11 Gea‘abo ‘u loeloemwawasidi, ‘abona nai ‘igu tomota si nuapupura: ‘U da lelewanedi ‘imu waiwaiega, ta ‘u da gimwa‘utedi, Ieoba ie ‘ima lawa.
Ta ‘oio, Ieoba ie, ‘u lawa sakowasiegu; ‘Igu esaesa, ta debagu ‘ana to‐gilagata.
Eaubada wate ‘i da ‘enapara ataeio, ‘I da ‘au‘ewa tu‘eieio, ta ‘imu anuega ‘i da lisiio. Ta maiawasidi ‘idi ‘asa ‘enega ‘i da dabuio. (Sela.)
Ta ‘aene tubudiao ‘i da ‘ulamwa‘utedi ‘ebeloinao gamwagamwanidia, Ta ‘i da lelewanedi ‘asao ‘edia.
Ieoba Eaubada Tauna sinara ta lawa ta ‘enega: Ieoba nua‘ole‘ole ta esaesa ‘i da ‘ebwaea: Taudi si tauia ‘ai‘aila gea‘abo ‘e bweu iage bobo‘ana ‘ediega ‘i da egagare.
Eaubada ‘ima lawa ie, ‘u da ‘ita, Ta ‘imu ‘orooroina maninina ‘u da ‘ita.
Ni‘atu ‘u tagwarema sipi ‘atua masura manuna; Ta ‘ebeloina ‘edia ni‘atu ‘u lelewanema.
Ta ‘omi ia da lelewanemi ‘ebeloina ‘edia, ta sisi‐saia ia da lisilolona murimia: ta ‘imi bwa‘a ‘i da saoora, ta ‘imi ‘asao si da waborebore.
Ieoba ‘agu to‐leme taudi si lemegu gamwagamwanidia: Ta ‘enega ‘igu nuanua ia da ‘itena taudi si guitoasegu ‘edia.