2 Timotius 2:7 - Eipomek

⁷ Adomon yupu deice arye nyapmakin yupu nirya ara, ‘Deiyok dan do?’ tenen, moubuka tenipdeminyebuk, Allah arye, “Ayupu nong ara, ani. Ayupu deiyok ara, ani,” nyabuka lak kipdeipkilibuk, kel biknamlyame.

2 Timotius 2:7 Referans Kwoze

Yakobus 1:5

Anggun kan-kan noutamak arye, yata nang do nirya, teleb una ati, weik kele deiyok ning kum upmasilyopura, Allah ati moronamlume. Sikce sik pataplye touk, Allah ati morobice nang ara, wenena kum arye talye urdem weika arye arilule anya arye, Allah arye dipkoprop arenamsile.

1 Yohanes 5:20

Ton kel kibupu ning, ton nyapnusine. Ara, ‘Sikda Pia Dib Koprop Allah, diba tenebuka talipnamake’ tenen, Allah el Mi Koprop Yesus yayukce, kel kina deiyok ning akunum arepsuke. Pia Dib Koprop Allah ap, nun ap, talima dukdongopsukba neika unyabe. Aninguk kume. Allah el Mi Yesus Kristus el bidamnye ap, nun ap, talima dukdongopsukba, neika unyabe. Yesus Kristus elda, Dib Koprop Allah el nong tonok ulule. Tonda, elda, Pia Kam Una Deiyoknye ulule.

Lukas 24:45

Nyabukce, elti, Allah yupu sekamik ning nirya ara, ‘Kel kipnuyak’ tenen, sik kanye talima tenen ning aribuk.

Yohanes 14:26

Bukni, Allah El Dib Kanye, anggun talima melina ati, Melinanye bira, Allah arye, na si deice arye el Dib Kanye dopdeipnamsile. Aripsiliba, Allah El Dib Kanye arye aning-aning nirya ati, peterenamsile. Tonda, na nyapdeiyamsise yupu nirya, ‘Tuba tamubuka tenepnamak’ tenen, Allah El Dib Kanye arye tonap nyanamsile.” Yesus arye nyabuk.

Yakobus 3:17

Amalye un ning akunum nyapmasin bukni, Allah arye weik kel bikilina deiyok ning arisulula ara, winira nyapnusine. Minop ara, el kel bikilina deiyok arisilye ning ara, yuk malye ning tonok babye tabakuka kum ulule, diksukumuk ulule. Ton anang ara, ‘Nun nirya talima nimalye aryuk, telebuk neika ulamtibye’ tenen, patalule. Tonda, sikce, ‘Na yupu nyapnikcopura, yuk nang kekebikirye, alye una ap, ilil una ap, kanye ikine ap, kanye delina ap, unamak do, kum do?’ tenen, minopce moubuka teniltonyake. Tonda, ninye arye yupu nyabikibuk, moubuka kekebikirye, nimalye aryuk unyake. Tonda, yuk nang malye ubicopura, ‘Na adiparyuk wenebuka optinye,’ kum tenebikirye, anang ati, bico tenebuka luba kilongonyake. Sik yupu nirya ara, duknuna kum arye, lak akuk laka nyanyake. Ton ninye urasin eibikirye, sik kanye kum bokolinyake. Sik teleb ubuka diksukum unyak ning noutam nirya ara, duk telebuk moulule.

1 Timotius 4:15

Anyapmakin yupu nirya ara, batakna kum arye pia pi dobuka, pil donalyame. An kanye ap, nong ap, mikip ap nirya arye, pia piribuka dopminyopura, yuk ninye eibikirye, ‘E apil donmala ara, teleb winipnin banmala atia,’ tenenamake.

Kolose 1:9

Aning nirya laka nyapsuk ning ati ara, Epafras arye, anggunti ayupu nyapsuk talak arye dipdongobuka, atalak ap, aminyan unamsil talak ap, atalak-atalak nirya babye, batakna kum arye, anggun Kolose nang ati, Allah pia morosinyame. ‘Allah arye anggun Kolose ninye ati wininamle’ tenen, morosinyam ning ara, nyapnusiname. Ara, Allah arye anggunti, ‘Wininamake, aning ton kum wininamake,’ tenyamsuk ning nirya ara, ‘Dipkoprop moubuka kel kibikirye, aninguk wininamak’ tenen, morosinyame. Ara, ‘Weik kel kina deiyok ning doprobikirye, kel ninye unamak’ tenen, morosinyame. Tonda, Allah El Dib Kanye arye, el mikip arisilya deice arye, nong bol deice ninguk kum bukni, ‘Pia noutamak deiyok kel ning ton moubuka tenenamak’ tenen, Allah morosinyame.

Yohanes 16:13

Bukni, min nyapmasinanye, Dib Koprop Yupu nyalulnye, Allah El Dib Kanye dopdeipsinyopura, anggun dam yalyopura, elce dipkoprop yupu nirya kel bikna ati, ‘Winipnamlum,’ nyabuka peteresilyopura, kel biknin banamlume. El kanye aryuk kum nyanamsil bukni, narye nyapnyopura, el kekeplye yupu uk, peterenamsile. Elce aminyan talak winipnamle ning ati, laka nyabuka, peterenamsile.

Lukas 21:15

Sik wenepnamsiak talak ara, narye weik kel yupu anggun kanye talima ak arepsinyeura, nyanamlum yupu ara, anang arye bisibuka yanipmanto kum winipnamsiake.

Ibrani 13:7

Ura, sik ninye deiyok nang atonun ubuka, Allah el yupu peterelamsik nang ara, sik winilamik ning luba kina kume. Anang arye winilamik ning ara, tuba tenenauk unamlulume. Sikce diksukum ulamikce, teleb pil dolamika deice arye, nong kilamuk ning nirya ara, aning tuba tenenauk unamlulume. Anggun deiyok nang arye diba tenelamik touk, anggun babye atonun, diba tenebuka telebuk wininamlulume.

Ibrani 12:3

‘Tuba imun ning usiliba, mikip ara, mitang asa ubuka, imun kanye bobibirye, talima bouku sukulamsil talak ara batakipyak’ tenen, ati ara, Yesus winilamuk ning ati, pia tenenauk unamlulume. Diba tenena kum, pia malye winin nang arye, Yesus yanibuka el nong deice ikin ning weik delilamik bukni, Yesus ara, pia batakna kum arye, pi dobuka mikip arye ulamuk.

Ibrani 7:4

Ura, anggun ton teneipdelulume. Melkisedek bira weik mambulnye ulamuk. Weik mambulnye ulamukba, nun apu Abraham arye, yuk mutuku deiyok nang obukabukce, sik bona ning weik dalubuka bopdakayayuk ning noutamak bokukabukce, Melkisedek el kina ati, yupa weik sepuluh persen (10%) aribuk.

Ibrani 3:1

Arup nyapmasin yupu nirya aupmala ati, anyapnusin yupu babye kekenulume. Isa Mutuku Dongonye arye, nun tukwak ninye ati, ‘Malye winipting’ tenen, talima lilosululba ikin asa unyap talak ara, ‘Nun du kopropa Yesus arye, melinamsil’ tenen, eltibuk diba tenebuka tenenamlume. Na kayapu, Allah arye wibsukba, elti, diba tenelulum ninye ati nyapsine. Allah arye nyapsukba, ‘Allah el dam im deice binamabe’ tenen, diba tenenyap touk, anggun yuk mutuku ton ululum ninye, aning atonun diba tenelulume. Aning ati ara, anggun kanye tenen ning nirya ara, Yesus deiceuk deipmunce, eltibuk diba tenenamlume. Yesus elti, diba tenebuka eluk talibuka unyabe. Yesus ara, Allah arye tukwak ninye lyena ati, el pia kai teleb yupu laka nyana ati, deiyok kouna deiyoknye ulule. Nun ap, Allah ap, neika una ati, ansinilina deiyoknye Yesus usulule. Yesus ati diba tenebibirye, el yupu laka nyalbanyabe.

Pilipi 4:8

Telebe na kayapu, asurat sirya dakana ati ayupu nyapnusine. Ara, yata teleb ning do nirya, pia dipkoprop mambul ning ap, kwalina kumce diksukum una ap, malye ning pia kum mingne ning ap, ninye nirya arye, ‘Aning dipkoprop teleb,’ tenenyak ning ap, apia teleb ning niryauk ara, tenenauk unamlulume. Yata ning do nirya, awinin ning ati ara, ‘Allah arye kanye delilule,’ tenenyap ning nirya ara, aninguk tenebuka unamlulume. Malye winin ning yala-yala nirya ara, kum tenenamlulume.

1 Korintus 12:8

Allah El Dib Kanye arye, tonoknye biti, Allah el ulul ning ap, el laka teleb yupu deiyok noutamak ning ap laka nyana deiyok ning ariliba, anye bira weik kelnye ulule. Yuknye ati ara, Allah El Dib Kanye melipliba, Allah el yupu kekeplinye bira, “Ayupu nong noutamak ara, ani. Ati winibuka unamabe,” nyabuka, nyalina Deiyoknye usulule.

Rasul 7:10

Allah arye Yusuf ati yupu teleb nyan ninguk areamuk arye, weik kel kopropnye ulamukce, el yupu nyalamuk ning ap, pil dolamuk ning ap, teleb-teleb kibuka ulamuk. Allah meilyamuk arye, Yusuf teleb kibuka ulamuka deice arye, Mesir mutuku weik ninye deiyoknye Firaun Yusuf ati kanye weik delilamuk. Kanye deilalamukce Firaun el talyamuk ning nirya ap, mesir mutuku ulamuk ning nirya ap, el aik pum pil dolamik ninye nirya ap, ‘El weik ninye deiyoknye kiplirye, elcuk talipnamle’ tenen, Firaun arye Yusuf dobuka erepdeibukura, aning-aning nirya el amutamuk ulamuk.

Daniel 1:17

Tonda, adumbarye wel nang ati, Allah arye kanye deibukce, weik kel bikna deiyok ning ap, Babel mutuku yupu deice sekamik ning yinin ning ap, arebukba kel kilamik. Daniel biti ara, lengdar mana deiyok ning arebukba, lengdar deice arye, winipman ning, lak nyananye ulamuk.

Yesaya 28:26

Wa wina deiyok nang arye, teleb kibuka wa koun ning ap, yala dokmanto ning ap ara, weik kel arye pil donyake. Deiyok ara, wa tuku wina deiyoknye birye, el si erelul Allah, elce anye akunum, ‘Winipnamlam, aning ton winipnamlam,’ nyabuka peterlya anya arye, anye birye apil talibuka, teleb kibuka pil dolule.

Amsal 24:32

Aning nirya akunum eipse ning ara, moubuka tenipdesirye, kel kipse. Kel kepsopura, ‘Aning ara ani,’ moubuka bikse.

Mazmur 119:125

Nara, an amu tam unirye, an piluk donanye ununa anya arye, ance, “Wininamlulume. Aning ara, kum wininamlulume. Teleb winina ara, ani,” nyalisilyam yupu nirya ara, kel kipnamne. Ance nyalisimin yupu, nong deiyok noutam ning babye, ‘Pia dipkoprob moubuka kel biktinye’ tenen, patanulul ati, ‘Moubuka kel bikna deiyok ning arepnamnilame’ tenen, moropkine na nio.

Yesaya 5:12

Sik anang arye, weik kwalya kwalibuka dinmace talak ara, mot sena ati, lelim len ning, el si kecapi ap, gambus ap, tonda rebana ap, suling ap onmakirye, kanye wangalamak mek, anggur mekuk dinyake. Wininyak deice sikce, ‘Se, nun ni Allah Yahweh, elce amambul pil donamleʼ tenen, sikce elti, moubuka bita tenebikirye, el taruk arye mambul pil dolamuk ning ati, si kum erenyake.

Mazmur 119:144

Ance, “Aninguk wininamlulume. Aning ara, kum wininamlulume,” nyapdeiamsulum yupu nirya ara, pia diksukumuk aunamle. Ati, ance kel bikna deiyok ninguk areniminba, aninguk talibuka, wininamne talak ara, teleb ubuka kamuk unamne.

Mazmur 119:73

Allah ancuk, kwepdeiamnulumce, an taruk aryuk nati, teleb kipdeiamnulume. ‘Wini talak ara, weik kel bikna deiyok ning, areniminya deice arye, ance, “Aning ara, wininalulume. Aning ara, pia kum wininamlulume,” nyalisilyam yupu nirya, moubuka kel kipnamne’ tenen, morokunune.

Mazmur 64:9

Deiyok ara, sik malye wininyak nang arye, pia malye yupu nyanyaka deice arye, Allah arye ayu nang ati, weneplirye, obuka sirya daknamle! Akunum oplyopura, yuk nang eibikirye, aning ati, kanye loplyopura, ‘Se, Allah arye, anang opmala ara, pia mambul weike,’ tenebikirye, ilil weik unamle.

1 Tawarikh 29:19

Tonda, nara Daud birye, ‘Na deiamse mi, Salomo melipnamlamʼ tenen, moropkine. Winipminyeura, elce, ‘Aning winipnamne do, kum do?’ tenena kumce, pia dipkoprob tonok kanye aryuk, ance, Winipnamlume, aning ara kum winipnamlume,’ nyabuka, nyapdeiamlum mem yupu ap, ance, ‘Teleb un ning ara ani,’ nyapsulum yupu ap, ‘Na tam nang arye, aninguk talibuka unamake,’ nyapdeipsulum yupu ap, aning nirya ara, Salomo moubuka tenelirye, dobolbilirye, an siuk erenamkileʼ tenen ati moropkine. Winibuka winiptopura, narye, ‘An si eren aik dopnamakinʼ tenen, aik don ning yuk-yuk ning nirya akunum kintinip deipse ninguk, ‘Na mi Salomo doproplirye, an aik dopnamkilʼ tenen moropkine, na ni Allah.” Ayupu ara, Daud birye Allah ati nyabuka morobuk.

1 Tawarikh 22:12

Tonda, an ni koproba Allah Yahweh, elce anti, kel weik kina deiyok ning ap, tonda ‘Anye una teleb ning ap, tonda aning ara malye un ning, ani, teleb un ning ani tenen bikilina deiyok ning ap nirya ara, an deice deipkiliba, sik Israel yala nang unyak mutuku ap, Israel yala nang nirya ap talibuka umince, yupu nyanamlam talak nirya ara, Allah el yupu uk moubuka talipmince, aninguk winipnin banamlame. Ara, ance el si erelyam Allah, Yahweh arye, ‘Aning winipnamlum, aning ara pia kum winipnamlume,’ nyapdeiamsuk yupu uk, ‘Ance ayupu moubuka talipmince, unamlamʼ tenen, narye nyapkine.

Ulangan 32:29

Se, sikce, ‘Tuba malye winibipyopura, aminyan talak imun kanye bobuka unamabe’ tenen, kel kiptingopura, teleb uptinge bukni, aning kum kel biknamake. Aning ara, dipkoprob kel kiptingopura, teleb upnamting bukni, kum upnamake.

Ulangan 4:39

Nyabukopura, ayupu ton dukdongobuka nyabuk. “Arup arye dipdongobuka, yuk talak nirya ara, luba kina kume. Pia teninamlulume. Anggun ni koproba Allah, el si Yahweh, el tonok im deice ap, im noutamak ap, tukwak mutuku im sirya, mutuku sirya nirya ap, eluk talibuka ulule. Yuknye ton, Allah atonun pia kum ulule.

Yakobus 3:15

Winin ning ara, nun ni Allah im deice arye kum arisulule. Ara Allah arye, ‘Wininamake,’ tenesilye touk winin ning kume. Ara nun babye kanye talima noutam patapsilye ning uka. Amalye usilye ning ara, sik diba tenena kum ninye ara, Allah El Dib Kanye nyasilye yupu kum kekenyakce, yaniltanauk wininyak ning ati nyapsine. Tonda aning ara, Isa Mutuku Dongonye arye nyalibuk, malye ubibyopura, malye ulisulule.

Lukas 9:44

Yesus arye nyabuk. “Na nyapnusin yupu ara moubuka kekepnululume. Luba kina meme. Ninye Mi Koprop Atonunye, ninye yupu delilbiceura, opnamniyake,” nyabuk.

Yesaya 1:3

Winipmanto ning ara, sapi basam babye, sik weilamak deiyok nang kel bikinyake. Atonun keledai basam babye, sik weilamak deiyok nang kel kibikirye, sik din arin sukum kintinililamak ara, akunum bikinyak bukni, sik Yehuda yala ninye ara, nati moubuka tenena kumce, sikce bita kel kum bikininyake.

2 Timotius 2:6

Aning atonun, wa wina deiyoknye birye, pia pi dobuka mikip weik arye pil dolinye bira, aminyan talak, awa win dam kouamice ning, akunum wisiplyopura, elce minop libuka dilule. Yuk nang nirya ara, aminyan talakuk libuka dinyake.

2 Timotius 2:8

Nun apu koprop Daud arye deibukura, dadeipdanin yangalamika ani, aminyan talak deibik mi, Yesus Kristus ara, obikura, dibuk bukni, tuba tamubuka, kam bukuk. Winibuk ning anirya ara, tuba tenenamlyame. Ayupu ara, Yesus el lak teleb yupu noutam aubuk ak, dobuka peterenune.