2 Samuel 13:1 - Eipomek

¹ Daud birye deiamuknye Absalom, el weit kil si ara, Tamar ulamuk. Akil ara, ninye dona kumce, urdem ulamukbuk, el urasin pia teleb kil ulamuk. Amnon babye, Daud elce deibuk mi bukni, yuk kil arye deiamuknye ulamuk. Tonda, Tamar el lin yuk kil ulamuk. El anye Amnonda, Tamar ati, ‘Se, akil dopnamneʼ tenen, pia moun dolamuk.

2 Samuel 13:1 Referans Kwoze

1 Tawarikh 3:9

Eitam sekmapu nang nirya ara, Daud birye deiamuk. Sik ananguk, min deiamuk bukni, Daud birye, yuk kilapu ton domukce mapu ton deiamuk. Akilapu ara, Daud birye dipkoprob, pia dona kum kilapu bukni, talye tia akilapu ap malamika arye, mapu yuk nang ton delilamik. Tonda, Daud birye, el kilmu tonok deiamuk. Akilmu el si ara, Tamar nyabuka si domuk.

1 Tawarikh 3:2

Tonda, Daud birye, Gesur mutuku Raja kibuka taleamuknye Talmai, el kilmu el si ara, Maakha dobukopura, mi ton el si ara, Absalom deipdik. Aminyan talak ara, dumunye deibuk mi, el si ara, Adonia. Ara, Daud birye, yuk kil ton el si Hagit dobukopura, Adonia deipdik.

2 Samuel 14:27

Anye Absalom bira, el mapu ara, sal winilye, kil tonok deiamuk. El kilmu ara, El si ara, Tamar deiamuk. Tamar nepnin balamuka ani, urasin pia teleb kil ulamuk.

2 Samuel 13:15

Amnon birye, aning akunum winibukopura, elce Tamar biti, adiparyuk, ‘Elda na likeʼ tenen, yu weik ubuk. Kapul talak ara, Amnon birye Tamar biti, kanye deiamukce, moun dilamuk bukni, elce el weit kil ati akunum malye kibuk talak ara, adiparyuk, ‘Na likeʼ tenen, yu weik ubuk. Winibuk ati, Amnon birye, el weit kil Tamar ati, “Anda adiparyuk beo,” nyabuk.

Amsal 31:30

Ninye arye, kilapu ulamice ning urasin eibikirye, tenenyaka ara nyapnusine. Ara, sal arye, “Se, akilapu banmace ning ap, teleb ubuka yupu nyalamak ning ap, urasin kamo teleb ubuka unyak ning ap ati, pia teleb unyake,” nyabikirye, akilapu ati, ‘Sikda pia telebe,’ tenenyak bukni, akunum wisi danin bacopura, aning nirya ara kum danin banamlarya. Bukni, yata kil do nirya, Allah ati dib teneplirye, kanye talima amu kibuka ulirye, Allah atibuk ilil ulul kil ara, weik mambul kil ulule. Akil atonun unyak kilapu ati ara, yuk ninye nirya arye sikti, kanye delinyakce, “Sikda pia telebe,” nyabuka unamake.

Amsal 6:25

Tonda na mapu, anggunce, talye-talye yolamak kilapu nong bol teleb kibuka urasin pia telebto upmaca ati, anggun kanye talima lipdopsiliba, pia kum tenenamlulume. Tonda, akilapu sik asing ikilanyaka deice arye, anggun kanye talima lipdoposiliba, ‘Malye winipmunyak’ tenen ati, pia moubuka kalikelanamlulume. Anggun kanye talima lipdopsikiba, eibuka dobolbimunyopura, ‘Ara tapu koulongona atonun akunum kipnamsiake,’ tenenamlume. Ati winina meme, nyapsine.

1 Raja-Raja 11:1

Ura Raja Salomo bira weik kel bikna ap, weik bona talinanye kina ap ulamuk bukni, malye ton weik winilamuk ning ara, ton aubuk. Ara, mince Salomo birye Firaun el kilmu dobuk. Bukni, atalak ara Raja Salomo birye yuk-yuk buru tam kilapu ton, pia kanye tenelamukce, ‘Akilapu ton doptinye,’ tenelamuk. Allah arye, ‘Yuk mutuku kilapu dona meme,’ nyapdeiamuk bukni, aning nirya kekena kumce, batakukabukce, yuk mutuku kilapu pia weik dolamuk. Ara, Moab yala kilapu ap, Amon yala kilapu ap, Edom yala kilapu ap, Sidon mutuku kilapu ap, Het, yala kilapu ap, ayala-ayala kilapu ati weik kanye pia tenelamukce dololamuk.

2 Samuel 11:2

El yin talin nang yukak, tuba oldanmek talak ara, like tonok sum, Daud mapmoka bukukce, sintam keting ara, el aik deice, kat ning arye amsuna, teleb ubuka domik deice arye, bayukce dinmokba, pia urasin teleb kil tonok, mek kekenmokba eibuk.

Kejadian 34:3

Ubula dobuka neika maprik bukni, akil ati kanye deibukba, Yakub el kilmu Dina biti, kanye deibukce, akil ati nimalya arye, teleb yupu nyapdeibuk.

Kejadian 29:20

Nyabuka anya arye, atalak arye dipdongobuka, keting tamun tekbarye deice arye, Yakub birye, ‘Rahel dopnamne’ tenen, Laban el piluk talye dolamuk. Yakub arye Rahel biti, ‘Pia dopnamne,’ tenelamukce, weik kanye deiamuka anya arye, ‘Se, keting tamun yupa weik, pil donune,’ pia kum tenelamuk. El kanye ara, ‘Kume atekbarye keting tamun ara, na ikine kume. Ara, sumu winilyeto, dumbaryeto ulule,’ tenelamuk.

Kejadian 29:18

Yakub bira, Rahel biti, weik arye kanye deiamuka anya arye, ‘Dopnamne,’ tenelamuk. El mam Laban biti nyabuk. “Kume mamo, ance aminyan deiplum kilmu Rahel arepnutum toura, keting tamun tekbarye deice arye pil melibuka donamkine. Akunum winipyopura, Rahel arepnutumba, akilmu dopnamne,” nyabuk.

Kejadian 6:2

‘Allah ara, weik mambule’ tenen, el tam diksukum ulamik nang arye, yuk talye nang arye, delilamik kilmapu dililamikce, ‘Se, akilapu ara, pia teleb kilapu,’ tenelamikce, sik patalamuk kilapu uk, talye alubuka dolalamik.

2 Samuel 13:2

Atalak noutam ara, Amnonda, ‘Se akil Tamar ap, nun neika maptinimnye,’ pia tenenauk ulamuk bukni, ‘Akil ara, na weit kil ulula ati, elda dipkoprob kum doptinye ati, yata wiriptinye do?’ tenenauk ulamuk. Tonda, Amnon birye, Tamar ap, neika mana ara, pia kum winipmanto. Ara, Tamar bira, ninye dona ap, yuk nang ap, neika una ap, kum kil. Elda weluk ulamuk ati, aning ati tuba-tuba tenenauk ulamukce, Amnon adiparyuk, ikin kanye bobukce, kanye talima olalamuk.