Joel 2:1 - DIOSPA QHELQACHISQAN DEUTEROCANONICAL

¹ Sión orqopi putututa waqachiychej. Noqaj ajllakusqay orqopitaj sinch'ita qhapariychej. Judá suyupi tiyakojkuna, tukuyniykichej kharkatitiychej, imaraykuchus Tata Diospa p'unchaynin chayamushanña.

Qheshwa Biblia DC

¹ Sión orqopi putututa waqachiychej. Señorpata kaj llimphu orqompi sinch'ita putututa waqarichiychej. Judá llajtapi tiyakoj runas tukuyniykichej kharkatitiychej. Imaraykuchus, Señorpa p'unchaynenqa qayllapiña kashan.

DIOSPA QHELQACHISQ

¹ Sión orqopi putututa waqachiychej. Noqaj ajllakusqay orqopitaj sinch'ita qhapariychej. Judá suyupi tiyakojkuna, tukuyniykichej kharkatitiychej, imaraykuchus Tata Diospa p'unchaynin chayamushanña.

Joel 2:1 Referans Kwoze

1 Pedro 4:7

Tukuy imaj tukukuynin qayllapiña kashan. Chayrayku qankunaqa allin yuyayniyoj jina kawsakuychej, amataj Dioswan parlarikunamanta qonqapuychejchu.

Joel 2:15

Sión orqopi putututa waqachiychej. Tukuy runata tantaspa, ayunanankuta willaraychej.

Joel 1:15

Ay, Tata Diospa p'unchaynin chayamushanña. Llakiy p'unchayqa qayllapiña. Tukuy Atiyniyoj Diospa thuñinan p'unchay chayamushanña.

Joel 3:17

17 (4.17) Chaypacha qankuna yachankichej, noqa Tata Diosniykichej t'aqakusqay Sión orqopi tiyakusqayta. Jerusalenqa noqapaj t'aqakusqay llajta kanqa, manañataj jayk'ajpis waj llajtayojkuna jap'enqankuchu.

Malaquías 4:1

1 (3.19) Tukuy Atiyniyoj Tata Dios nin: Horno jina lawraj juicio p'unchay qayllamushanña, chay p'unchaypitaj tukuy jatunchakojkuna, tukuy millayta ruwajkuna ima ichhu jina ruphanqanku. Chay jamoj p'unchaypi ninaqa tukuyninkuta q'olanqa, nitaj imapis paykunamanta puchonqachu.

Sofonías 3:11

Munasqa ayllúy, chay p'unchaypi manaña p'enqakunkichejchu contraypi oqharikuspa millayta ruwasqaykichejmanta. Chaypacha noqaqa jatunchakojkunata, umata oqharejkunata ima qankuna chawpimanta wijch'usaj. Manataj jayk'ajpis ujtawan noqapaj t'aqasqa orqoypi wapuykachanqankuchu.

Sofonías 1:14

Tata Diospa jatun p'unchaynin qayllamushanña. Qayllapiña kashan, usqhayllatataj jamushan. Tata Diospa p'unchaynenqa waqana p'unchay kanqa. Chay p'unchaypi aswan wapu kajkunapis mancharispa qhaparenqanku.

Jeremías 5:22

Noqa Tata Diosmin kayta nini: Manachu qankuna manchachikuwankichej? Nillatajchu ñawpaqeypi kharkatitinkichej? Noqaqa mama qochaj kantunta jark'achata jina churarqani, chaymanta aswan jaqayman mama qocha mana wasaykunanpaj. Mama qochaj qhollchoqeyasqan astawan, astawan manchayta sonarispa oqharikun. Chaywanpis mana wasaykuyta atinchu.

Isaías 66:2

Noqa makiywan kay tukuy imata ruwarqani, ajinamantataj kay tukuy ima rikhurerqa. Ajinata noqa Tata Dios nini. Chantá nillanitaj: Pichus llamp'u sonqoyoj kajta noqa qhawasaj, pikunachus nisqayta uyarispa kharkatitinku, chaykunata.

1 Tesalonicenses 5:2

Qankuna allinta yachankichej Tukuyta Kamachej Jesuspa kutimunan p'unchay kaymanta jinalla chayamunanta, imaynatachus suwaqa mana yuyasqallamanta tutan jamun, ajinata.

Abdías 1:15

Tata Dios tukuy suyukunata jasut'inan p'unchay chayamushanña. Chayrayku imaynatachus wajkunata ruwarqanki, ajinallatataj qantapis ruwasonqanku. Imatachus ruwasqaykiman jina jap'inki.

Amós 3:6

Sichus llajtapi pututu waqan chayqa, runakuna qhollpirakuyta qallarinku. Sichus ñak'ariy llajtapi rikhurin chayqa, Tata Diosmin chayta apachimun.

Oseas 5:8

Gabaa llajtapi maqanakuman wajyana putututa waqachiychej, Ramapitaj cornetata waqachiychej. Bet Avenpi wakichisqa kachunku, Benjaminpipis kikillantaj kachunku.

Ezequiel 7:12

Kunan chay p'unchay chayamunña. Vendejpis, rantikojpis manaña kusikuchunkuchu, imaraykuchus noqa tukuy paykunata jasut'isaj.

Jeremías 4:5

Judá suyupi kayta willamuychej, jinallataj Jerusalén llajtapipis uyarichimuychej. Trompetata waqachispa, kay tukuy suyupi qhapariychej, ajinata sinch'itapuni qhapariychej: Tantakuspa, ayqekunachej sumachaj jark'achasqa llajtakunaman, nispa.

Santiago 5:8

Ajinata qankunapis pacienciakuychej. Chantá sinch'ita sayaychej, imaraykuchus Tukuyta Kamachej Jesuspa kutimunan p'unchay qayllapiña.

Filipenses 2:12

Munasqa wawqe panakuna, noqa qankunawan kashajtiy, qankuna kasuwajpuni kankichej. Kunanrí qankunamanta karupi kashajtiy, astawanraj kasunawaykichej tiyan. Chayrayku atisqaykichejta ruwaychej qhespichisqa kasqaykichej imatachus ruwasqanta rikuchinaykichejpaj Diosta kasuspa, chantá payta may jatun respetowan qhawaspa ima.

Sofonías 1:16

Chay p'unchaypi pututu waqanqa. Jinapitaj awqaykichejqa jark'achasqa llajtakunaj contrankupi, jatuchaj qhawana torrenkunaj contrankupi ima jap'inankupaj kachaykonqanku.

Amós 8:2

Paytaj tapuwarqa: Amós, imatataj rikunki? nispa. Noqataj kuticherqani: Poqoyniyoj canastata rikushani, nispa. Chantá Tata Dios niwarqa: Israelpa millay ruwasqan anchaña, manañataj ujtawan juchanta pampachasajchu.

Oseas 8:1

Waqachiychej cornetata runakuna wakichikunankupaj. Aylluypa awqan anka jina jamurishan, imaraykuchus aylloyqa yachachisqayta mana kasuspa, tratoyta p'akisqanku.

Ezequiel 33:3

Chantá chay soldadoqa llajtaj contranpi soldadokunata jamojta rikuspa, trompetata waqachin llajta masinkunaman soldadokuna jamushasqankumanta yachayta qonanpaj.

Ezequiel 12:23

Qantajrí paykunata niy: Tukuyta Kamachej Tata Dios nin: Chaytaqa Israelpi manaña ujtawan parlankichejchu, nispa. Paykunaman nillaytaj: Chayta ninaykichejtaqa kunanmantapacha ninkichej: P'unchay chayamunña mosqoypi jina tukuy sut'inchaykuna junt'akunankupaj, nispa.

Ezequiel 7:10

Kayqa, chay p'unchay chayamunña. Chay phani chayamunña. Millayta ruwayqa tukuynejpi t'ika jina qhallallarishan, runaykachaytaj may jina kashan.

Daniel (hebreo) 9:20

Noqaqa juchayta jinallataj israelita llajta masiykunaj juchankutapis rimarispa, Diosmanta mañakushallarqanipuni. Ajinamanta Tata Diosniypa ñawpaqenpi mañapusharqani paypa t'aqakusqan Jerusalén llajtanrayku.

Daniel (hebreo) 9:16

Chaywanpis Tukuyta Kamachej Diosniyku, cheqan khuyakuyniykiman jina, Jerusalenmanta phiñakuyniykita karunchay, chay sinch'i k'araj phiñakuyniykita, imaraykuchus Jerusalenqa llajtaykimin. Tukuy muyuyninpi suyukunamanta runakunapis Jerusalenmanta, aylluykimantapis alqochakunku, noqaykoj jinallataj ñawpa tataykoj juchankuraykupis.

Daniel (hebreo) 6:26

26 (27) Kayta kamachini: Tukuynin suyuypi Danielpa Diosninta manchachikuychej, kharkatitispataj payllamantaj k'umuykuychej, imaraykuchus paymin kawsaj Diosqa. Payllapuni wiñaypaj wiñaynintinkama kawsan. Kamachiynenqa mana jayk'ajpis chinkarenqachu, nitaj atiyninpis tukukonqachu.

Ezequiel 33:6

Sitajchus qhawananpaj churasqa soldado llajtaj contranpi awqankunamanta soldadokunata jamushajta rikuspa, trompetata mana waqachinmanchu chayrí, llajtapi runakuna mana willasqachu kankuman. Chantá sichus awqakuna yaykumuspa mayqen runatapis wañuchinkuman chayqa, chay runa juchallisqanmanta wañonqa. Noqatajrí qhawaj soldadomanta chay runa wañusqanmanta cuentata mañasaj, nispa.

Jeremías 16:10

Aylluyman kay imakuna jamunanta willajtiyki, paykuna tapusonqanku: Imaraykutaj Tata Dios kay jatun ñak'ariyta contraykupi jamunanta kamacherqari? Ima millaytataj ruwarqaykuri? Ima juchatataj Diosniykoj Tata Diospa contranpi ruwaykuman karqari? nispa.

Jeremías 16:7

Chay wañojpa ayllunta sonqochanapaj mana pipis qorpachuta ruwanqachu, ni tatan wañupojtin, chayrí maman wañupojtinpis.

Isaías 66:5

Noqa Tata Diospa nisqayta uyariychej, pikunachus simi nisqayta uyarispa kharkatitejkuna. Qankunataqa llajta masiykichej chejnikusunkichej. Noqaj sutiyraykutaj jawaman qankunata qharqospa, nisunkichej: Tata Diosqa jatun kayninpa lliphipiyninta rikhurichichun, chayta rikuspa qankuna kusikuyta atinaykichejpaj, nispa. Chaywanpis paykunaqa p'enqaypi rikhurenqanku.

Isaías 2:12

Chaypacha Tukuy Atiyniyoj Tata Diospa p'unchaynin jamonqa runaykachajkunaj contrankupi, uma oqharejkunaj contrankupi, may kasqankuta yuyakojkunaj contrankupi ima, tukuyninku k'umuykuchisqa kanankupaj.

Salmos 119:120

Qanta manchachikusqayrayku tukuy ukhuy kharkatitin, kamachisqaykitataj manchay jatun respetowan qhawani.

Salmos 87:1

(1b) Diospa llajtanpa cimientonqa ajllakusqan orqo patapi churasqa kashan.

Números 10:3

Sichus iskaynin trompeta waqanqa chayqa, Dioswan Tinkukuna Toldo punkuman qanpa ñawpaqeykiman tukuy israelitakuna jamunanku tiyan.

Zacarías 8:3

Chayrayku Sionman kutisaj, Jerusalenpitaj tiyakapusaj. Chaypacha Jerusalenqa Cheqanta Purej Llajta nisqa kanqa. Tukuy Atiyniyoj Tata Diospa orqontaj Diospaj T'aqasqa Orqo nisqa kanqa, nispa.

1 Crónicas 15:28

Ajinata tukuy israelitakuna Tata Diospa trato ruwasqan arcata kusiymanta qhaparirispa aparqanku, pututukunata, trompetakunata, platillokunata, jinataj cuerdayoj tocanakunata, chantá arpakunata ima tocarispa.

1 Corintios 14:8

Cornetachus mana sut'ita waqanman chayqa, soldadokuna imaynatataj yachankuman maqanakoj rinankupaj wakichikunankuri?

Apocalipsis 6:17

imaraykuchus Cordero jasut'inan p'unchay chayamunña, manataj pipis awantayta atenqachu, nispa.

Éxodo 10:14

Phinki phinkeqa tukuy Egipto suyuman phuyu jina tiyaykorqa. Chay chhika phinki phinkeqa mana jayk'ajpis karqachu, nitaj jayk'ajpis kanqachu.

Ezequiel 30:3

Chay p'unchay qayllamushanña. Tata Diospa jasut'inan p'unchayqa qayllapiña. Chay p'unchay phuyusqa p'unchay jina kanqa, tukuy suyukunapajtaj jasut'ina p'unchay kanqa.

Joel 2:11

Tata Diosqa soldadonkunaj ñawpaqenkupi purispa, qhon qhon jina kamachisqanta uyarichin. Soldadonkuna may ashkhapuni kanku, kamachisqanta junt'ajkunataj may atiyniyoj kanku. Tata Diospa p'unchaynenqa manchay t'ukuna, manchachikunataj. Manataj pipis ñawpaqenpi sayayta atej kanchu.

Joel 2:31

31 (3.4) Inteqa laqhaman tukonqa, killataj yawar jina puka kanqa, Tata Diospa manchachikuna p'unchaynin manaraj chayamushajtin.

Joel 3:14

14 (4.14) Justicia Ruwana vallepi manchay ashkha runakuna kashanku. Tata Diospa p'unchaynin chayamushanña.

Amós 5:18

Ay, jatun llakiy kanqa, pikunachus Tata Diospa p'unchaynin chayamunallantaña munashanku, chaykunapaj. Yachankichejchu imaynachus chay p'unchay qankunapaj kananta? Chay p'unchayqa laqhalla kanqa, manataj sut'ichu.

Zacarías 14:1

Jerusalén, Tata Diospa p'unchaynin chayamushanña, maypachachus tukuy imayki rak'irasqa kanqa, chaypacha.

Números 10:2

Martillowan takaspa, qolqe metalmanta iskay trompetata ruway. Chaykunaqa israelitakuna tantakunankuta wajyachinaykipaj kanqa, jinallataj puririnankuta kamachinaykipaj.

Isaías 13:6

Qhaparispa waqaychej, imaraykuchus Tata Diospa p'unchaynenqa qayllapiña kashan. Chay p'unchay chayamojtin, Tukuy Atiyniyoj Tata Dios tukuyta phirenqa.

Isaías 13:9

Tata Diospa p'unchaynenqa manchaytapuni jamushan, chay p'unchaytaj manchay ñak'ariy p'unchay kanqa. K'araj phiñakuytaj kay pachata ch'inpachata saqenqa, tukuy juchasapakunatapis chinkarparichenqa.

Ezequiel 21:12

12 (17) Qantajrí, runaj churin, sonqo nanayta qhapariy, waqaytaj, imaraykuchus kayqa aylluyta wañurachinapaj wakichisqa kashan, tukuy Israelta kuraj kamachejkunapaj ima. Paykunaqa aylluywan khuska juchachasqa kanku wañuchisqa kanankupaj. Chayrayku llakiy nanaywan qhasqoykita takakuy.

Sofonías 1:7

Tukuyta Kamachej Tata Diospa ñawpaqenpi ch'inlla kaychej, imaraykuchus Tata Diospa p'unchaynenqa chayamushanña. Tata Diosqa uj jaywanata wakichin, wajyakusqankunapis t'aqasqaña kashanku.