1 Yohanes 2:28 - Eipomek

²⁸ Ura, na mapu bico tenesunune. Winira pia diba tenebuka, Yesus yupu uk, dobolbanamlulume. Winilamibyebuk, aminyan Yesus yalyopura, nun alye una ap, ilil una ap kumce, ‘Talye kanye bopnamap’ tenen, nyapne.

1 Yohanes 2:28 Referans Kwoze

1 Yohanes 4:17

Ninye mutuku-mutuku nirya ati, Allah arye wenebuka yupu bokeipnamsil talak ara, ‘Sik ilil kumce, talye kanyeuk bopnamak’ tenen, bico tenena deiyok ning arisilibuk, ulirye, nun talima ak wisisulule. Ara, nun tukwak unyap talak nirya ara, Kristus el ulye touk, nun babye unyaba ati, nyapsine.

Markus 8:38

Wini talak unyak nang ara, wininyake. ‘Ninye arye el bidamnye kil batakuka, yuk kil ubula neika malamak touk, nati diba’ tenena kumce, na batakuka yuk ning eibuka, dobolbanyakce, pia malye-malye wininyake. Wininyaka ati, anggun babye, sik anang kan-kan umunce, na nong ap, na yupu ap, ati, ‘Nun opsicak’ tenen, anggun ilil ati alye upsile bukni, bataknumunyopura, na Ninye Mi Koprop Atonunye birye aminyan sirya talak, anggun babye, bataknamsine. Ara, na ni el urasin pia teleb ulirye, dirina weik ulya atonun, na babye atonun unyopura, Allah arye dirina kipdeibukura, im deice unyak nang, malaikat ap, ansiniprobibyopura, tukwak yanamap, talak ati nyapsine.” Yesus arye awekmek nang ati nyabuk.

1 Yohanes 3:2

Na kayapu na kanye deipsine. Wini talak ara, Allah el mapu unyabe. Aminyan nun nonge unamaba ara, min kum laka nyapsike. Bukni, nun kele. Yesus el yanamle talak ara, el nong babye, el ulul ning babye, dipkoprop ulye touk eipnamaba ati, nun babye el ulye touk unamabe.

1 Yohanes 3:21

Na kayapu, nun bidamnye kanye arye, ‘Na malye unune’ tenen, alye asa arye kum tenepdabyopura, Allah moron talak do, el damto unyap talak do nirya ara, alye kumce, teleb kanyeuk bobuka, talye mangkau Allah moronamnyabe.

Kolose 3:4

Winimunyopura, aminyan ara, Kristus arye, bol kobuka pia kam kilisululnye bira, Kristus tamubuka lakak nyasilyopura, Allah arye anggun ap, Yesus ap, lakak erepdeipsilirye, pia teleb kibuka, weik mambul kipdeipnamsile. Winipsilyopura, Yesus ap, weik dirina noutamak neika unamabe.

1 Yohanes 2:1

Na mapu bico tenesunune. ‘Anggunda malye kum unamlume’ tenen, ayupu seksene. Bukni, yata nang do nirya, malye winibicopura, nun kanye barina ap, melina ap ati, Allah dam tuba-tuba yupu melibuka nyasululnye tonok usulule. ‘Allah arye sik tukwak mutuku ninye oploplyak’ tenen, Yesus Kristus arye, nun melina ati, teleb yupu nyaplirye, yupu sekelule. Allah dam melina yupu nyasululnye bira, Yesus Kristus uka. Yesus Kristus ara, Pia Diksukumuk ulule.

1 Tesalonika 3:13

Tonda, nun Deiyoknye Yesus ap, el im deice melina nang, malaikat ap, tukwak tamubuka yanamak talak noutamak bukni, anggun Tesalonika ninye ara, nun ni Allah dam tikilbinamlum talak ara, ‘Anggun malye winin ning tonok ning babye, kum uplye deice arye, pia diksukumuk wininamlulum’ tenen, Allah morosunune. Tonda, ‘Winibuka wininamak’ tenen, ‘Yesus arye anggun talima mikip kilililamsilya deice arye unamak’ tenen, Allah morosunune. Na Paulus arye nyapsine.

Maleaki 3:2

Bukni, nara Allah Yahweh yanamne sum ara, yatanye birye, pia darapdongobuka tikturye, na eipnutu do? Na yanamne sum ara, kat weik ning uku dana deiyok nang arye, uku dongobikiba, mil paraplirye, malye ning nirya diplirye, teleb ninguk laka nyelelamle touk, narye malye un ning, aning-aning nirya, pia kum daneipnamne. Winipmanto ning ara, sabun mikip ning memena deiyok nang arye, memebuka deibikirye, nininga palepmalye baju, asabun arye mek likikiba, pia teleb kibuka liklamak touk, narye malye ning nirya kum kipdeipniba, diksukum ninguk tuba unamle.

1 Yohanes 5:14

Nun Allah morobye talak nirya ara, kanye bokoltona kumce, dipkoprop akunum tenenyap ning nyapnusine. Ara, Allah arye, ‘Aning telebe. Narye wininamne. Sikda, winipnamake,’ tenesilye touk, Allah morobibyopura, Allah kekepsilirye, melisulule.

1 Peterus 5:4

Anyapmasin touk akunum winipmunyopura, nun Domba basam weina Deiyoknye atonunye, Yesus Kristus tamubuka yalyopura, elce anggunti, pia teleb mingne ning, pia teleb ulirye, min kum danmanto kum ning arepsiliba, dopropnamlume.

Wahyu 1:7

Anggun moubuka kekenululume. Aminyan talak dua kan-kan noutamak yanamsil talak ara, ninye mutuku-mutuku nirya arye eipnamake. El obik ninye babye, eipnamake. Yesus yaliba, el obik ninye ap, yuk ninye nirya ap, sik asing eibikirye, el obikba, dibuk ning ati malye kanye bobuka engenamake. ‘Dipkoprop Yesus Kristus eibikirye engenamak’ tenen, na Yohanes arye, “Amin,” nyapsine.

Ibrani 9:28

Aning atonun, Allah arye, ‘Ninye tukwak ninye weik, sik malye winin ning kum daneipnamle’ tenen, like tonok talak aryuk Kristus dopdeibukba, malye nang arye Yesus obika deice arye, nun malye winin ning nirya akunum kilibuka kum kipdeipsuke. Aminyan talak ara, Yesus Kristus ila tuba tonap, tukwak mutuku dam kutukuka tikilyanamle bukni, atalak ara, ‘Malye winin ning, na nong deice deipnikiba kilipnamne,’ tenena ati kum yanamle. Aning kum bukni, bitinye talak yanamle deiyok ara, sikce, ‘Yesus dipkoprop dolyanamsil’ tenen, elti, diba tenebuka, dinauk unyak ninye ati, lyebuka dolyanamsile.

1 Tesalonika 2:19

‘Tesalonika ninye ap, neika dilbinamap’ tenena ati, anggun dam yangalelamubu ning ara, talye ati kume. Ara, yata mutuku ninye pin-pin kilisinyak do kume. Anggun uka. Ani, nunce peterelamsupuba, diba teneluluma ati ara, Yesus dolyanamsil talak, nunti kanye deipnamsile. Kanye deipsilyopura, anggun diba teneluluma ati, dekna ning arepnamsile. Aning ati ara, anggunti kanye pin-pin usulule.

1 Korintus 1:7

Allah arye melyamsukba, mikip arye dib teneluluma anya arye, Allah El Dib Kanye arye ninye ati, ‘Allah el mambul pil donamak’ tenen, pil dona deiyok ning, talye aresirica ning nirya ara, anggun Korintus mutuku ululum ninye akunum dololulume. Tonok ning babye kum sukultalisulule. Aning ati ara Allah arye, ‘Nun Deiyoknye Yesus Kristus aning-aning nirya talinamla ati, laka kipdeipnamsil talak, minopce yanamle’ tenen, anggun nirya arye, kanye deibuka, dinauk umunce, dib tenebuka telebuk ululume. Ara, Allah arye arisilye ning nirya, kum sukultalisilya ati nyapne.

Roma 9:33

Nabi Yesaya birye sekamuk yupu ara, ani. ‘Allah arye domona yupu deice nyabuk. Anggun moubuka dipdelulume. Sion mutuku bana ati, bisik noutamak ara, yan dum dukne keil deipne. Ninye arye talye luparabuka bakiba, akeil deice arye, sik yan dum dukliba, kote saknamake. Bukni, abisik noutamak deipnamnanye bira, pia diksukumnye unamla anya arye, elti, diba tenebice ninye nirya ara, na Allah arye dipkoprop lyepnamna ati, alye pia kum dakdanamake. Aning ara, nong upnamle anya arye, sikce nati diba tenebikcopura, aminyan talak, ‘Se, nunda talye ninguk diba tenelamupu’ tenen, sik talima pia boktoplirye, kum uk dinamle. Dipkoprop na Allah arye aninye lyepnamne. Ati, aninye ara alye pia kum alye dakalanamake.’ (Yesaya 28:16)

Titus 2:13

Aminyan yuk talak ara, nun ni Allah pia mambulnye, ara nun Lyena Deiyoknye Yesus Kristus, im deice arye tamubuka dolyanamsil. El dolyanamsila ara, pia teleb ubuka, dirina weik arye yanamle. Men kum dolyanmasilye talak noutamak nirya ara, nun kanye bokoltona kum aryuk, ‘El dipkoprop dolyanamsil’ tenen, kanye pia deibuka, dinauk ubirye unyabe. Ati ara, tukwak mutuku noutamak tuba kam unamap talak ara, pia diksukumuk unamabe.

2 Timotius 4:8

Winibuka ulamsa ani, wini talak babye, tuba wininune anya arye, Allah arye dekna ning kintinibuka ara, dipkoprop dopropnamne. Ara, Yesus arye ninye mutuku-mutuku nirya ati, yupu bokeipnamsil sum ara, pia diksukum yupu bokolina deiyoknye Allah arye nati, malye ning nirya kilipnilirye, pia diksukumnye kipnamnile. Dekna ning dopropnamne ara, aninguka. Pia teleb updeipnamnil ara, nauk ati kume. Aning kum bukni, yata nang do nirya, ‘Se, nun Deiyoknye Yesus arye, ila tamubuka tonap, tukwak mutuku tamubuka yasutue’ tenen, buku sukubuka, kintinibuka dinauk unyak nang nirya ati, dekni ning arepnamsil ning ara, diksukum kili sal daneipnamsile. Na Paulus arye nyapkine.

1 Timotius 6:14

Ara, asurat deice nyapmakin yupu nirya kekebuka talinalyame. Moubuka talinalam talak noutamak nirya ara, tonok ning babye, kum bataknamlyame. Tonda, anyapmakin touk, bita teleb pil dolamince, sirya dakanamlyame. Winipminyopura, yuk ninye arye, “E, el malye ulul ning ara, ani,” kum nyapmanto upnamake. Winibuka pia winilamlya ani, aminyan ara, nun Deiyoknye Yesus Kristus tamubuka yanamle.

1 Tesalonika 5:23

Ninye oldana ap, walana ap kum aniryuk, kanye deibuka nimalye arye teleb ubuka neika una ati ara, nun ni Allah, el pil dosilya deice aryuk unyabe. Allah, elce anggunti, ‘Nauk talinamniak’ tenen, anggun nong ap, anggun kanye talima ap, anggun winin ning nirya ap, ‘Pia teleb ulinamsile’ tenen, Allah morosunune. Aning pia winibuka daulamsilye bukni, nun Deiyoknye Yesus Kristus tukwak tamubuka yanamle talak ara, anggun sambala ap, anggun kanye talima ap, anggun nong nirya ap ara, ‘Malye ning tonok ning babye, kum upsiliba, pia diksukumuk wininamak’ tenen, Allah morosunune.

1 Korintus 15:23

Kam bukeipnamsil bukni, Allah arye, ‘Aning ara minopce, aning ara aminyan,’ tenyamsuk touk, aninguk wininamabe. Ara, Kristus ara, wa wibuka kouamica ani, wisiplyopura, winiryuk kwaning minopce yongobuka libikirye, dilamak touk, Kristus minopce kam bukeibuk. Winibuka anya arye, Kristus sirya talak arye, tukwak mutuku tamubuka yalyopura, elce talilye ninye ara, el na tenelul ninye anya arye, aminyan Allah arye, kam bukeipsiliba, pia kam unamabe.

Maleaki 4:5

Bukni, anyapnusin yupu moubuka kekepmunce, ‘Dan talak winipnamle do?’ tenen, dinauk unamlulume. Ara, ‘Weik imun ning winipnamle’ tenen, kintinip deipse sum, na Allah Yahweh arye ninye nirya ati, yupu lipsisikuka bokeipnirye, malye wininyak nang wenepnamne sum, min kum upmalye talak ara, minopce narye na yupu lak lenanye, nabi Elia dopdeipniba, anggun dam minopce yanamle.

Yesaya 25:9

Atalak ara, nunda el ‘Naʼ tenen, nang arye, “Anggun nirya dilulume! Dipkoprop Allah Yahweh, elda nun ni koproba Allah ulule. El siuk erenyabe. Minop talak arye, dipdongobuka atalak noutam babye, nunce, ‘Se, Allah atibuk, dan talak yalirye, nunda lepnamsil do?’ tenen, pia dinauk ulamupu bukni, wini talak ara, akunum yale! Dib Koprop el atibuk, ‘Dan talak melilyanamsil do?’ tenen, dilamupu. Bukni, wini talak ara, el akunum yanmasile. Elda, nun Lyena Deiyoknye usulula anya arye, adiparyuk pin-pin kanye bobuka upbibirye, elti, buk si erebibirye, kil-kil asa unamabe. Ara, elce nun akunum lyepsuka atia.” Aning nyanamabe. Kanye deibuka unamaba ara, talye ati kum bukni, Allah Yahweh, el taruk mikip, amutuku dup, Sion mutuku dup deiplirye, nun lyepdopnamsila ati nyapsine!

1 Peterus 1:7

Kanye winilden ning usilye ning ara, deiyok nyapnusine. Ara, anggun diba tenebuka, Yesus talibuka umunye ning nirya ara, winilesilyebuk, talima wisipsilye, ‘Dipkoprop pia gat uk, dipkoprop ninguk unamsil’ tenen, yangalule. Dekna weik ning emas ara, ‘Malye ning ubuk ning, kum uptue’ tenen, uku dongopmacebuk, malye ning diplyopura, teleb ubuka delinyak bukni, emas babye kum uptue. Emas ara, dekna weik ning ulul bukni, mitik mambul ninguk ulule. Anggunce diba tenebuka, Yesus talibuka umunye ning nirya ara, weik dekna weik ning atonun, weik mambul ulule. Diba tenelulum ning winilesilyebuk, akunum teleb uplyopura, Allah arye nyapdeiplibuk, Yesus Kristus tamubuka lakak yanamle talak ara, Allah arye telebe nyana ap, si erena ap, weik dirina ap, weik si ap, arepsilirye, erelinamsile.

Yesaya 45:17

Bukni, Israel ninye nirya ara, Allah Yahweh arye lyepnamle. Winipliba pia kam uk unamake. Tonda yuk mutuku ninye arye, anggun Israel ninye ati, malye yupu nyabuka anggun deice kum lululinamsiake. Ati, pia alye kum dakdanamake.”

Matius 16:27

Ara, talye ati kume. Nara, Ninye Mi Koprop Atonunye, na ni el urasin pia teleb ulirye, dirina weik ulya atonun, na babye atonun upyopura, Allah arye kwepdeibukba, el im deice pil don nang, malaikat ap, ansinibibyopura, tukwak yanamabe. Yanamap talak ara, tukwak ninye nirya wenebuka lipsisikuka bokeipnamne. Yata ninye do nirya, sik winilamikce ning atonun, narye moubuka dipdebuka nuknirye lipsisikuka bokeipnamne. Ara malye winin ninye ati wenebuka opnamne. Teleb winin ninye ati dekna ning arepnamne. Yesus arye awekmek nang ati nyabuk.

Matius 16:28

Nyabukopura, ayupu ton nyabuk. “Na dipkoprop yupu nyapsine. Anggun mening dam atikmalum nang kan-kan ara, ton nang ara, ‘Allah arye mutuku-mutuku nirya noutamak arye, ninye weik lyeplirye, el mikip deice sik talima talinamle’ tenen, nara Ninye Mi Koprop Atonunye yanamne talak min kum uplye talak ara, kum dipnamake. Sik aninye ara awinipnamle ning eipnamake.” Yesus arye awekmek ninye ati nyabuk.

Lukas 17:30

Sik talye mangkau kanye bobuka ulamika ani, uku im deice arye dopkwetebukura, aninye minpola dibuk atonun, na Ninye Mi Koprop Atonunye yanamne talak ara, atonun kum bikmace talak talye karen arye minpola tukwak mutuku tamubuka yanamne.

Efesus 3:12

Nunce Yesus Kristus ati dib tenebibirye, el ap, talima dukdongobuka unyap deice arye, nun Ni Kopropa Allah ati moroptibye. Tonda, Allah ati moronyap talak ara, kanye teniltona kumce, ‘Dipkoprop kekepsilirye, kum bataknamsile’ tenen, ilil kum asa aryuk, nun talye kanye bobuka yupu nyaptibirye, elti, moroptibye. Ara, Yesus dib tenenyap deice arye, wininyabe.