1 Tawarikh 4:10 - Eipomek10 Ura, Yabesh birye, Israel nang kalikuka melilamuk Allah ati, morobukce nyabuk, “Se, na ni Allah, ance, teleb kipdeinilyame. Tonda, na talipnamne mutuku ara, lo weik areneminyeba, amutuku tuku weika arye talipnamne. Tonda, an weika arye melineminyeba, nara an amu tam unamne. Wininamne talak ara, na dam ikin ning yalyeba, imun kanye bopnyak ati, ance kalikniminyeura, weik ikin ning dobuka, karenak donoknamnilyame,” nyabuka, Allah morobuk. Winibuka morobukba, Allah arye, amoropmuk ning kekebukce, amoropmok touk kibuka melilamuk. Gade chapit la |
1 Tawarikh 4:10
56 Referans Kwoze
Anggunce amutuku ulamlum ninye arye, nati, ‘Nun ni Allah, aminyan talak upnamle ning ara, lak nyapsilyame,’ nyabuka, moropnimunyopura, narye anggun moropnimunye ning kekebuka, laka nyanamsine. Ara, narye anggun bikina kum yupu, pia mambul weik ning, minop talak min kum laka nyapdeipsise ning, lak arye laka nyapdeipsiniba, kekepmunce, biknululume.
Ati ara, narye nyapsise. Anggunda ilil una meme. Nara anggun dam unirye, pia melinamsine. Nara, anggun ni koproba Allah ununa ati, anggun kanye teniltona kum unamlume, Imun kanye bobuka kum unamlume. Nara anggun ni Allah unirye melinamsine. Na aryuk mikip arenamsine. Tonda nara, malye ning tonok ning babye ton kum ununye birye, na sirik taruk deice arye, pia talinamsine. Winibuka melipsinya deice arye, aning-aning nirya malye kum kipnamsine.
Nunce Allah ati, ‘Winipsutue’ tenen, yupu deice moronyap ning ap, nun kanye talima noutamak tenenyap ning ap ati, ‘Anirya ara, pia weik,’ tenenyap bukni, nun ni Allah ara, weik mambulnye, mikip pia weiknye ulula anya arye, nun morolamap ning ap, tenelamap ning ara, mitik tonunuk ulule. Elce nun kanye talima noutamak pil dosilye mikip deice arye, nun kum tenelamap ning ara, pia mambul weik ning, pil dopsutue.
Ance, “Aninguk wininamlulume. Aning ara, kum wininamlulume. Teleb winina ara, ani,” nyapdeiamsulum yupu nirya, narye, ‘Ayupu uk moubuka kel kipnirye, aninguk pia talibuka wininamne’ tenen, akunum dobuka dobolbanune. Ati, ‘Anda dinimince, kintinibuka natibuk, pia bico tenebuka, melinamnilam’ tenen, moropkine.
Atalak arye melipnuk touk, aminyan yanamle talak noutam nirya ara, malye ninye arye nati, ‘Paulus optibye,’ tenepniting bukni, na kele, nun Deiyoknye Yesus arye lyepnamnile. Winibuka ulamnilya ani, aminyan talak ara, elce aning-aning nirya talibuka, weik deiyoknye unamlak ara, teleb ubuka dopdopnilirye, im deice bobinamnile. ‘Ninye mutuku-mutuku nirya arye, el Yesus ati, el si erebuka el si pia erenamak’ tenen, patanulule. Anyapman touk, ‘Winipting’ tenen, “Amin,” nyapne.
Aning ara, talye ati kum nyapne. An Allah arye, Raja dam yaminyopura, pia teleb ning boyanuka, weik tonun tuba-tuba areniminye ning ati, nyapne. Winipminyopura, ‘Anye bira, Raja aulule’ tenen, lak nyana ati bikilin ning, el si mahkota, dekna weik ning, el si emas arye, memebik topi, aninye deiyoknye, el kisok deice akunum deiplume.
Tonda, yatanye do nirya, anggun talye bona utotoa talina kum ninye ap, mek kum upliba, mek pataplirye si bam bol sesal lepliba, imun kanye bobuka, ‘Mek dan do?’ tenen, pia elinamak bukni, kum eipnamake. Winibikirye, ikin kanye bobuka nati morobicopura, narye kekepnamsine. Nara Allah, Israel ninye anggun ni koproba unirye, anggunti pia kalikuka melisununa ati ara, narye anggunti melibuka lyepnamsine. Narye anggun Israel ninye ati pia kum bataknamne.
Bukni, na ni Allah, ‘Ikin ning weik, na nong deice delininyak nang, sik wenena ati ara, ance dibin ning dobuka, sik deice deipnalam’ tenen, moropkine na nio. Ance sikti, wenepminyeura, dibikceba, adiparyuk akunum diamik nang unyak mutuku, el si ara, Sheol mutuku noutam binuka, aunamak’ tenen, moropkine. Aning ara, talye ati kum bukni, deiyok ara, sik kanye talima noutam ap, sik aik noutam ap ara, pia malye winin ninguk aulula ati, ance anang ati, wenepnamlyame, na nio.
Nyabukce, anyalin yupu tonap dukdongopbuka nyabuk. Allah arye, Abram biti nyabuk yupu ara, ani. “Narye anti, pia teleb kipkinirye, narye melilamkiniba, ance deipminyeba, dadeipdanin balamica ani, deipnamak nang, pia weik upnin banamake. Aninye nirya ati, sik apu koproba kibuka unalame. Na mikip deice arye, an si weik arye, ereipkiniba, ninye nirya arye, anti kekepnamake. Narye melipkineba, an deice arye, yuk nang weika arye, teleb updeipnamne.
Na ikin ulamnuk ning nirya noutam arye lolamnuk Allah arye, ‘An mapu bitinye ati melibuka pia teleb updeipnamle’ tenen, nyapne. Tonda amapu bitinye ara, yuk ninye arye sikti, ‘E, amapu ara Israel birye deiamuk mapu ururake. Sik apu yapu ara Abraham ap, Isak ap ulamrik. Sikda ayala nang arye deibik,’ nyabuka ‘Pia nyanamake’ tenen, Allah moropne.” Israel birye nyabuk.
Musa ap, Harun ap ara, Allah el si eren aik pum tam, pil talibuka dona deiyok nang, imam nang pil talibuka dolamdik. Tonda, Samuel babye, nun Israel nang melina ati, imam deiyoknye ulamukce, Allah el si nyabuka, nunti morolamuk. Aimam deiyok nang, winilye nang arye, nun ni Allah Yahweh ati, ‘Naio, nun Israel nang nirya ara, melipsilyame!” nyabuka morolamik. Sikce Allah ati, morolamikopura, Allah kekelamukce, nun Israel yala nang ati, yanuka melilamuk.
Sik amutuku unamak ninye nirya arye, ayana talipnamsilanye, ninye deiyoknye Raja ati, si erebikiba, pia aunamle. Tonda, ayanamlanye, el si tuba auplyeba, el tibuk, “Nun deiyoknye ani,” nyabuka, elti, si pia erenamake. Keting sinarya aupnamle talak nirya ara, el tibuk kinamake. Aninye deiyoknye, pia teleb unamla deice arye, mutuku-mutuku nirya unyak ninye, ayala-ayala nirya ara, telebuk ulilulba, weika arye tabakikirye, teleb wininamake. Elce, tukwak mutuku noutamak unyak ninye nirya ati, teleb kililirye, melilamliba, tukwak mutuku ninye nirya arye, “Diba, elda pia telebnye ulule,” nyabuka, elti, si pia erenamake.
Nyabukura, malaikat arye, Yakub biti nyabuk. “Wini talak ara, winiryuk si arepnukine. Wini talak arye dipdongobuka, doryanamle talak ara, an si ati ‘Israel,’ nyanamkiake. Deiyok ara, ance Allah ap, yuk ning ap ati, pia pi dobuka piripdenmalamce, an mikip arye akunum malye kibuka bisipmalama ati, an winiryuk si ara, ‘Israel’ arepmakina ati ara, dorunamle talak ara, asiuk nyanamkiake,” malaikat arye, Yakub biti nyabuk.
Nun nirya arye, “Nun ni Allah antibuk, nun deiyoknye pia teleb ulyame,” nyabuka, Sion mutuku noutamak arye, an siuk pia erenamkiyabe. Tonda, nunce anti, “Nun ni koproba Allah, el siuk erebibirye, el yupu kekebuka unamabe. El amu tam ubirye, el piluk donamabe,” nyabuka, nyalin yupu deice arye nyabupu touk, dipkoprob aninguk, talibuka wininamabe.
Sik bitinye arye, pia talepkwinik-kwinik winikdarika ani, bereknamoka, akunum dam kibukopura, ayanmoknye malaikat birye nyabuk. “Winira, na batakdongopnilyame. Keting akunum purupnamala atia,” nyabuk. Nyabukba morobukba, Yakub birye tamubuka nyabuk. “Kume, na kum batakdongopnamakine. Na nio ance nati, ‘Allah arye weik ning melipnamkil’ tenen, teleb yupu nyapnutumba, kekeptinyopura, bataknamakine. Ayupu kum nyapniminyeura, kum bataknamakine,” nyabuk.
Tonok ning ara ani. Ara, ance meliniminba, narye tilila yupu nyan ning nirya ara, kum nyanamne. Bitinye ning ara ani. Ara, pia bona talina kum ninye ulamice ning ap, bona weik talin ninye ulamice ning ap ara, na damak arye dobuka, yuk tam dadelilyanamnilame. Aning nirya, na damuk batakminyeura, bona talina kum ninye ulamice ning ap, bona weik talin ninye sik winilamice ning ap nirya ara, na damak kum yanganamnile. Teleb ning ara, dipkoprob na patanilye touk, aninguk arepnutumba, kanye deibuka telebuk unamne. ‘Winibuka melipnutumba, teleb ubuka unamne’ tenen, na ni Allah anti moropkine.
Bukni, na ni Allah, ance nati teneniminya ara, ‘Tuba malyeuk kilya babye, nong bol deiceuk, teleb winin ning tenena kume. Bukni, ‘Ninye kanye talima pum tam arye, pia diksukum winin ninguk tenebuka patapliba, pia telebuk unamle,’ tenenilyame. Utenemince, ‘Weik kel bikna deiyok ninguk wininamle,’ teneniminye touk, aninguk na kanye talima pum tam arepniminba, moubuka kel biknirye, telebuk unamne.
Bukni, aning babye akunum teninune. Minop talak ara narye Allah ati, “Naio, melipnilyame,” nyabuka, morolamse talak ara, Allah kekepnukce, adiparyuk yanuka meliamnuke. Nara, diksukumuk ulamse ati, yuk nang arye nati, ‘Elce malye winilamuk ning ara, nunce eibupu ning ara, ani, ani,” nyabuka, nati kum nyapnitinge. Malye ning ton, pia kum winilamsiba, Allah arye melilamnuk bukni, wini talak ara, ninye nirya eipnikirye, akutubuka, nati nalipnikirye, akutuninyake.
Yangapdeibukce, asukum panabuka bisik banmoka ani, Betel mutuku bukni, keting yangan tam ara, mutuku kon welebukce binuka, tenda cang kain aik dobuk. Betel mutuku ara, keting wekelban tam, Ai mutuku ara, keting yangan tam noutam ara, el tenda aik dobuk. Asukum ton Allah el si Yahweh ati, el si erena ap, el arena ap ati, keil pala dobukabukce, keil yangapdeibukce, Allah el si Yahweh yukubukce morobuk.
Winipniminyopura, na ni Allah ancuk, na kanye talima pum tam malye wamnilye ning kum kipdeipnimince, talima winiryuk ning punubuka arepnamnilyame. Tonda, ance mikip arepniminba, na kanye tenen ning ap, na nong noutamak ap nirya ara, mikip kipniminba, amikip deice arye, ila tuba tonap, diksukum winin ning kum bataknamne. Pia anuk talibuka unirye, teleb kanye uk bobuka unamne.
Ura, anggunce, ‘Yuk ninye nirya ati, bico tenebuka melinamabe,’ nyabuka tenepce arye talye yupu nyabuka, kum wininamlum bukni, dipkoprop yuk ninye ati pia bico tenebuka melipnamlulume. Tonda, malye winin ning aning-aning nirya ati, ‘Aning ara pia nun like’ tenen, bataknamlume. Malye ning tonok babye talibuka kum unamlume. Teleb winin ning yala-yala nirya ati, aninguk talipmunce kanye deibuka diksukumuk unamlume.
Peterus ayupu nyabuk akarye ayupu tonap, nyabuk. “Allah arye el Melinanye kunum kintinipdeibukura, ‘Yahudi yala nang ara, weik melipnamle’ tenen, anggun dam minop dopkwetepsuke. Ara ‘Sik yuk arye, malye wininyak ning batakuka, balye tamubuka teleb bisik binamakce, Yesus ati dib tenepnamak’ tenen, dopkwetepsuke. Tonda, ‘Yesus arye aninye dobuka, Allah el tam tamulinamsil’ tenen, dopkwetepsuke,” Peterus arye nyabuk.
Bukni, amapo, anggun Roma mutuku tam umunye ninye ara, Allah el yupu nyasilye touk, diba tenebuka, diksukumuk umunyopura, yuk mutuku nang nirya arye eibuka kel bikisinyakce, laka nyanyakba, nun ton kekenyabe. Ati narye anggunti kanye delisunune. Narye anggunti, ‘Se, winibuka unamak’ tenen, patapnile. Aning ara nyapnusine. Tonok ning ara, ‘Weik arye kel kibikcopura, teleb winin ninguk wininamak,’ tenesunune. Bitinye ning ara, ‘Malye winin ning aning-aning nirya ati ara, kum wininamake,’ tenenune. Tonda, amalye winin ninguk kel kibikirye, malye kum wininamak’ tenen, se tenenune. Ara, ‘Malye winin ning tonok ning babye kum wininamak’ tenen, se tenenune.
‘Malye upnamak do?’ tenen, ‘Weik ikin winilden ning kum arepnamsilam’ tenen, moropkiyabe. Aning kum bukni, tonda, Pia Malye Uning Deiyoknye, ara Isa Mutuku Dongonye arye, ‘Malye ulisulul anya arye, malye winibibyak’ tenen, ‘Ance kalikuka disimince melinamsilam’ tenen, moropkiyabe. Ayupu nyabuka, Allah moronamlulume. Yesus arye el yupu kekenmek nang ati nyabuk. Nyabukce ayupu tonap nyabuk.
Tonda, anggun winimunye ning nirya ati, winibuka tenenamlulume. Winipniba, Allah El Dib Kanye arye, kekebuka eipnilirye, ‘Se, sik malye wininmake,’ tenepnilirye, ‘Malye kanye boplyak’ tenen, malye una kumce, pia diksukumuk unamlume. Allah El Dib Kanye ara, talye ati kum arepsuk bukni, basam amul seklamak atonun, Allah El Dib Kanye arepsuka deice arye, urasin kintinilina atonun winipsuke. Ati, adeice arye, nun kele. ‘Akunum lyepsukce, deksuka ati ara, daulamibya ani, sirya talak weik mambul sum ara, sirya memeproplirye, teleb kipdeipsilirye, el dam bobinamsil’ tenen, bikinyabe.
Aminyan ara, Yesus like winilye ning arye Peterus ati asipdeyuk. “Wisinye Yohanes arye deipkuk mi, anda Simon Peteruso, dipkoprop kanye delinilyam do?” nyabuka asipdeyuk. Asipdeyukura, Peterus arye, ‘Se, like winilye ning arye, tuba tamubuka tonap aninguk asipdenmanile’ tenen, bouku sukubuk. Mambul kanye bobukce, Yesus ati tamubuka nyabuk. “Naio, anda aning-aning nirya kel bikinanye ulyama anya arye, adinmanilama arye, moubuka kel bikmanilame. Narye anti kanye delikunune,” nyabuk. Peterus arye nyabukba, Yesus arye tamubuka nyabuk. “Ati, na bico tenenun domba ati, sik din arenamlyame,” nyabuka domon yupu deice nyabuk.
“Se, anggun Yerusalem mutuku noutam ululum nango, Allah ap, ninye ap neika una ati, ninye lyebuka teleb updeipmanto ning diba tenebuka kel kipmatumtoura, Allah arye akunum lyepsutubuk, anggunda, kel bikmanto kum nang ululume. Anggunce Allah ati, bataklum ati, Allah arye, ‘Anang kel bikicak’ tenen, adeiyok ning akunum dungnupmasila ati, ninye lyena deiyok ning kel kum bikmalume.
Yim ayam arye ngalukukopura, adiparyuk, Yesus arye Peterus ati min talak nyapmok yupu ara, Peterus ila tonap tenebuk. Tenebukce, “Se, Yesus arye, ‘Yim ayam like bitinye kum kamupmalye talak, anye bira na walwale,’ nyabuka, like winilye deice arye pilipnamanilame,” nyapmanu touk, ‘Na akunum winipne,’ tenebuk. Utenebukce, el kanye talima pia ikin ubukba, anang asukumuk batakuka, bai tam biyukce, weik arye engenmok.
Ura, Yehuda birye deibukba, dadeipdanin yangalamika ani, tonoknye ton deibik. Anye el si ara, Yabesh ulamuk. Teleb kibuka ulamukba, yuk nang nirya arye, el tibuk si erelamik bukni, el aik ninye koproba ati, yuk nang arye, ton sik si kum erelamik. El lin birye, ami Yabesh ati, “Ami deipnuse talak ara, mi deiyok donmase ara, uk weik dilamnuk bukni, sirya ara, ami deiamsa ati, ami ara, el si Yabesh nyanamabe,” nyabuka, si domuk. Yabesh nyabuka, si domuka deiyok ara, sik yupu deice arye, ‘Pia weik uk dilule’ tenen, nyalamik ati, ami el si ara, asi Yabesh nyabuka si domuk.
Tonda, Yakub arye, Allah ati ayupu ton nyalinmok. “Na bisik banaman talak noutamak nirya ara, Allah el si Yahweh arye, pia melibuka kaliknilirye, na patapnamnil ning, din ning do, baju do, pia arelamnilya ani, aminyan talak teleb kibuka, na ni dam tamubuka boyanilyopura, narye el si Yahwehuk, pia si erenamne. Elda na ni koproba, Allah pia unamnile.
Ura, Hana mi bomuk ani, sal mi deibuk. Deibukura, ami el si ara, Samuel nyabuk. Samuel nyabuka deiyok ara, ani. Ara, sik Ibrani yupu deice arye, Samuel nyalamik ning deiyok ara, ‘Allah kekepmanile’ tenen, nyalamik. Ara, ‘Nara Allah ati, tuba pia morolamsa ati, Allah arye kekepnukce, arepnuke,’ tenebuka ati, ami si Samuel nyabuka sisibuk.
Allah anti ilil tenebuka, nimalye arye kanye dakdongobuka wininyak ninye arye, “Se, nun ni melipsilyame,” nyabuka, morokinyak ninye ara, sikti, melipmince, teleb kililyame. Aninye arye, “Se, yatanye birye melipsutue do? Kume, Allah elcuk melipsutue,” nyabuka morokinyak ninye ara, an kekepmince, aninye nirya ati, melibuka lyelyame.
Piblisite