Ati ara, Zaitun mutuku nirya adiparyuk toplirye, keting panalyangan tam arye, otam keting kumulban tam lipdopnamle. Liplyeura, amutuku noutam ara, weik lu ara, lak kipnamla ati, anggunce adiparyuk alu mutuku noutam bikbik abuka binamlume. Bikbik abuka binamlumak ara, Asal mutuku dam binamlume. Ura, minop talak, ninye deiyoknye Raja Usia birye Yehuda mutuku talibuka ulamuk talak, sik mutuku noutam ara, weik mutuku lulukna lulukukba, anggun apu yapu nang arye minopce, bibik abuka binamik touk, Zaitun mutuku topnamle talak ara, anggun amutuku unamlum nang babye, atonun bibik abuka binamlume. Ati ara, na Zakaria birye si erenun Allah, na ni koproba Allah Yahweh ap, el im deice pil don nang, sik pia teleb lek malaikat nirya ap, sik neika yanamake.
Amos 1:1 - Eipomek1 Amos bira, Tekoa mutuku unye ulamuk. Tonda, Amos bira domba weinanye ulamuk. Atalak ara, Israel yala ninye ati, deiyoknye kibuka taleamuknye bira, Yoas el mi Yerobeam ulamuk. Tonda, atalak ara, Yehuda yala ninye ati, deiyoknye kibuka taleamuknye, Raja Uzia ulamuk. Atalak ara, Allah arye, ‘Amos bira, talye domba weinanye ulul bukni, na yupu laka nyalbinamle’ tenen, el yupu nyapdeibukba, Amos kekebuk. Amos birye, ayupu kekebuka, seklamuk talak ara, mutuku lulukna weik ning, min kum lulukamuk talak noutam, Raja Yerobeam ap, Raja Uzia ap arye, ninye deiyok nang kibuka, amutuku noutam ulamik ninye nirya taleamdik. Amos ayupu kekebuk talak arye diprongobuka, keting tamun bitinye tonap, mabik talak noutam ara, Allah arye weik mutuku lulukna arebuk. Arebuk talak arye, ayupu nyapdeibuk talak ara, weik mutuku lulukna min kum dobuk bukni, Allah el yupu laka nyananye Amos, el dam yanuka lak nyapdeibukba, kekebuk. Ara, Israel ninye ati, aminyan talak arye winipnamuk ning ati, ‘Lak nyapnulyame,’ nyabuka, yanuka lak nyabuk. Gade chapit la |
Amos 1:1
23 Referans Kwoze
Nyabukopura, Amos birye tamubuka, Amazia biti nyabuk. “Ance nabinye nyabuka, si sipmanilam bukni, nara dipkoprob nabinye kume. Nara, Allah el yupu laka nyana ap, aminyan winipnamle ning, laka nyananye kuma. Aning atouk, na ni koprop babye, nabinye kum ulamuk. Dipkoprop, nara basam weina ap, bai tam palamle yo, el si ara, yo duk dakananye unune. Na pil ara, apil bitinye uka.
Se, anggun Benyamin yala nango, bikbik abuka bimunce, yuk mutuku binamlume! Yerusalem mutuku batakuka bimunce, Tekoa mutuku arye binuka, terompet lelim nyapnamlume. Tonda, Bet-Kerem mutuku arye, Israel nang lak kina ati, uku binuka sekmumce, ayupu nyapnalume. “Ikin weik una deiyok ap, imun una deiyok ap ara, dabu tam arye yalyeba, dopropnalume,” nyabuka, laka nyapnalume.
Akunum mapmika, berekukopura, beren tam koproba arye, sik Israel nang nirya ara, Tekoa pata mutuku tam biyik. Sik aninye binuyik talak ara, Raja Yosafat birye, ayupu nyabuk. “Yehuda tam noutam ululum nang ap, Yerusalem weik asik noutam ululum nang ap, anggunce Allah Yahweh tonok ati, dib tenepnamlulume. Dip tenepmunyeura, Allah arye melipsiliba, anggun adiparyuk talima darabuka, mikip tuba unamlume. Tonda, sik nabi-nabi nang arye nyalilamsik yupu ara, moubuka talebuka, dib tenepmunce, teleb umunyeura, anggun winin ning nirya ara, nong unamsile.” Yosafat birye, sik Israel nang ati nyabuk.
Ara, Yerobeam birye nyabuk touk, Yehuda mutuku noutam ap, Benyamin yala nang ulamik tam noutam ap, cang keil poka deibuka dobik. Ara, Bet-Zur mutuku ap, Zoko mutuku ap, Adulam mutuku ap, Kat mutuku ap, Mares mutuku ap, Zif mutuku ap, Adoraim mutuku ap, Lakis mutuku ap, Aseka mutuku ap, Zora mutuku ap, Ayalon mutuku ap, tonda Hebron mutuku ap nirya ara, kat weik keil poka arye, antanap dongopdeiamikce domik.
Allah arye Elia biti, “Ninye deiyok kipnamak nang wibuka delilbinulyame,” nyabukura, Elia birye, adiparyuk biyuk. Biyukopura, ninye si Sapat, el mi Elisa eibuk. Atalak ara, anye el si Elisa, el sapi basam dua puluh empat nirya, bukni bitinye-bitinye kibuka, wa win dam binuka deipmokce, ikin tace yo sapi dana-danatikrikba, adeice krikdongopmokce, kilibuka banmekce, yo tace krikmok ning arye tuku palipnin banmok. Wininmokce palinmek wa winmekce, Elisa bira, sirik tam tikmok. Winipmok talak ara, Elia el dam yayukce eibuk. Eibukopura, el ongolamuk cang ongon aling ara, kwiribukabukce, Elisa el nong deice binuka kalupdeibukce, adiparyuk biyuk.
Ati ara, Yoab birye, ninye dopdeibukba, kel weik kil tonok, Tekoa mutuku ulamukak biyikce, binuka bobuka, Yoab dam tamubuka yayik. Akil bobuka yayikba, Yoab birye, akil ati nyabuk. “Akilo anda, ninye dipmalinye biti, tenenmakirye, winilamak touk, winipnamlyame. Tonda, dipmalinye biti, bico tenebikirye, ongolilamak baju uk, ongopnamalyame. Tonda, kil tonok, el pia kanye deiamlinye, diamlya ati engelamlirye, ulamle urasin atonun, an babye bopnamlyame.
Ayupu sekamuknye, el si ara Yeremia. Ara, Benyamin yala nang sik mutuku noutamak tonok mutuku el si ara, Anatot mutuku, tonoknye el si Hilkia ulamuk. Hilkia arye, el mi Yeremia deibuk. Yeremia bira, Allah el si eren aik pil talibuka dolamukce, Hananot mutuku ulamuk. Yeremia birye nyabuk yupu ara abuku noutamak sekuk.
Abuku sekamuk ning deiyok ara, Yehuda yala ninye ap, Yerusalem mutuku ulamik ninye ap arye, winilamik ning ati, Allah arye el yupu lak lena deiyoknye, nabi Yesaya biti, nyabuk. Yesaya el li bira, el si Amos. Anyabuk ning ara, Yesaya lengdar malamuk ning ap, Allah arye el talima pum tam yupu nyalilamuk ning ap ati, Yesaya birye sekuk. Atalak ara, Yehuda yala ninye, sik ninye deiyok nang, sik si ara Uzia ap, Yotam ap, Ahaz ap, Hizkia ap, ulamik talak noutam, Allah arye Yesaya el talima pum tam, laka len yupu nyalilamukba, ayupu nirya kekelamukce seklamuk. Ayupu ara, Yehuda yala ninye ulamik ning ap, aminyan talak winipnamuk ning ap ati seklamuk.
Ura, Raja Yoas el mi Amazia bira, ninye deiyoknye Raja kibuka, Yehuda tam ulamik ninye taleamukce, daulamuka ani, keting tamun lima belas (15) akunum ubukba, aketing tamun noutam aryuk, Israel tam ulamik ninye nirya taleamuknye, el si Raja Yerobeam kedua aketing tamunuk deiyok koubuka, ninye deiyok kibukce, Israel tam talibuk. Raja Yerobeam Keduanye bira, keting tamun weik, empat puluh satu (41) tahun amutuku taleamukce, Samaria mutuku noutam ulamuk.
Ura, anggun kan-kan arye, weik mambul ninye weik kum unyak bukni, talye ninye arye nunto nang ati, ‘Sikda walwal ninye unyake,’ tenesinyak nang ara, Allah arye, ‘Aninye na mapu unamak’ tenen, wiamsuke. Wibuka dopropsuka deiyok ara, Allah ati dib kum tenenyak ninye arye, ‘Nunda weik kel ninye,’ tenelanyakce, aminyan talak, ‘Alye dakdanamak’ tenen, Allah arye nunti wiamsuke. Aning atonun, talye ninye arye nunto ninye ati, ‘Sikda, mikip kum ninye anya arye, anang ara, talye nang,’ tenesinyak nang ara, Allah arye wiamsuke. Winipsuka deiyok ara, Allah ati dib kum tenenyak ninye arye, ‘Nunda weik mikip nang, weik mambul nang,’ tenelanyakce, ‘Aminyan talak ara, alye dakdanamak’ tenen, Allah arye nunti wiamsuke.
Minop talak ara, Yehuda tam nirya ap, Yerusalem mutuku noutam ap, Samaria mutuku ap, winilamik ning nirya ati, Allah Yahweh arye elilamuk. Elilamukce, ninye tonok, mitik mutuku, el si Moresyet mutuku arye, deiamiknye el si ara, Mika ulamuk. Anye el dam, Allah Yahweh yangalamukce, el yupu laka nyalilamuk. Ayupu yanuka laka nyalilamuk talak noutamak ara, Yehuda yala ninye tam talina ati, sik ninye deiyok, Raja nang wibuka deipra balamikba, sikce ninye deiyok kibuka, talipra balamik nang, sik si ara, ani. Ara, Yotam ap, Ahaz ap, Hizkia ap, sik anang arye, ninye deiyok nang Raja kibuka, Yehuda tam ninye talipra balamik. Allah arye, nabi Mika biti, laka nyalamuk yupu ara, lengdar mapna deice arye laka nyalamukba, Mika birye eipman ning ap, kekepman ning ap ati, laka nyabuka sekelilamuk. Ara, Samaria tam ap, tonda Yerusalem mutuku noutam ulamik ninye ap ati, Allah arye laka nyalilamukba, Mika kekelamukce, seklamuk.
Yehuda yala ninye ulamik mutuku talibuka ulamik ninye deiyok nang, sik si ara, Uzia ap, Yotam ap, Ahaz ap, Hizkia ap, sik anang arye, Yehuda mutuku noutam ulamik nang nirya taleamik talak ara, Allah Yahweh arye, nabi Hosea biti yanuka, yupu nyalilamuk. Atalak noutamuk, Israel ninye talina ati, sik ninye deiyoknye bira, Yoas el mi Yorebeam birye, Israel yala ninye taleamuk. Winibuka taleamuk talak ara, Allah Yahweh arye, ninye si Beri, el mi Hosea biti nyalilyangalamuk. Israel ninye ap, Yehuda tam ulamik ninye ap arye, Allah el yupu nyapdeiamuk atonun, kum winilamik ati, Allah Yahweh arye, Hosea biti anyuk nyabuk.
Winibikopura, Yehuda tam ulamik ninye nirya arye, Amazia elce deiamuk mi, el si Uzia biti, “Elcuk nun ninye deiyoknye unamsile,” nyabuka wibikba, el anye birye, el li punubukce, ninye deiyoknye Raja kibuka, Yehuda tam talibukce, ulamuk. Atalak ara, Uzia el ulamuk keting tamun ara, enam belas (16) tahun kibuk noutam arye, ninye deiyoknye kibuk.
Allah arye nyabukopura, na Yeremia biti, nyapdeipnuke. Israel ninye ara, malye weik tuba wininyaka ati ara, Yeremia, ance na mapu Israel ninye dam, na yupu laka nyalbinulyame. Ayupu nirya, binuka laka nyapnalam bukni, anyanmaminye yupu nirya, sikce kum kekenamkiyake. Ance sikti, ‘Se Israel nango, kekelyalulume,’ nyabuka, yukupnalam bukni, sikce kum kekebikirye, ‘Nunda ayanuka kekelyanamabe,’ kum nyapnamake.
Musa bira, el yamal koproba si ara, Yitero ulamuk. Yitero bira, Midian mutuku ninye ati, Allah arena deiyoknye ulamuk. Atalak ara, Musa el yamal koproba melina ati, Yitero el domba basam, Midian mutuku noutamak weilamuk. Atonun ubuka, amutuku ninye kum ulamik mutuku otam binuka, mutuku si Horeb mutuku yana, domba basam weilbiyuk. Amutuku ara, Allah arye yupu nyapdeiamsuk mutuku dam nyalamik. Asukum binuka, domba basam weilamuk.
Ayupu nyapnin balamuk talak noutamak ara, Yesus arye Galilea mek lilkwa banmok. Banmokce, ninye bitinye, sik nang susukuk eibuk. Eibuk nang ara, Simon, ton el si ara, Peterus nyalamiknye ap, el weit kopropa Anderias ap, ‘Mek imbal dongobuka dopnanam’ tenen, mek pum aling atonun ning, mekin bal don ning, el si jala dolkwetenmarikbuk eibuk. Sik abitinye nang ara, mekin bal don nang anya arye, wenmarik.
Min talak ara, an ap, na ap min kum deiamsik talak ara, yuk nabi-nabi nang ton nyalamik. Ara, “Nun wininunyap talak kum bukni, aminyan dotalak ara, weik kanye imun mal olan ning ton, nun dam yanamsilarya! Aning atonun, aminyan talak, ikin ning yanuka upnamsil ning ara, ani,” nyabuka nyalamik. “Ara mal olana ap, kanye imun din patana ap, ninye dipna ati kanye imun uk yala weik ning ap ara, nun tam ap, yuk-yuk daunyak nang weik, sik unyakak ap, ninye deiyok kibuka, taleamik weik mutuku nirya ap, kanye imun ikin ning dopropnamabe,” nyalamik.