Amsal 16:7 - Eipomek

⁷ Sik ninye nirya arye, teleb winin ninguk, talibuka ucopura, Allah Yahweh arye, sik unyak ning ati, pia kanye delinamle. Allah Yahweh arye, aninye ati kanye deiplyeura, elce melipliba, aninye sik oldan nang nirya, winiryuk kanye tenen ninguk, punubuka areplirye, aninye ap ansinipdeipliba, telebuk unamake. Minop talak ara, oldana uk ulamik bukni, aminyan talak nirya ara, sik kayapu nang koprop atonun ubuka unamake. Sik kam unamak talak noutamak nirya ara, tonap pia kum oldanamake.

Amsal 16:7 Referans Kwoze

Roma 8:31

Arup talak, “Allah arye akunum teleb kipdeipsuk ning ani,” nyabuka laka nyapmasin yupu ati ara, yata yupu ton tabakuka nyaptibye do? Kume, Allah arye akunum bico tenyamsukce, nunti wipdeipsukce, melibuka pil dosulula anya arye, yatanye ap, yata ikin ning ap arye, malye kipsutu do? Aning nirya ara, malye kum kipsutue.

1 Yohanes 3:22

Tonda, Allah arye, “Wininamlulume,” nyasilye yupu nirya moubuka kekebuka dobolbabirye, el kanye deililul piluk donyabe. Winibibyeopura, yata ning do nirya, nun patapsil ning, ‘Elce melipnusil’ tenen, Allah ati morobibyopura, kekepsilirye, aning nirya arisilibuk, dolonamabe.

Kolose 1:10

Nunce anggun anang ati, ‘Aning nirya dolonamak’ tenen, Allah morosinyam ara, urdem ati kume. Deiyok ara, Allah arye, ‘Na mapu winibuka, winibuka diksukumuk unamake,’ tenesilye touk, dipkoprop aninguk talibuka, ‘Anggun unamlum ning nirya teleb ubuka unamlum’ tenen, Allah morosinyame. Tonda, ‘Wininamluma deice arye, Allah arye kanye delinamsil’ tenen, nunce anggunti Allah morosinyame. Winibuka winimunyopura, Allah arye kanye delinamsil ning ara, lilibuka nyapnusine. Ara, yata teleb winin ning nirya do, diksukum ninguk yala-yala nirya umunyebuk, teleb duk weik moupnin banamsile. Tonda, Allah ap, kanye dukdongobuka umunye ning ap, Allah winilul ning nirya ara, ‘Weik arye kel kipra banamak’ tenen, nunce anggunti Allah morosinyame.

2 Tawarikh 17:10

Allah Yahweh arye Yehuda mutuku noutam nirya ara, mikip weik kibukce, sik dana-dana tam yuk mutuku nang ati, ilil deiyok ning weik arebukba, atam nang nirya ap, sik ninye deiyok nang nirya arye, Yehuda tam nang ati ilil weik ubuk. Ilil weik ubuka ati, sik yuk mutuku dana-dana tam ulamik nang ap, sik deiyok nang Raja-Raja arye, Yudea tam ninye deiyoknye Yosafat biti, ilil ubuka ati, sikce Yudea mutuku noutam ninye ati mal pi yangana ara, batakamik. Batakamikce teleb aryuk, talima lamabuka ulamik.

Ibrani 13:21

Anggunti Allah morosunun ning ara, nyapnusine. Ara, ‘Yesus Kristus melisilya deice arye, anggun talima noutamak pil dosiliba, Allah arye, ‘Wininamake,’ tenyamsuk ning, el kanye delisulul ning nirya weika arye kipnamsile’ tenen, Allah morosunune. Yesus melisilyeba, aning nirya aupsilyopura, adeice arye Allah arye anggunti, ‘Wininamake,’ tenesilye touk, ‘Telebuk unamlulume’ tenen, Allah morosunune. Tonda, ‘Wini talak arye dipdongobuka, doryanamle talak nirya ara, ninye im sirya, mutuku sirya nirya arye, Yesus Kristus el siuk weik arye erenamak’ tenen, pataniliba, Allah moronune. ‘Dipkoprop pia telebuk wininamak’ tenen, “Amin,” nyabuka, Allah morosunune.

Yeremia 15:11

Nyapsiba, Allah el si Yahweh arye tamubuka nyapnuk. “Diba amutuku ninye arye, anti, ‘Nun like,’ nyapnamkiyak bukni, dipkoprob na Allah arye, lyepropnamkine. Narye anti, tenyamkise touk, an dam unirye, dukdongobuka teleb aryuk, pil dopnin bakinyopura, aminyan talak an dam unamle ning ara, telebuk unamkile. Wini talak ara, sikce anti, ikin ning deilikinyak ninye ara, aminyan talak, narye kanye imun ning, sik nong deice deipniba, ikin weik ubicopura, sikce anti, ‘Allah melipsutue’ tenen, ance melibuka, ‘Allah ati moronamsilame,’ nyabuka moronamkiake.” Allah arye, na Yeremia ati nyapnuk.

Kejadian 33:4

Yakub birye winipmok bukni, Esau birye, el weit koproba Yakub eibukce, bikbik abuka yayuk. Yayukce epdarikura, Esau birye, Yakub biti iribukce, mutubuk. Kipdarikce, sik bitinye nang engepdarik.

Kejadian 32:28

Nyabukura, malaikat arye, Yakub biti nyabuk. “Wini talak ara, winiryuk si arepnukine. Wini talak arye dipdongobuka, doryanamle talak ara, an si ati ‘Israel,’ nyanamkiake. Deiyok ara, ance Allah ap, yuk ning ap ati, pia pi dobuka piripdenmalamce, an mikip arye akunum malye kibuka bisipmalama ati, an winiryuk si ara, ‘Israel’ arepmakina ati ara, dorunamle talak ara, asiuk nyanamkiake,” malaikat arye, Yakub biti nyabuk.

Kolose 3:20

Anggun mapu nirya ara, anggun ni yapu ap, anggun nin yapu ap nirya ati, sik amu tam umunce, yata winin ning ati do nirya, atalak-atalak nirya sik yupu moubuka kekepmunce, melibuka dobolbamunyopura, Allah arye kanye delisulula anya arye, adiparyuk wininamlume.

Pilipi 4:18

Anggunce dopdeipnulumba, weik arye akunum dopropse. Aninguk kum bukni, tonda anggunce Epafroditus areplumba, elce dobuka boyanuk ning akunum dopropse ati, na patapnuk ninguk kum bukni, weika tonap, dopropse ning ara, akunum moubuka aupmanile. Nunce Allah arena ati, el kanye deililul ning, kam ning obuka aribibirye, nintong teleb ning uku dongobibiba, nintong arye Allah ulyak welelamle atouk, anggun urdem aryuk arepnulum ning ara, atong teleb ning atouk ulule. Anggunce winilamlum ning ati ara, Allah arye kanye deilisulule.

Mazmur 69:31

Winibuka ereipneminyeba, na mot sena deice arye, an siuk erenamkine. Tonda, na mot senamne deice arye, anti, ‘Elda pia weiknye ulule,’ tenebuka, an siuk erebuka, weik arye telebe nyanamkine.

Kejadian 27:41

Ura, atalak nirya ara, Esau birye, el weit koproba Yakub biti, yu weik ulamukba, pia teninauk ulamuk. Deiyok ara, ‘Na ni koprop arye, pia teleb yupu nyabuka, Yakub el nong deice deibuka deice arya, telebuk unamle,’ tenelamukce, el weit koproba ati, yu tuba ulamuk. Ati ara, Esau birye, el babye talima noutamak ara, ‘Na ni koproba dipliba, el si erena ati engen talak akunum uplyopura, na weit koproba Yakub oplopnamne,’ pia tenelamuk.

1 Peterus 3:13

Teleb winin ninguk patapsilibuk, anyuk talibuka ulamunyopura, yata ninye arye, ikin ning anggun nong deice deipsikirye, malye kipnamsiyak do?

Keluaran 3:21

Nyabukopura, ayupu tonap nyabuk. “Narye sik talima pum tam pil dopneba, Mesir mutuku nang, sik Israel ninye nirya ati, sik kanye deibuka unamake. Winipnya deice arye, anggun bataksikiba binamlum talak ara, talye kum binamlume. Talin ning babye, talibuka bobinamlume.

Amsal 3:17

Weik kel bikna deiyok ning dolonyak nang ara, kanye deibuka unamake. Tonda, aninye ara, yuk nang ati, yu upliba olana ap, yupu si dalana ap, malye kilana ap ara, kum unyake. Sik ap yuk ninye nirya ap, dukdongobuka neika telebuk unyake.

Amsal 16:8

Ati teleb ning ara, Allah Yahweh arye tenelula ara ani. Yata ninye do nirya, bona ning weik arye dekuka delina kumce, talye bona utotoa talina kum ninye uk unamak bukni, teleb winin ninguk talibikirye, Allah el yupu moubuka kekebiceura, ‘Sikda pia telebuk unyake,’ tenelule. Yuk ninye arye, ‘Bona ning weik arye doproptibye,’ tenena ap, ‘Yo bok weik arye taleptibye,’ tenena ap deice arye, malye kanye bobuka enyaka anya arye, anang arye sik yuk ninye ati, tilila yupu nyanyaka deice arye, malye kilinyake. Aninye ati ara, Allah el kanye ara, ‘Sikda pia malyeuk unyaka anya arye, na like,’ tenelule.

Yeremia 39:12

“Anda, el nabi Yeremia biti, elbinulyame! Moubuka epminyeura, elti, moubuka kalikmince, el patan ning nirya ara, arenamlyame. Tonda, ance el deice, ikin ning ton kum deipnalyame. El nabi Yeremia birye anti, yupu nyabuka moropnamkil ning ara, ance anyaplye touk winipnamlyame,” nyabuk.

Yeremia 42:12

Anggun minop talak arye, malye winilulum ning ati, narye adiparyuk wenebuka opsitinye bukni, aning kumce, bico tenepsinirye, na kanye aryuk, pia teleb kipdeipnamsine. Winipnamsina deice arye, Babel mutuku talilul ninye deiyoknye birye, el babye anggunti, bico tenepsilirye, melinamsile. Tonda, Babel mutuku talilul ninye deiyoknye birye, ‘Anggun Israel yala nang nirya ara, anggun mutuku koproba uk, tamubuka bimunce, unamlume,’ nyapdeipnamsile. Ayupu ara, na Allah arye, ‘Winipnamleʼ tenen, akunum nyapdeipne.

Daniel 1:9

Allah melibuka deice arye, Aspenas birye Daniel ati, bico tenebukce, Daniel moropmok ning, ‘Telebe,’ nyabuk bukni, “Minopce na deiyoknye ati nyapniba, ‘Telebe,’ nyaplyopura, melipnamakine,” nyabuk.

2 Tawarikh 20:30

Ati ara, Yudea tam taleamuka ninye deiyoknye Raja Yosafat birye, taleamuk mutuku ulamik nang nirya ara, pia teleb aryuk talima lamabuka teleb arye ulamik. Sik ap yuk mutuku nang ap ton kum oldalamik. Ara urdem arye kume. Yosafat birye si erelamuk Allah arye, talima lamabuka una deiyok ning arebukce, lo arebukba, Yosafat birye taleamukak ulamik mutuku nirya ara, Allah arye meilyamukba, teleb ulamik.

Esra 8:36

Tonda, atalak ara ninye deiyoknye Artasasta birye nyabukce, sekuka deiamuk surat ara, sik Israel deiyok nang arye, Raja el amu tam deiyok-deiyok nang ati, binuka arebik. Ara, weik balamle mek, Efrat mek atam, otam keting kumulban tam ulamikce, amutuku taleamik ninye deiyok-deiyok nang ati, sik dam binuka arebik. Tonda, atam taleamik ninye deiyok Gubenur nang ap, Bupati nang ap ati, asurat bokuka arebik. Aning akunum arebikopura, sik atam taleamik ninye deiyok-deiyok nang arye, ‘Nun ton melipnuyap’ tenen, teleb aren ning ton, weik tonun bulubuka, Allah si eren aik lipsisikuka dona ap, anyaik pum tam pil dona ap, nun Israel yala nang melina ap ati, sik melin ning arepsik.