1 Yohanes 5:16 - Eipomek

¹⁶ Ara Allah arye wenebuka oltakasulul atonun, malye una ning kum bukni, yatanye do nirya, el mening dam ululnye birye malye ulamlye bukni, eiplyopura, amalye ulamlenye ati, Allah moronamlule. Allah moroplyopura, Allah arye amalye ulamlenye ati, lyebuka deiplibuk, kam unamle. Na nyapmasi ning ara, sik malye wininyakba, Allah arye wenelul bukni, amalye winilamikibuk kum olye ning ati, nyapne. Ton yala malye winilamice ning ara, aminyan ara Allah arye oblyeba, dibinyake. Amalye winilamice ati ning ara, Allah moronamlume kum nyapsine.

1 Yohanes 5:16 Referans Kwoze

Yeremia 11:14

Allah arye nyabukura, na nabi Yeremia ati, ayupu ton nyapdeipnuke. Ati ara, Yeremiao, ance sikti, winipmince, na Allah ati, kum moronamnilyame. Tonda, ance na Allah ati, ‘Se na ni Allaho, sik Israel nang ati melipsilyame,’ nyabuka, morona ap, engena ap kume. Deiyok ara, sikce talye isa ati, ‘Nun deiyok ning ani,’ nyabuka, si erenyaka deice arye, narye arepnyeba, weik ikin ning, sik nong deice areplyeba, dopropnamaka talak ara, ance nati, ‘Naio, melipnilyame,’ nyabuka, kum moronamnululume. Moropnutuma babye, kum kekenamne.

1 Samuel 2:25

Tonda nyabuk. “Winipmanto, ninye tukwak nang ati, malye winilina ara, Allah arye dipkoprop, ‘Aning ara, malye wininyake’ tenen, bico tenebuka, namin kipturye lyepsutue. Bukni, Allah el si Yahweh ati, malye winibibye ning ara, yatanye birye lyepsutue do? Yatanye birye, amalye winin nang ati, Allah ap, ansinilina deiyoknye upturye, pil doptuba, teleb kibuka, neika uptibye do?” nyabuka wenebuke. Nyabuka wenebuk bukni, el mapu sik bitinye arye, anyamuk yupu ton, pia kum kekelamdik. Sik kum kekelamrik deiyok ara, Allah el si Yahweh arye, abitinye nang ati, ‘Anang wenebuka oplopnamne,’ akunum tenebuka atia.

Lukas 12:10

Yata nang do nirya, nara Ninye Mi Koprop Atonunye nati, malye yupu nyapnice nang ara sik malye nyapnice ning ara, sik batakiceura, Allah arye kum kipdeiplirye, namin kipnamle. Bukni, sik anang arye Allah El Dib Kanye el pil dolye ning ati, malye yupu nyabuka, ‘Aning ara, Isa Mutuku Dongonye arye el mikip deice arye pil donyake,’ nyabiceura, Allah arye sik malye nyanyak yupu ara kum daneiplirye, namin kum kipnamle. Aning atouk, sik kanye talima noutamak ayupu pia tenebiceura, aning pia tuba aupnamle, Allah arye sikti, wenepnamle. Ayupu nyanyak nang ara, kum lyepmanto ning wininyaka ati, nyapsine,” Yesus arye nyabuk.

Yeremia 14:11

Allah el si Yahweh arye, na Yeremia biti nyapnuk. Ance sik Israel ninye ati, ‘Na ni Allah, aninye teleb kipdeiplyame,’ nyabuka, kum moronamnilyame.

Yeremia 7:16

Allah arye, na Yeremia biti nyapnuke. An Yeremia birye, sik amutuku noutamak unyak Israel ninye ati, ‘Naio, sik melibuka lyeplyame,’ nyabuka, na Allah ati kum moronamnyelame. Winina kume. Tonda, ance nati, ‘Sik Israel ninye malye wininmaka ati, namin kipmince melipnamlyame,’ nyabuka, morona kume. Ara, Yeremia ance nati, nyabuka moropnimya babye, na lik ati, an yupu pia kum kekenamkine.

Bilangan 15:30

Bukni, Israel ninye tonoknye do, yuk mutuku arye yanuka, tikilyanamikce ninye asik nang do nirya ara, mangkau arye kum bukni, malye kipnikirye, tenepce arye, nati aren ning kum arepnikirye, pia malye upmakcopura, na Allah Yahweh ati, ‘Nun like,’ tenebuka malye, upmanyaka anya arye, atonun nang ara, anggun Israel ninye unamlumak arye, buru tam yakdonokmunyeba, el yuk talye dabinuka unamle bukni, narye anye bira, wenebuka opniba dipnamlume.

Keluaran 34:9

“Se na Ni Allaho, dipkoprob an ‘Naʼ tenen, kanye, na deice deipnutumopura, pia telebe. Kanye deipminyopura, an ap, nun ap, neika bitibirye, melipsutumopura, pia telebe. Israel nang ara, malye pia weik nang bukni, sik malye wininyak ning ap, malye tenenyak ning ap, namin kipsilyame, na nio. Namin kipsutumce, ance, ‘Na tenena ninye,’ tenepsiminyopura, pia telebe. Na nio, ‘Namin kipsutum,’ tenen, moropkine,” Musa birye nyabuk.

Kejadian 20:17

Ura, Abimelek birye, mangkau kanye bobuka Sarah dopmok talak ara, Allah el si Yahweh arye, el wenena ati, ‘Abraham dobuk kil dopmuka anya arye, moupdeipnamle’ tenen, ikin ning arebuk. Ara, Abimelek el kil ap, el pil melin kilapu nirya ap ara, el asik nang bukni, el aik ulamik kilapu nirya ati, ‘Sik mapu tonap kum deipnamak’ tenen, you kilapu una deiyok ning arebukba, sik nirya you kilapu ulamik. Allah arye wenebukba, you kilapu ulamik ati, Abraham birye, Allah ati morobuk. Ara, ‘Allah arye Abimelek el aik kilapu nirya kwetepnul’ tenen, morobukba, Allah arye, akilapu nirya kwetebuk.

Kejadian 20:7

Wini talak ara, anye Abraham ati, el kil dobuka tuba tamubuka arepnulyame. Elda, na yupu lak nyana deiyoknye ulula anya arye, elce nati moropnilyeura, kum opnamakine. Tuba kam unalame. Bukni, ance akil dobuka tuba tamubuka el akanye biti, kum arepminyopura, na pia dipkoprob nyapkine. Narye wenebuka opsiniba, an babye an asik nang babye, nirya dipnamlume.” Allah arye Abimelek biti nyabuk.

Mazmur 106:23

Atalak ara, sik malye weik winilamika ati, Allah arye, “Sik Israel yala nang nirya ara, obuka malye kipnirye bataknamne!” nyabuk. Nyabuk touk, Allah arye anang nirya akunum obuka, sirya dakmatu bukni, Musa birye Allah el dam yanuka, Allah ati, ‘Se na nio, aning ara, kum winipnulame. Anang namin kipnalame,” nyabuka morobuka ati, Allah arye anang kum obuka, sirya dakuk.

Yohanes 17:9

Naio, narye talye tukwak ninye nirya, diba tenena kum ninye nirya ati ara, anti kum morokunune. Aning kum bukni, ance areamnulum ninye ati moropkine. Aninye ara, an na tenen ninye, ance taliplum ninye anya arye, anang ati moropkine.

Yehezkiel 22:30

Na Allah arye, ‘Israel nang, sik kan-kan noutam ara, tonok telebnye ton auptuba, anye birye, amutuku dana-dana mutuku antanap dongobuka, domik cang keil poka, yu nang arye lulutaklamik ning ara, yupu nyaptuba, atam nang arye, aning lipsisikuka doptinge. Tonda, elce yupu nyaptuba, sik malye wininyak ning ara, bataknirye, telebuk ubtingba, aninye kum wenepnamneʼ tenenune. Bukni, atonunye ton, pia kum ululba kum eipse. Winipmanto ara, ‘Anye wipdeiptinyeba, elce min arye domikce cang keil poka dakuka sakamlibuk, elce tamubuka doplirye, mikip kipdeibuka, el anye birye amutuku talebuka, teleb kibuka winiptopura, narye amutuku nirya ati, weik ikin ning arena kumce, obuka sirya kum daktinye,’ tenenune. Bukni, wini talak ara, atonye pia kum ulule.

Bilangan 12:13

Nyabukura, Musa birye Allah el si Yahweh ati morobuk. “Naio, Miryam el bol deice, bol kona suse deiyok ning dilya ning ara, kum daneiptume. Na makal kil kweteplyame na nio,” nyabuka morobuk.

2 Timotius 4:14

Ura, yuk yupu nyapnukine. Tonoknye el si ara, Aleksander ara, kat ning tembaga dobuka, aning-aning memelulnye birye, ikin ning pia weik arye, na nong deice delilamnuke. Elce nati, kanye imun ning weik areamnuke. Ati ara, Allah arye anye bira, kwa dibuka wenena ati, kanye imun ning weik arenamle.

1 Samuel 12:19

Akunum tenebikopura, sik Israel ninye arye, Samuel biti nyabik. “Se, Na nio. Ance nun ni koproba, Yahweh ati moroptumba, kekepkuturye, nunti kum opnamsile. Ara, talye ati kum nyababe. Nun malye winilamupu ning weik, awamuk ati, wini talak ara, tonok weik malye un ning ton, akunum tabakmabe. Ara, nunce, ‘Ninye deiyoknye Raja biryuk talipsutue,’ nyabuka, morobupu ning ara, dipkoprob malye winibupe,” nyabik. Nyabikba, Samuel birye, tamubuka nyabuk.

1 Yohanes 5:17

Malye winina ning ara, ani. Ara, Allah yupu yaniplobuka, malye winilamice ning nirya ati, nyapne. Tonda, ninye arye, malye winina ning, malye winipmaceopura, Allah arye anang ati, wenelul bukni, pia kum dibinyake.