Amsal 12:7 - Eipomek

⁷ Malye winin ninguk, talibuka unyak nang ara, aminyan talak yuk nang arye anang ati, lik upliba, obisibikirye, kum daneipnamake. Sik malye wininyak nang ara, kum danin banamake. Bukni, malye un ning talina kum diparyuk, diksukumuk unyak ninye ara, pia telebuk ukirye, tuba-tuba teleb upnin banamake. Sik ap, sik wininyak ning ap, sikce deibikiba dadeipdanin banamak ninye babye, kanye lamapdongobuka pia telebuk unamake.

Amsal 12:7 Referans Kwoze

Amsal 11:21

Narye nyapnusin yupu ara, pia dipkoprob yupu ati ara, ayupu ara pia kum luba kinamlulume. Talye kum nyapsine. Yata ninye do nirya, malye ninguk tenebuka unyak ninye ara, aminyan talak dipkoprob wenen ning, sik dam yanuka aunamle. Allah arye aninye ati, pia weik arye wenepnamlarya. Bukni, malye winin ning talibuka winina kum aryuk, diksukumuk unyak ninye nirya ara, aminyan talak Allah arye lyebuka, teleb sukumuk deipnamle. Diksukumuk unyak ninye ara, wenena ning sik dam ton kum yanamle.

Amsal 10:25

Winilula ati ara, malye, el dam ara, pia weik kumanya mikip yalirye, amalye ululnye dam, yanuka puplirye, el nong bobiliba, kum danamle. Bukni diksukum teleb ubuka unyak ninye ara, pirilen ning ton, sik dam yatua babye, kum lulukdenamake. Pia tunim abuka telebuk unamake.

Ayub 11:20

Bukni, sik malye winin ninguk talibuka, tuba malyeuk wininyak nang ara, sik deice ikin ning yalye babye, sikce, ‘Se, yata deiyok ati, aikin ning ara, yanmasil do?’ tenen, moubuka, pia kum biktinge. Ati sik anang ara, yatanye birye meliptu do? Pia kume. Tonda, sik anang, ikin ning doprobikcopura, aning batakuka, pia binmanto kum unamake. Sik anang arye teninamak ning ara, ‘Se, nunda isin tonok ton kum dasutuba, aning ara adiparyuk minop diptibye,’ tenena uk unamake.

Ester 9:14

Nyabuka morobukba, ninye deiyoknye Raja arye, “Telebe dawiniplulume,” nyapdeibukba, Ester birye moropmuk touk winibik. Weik kota Susan mutuku noutamak, Raja birye, ‘Winipnamlulume,’ nyabuka, sekna ning deice arye, surat sekuka deipmoka ati ara, anyapmok touk winibik. Ara, Haman el mapu nirya ara, 10 nang dobuka, namin yo arye ikuka, deiamikak uk, yanuka diripkwetebikba, dibik.

2 Samuel 7:26

Ance nyapdeiamsulum touk, winisiminyopura, na ni Allah, an si weik arye, pia ati si erepkikirye, nyanamkiyake, ‘Allah el si ara Yahweh, elda Israel ninye, sik ni koprop Allah ulule. Elda, im ap, tuku ap, aning-aning nirya ap talilya, weik deice tam deiyoknye ulule,’ nyabuka nyapnamake. Tonda, winipsiminba, Daud na yala ninye nirya ara, ance mikip weik arepsiminba, ninye deiyok nang pia unamake. An tibuk, pil dobikirye, an si erenamkiyake.

2 Samuel 7:16

An deipmin mapu ap, ance dipminbuk, dadeipdanin banamak nang ap, na damak pia unamake. Aning atouk, an talipnalam mutuku ap, talinalam nang ap, an mapu nirya talinamak ning nirya ap, narye mikip arepnibuk, keting tamun weik arye talipnamake. Winilaminya, ance deipnalam mi arye, an taliplum mutuku, elce anti punubuka, aning nirya talinamle. Ance dipminbuk, dadeipdanin banamak nang nirya ara, an yala nang ati, ‘Weik ninye deiyok nang unamak’ tenen, pia ereipnamne.” Allah arye nabi Natan ati, laka nyabuk. Laka nyabukce, “Anda, Raja Daud laka nyalbilyame,” nyabuk.

Amsal 15:25

Ninye ton kanye talima erebuka ululnye bira, el kam unamle talak pil donamle ning ap, el upnamle ning ap, el kilapu ap, el mapu silip nirya ap ati, Allah Yahweh arye, sik wenen ning nirya, kum kilinamle. Bukni, diksukum teleb ubuka unyak youwak kilapu ara, sik talibuka unamak talak noutamak nirya ara, Allah Yahweh elce melibuka, arenamle deice arye, sik bona ning ap, sik mapu ap ati, pia melibuka kalikinamle. Sik ning ara, kum kum upnin banamle.

Amsal 14:11

Ton nang ara, teleb ubuka una kumce, malye winin ninguk talibuka winipnin bakirye, bona weik talin nang akunum unyakce, urasin pia teleb aik dobikirye, anyaik pum tam unamak bukni, aminyan talak anyaik ap, anang arye unyak malye ning nirya ara, dipkoprob kum upnamle. Bukni, ton nang ara, pia diksukumuk winipnin bakirye, talye cang kain bol arye, tia doltakne tenda aik pum tamuk unyak bukni, sik ap, sik kilapu ap, sikce deilinamak mapu nirya ap ara, pia telebuk upnin banamake. Aninye ara, talye noutamak ninye unyak bukni, sik min kum winipnamake.

Amsal 14:1

Pia kel weik kilapu arye, sik unyak ning ara, sik aik noutamak unyak ninye nirya ati, melilamikiba, sik talibuka pil donyak ning nirya ara, telebuk ulule. Bukni, walwal uk unyak kilapu nirya, pil teleb ubuka kum donyak kilapu ara, malye winin ninguk talibuka ukirye, sik kam unyak talak noutamak nirya ara, sik neika unyak ninye nirya ap, sik mapu nirya ap, sik ap nirya ati, sik malye unyaka deice arye, aninye nirya ati malye ulinyake.

Mazmur 37:10

Ati ara, tenipnamlulume. Sik malye winin ninguk, talibuka wininyak ninye ara, Allah arye kum kipdeipliba, epdenamap bukni, ton kum eipnamabe. Like mitik tonun ton, daulamepya ani, Allah tenebuk talak akunum uplyopura, amalye winin ninye nirya, kum daneipnamle.

Ayub 34:25

Ara, sik anang winilamice ning nirya ara, Allah el kele. Ati ara, elce teneplye talak, lukunyan noutam aryuk, kum talibuka ulamlinye birye, yanuka obukaplirye, winiryuknye punuplirye, erelilule.

Amsal 12:8

Ninye arye pia weik kel bikne deice arye nyakiba, yuk nang kekebikirye, ‘E, anang ara, teleb yupu uk nyanyaka anya arye, anggunda teleb nanguk unyake,’ nyabuka kanye delinamake. Bukni, yuk nang ara, sik kanye talima malyeuk unyak nang ara, kwalin yupu ap, kanye bona kumce, nyanyak yupu ap nyakiba, yuk ninye arye kekebiceura, ‘E, anang ara, pia malye ninguk nyanyaka anya arye, nun lik weike. Anang ara nun lik,’ tenen, batakanamake. Amalye ning tenebuka wininyak ninye ara, teleb unyak ninye arye, batakikirye, memepropnamke.