2 Samuel 3:1 - Eipomek

¹ Raja Saul el mapu silip ap, el tam kiamik nang ap, Raja Daud el mapu silip ap, el tam kiamik nang ap nirya ara, keting tamun weik tonun ton, olana uk ulamik. Winilamik bukni, Daud el tam ara, mikip weik upnin balamuk. Bukni, Saul el tam nang ara, pia mikip kum upnin balamuk.

2 Samuel 3:1 Referans Kwoze

1 Raja-Raja 14:30

Rehabeam elda eitam iknapye tam, (arah selatan), Yehuda mutuku ninye deiyoknye, Raja kibuka ulamuk talak ara, Israel tam nirya, ninye deiyok kibuka, taleamuknye Raja Yerobeam ap, olalamdike. Sik ap, sikce talilamdik ninye ap, olanauk ulamik.

Ayub 8:7

Minop talak ara, anda bona mitik tonun talilamlum bukni, Allah arye melilamkuka ani, aminyan ara, bona weik talinanye ulamlume. Anirye ubuka, aning nirya kum upkuk bukni, aminyan doupnamle talak ara, aning nirya tuba tonap arepkiliba, tonap, anda pia bona talina weiknye unamlame.

2 Samuel 2:17

Aning winipdayikopura, sik dana-dana tam awekmek yin talena nang nirya arye, adiparyuk asum noutam aryuk, atalak ara, yu weik ubukce, opdayik. Winipmeka ani, sirya ara, Daud el yin talin nang arye, Abnar ap, Israel yin talen nang ap nirya ati ara, obisibikce, malye kibik.

Efesus 6:12

Aning ara, talye kum nyapsine. Nun nong deice ikin ning deipsikirye, nun kanye talima malye kilina ati, usulula deiyok ning ara, ninye arye, kume. Tonda, nunti opmanto usulul ning ara, ninye arye, kume. Aning kum bukni, malye ulul ning nirya talibuka, deice tam mikip ulya deiyoknye Isa Mutuku Dongonye ap, tonda Isa Mutuku Dongonye el amu tam unyak bukni, im ap, tukwak ap, im sirya, mutuku sirya bokuka, talilya deiyok isa mer ap, pia malye tukwak kunuknak mutuku noutamak mikip ulul isa mer ap, asing kum elinyap bukni, im noutamak unyak isa mer ara aning-aning nirya ap, aisa mer nirya arye, nun dib tenenyap ninye ati, ‘Malye kibuka, optibye’ tenen, yaniltasinyake. Ati, winipsikiba, ikin weik usilye ning deiyok ara, ninye arye kume, ara Isa Mutuku Dongonye aryuka.

Mazmur 84:7

Allah an si erena ati, sik anang bisik kabul deiyok koubuka, banmakca ani, minop talak Israel nang arye, engelamik mutuku, Baka mutuku bisik bikirye, amutuku noutam bikca babye, ance anang melipminyeba, amutuku urasin tamuplirye, mek pukuka balamle atonun kibuka, deipnamlame. Tonda, amutuku noutam bacebuk, Allah arye mok areplyeba ceplirye, aminyan datalak, amutuku mekwen weik deipnamle.

Ayub 17:9

Malye nang arye, malye winin ning wininyaka babye, yata nang do nirya, dipkoprob kibuka, teleb unyak nang ara, teleb bisik kum batakanyake. Pia dobuka, tuba teleb unyake. Atonun, yatanye do nirya, el malye kum winilulnye bira, el mikip ap, nong ap, kanye tenenin ning ap, ton tabakuka mikip unamle!

Galatia 5:17

Nunda ninye tukwak ninyeuk unyaba anya arye, nun kanye talima noutamak malye ning aupmasilya arye, talima lilosululba, malye ning patasilye ning ara, pia yuke. Allah El Dib Kanye arye, nun talima talisiliba, teleb ninguk patasilye ning ara pia yuke. Apatan ning pia yuk-yuk ati, nun ninye kanye talima ap, Allah El Dib Kanye ap, olana atonun updikcopura, nun kanye tenenarye, ‘Se, teleb winin ning winiptinye’ tenen, patalamsil ning ara, dipkoprop kum uptibye.

Ester 6:13

Tonda, aubuk ning nirya ati, Haman birye el kil Seres ap, el kwit capu ap, sik kekena ati yanuka nukuk. Winibuka nukukba, el kil ap, el kwit capu ap ati, ‘Wininamlulume,’ nyabuka, laka len nang ap, nirya arye tamubuka nyabik. “Se, anda wini talak arye deiyok kibuka, an mikip akunum mitang upkilirye, Mordekai uk ara, mikip pia weik upra banamle. Mordekai elda, Yahudi yalanye ati ara, ance elti, kum opbisiptume. Nun ninye deiyoknye Raja arye, Mordekai biti kanye deipmala anya arye, elda dipkoprob mikip pia weik upra banamle. Bukni, anda amu tam kipdeipnamkile. Mordekai biti, ‘Malye kipnamne,’ tenena meme. Winibuka tenepniminyopura, aminyan talak dipkoprob ikin ning an dam yanamkile,” nyabik.

1 Raja-Raja 15:32

Raja Baesa birye, Israel tam ninye ati, deiyok kibuka ulamuk talak nirya ara, Yehuda tam deiyok kibuka taleamuknye, Asa ap, batakna kumce, tuba mal olanauk ulamdik.

1 Raja-Raja 15:16

Asa birye, ninye deiyoknye kibuka, outam Yehuda yala ninye taleamuk talak nirya ara, eitam mutuku Israel yala ninye ati, deiyok kibuka taleamuknye, Raja Baesa ap, tuba olanauk ulamdik.

Kejadian 3:15

Winilaminyeba, narye nyapdeipniba, an ap, akil ap, ‘Pia lik,’ tenilanamdume. Elce deipliba, dadeipdanin banamak mapu ap, ance deipminyeba, dadeipdanin balamica ani, banamak mapu ap, doyanamle talak noutamak nirya, ‘Pia lik,’ tenilanamake. Ninye nirya arye, an kisok teikuka onamkiake. Ance ninye yan dumu kisok si tobuka onamlame,” nyabuk.

Wahyu 6:2

“Yalyame,” nyabukba, amining damak binuka dinmasiba, kuda basam kurun ning ton yayukba, eipse. Akurun kuda balye deice bukmoknye bira, yin talipmoke. Allah arye ninye deiyok nang, ati kisok deice kalulamak ning, el si ara mahkota aribukba, el kisok deice kalupdongobukce, akurun kuda deice bukuka, bik-bik abuka biyuk. El bik-bik abuka biyuka ara, sik yin talin deiyok nang arye, ‘Malye ninye oplobibirye, malye kipnuyap’ tenen, mikip asa arye balamak atonun ubuka, kuda deice bukuka bik-bik abuka biyuk.

2 Samuel 2:28

Nyabuk ning ara, laka kina ati, Yoab birye, bung-bung ana, el si terompet talibukce, weik arye pong-pong abukba, weik lelim nyabukopura, el tam yin talin nang nirya arye kekebik. Nyabukba, el mapu sik Yudea tam ulamik yin talin nang nirya arye, alelim kekebikce, sik kayapu yuk Israel nang, itam ulamik Israel nang ati, dobolbanmek ning ara, adiparyuk batikik. Tonda, atalak aryuk, olalamik ning babye batakik.

2 Samuel 5:10

Allah ara, aning-aning nirya, deice tam ulirye, mikip weik ululnye ati ara, Allah el si Yahweh arye, Daud biti weik arye melilamukba, Daud el mikip weik, tonap tabakuka upnin balamukce, el winibuk ning nirya ara, ninye winipmanto kum ulamuke.

2 Samuel 22:44

Tonda, na ni Allah, na mutuku nang bukni, ‘Anye bira obisipnamabe’ tenen, olamnik bukni, ance nati, anang noutamak arye lyepdeipnulume. Tonda, amutuku ninye, sik talina deiyoknye kipdeipnulumba, sikda na amu tam unyaka anya arye, na mapu unyake. Nara, sik ninye deiyoknye tuba unune.

1 Tawarikh 11:9

Raja Daud daupra balamuk talak, mikip weik kipnin balamuk. Winibuk deiyok ara, Allah Yahweh aning-aning nirya talibuka, deice tam ulul mikip weiknye birye, Daud biti meliamukba winilamuk. Allah el mikip areamuka deice arye, Daud bira mikip weik kipnin balamuk.

Ester 9:4

Persia pia weik mutuku-mutuku nirya ulamik ninye arye, Mordekai biti biklamik. Tonda, ninye deiyoknye Mordekai birye, pil dolamuk ning ap, winilamuk ning ap nirya ara, yuk nang arye laka nyalamikba, Persia pia weik mutuku noutamak ulamik ninye nirya kekenmmikce, ‘Se, anye dipkoprob weik mambulnye ulule,’ tenelamik. Mordekai bira tuba-tuba pia tabakuka, mikip weika arye upra balamuk.

Mazmur 18:43

Allah ance anang ati, kum kekeplumce, kum meliamluma ati, narye, mal olan nang nirya ara, obuka sirya dakse. Sikda, obuka malye kipse ati, winipmanto ara, kumanya yanuka, mikip arye dopliba, tuku sung-sunga nirya bobalirye, kum danin balamle touk, narye mal olan nang nirya obuka sirya dakse. Diba, winipmanto ara, ninye arye talye balamle ning do, malye kibuka akunum lyulul ning do, bisikak aupmaliba dobuka, bai tam dolamak touk, na mal olan nang nirya obuka, yuk pere sukum donokse.

Mazmur 46:9

Ati ara, tukwak ninye nirya arye, Allah el si Yahweh mikip arye pil domuk ning ara, dilyalulume. Allah arye tenelye talak, akunum kiplyopura, tukwak mutuku nirya, kum daneipnamle.

2 Samuel 3:6

Daud el tam kiamik nang ap, Saul el tam kiamik nang ap, tuba olana uk ulamikba, Abnar arye, Saul el tam nang ap ulamukce, pil dolamuk deice arye, mikip weik kipnin balamuk.

1 Tawarikh 3:1

Raja Daud Hebron mutuku ulamuk talak arye, minop deiamuk mi el si ara, Amnon ulamuk. Ara, Daud birye Yisreel mutuku kil, el si Ahinoam dobukce, Amnon deipdik. Tonda, Daud birye deiamuk mi ton, el si Daniel, el lin bira, Karmel mutuku kil el si Abigail. Daud birye, akil Abigail dobukce Daniel deipdik.