Amsal 15:4 - Eipomek

⁴ Ninye arye yuk nang ati, yupu nyapnuce talak ara, nimalye arye tenipdekirye, teleb yupu uk nyanamake. Winibikce deice arye, yuk ninye sik kanye teleb ulinamake. Winipmanto ara pia teleb yo duk moupmaliba, ninye arye dakuka arepmakibuk dibikirye, kam ulamak touk unamle. Sik nirya arye, teleb yupu kekebikirye, sik kanye talima mikip kibuka melildakirye unamake. Wininamak bukni, yuk nang arye yuk ninye ati tenena kumce, talye tilila yupu nyaltakanyake. Atilila yupu nyaltakaca deice arye, malye kanye bobikirye, dipkoprob anang sik kanye talima kam un ning ara, mitang kilinyake.

Amsal 15:4 Referans Kwoze

Amsal 12:18

Ninye ton sik yupu nyapnuce talak ara, moubuka tenena kumce, talye-talye yupu uk, nyalamak ninye ara, sik yupu nyanyaka deice arye, ninye talimak parang ya tace arye, talimak lukliba, uk dilamle touk wininyake. Bukni, weik kel bikin nang arye nyanyak yupu ara, teleb yupu uk nyanyaka ati, sik yupu nyanyaka deice arye, ninye nirya ati, teleb ulinyake. Winipmanto ara, ninye kwetena deiyok nang arye, uk dilamle ninye kwetelamak touk, weik kel bikin nang arye nyanyak yupu deice arye, yuk ninye kekebicopura, sik kanye talima melilanyakba, teleb kilinyake.

Amsal 16:24

Winipmanto ara, ninye arye madu mong mek purubuka dipmakiba, to lepliba, kanye delilamak touk, ninye nirya arye, teleb yupu nyabikiba, yuk ninye kekebikirye, kanye delinyake. Ateleb yupu nyabikiba, kekebikca deice arye, sik kanye talima mikip upliba, kanye delinyake. Winipmanto ning ara, ninye ton uk dilamliba, ninye kwetena deiyok nang arye, obat dipkoprob ning arepmakibuk, sik uk dilamle ninye dibikcopura, yok pum bisik nirya weklirye, teleb ubuka kwetelamle atonun, teleb yupu nyanyak ninye arye, sik nyanyak yupu deice arye, yuk ninye ati, teleb kilinyake.

Amsal 18:8

Winipmanto ara, ninye arye teleb din ning bokuka, mitik-mitika arye sekuka, yuk nang ati, bokuka arepmakibuk, sik nirya arye dibikcopura, to lelamle tonun, malye unyak ninye arye, yuk nang ati, minina yupu nyanmakiba, yuk nang kekebikirye, kanye delinyake. Ayupu ara dipkoprob kum nyanyak bukni, yuk nang arye kanye deibuka kekenyake. Bukni, winibuka unyaka ara, pia malye weik ulule. Deiyok ara, ninye nirya arye, talye-talye yupu nyaltakakiba, yuk ninye kekebiceura, ayupu ara ninye talima noutamak biliba, pia unamle. Aning ara, kum kum danamle. Tuba teninauk unamake. Ati ara, ninye arye talye nyaltaklamak yupu ara, ninye oldan ning atonun ulule.

Maleaki 4:2

Bukni, anggunce nati, ‘Allah elda weik mambule,’ tenebuka, na si erenululumce, na nyapdeiamse yupu uk, moubuka talipmunce, ululum ninye nirya ati, na mikip ara, anggun deice deipsiniba, keting delilamle touk upsilyopura, teleb kipdeipsinirye, lyepnamsine. Winipsinya deice arye, anggun ikin usilye ning nirya, kum daneipnamsine. Winipmanto ara, sapi basam mi poka pum tam dongamica ani, apoka pum bisik arye kubuka, bai tam bilirye, weik kanye delilamle touk upmunce, kanye delinamlume.

Amsal 3:18

Weik kel bikna deiyok ning moubuka talipmunyopura, Allah arye ouku weik ton arepsiliba, kam pia unamlume. Teleb winin ninguk moubuka, mikip arye talinamak ninye ara, pin-pin asa arye kanye deibuka unamake.

Amsal 18:14

Yata ninye do nirya, sik dib kanye mikip uliba unyak ninye ara, sik weik kanye imun uk dinmalya babye, sik dib kanye mikip tuba ulula anya arye, uk dinmalya ani, kum uplyopura, tuba yum uk unamake. Weik kanye imun uk dinmalya babye, kam uk unamake. Bukni, yata ninye do nirya, ikin kanye bobikirye, talima buku sukubuka uk dilamliba, teniltona uk unyak ninye ara, sik dib kanye mikip kum ninye anya arye, mikip pia kum uk unamake. Weik kanye imun uk do, yuk ikin ning do, sik damak yalyopura, dipkoprob ikin weik unamake.

Wahyu 2:7

Anggun amul wapsilyopura, ‘Ayupu deiyok ara ani’ tenen, kekepmanto ninye nirya ara, Allah El Dib Kanye arye, Allah diba tenenyak ninye nirya ati nyalul yupu ara, moubuka kekenamlulume. Ara, malye winin ning nirya ati, malye kibuka kinyak ninye nirya ati ara, na pia teleb ununa noutamak tikuk yo ati, “Teleb amolul yo duk ara anggunda dakuka diplulum,” nyapnamne. Ayo duk din ning ninye nirya ara, pia kamuk unamak anya arye, ayo el si ara, Kam Una Yo nyanyabe. “Ayupu nirya ara, Efesus mutuku diba tenebuka unyak ninye ati nyapnamlyame,” nyapnuke.

1 Timotius 6:3

Yatanye do nirya, tilila yupu petereplirye, nun Deiyoknye Yesus Kristus arye peterelamsuk yupu ap, Allah arye, ‘Wininamake,’ tenepsuk touk, peteren yupu ap, dib tenen kum arye, batakuka yaniltakalinye bira, maknya kintinipdakirye, ‘Nara, weiknye,’ tenelul bukni, dipkoprop ara, pia walwalnye ulule. Aning-aning nirya moubuka kum tenelule. Atonye bira, ninye arye yupu deice waldanyak yupu ap, moubuka kum laka nyapmanto yupu bukni, “Ayupu deiyok ani, ani,” nyabuka, yu uplye ati, kanye yuk-yuk wilildanyak yupu ap ati, pia patalule. Amalye yupu deice arye, ninye talima wililanyak akarye, tonye birye, yuknye biti, ‘Se, anye birye malye upnamnil do?’ tenen, ilil teneldanyake. Atonye bira, amalye yupu ati, kanye deililula ati ara, elda, uk dinanye atonun ulule. Na Paulus arye nyapkine.

Amsal 26:22

Talye tilila yupu ap, lulundana yupu ap, “E, aning ara diba, na asing arye elilamse ning ara ani-ani,” nyabuka nukunyak yupu ara, ninye nirya teleb ubuka kekebikirye kanye delinyake. Winipmanto ara, din ning pia telebto ning dipkwetebikiba, sik mun pum tam biliba, kanye delilamak tonun, ninye arye talye-talye nyanyak yupu, yuk nang kekena ak nyabikcopura, kekebikirye, sik talima noutamak malbalule. Ninye arye talye nyaltakalamak yupu, yuk nang ton kekebiceura, kanye delinyake. Aning ara, malyeuk unyake.

Mazmur 109:22

Ton deiyok ara, nara imun kanye bobuka ununa ati, narye kum winipmanto unune. Ati, ‘Ancuk, nati melibuka lyepropnamnilam’ tenen, moropkine na nio. Tonda, winipmanto ara, ninye arye, yuknye ati, parang arye, el talima noutam daklamak touk, ayu nang arye, ikin weik deililamak deice arye, na kanye talima noutam nirya ara, daksakmanto unulula ati, anti moropokine, na ni Allah.

Amsal 15:3

Allah Yahweh elda, mutuku-mutuku nirya tuba-tuba dilula anya arye, yata winin ning do nirya, malye winin ning babye, teleb winin ning babye nirya ara, aning nirya dilirye kel kisulule. Tonda ninye kanye noutamak tenenyap ning nirya babye, eibuka kel kisulule. Teleb ubuka unyak ninye babye, malye ubuka unyak ninye nirya babye, elcuk sik damak ulirye, tuba-tuba pia disulule. Allah ati, tonok ning babye kum dungnuptibye.

Amsal 15:5

Walwal kanye bobuka unyak nang ara, sik ni yapu arye, wenena yupu ap, lipsisikuka peterena yupu ap, nyanyak ning kekebikirye, moubuka kum dobolbanyake. Yaniltana uk unyake. Bukni, ninye ton sik ni yapu do, yuk nang do, sikce nyabice wenena yupu ap, lipsisikuka peterena yupu ap, moubuka kekenyak nang ara, pia weik kel nang unamake.

Amsal 10:11

Ninye ton malye un ning nirya batakikirye, diksukum un ninguk winibikirye, teleb yupu nyabikiba, yuk ninye kekebicopura, sik kanye talima kwa dilule. Tonda aninye nyanyak yupu deice arye, yuk ninye ati teleb ulikiba, kam unamake. Bukni, malye un ninguk talibuka unyak ninye ara, ‘Yuk nang arye, nun malye un ning kel biksikirye, wenepsicak’ tenen, tenepce arye, tilila yupu uk nyaltakanyake. Namin yupu uk nyanyak bukni, sik talima pum tam ara, malyeuk ulirye, malye un ning nirya duknunyake.