Tonda, bona weik talin nang ati ayupu ton nyanamlyame. “Sik bona weik talin nang ara, sik bona weik aulye touk, teleb un ning weik arye pia upmunyopura, aning ara, bona weik talin nang atonun unamake. Tonda, ‘Se aning ara, ‘Na’ tenen ning anya arye, kum arenamne’ tenen, teniltona kum aryuk, talye kanye bobuka yuk ninye ati, anggun ning weik arye bokuka arenamlume,” nyabuka peterenamlyame. Na Paulus arye nyapmakine.
1 Timotius 5:10 - Eipomek10 Tonda, yuk ninye nirya arye, ayouwak kilapu sik winilamik ning akunum eibuka kel bikamik akarye, “Akilapu ara, pia telebuk wininyake,” nyabuka nyalamak kilapu ara, sik siuk sekna telebe. Ayupu ara, ani. “Kume, ayouwak kilapu, sik teleb winin ning weik aulule. Sik damang mapu ara, teleb kibuka kwaknalamikbuk, weik arye nelamik. Ninye asik nang ati, ‘Nun aik una telebe,’ nyabuka, buplan kukulilamik akarye, melilamik.” Ayupu atonun yupu nyapting kilapu ara, sik si sekuka milina telebe. Tonda, yuk ninye melina ati, ‘Apil ara, malye pil ati ara, nun teleb kilapu arye kum pil dopnuyabe’ tenena kumce, yuk dib tenen ninye ati melilamik. Tonda, kanye imun ulamuk ninye melilamik. Ara, yata teleb winin ning do nirya, yuk ning tenena kum, apiluk dobuka teleb ulamik. Yuk ninye arye, ayouwak kilapu ati ayupu atonun nyaptingopura, ‘Ato youwak kilapu ara, melinamabe’ tenen, si sekna telebe. Gade chapit la |
1 Timotius 5:10
42 Referans Kwoze
Anyapmakin yupu ara, pia dipkoprop ulula ati ara, ayupu diba tenebuka talinamlyame. Tonda, ance peterenaminye ninye ati, ayupu dem dobuka, mikip asa arye peterenamlyame. Ara, ‘Allah ati akunum dib tenelamik kili sal arye, yuk talye ning nirya batakikirye, teleb un ninguk pia patapliba, moubuka talibikirye, pia pi dobuka, diksukumuk wininamak’ tenen, nyapkine. Anyapmakin yupu nirya ara, pia teleb yupu ulul ati, yata ninye do nirya, aninguk kekebibirye, talibuka wininamyaba deice arye, ayupu arye, telebuk kilisulule. Ninye nirya ati, nyapkine.
Na mi Tituso, sik dib tenenyak ninye, Kerit mutuku nang noutamak ara, ‘Akunum diba tenebikce, Allah yupu kunum kekebik bukni, luba kibcak’ tenen, tonap ayupu peterebuka nyanamlyame. “Sik amutuku deiyok nang, pemerintah nang ap, yuk ninye deiyok nang ap nirya ati, sik adiparyuk, sik amutamuk ubuka, sik nyanyak yupu kekebuka, telebuk wininamlulume. Tonda, atalak-atalak nirya, yata teleb winin ning do, yata teleb pil do, ‘Kanye deibuka, talye kanye bobuka, mikip arye pil dopnuyap’ tenen, kintinilinalulume,” nyabuka peterenalyame.
Yata winin ning do nirya, winipmanto ati ara, ance pil dominyebuk, akam nang eipkikirye, ‘Teleb winin ning kel biknamak’ tenen, aning-aning nirya pia moubuka, telebuk pil donamlyame. Ance Allah yupu peterenamlam talak nirya ara, ‘Yo bok doproptinye’ tenena ap, tenepce arye tilila yupu nyana ap, ‘Anang arye, nati, yata tenepnuninyak do?’ tenen, ilil una ap, kil-kil arye talye-talye nyana ap, anirya ara, kum wininamlyame. ‘Teleb yupu petereptinye bukni, naryuk tenepmanye touk, malye winina telebe,’ tenena kume.
Tonda, Allah ati diba tenekirye, el mapu unyak ninye nirya ati, sik patalul ning kum upliba, mambul kanye bobuka ucopura, anggun talilulum ning noutam arye bokuka, aninye ati melibuka arenamlulume. Tonda, ninye asik nang nirya ap, anggun kayapo nang nirya ap ati, anggun aik buplan kukeipmunce, “Telebe,” nyabuka inilonamlulume. Aning atonun, anggun unamlum mutuku noutam yanuka unamak ninye asik nang nirya babye, teleb kibuka melinamlulume.
Anggunti Allah morosunun ning ara, nyapnusine. Ara, ‘Yesus Kristus melisilya deice arye, anggun talima noutamak pil dosiliba, Allah arye, ‘Wininamake,’ tenyamsuk ning, el kanye delisulul ning nirya weika arye kipnamsile’ tenen, Allah morosunune. Yesus melisilyeba, aning nirya aupsilyopura, adeice arye Allah arye anggunti, ‘Wininamake,’ tenesilye touk, ‘Telebuk unamlulume’ tenen, Allah morosunune. Tonda, ‘Wini talak arye dipdongobuka, doryanamle talak nirya ara, ninye im sirya, mutuku sirya nirya arye, Yesus Kristus el siuk weik arye erenamak’ tenen, pataniliba, Allah moronune. ‘Dipkoprop pia telebuk wininamak’ tenen, “Amin,” nyabuka, Allah morosunune.
Ura, ton nang ara, ‘E, aninye ara, malaikat unyake,’ kum tenyamik bukni, talye mankau kanye bobuka, ninye asik nang melilamik talak ara, dipkoprop im deice, pil don nang, malaikat ati yukulamikce, melilamik. Aning ati, luba kina kume. Ninye asik nang sik dam yacopura, “Telebe,” nyabuka yukulonamlulume.
Nun diba tenenyap ninye nirya ara, yata teleb winin ning do nirya, aninguk pataliba, moubuka pil dona ati, adiparyuk bikinamabe. Ara, 'Allah akunum diba tenenyap ninye arye, yuk talye ning nirya batakibirye, teleb un ninguk pia pataliba, moubuka talibibirye, pia piribuka diksukumuk unamap' tenen, nyapkine. Wininamaba deiyok ara, 'Asum-asum nirya, nun patapsilye ning kintinibuka delina ap, yuk nang ati, melibuka arena ap, unamabe. Tonda 'Nunce teleb teleb ubuka kum wininyap' tenen, nyapsine. Tonda, talye-talye winina kumce, pil pia teleb ubuka dolamipya ani, 'Teleb winin ning weik winibipya deice arye, duk weik mounamsil' tenen, na Paulus arye, nyabuka sekeipkine.
Nun Lyena Deiyoknye Yesus arye, nun lyena ati, el mining nonguk arepsukce, nun pununa ati dipsuke. Malye winin ning noutam akuk ulamupa ati ara, nun wenena ati talye luparabuka oplopsutu bukni, ‘Akili sal ara, deknamne,’ tenelamukce, nun pununa ati, tukwak mutuku yanuka dibuk. Winibuka deksuka deiyok ara, ‘Ninye tukwak kili sal, sik malye un ning nirya kilipnirye, dekuka lopdeipniba, ‘Na’ tenen, ninye pia teleb una ninye unamake. Winibikirye, teleb winin ninguk talibuka, kanye deibuka diksukumuk unamak’ tenen, el nong deice arye deksukce, lyepsuke.
Dobuka yayukce, Yesus wirikdeibuka bukmokce, yan donokmok damak tikilyayukce, engenmokura, el asing maka ara, Yesus el yan deice sakanmok. Sakanmokura, akil potong ara, pia cang potong kil anya arye, el potong arye dobuka, Yesus yan deice asing maka sakmoka ara kilibukce, Yesus el yan deice mutubuk. Mutubukce, atong teleb mek dekna weik mek ara, Yesus el yan deice dikeibuk.
Yuk ning ton nyapnune. Yuk ninye nirya arye, nun kwit Demetrius ati, “Elda telebuk ulule,” nyabuka nyanyake. Tonda, Allah yupu nyasilye touk ululnye anya arye, Allah yupu deice arye ton, ‘Demetrius bira, telebuk ulule,’ tenenyabe. Atouk ton, nun babye, elti, “Telebuk winilule,” nyanyabe. Aning ara, talye kum nyanyabe. Tonda, anggun kele, nunce nyalamap yupu nirya ara, dipkopropuk nyanyabe.
Tonda, an mitik mi ulamlum talak arye dipdongobuka, anoutam talak nirya, Allah el pia diksukum yupu peterelamkikbuk, akunum kel bikamlume. Allah yupu peterelamsiaka deice arye Allah, ninye ati lyesulul yupu ap, lyen ning ap, nirya ara, kel bikinyabe. Nunce Yesus Kristus ati, dib tenenyap deice arye, Allah lyesulule. Aning nirya ara, Allah el yupu deice arye kel bikinyabe.
Aning mitik tonun, yatanye do nirya, mambul un ning, malye ning yala-yala nirya ati, bataktopura, teleb pil donanye unamle. Winipmanto ara, elda weik aik pum dekna weik ning ulye touk, weik mambul pil talibuka dopmantonye unamle. Atonye, el deiyoknye Allah arye anye biti, el malye winin ning kum kipdeiplyopura, anye biti teleb kipdeipnamle. Teleb akunum winibdeiplyopura, weik mambul pil aning-aning nirya talibuka, el li koprop ati, teleb pil melibuka dopmantonye unamle.
Tonda, ila tonap, tenekunun ning ara, nyapnukine. Ara, an nu kopropa Lois ap, anin kopropa Eunike ap, sik bitinye arye, lik tenena pia kum aniryuk, weik arye dib tenyamrik touk, an babye, Yesus ati dib tenelyame. Na kanye bokoltona kum arye, anti, akunum kel bikamkise. ‘Anye Timotius bira, Yesus ati dipkoprop weik arye diba tenelule,’ tenekunune.
Aning atonun, ninye arye teleb winilamak ning babye, atonun lak upnamle. Ton nang ara, sik teleb winin ning lak ubikceura, yuk ninye nirya eibikirye kel bikinyake. Ton nang ara, teleb wininyak bukni, yuk ninye arye atalak aryuk kum elikirye, kel kum bikinyake. Bukni, aning babye, aminyan talak kum duknupmanto ning ati ara, lak kipnamlarya.
Aning kum bukni, Allah arye, ‘Na si erebuka, nati kanye deibikirye, na melin kilapu ara, wininamake,’ tenesilye touk, ninye melina ati, teleb pil dona ap, ninye bico tenebuka melina ap, diksukumuk unamake. Yuk ninye, aunyak ning eibice, deice arye, ‘Akilapu ara, telebuk,’ tenepnamake. Kwerya weik ning donyak deice arye kume. Allah si erebikirye, diksukumuk unyak kilapu ara, amalye winin ning kum wininyake.
Nunce anggun anang ati, ‘Aning nirya dolonamak’ tenen, Allah morosinyam ara, urdem ati kume. Deiyok ara, Allah arye, ‘Na mapu winibuka, winibuka diksukumuk unamake,’ tenesilye touk, dipkoprop aninguk talibuka, ‘Anggun unamlum ning nirya teleb ubuka unamlum’ tenen, Allah morosinyame. Tonda, ‘Wininamluma deice arye, Allah arye kanye delinamsil’ tenen, nunce anggunti Allah morosinyame. Winibuka winimunyopura, Allah arye kanye delinamsil ning ara, lilibuka nyapnusine. Ara, yata teleb winin ning nirya do, diksukum ninguk yala-yala nirya umunyebuk, teleb duk weik moupnin banamsile. Tonda, Allah ap, kanye dukdongobuka umunye ning ap, Allah winilul ning nirya ara, ‘Weik arye kel kipra banamak’ tenen, nunce anggunti Allah morosinyame.
Allah el kanye aryuk lyepsukce, teleb kipdeipsuka ati ara, Kristus ap, talima dukdongopsuka deice arye, winiryuk ninye atonun kipdeipsukba, unyabe. Lyepsukce, winiryuk ninye atonun kipdeipsuka deiyok ara, ani. Ara, minop talak Allah arye, nun dib tenenyap ninye ati, ‘Teleb winin ning yala-yala nirya pil dobuka unamake,’ tenyamsuka ati, Kristus deice arye, winiryuk ninye kipdeipsukba, unyabe. Na Paulus arye, nyapsine.
Winipnikura, unmasi bukni, tonoknye, el si ara, Ananias na dam yayuk. Ananias ara, Allah arye nyapdeibukura, Musa sekamuk yupu, mem yupu ara, elce diba tenebuka pia moubuka talibuka ulamuka anya arye, Damsyik mutuku Yahudi yala nang ulamik nang nirya arye Ananias ati, ‘Ara pia telebnye,’ tenelamikce, elti, kisal dolamik.
Asipdeyukura, sik ayayik nang arye tamubuka nyabik. “Kume, Roma mutuku yin deiyok nang, 100 nang yupu bokolin deiyoknye, el si ara, Kornelius arye nyapdeipmasil ati yanmabe. Kornelius ara, Allah nyalilamuk yupu nirya pia talibuka ulule. Ati, Israel nang nirya arye elti, kibuka si erenyakce kanye deilinyake. Tonda, Allah el im deice pil donanye malaikat arye Kornelius ati nyabuk. ‘Peterus arye an aik yangana ati, moropminyeura, an aik yalirye, el nyapdeipnamkil yupu, anyuk moubuka kekepnamlyame,’ nyabuka, Kornelius ati nyapdeibukura, Kornelius birye ayupu kekebukce dopdeipmasilba, nun ayanmabe,” nyabik.
Anang arye Peterus dobuka yarikopura, Dorkas deipmek aik, alip aik deibik. Alip aik noutamak, Peterus binuka tikukbuk, youwak kilapu weik arye el balye tam nirya tikuka antapdongobik akarya nyabik. Tikra antapdongobikce, Peterus ati, “Akain ara, Dorkas arye el kam ulamuk talak nun neika ulamubu talak arye wiyamsuk baju adipdelyame,” nyabuka engenmekce, laka nyanmek.
Ati, nun kayapu, anggun akunum bikilulum nang ara, anggun noutamak arye tekbarye nang wipdeipnulume. Ara, Allah El Dib Kanye wekuka langdibukura, funguk kibuka unyak nang, sik yupu nyanyak ning ap, sik pil donyak ning ap, teleb-teleb kibuka wininyak nanguk wipdeipnulume. Wibdeipmunyeura, ‘Youwak kilapu dina bokuka arin pil donamak’ tenen, sik deiyok nang keipdeipnamabe.
Winipmunyopura, teleb ninguk winipra banamlume. Ara, diksukum un ninguk, kel bikra banamlulume. Ninye ati yupu lipsisikuka bokolin nang babye, diksukumuk nyanamlulume. Tenepce arye, tilila yupu nyabuka, kum nyanamlulume. Winipmunyopura, youwak kilapu do, kwaknamne mapu do, yuk nang arye, sik nong deice ikin ning delinamak talak ara, angguncuk lipsisikilinamlulume. Sik bidamang arye kum melipdanmanto ninye ati, melipnamlulume.
Anggun unamlum mutuku noutam ara, anggun yala nang koproba noutam ap, anggun weite-du nang arye, tonoknye ton, aning-aning nirya kum uplyeba, talye bona talina kumce ulirye, kankanye uplyopura, el nong mikip kum upmanto upliba, ikin ning weik, el deice yalyopura, anggunce elti, adiparyuk melibuka arenamlume. Akan-kan nye bira, anggun ninye asik nang do, anggun mutuku noutam tikilyangan nang do, melibuka winilamluma atonun, anggunce aning-aning nirya, weik tonun talye arepmunyeba, anggun aik pum tam nang ap neika unmunce, pia teleb kibuka melipmunce, kanye doubuka, neikauk unamlume.
Laban birye nyabukba, anye sik aik biyukura, el ap yanganmek nang arye, bona weik kitibuka, unta basam balye tam koupdongopmek ning nirya, lopdongobikce deibikura, anyaik nang arye, sik unta basam manak ati, maning dobuka deibik. Tonda unta basam sik din ning ton libuka boyanmek ning, deibik. Ura, anye ap, el melin nang ap, bisik pera weik yanganmeka ati, anyaik nang arye, ‘Sik yan bene dupmok ning, mek iliknuyak’ tenen, mek ton kwebuka arebik.
“Na ni yapu, pera mutuku arye yanganmarumba, ben dupmasila ati ara, na aik yarumunyeba, anggun yan mek liknusine. Anggunda, ninye asik nang anya arye, na aik neika mapnamabe. Mapmapya, bereklyopura, anggun tenepmarum touk, beren tam koprop do, keting noutam do, panabuka binamarume,” nyabuk. Nyabuk bukni, anang bitinye arye, “Teleb nyapsilam bukni, nunda anggun aik dam bukni, talye buru tam mana ara, teleb uka,” nyaprik.
Ara, yata dib tenen kilapu do nirya, anggun yala kilapu youwak akunum ubikcopura, sik adiparyuk ayouwak kilapu ati melinamake. Ara, yata mutuku do nirya, Allah dib tenen ninye arye, ayouwak kilapu nirya ati, ‘Se, yata wiribuka melipnamap do?’ tenen, ‘Ikin kanye bobicak’ tenen, nyapne. Ati youwak kilapu kum bukni, Allah dib tenenyak ninye, mutuku-mutuku nirya arye, dipkoprop ikin kanye bobuka unyak youwak kilapu, sik yala nang kum unyakbuk, ‘Aning-aning pia kum uplyopura, pataplye kilapu melinamak’ tenen, nyapkine. Na Paulus arye nyabuka sekeibkine.
Tonda, Allah dib tenena kum ninye arye, anang ati, “Sik malye winin ning ara, ani,” nyabuka, ‘Lulupdakcak’ tenen, yuk talye nang arye, “Anang ara, pia telebuk unyake,” nyanyak nanguk apil doptinge. Yuk-yuk unyak ninye wibuka deipminyopura, aminyan Isa Mutuku Dongonye arye, el wena pum bisik wekikibuk, yupnamle. Ara, sik malye ubikibuk, ‘Dauplye’ tenen, Allah yupu aik deiyok nang pil dopnin bakcebuk, aminyan yuk nang arye, sik anang babye, Allah dib tenen nang nirya babye ati, “Anang ara, malyeuka,” ‘Nyapsikcak’ tenen, na Paulus arye sekeibkine.
Anye birye, Yusup el du yapu nirya bobuka, Yusup aik pum bobiyukce, sik pera bisik arye yanmeka ati, sik yan mek likina ati arebuk. Tonda, sik kuda basam ati din ning arebukce, “Keting duk-dukan ara, sik ap, Yusup ap, anyaik neika kwaning dipnamalume,” nyabukba, kekebik. Kekepmeka anya arye ‘Yusup bira, keting duk-dukan yalyopura, elti, arepnamap’ tenen, boyayik ning kintinibik.
Ara, Allah yupu peteren nang. Sik deiyok talibuka pil dopmanto ninye adiparyuk wininyak ning lak nyapnukine. Sikda, malye winina pia kum winilamikibuk, yuk nang arye, “Anang wininyak ning ara, ani-ani,” kum nyapmanto nanguk, wibuka delina telebe. Sikda, kilapu tonokuk dobuka unyakce, ‘Talye kanye bobuka unune,’ tenena kum aryuk, sik bidamnye ati bita dilakirye, teleb winina ap, ninye minop wana ap, yu pola una kumce, nimalye arye una ap, anirya wininamak nang ara, apil dopnamtinge. Ato nang ati ara, yuk ninye arye, “Anang ara, dipkoprop teleb wininyake,” nyabuka, tenelamak nanguk apil dopnamtinge. Tonda, yuk ninye do, ninye asik nang do, sik aik buplan kukulinyak nang wibuka delina telebe. Tonda, yuk nang bikna ati, teleb kibuka peterepting nang wilina telebe. Winilamice ninye uka. Yuk unyak ninye ara, wilina kume.
Piblisite