Ta taudi Ieoba ‘ena si iamwaiamwa taudi ‘idi pa‘ara si da ‘ewa limena; si da tu‘e pape ‘ediega ‘atua magisubu; si da pili, ta gea‘abo si da lo‘ame‘ame; si da tautauia, ta gea‘abo oodi ‘i da taba.
Ta ‘enega Ieoba ‘i da iamwaiamwa, be ‘i da nuabobo‘ana ‘emia, ta ‘enega ‘i da mia tu‘e, be ‘i da nua‘ole‘ole ‘emia: Ieoba loina ‘ina Eaubada ta ‘enega; taudi manuna si iamwaiamwa si bobo‘ana.
Ieoba ‘ena ‘u da iamwaiamwana, ta ina ‘eda ‘u da ‘ita‘i‘isi, Ta ‘i da gitu‘eieio be ‘asa ‘u da ‘ewena: ‘Ena to to‘umalidi si ‘upwa‐iauledi, ‘u da ‘itena.
Ta asiata gote ‘enega si da gwae, Wa ‘ita, gete ‘ida Eaubada; manuna ta iamwaiamwa, ta ‘i da ‘etoseeda; gete Ieoba; manuna ta iamwaiamwa, ta da uiawana be ta da guausoara ‘ina ‘etoseana ‘enega.
Ieoba ‘ena ‘u da miaenono, ta manuna ‘u da iamwaiamwana ma‘anuaeio: Gea‘abo nuaio ‘i da soa tauna ‘i sinabwa ‘ina ‘ebetauia ‘enaia manuna, Tai nina wasegigi geiogeioi ‘i gieapwesenama manuna.