1 Korintus 1:13 - Eipomek

¹³ Winibuka nyalulum bukni, na kayapu, Kristus el nong ara noutamak bokuka yuk-yuk ulul do, kum do? Tonda, anggun lyena ati, na Paulus dopropnikce, anggun malye winimunye ning ati, aning kilibuka pununa ati wanwanun yo deice deipnikce opnik do, kum do? Tonda, na si deice arye, mek dongopsik do, kum do? Kume.

1 Korintus 1:13 Referans Kwoze

Efesus 4:5

Nun Weik Ninye Deiyoknye tonok ulule. Nun dib tenebuka talinyap yupu ara, tonokuk ulule. Dib tenebibyopura, mek dongosinyaka ara, tonok ulule.

2 Korintus 11:4

Dipkoprop nunce Yesus el yupu peterelamsupu atonun kum bukni, yuk nang arye tilila yupu deice arye Yesus ati peterepsikceba, ‘Diba tenepnamlum’ tenen, nyapsine. Tonda, yuk nang arye, ninye lyena ati tilila yupu, peterepsikceba, ‘Tilila isa dib tenebuka dopropmunyak’ tenen, nyapsine. Anggunda, ‘Ayupu ara dib do, tilila do?’ tenen, moubuka tenena kum arye, yuk nang arye nyasikce yupu, adiparyuk kanam aryuk kekebuka dololulume. Winilulum ning ara malyeuka.

Rasul 2:38

Nyabikura, Peterus arye tamubuka nyabuk. “Anggun nirya ara, anggun malye winilulum ning ap, kanye malye tenelulum ning ap, ‘Allah arye namin kipsilirye, kum daneipnamsil’ tenen, anggun malye ning nirya batakmunyak arye, donga tamubuka, Allah el tam kipropmunyeura, nunda Yesus el si deice aryuk mek dongopnamsiape. Winibibyeura, Allah arye nun bico ati, talye arisulul Dib Kanye ara, arepsilyeura, dopropnalume.

1 Korintus 10:2

Musa menekuka balamukba, nun apu yapu nirya arye, Allah dua kan-kan ulamukce, adua menekuka balamukba, sik nirya arye, adua amuak balamik ning ap, weik mekwen dana-dana kipdopbukba, tuku kel-kel abuk bisik biyik ning ap deice kel biklamikce, “Musa ara, nun deiyoknye ulule,” nyabuka ulamikce, Musa el yupu kekelamik. Winilamik ning ara, winipmanto ning ton nyapnusine. Ara, dib tenebibirye, yuk ninye nirya nunti, ‘Anye bira, Yesus el mi akunum ulule kel biknamsiak’ tenen, mek dongolamak touk, nun apu yapu ara, Musa el amu tam ulamikce, elti, melilamik.

Rasul 19:5

Paulus arye ayupu peterebukura, sik min arye dib tenebik nang, ayupu kekebikce, diba tenebika ati, Paulus arye anang ati, Yesus si deice mek dongobuk. Winibuka deice arye, Yesus el tam nang kiprobikce, el mapu kibik.

Rasul 10:48

Ati, Peterus arye nyabuk. “Anang ara, Yesus Kristus ati dib tenepmaka anya arye Yesus el si deice arye, mek dongoplulume,” nyabukura, sikce anang dobuka mek dongobik. Mek dongobikura, amutuku nang sikce nyabik. “An ap neika mitik anun ton unamabe,” nyabuka morobikura, mitik anun ton Peterus asukumuk unmok.

Galatia 1:7

Allah el kai teleb yupu, ninye lyena yupu ara, dipkoprop tenebuk ninguk ulul bukni, anggunce aning batakuka, yuk yupu kekebuka, yuk bisik banmaluma ati, ayupu nyapmasine. Ura, na walwal bukni, yuk nang arye anggun dam yakirye, sik tenenyak ning peteresice deice arye, kanye walwal upsiliba, teniltonauk ululum do, kum do? Ara, sik yuk yupu peteren nang ara, Kristus arye ninye lyena ati, el kai teleb yupu dobuka, yuk yupu ap ansinibuka peteresikceba, ‘Kanye bokoltonmasil,’ tenepsine.

Matius 28:19

Ati ara, ninye mutuku-mutuku nirya, na yupu moubuka kekebikirye, ‘Na wininye ning atonun wininamak’ tenen, anggunda na mapu arye, ‘Ninye mutuku-mutuku im sirya, mutuku sirya nirya kekenamak’ tenena ati, peterelbanamlume. Peterepra balamunyebuk, ninye dib tenebikceopura, Allah el si deice ap, el Mi Koprop, Yesus na si deice ap, Allah El Dib Kanye si deice ap, sik diba tenepnamak ninye mek dongopdeipnin banamlume.

Titus 2:14

Nun Lyena Deiyoknye Yesus arye, nun lyena ati, el mining nonguk arepsukce, nun pununa ati dipsuke. Malye winin ning noutam akuk ulamupa ati ara, nun wenena ati talye luparabuka oplopsutu bukni, ‘Akili sal ara, deknamne,’ tenelamukce, nun pununa ati, tukwak mutuku yanuka dibuk. Winibuka deksuka deiyok ara, ‘Ninye tukwak kili sal, sik malye un ning nirya kilipnirye, dekuka lopdeipniba, ‘Na’ tenen, ninye pia teleb una ninye unamake. Winibikirye, teleb winin ninguk talibuka, kanye deibuka diksukumuk unamak’ tenen, el nong deice arye deksukce, lyepsuke.

1 Korintus 1:15

Ati ara, yatanye do, yata kil do nirya, “Paulus el si deice arye, mek dongopnika anya arye, el mi unune,” kum nyaptinge.

Roma 14:9

Ura, el na tenen ninyeuk unyabe nyapmasin deiyok ara, talye ati kum nyapsine. Kristus dibuk bukni, ila tuba tamubuka kam bukuk. Ara, ‘Akunum dibilamice ninye babye, kam tuba unyak ninye babye, sik nirya ara, naryuk talinirye, sik weik Ninye Deiyoknye erebuka unamne’ tenen, dibuk bukni, tamubuka kamuk ulule.

Rasul 8:16

Winiprika deiyok ara, Allah El Dib Kanye amutuku nang yanuka min kum wekamuka ati, sik amutuku nang ara, ‘Nun ni Yesus el mapu unamak’ tenen, Yesus el si deice aryuk talye mek dongolamik bukni, Allah El Dib Kanye men kum dololamik.

Matius 3:6

Balamikce, sik malye ulamik ning, yuk ninye kekelamikak arye, lakak laka nyabuka batakik. “Nun dipkoprop malye winilamupe,” nyabuka, sik malye winilamik ning lak akarye, laka nyabuka bataklamikba, Yohanes arye adib tenelamik ninyeuk dobuka, mek ongolamuk. Aninye dobuka, mek dongolamuk mek si ara, Yordan mek.