Na ni Allah, anda Yahweh ulyame. Na oldan nang oldanmapye talak nirya ara, ance melibuka kalikinilyame. Tonda ancuk lyenilyame. Wininilyama anya arye, ‘Yu nang arye opnamap’ tenen, mutuku yangan keil deice, bikbik abuka binirye, dungnubuka ulamne tonun, anda lelildongonilyame. Aning atonun ton, ‘Yu nang arye opnamap’ tenen, malye nang kum wekmanto keil aik pum bisik wekuka, dungnubuka banun tonun, anda aning atonun wininilyame. Ancuk talipdongopniminba, ikin unilye ning nirya, noutam arye lyenilyame.

Amsal 14:26

Yata nang do nirya, sik ni koprop Allah Yahweh ati, ilil tenebuka ukirye, el siuk erenyak ninye ara, kanye lamapdongobuka telebuk unamake. Tonda, Allah Yahweh arye, aninye ati, pia melibuka kalikinamle. Aning atonun, anang sik mapu silip nirya ara, Allah arye melibuka kalikilirye, aning-aning weik tabakuka sikti, arenamle.

Amsal 29:25

Ninye ati ilil tenebuka unyak nang ara, ikin kanye bobuka unyake. Tonda, sikce atalak-atalak nirya ara, ‘Se, yata wiripnamak do?’ tenen, ilil asa ukirye, dungnuldanyake. Bukni, yata nang do nirya, Allah Yahweh atibuk, ‘El bidamnye aryuk melibuka kalikinamnile’ tenen, el tibuk dib tenebuka ululum nang ara, anggun damak ausilirye melisiliba, kanye deibuka umunce, pia telebuk unamlume. Tuba ilil kum unamsile.

1 Samuel 17:45

“Anda ninye olana ati cang yo tace ap, parang ya ap, aning nirya kintinipmalamce, yanmalame. Bukni, nara, aning-aning nirya, deice tam ulirye mikip weiknye, Allah el si Yahweh, el si deice arye yane. Allah ara, mikip weik deiyoknye, el si Yahweh deice, aniryuk yanmane. Allah ara, Israel ninye, sik yin talin nang kalikuka melilule. Ance malye yupu nyaplame deice arye, Allah ati yanipmalame.

Mazmur 20:2

Anggun nirya ikin upsilye talak nirya ara, ‘Allah Yahweh eipsilirye, yanuka melinamsil’ tenen, na raja Daud birye Allah ati moronune. Nun apu koproba Yakub, minop talak si erelamuk Allah ara, elce anggunti pia kalikuka melisilyakarye, lyenamsil’ tenen, moropne. Winipmanto ara, Allah arye, ‘Pia telebuk unamak’ tenen, ‘Sik nirya dobuka, weik mutuku kon deice deipsutu’ tenen ati nyabuka moropne.