Ibeliu 7:25 - Loina Tabu Auwauna NT

²⁵ Ta Yesu nina tuta maibo'ana sawesawenaya 'i'etoseyeda, 'eguma 'ana emisega talulugu Yaubada matanaya, manuna Yesu miyamiya atayana, ta tuta yauna manuda 'isidasida Yaubada 'ena.

Ibeliu 7:25 Referans Kwoze

Loma 8:34

Ga wate nigeya sawesawenaya be 'ebweu yaita 'ina ona mwauna 'edaya 'isa'u, manuna Yesu Keliso ni'atu manuda 'imwawasa ga mwawasega 'itoolo limana, 'enega gete tuga Yaubada 'atainaya 'imiyami, ta manuda 'isidasida.

1 Timoti 2:5

Yaubada 'ebweuna namo tuga, ta wate 'ebweuna namo tai 'i'au'eweda Yaubada 'enaya, tauna Yesu Keliso.

Yude 1:24

Yaubada nina sawesawenaya 'ilomata'i'isimi be geya'abo wabe'ube'u, 'ana laba tuta nina tauna matanaya 'ime'emi 'ina 'asa 'esasena 'enaya, ma imi bubuna palupaluna, ta wate ma imi gwausowala sinabwana.

Yoni 14:6

Ta Yesu Tomasi 'ieonena, 'igwae, “'Abo'agu 'eda nina, ta wate ona 'ai'aila, be yawasimi 'aledi. 'Abo yaita nuwanuwana be 'itatauya Tamagu 'ena, nigeya 'ebweu wate 'eda 'imiyami, nate namo tuga 'abo'agu.”

Epeso 2:18

Ga tauna 'enega, 'omi be 'abo'ama Yaluyaluwa 'ebweuna 'enega 'i'au'eweda Tamada 'enaya.

Loma 5:2

Manuna Yesu 'ilemeda ga Yaubada 'ina oboboma 'iapwesa 'edaya ga 'ena tamiya bobo'ana. 'Enega tada nuwayai ma ida gwausowala Yaubada 'ina esaesa 'etamo 'i'ebwa'eda manuna.

Ibeliu 11:6

Ona'ai'aila, 'eguma geya'abo taemiemisa Yaubada 'enaya, geya'abo manuda 'igwaugwausowala. Manuna 'abo nuwanuwada be Yaubada 'ena tatatauya, taemisa nugana 'aene Yaubada nina 'imiyami ta 'ana to'ebesao 'adi tooboboma, be muliyega sawesawenaya tatatauya 'ena.

Epeso 3:20

Ona'ai'aila, 'ina waiwai soladaya 'ietaetapewa, be 'eguma to'ase manuna tasidasida ma ida emisa, tauna sawesawenaya be 'ida guinuwe, ma 'ana loeposeyana sinabwana manuda.

Ibeliu 9:24

Ta Keliso nigeya 'ilugulugu Anuwa Tabu 'abi'abina 'enaya, nate Anuwa 'ai'aila 'ana ma'ama'ayau tuga, ta esi galewaya 'ilugu ga Yaubada matanaya 'imiyami be 'ilemalema manuda.

Yoni 14:13

Be to'ase nadigega nuwanuwami, be 'agu esanega wasisida, ya'ebwa'emi tuga, be gote 'enega Tamagu 'ana tupu 'ida loba 'igu guinuwa 'enega.

Ibeliu 5:7

Lowa Yesu bale'uya 'imiyami, ma ina dedoi 'isidasida Tamana 'ena, be nuwanuwana mwawasega 'i'etoseye, 'enega 'i'etoseyenaya manuna Yesu Tamana 'i'amayabena.

Ibeliu 13:15

'Enega Yesu 'ilemelemeda be tuta yauna 'ediya Yaubada tada tuputupu. Gete 'ida taliya nonowana, 'eguma tauna 'ana esana ta'awa'awa sinabwae.

Ibeliu 7:16

Nigeya Mosese 'ina loina 'enega 'ietotaliya, ta esi yawasina miyamiya atayana ta waiwaina 'enega.

Ibeliu 2:18

Ona'ai'aila, Yesu bale'uya miyamwau ta 'ebetoo yauna 'ilobedi, 'enega 'abo Seitani 'itooda, Yesu ni'atu 'ebetoo nidi 'imwalamwalatonidi, be kapekapeyana 'ediyega 'i'etoseyeda.

Pilipai 3:21

Be tuta nina 'iilama ooda 'ida sa'ugelasedi; batuwa nenetadi, ta 'ida sa'ugelasedi 'atuwa tauna oona waiwaina ta 'esasena nadigega, ta 'ina guinuwa gete tauna 'ina waiwaiyega, manuna tauna sawesawenaya be yage maibo'adi 'ediya 'ietoloina.

Yoni 14:16

ta ma'etamo Tamagu 'ena yada sida be tauna wate 'ami tolema 'ebweu 'ida 'ebwa'emi. Tauna tolema nina Yaluyaluwa 'esasena ta palupaluna, be tauna 'emiya 'ida miyaataya.

2 Timoti 1:12

Gete manuna 'igu miyamwau yalobena, ta geya'abo manuna yaomayamaya, manuna 'Inapwana nina yaemisena tauna yamwalamwalatoni, ta wate yamwalatonina 'aene guinuwa 'i'ebwa'eguya 'ida 'ita'i'isi be 'ana laba 'asiyata nina sinabwana 'imeemai 'ena.

Ibeliu 7:24

Ta Yesu tauna 'ida totaliya ataya, 'enega nigeya 'ana lopa'elumo.

Epeso 3:12

be 'abo Keliso nina taemise ta'atepatu, be sawesawenaya talulugu Yaubada tauna matanaya, be tasidasida 'enaya.

Ibeliu 7:8

Gete tugai Libai 'ina bodao 'ida gwegwe tupwana si'ewa'ewa, ta taudi ma'etamo simwamwawasa, ta Melikisedeki tetelina 'aene tauna miyamiya atayana.

Loma 5:10

Ona'ai'aila, lowa Yaubada taetalauwalena ta gete tuga Natuna 'ina mwawasa 'enega ni'atu ma'eda tae'ebweu, be Natunana yawasina manuna 'i'etoseye 'ai'ailida.

1 Kolinita 1:21

Manuna sinasinapu bale'u geya'abo sa'i 'enega Yaubada tamwalamwalatoni. Ta esi Yaubada 'ina nuwanuwa, ta 'ina tetela 'ana loguguya namo 'enega, 'ana toemisao 'abo'ada 'i'etoseyeda. Tetela nina me bale'u sieyage besobesoena,

Ibeliu 2:9

Ta Yesu esi ni'atu ta'itena, 'aene tuta kukupana namo 'ena 'imiyaebusi aniloseyao 'ubunidiya, ta muliyega 'ana 'amayaba be 'ana tupu sinabwana 'ilobedi 'ina 'elouya be 'ina mwawasa 'ediyega. Nate Yaubada 'ina oboboma 'edaya, manuna Yesu mwawasa 'ana 'elouya 'ilotoona maibo'ada manuda.