E'ita'ita 7:15 - Loina Tabu Auwauna NT

¹⁵ Nate 'alena 'enega Yaubada 'ina 'ebemi esaesa matanaya simiyami, ta 'asiyata be boiboi 'ediya 'ina guinuwao siguiguinuwedi 'ina Anuwa Tabu solanaya. Ta wate Yaubada nina 'ina 'ebemi esaesa 'ena 'imiyatowa, tauna 'ida 'ita'i'isidi,

E'ita'ita 7:15 Referans Kwoze

E'ita'ita 22:3

Ta esi yage gadilulu sida sawala 'asa nina 'enega, be Yaubada ta Lami nina 'idi 'ebemi esaesa 'ena sida miyami, be Lami nina 'ina topaisewao 'enaya sida guinuwa.

2 Kolinita 6:16

Wate nigeya sawesawenaya mali 'ebe emisao wasa'u luguyedi Yaubada 'ina anuwa solanaya, ta Yaubada tauna mayawasina ga 'ina anuwa 'abo'ada, ta 'igwae, “ ‘'Abo'agu taudi 'ediya yada e'asa be soladiya yada adadana, be 'abo'agu 'idi Yaubada ta taudi 'igu tomotaiyao.’

Ibeliu 12:2

Ta wate Yesu 'enaya tada sanalaga ataya, manuna Yesu nina 'ida emisa 'ana 'ebe e'ale ta 'ana 'ebe losalowa. Tuta nina Yesu bale'uya 'imiyami 'imwalatonina 'aene ma'etamo 'ebe gwausowala sinabwana 'ilobai, 'enega kelose 'ina 'elouya 'i'alama'i'itanena, omayamaya wate nigeya manuna 'inuwanuwa, ga 'ebe losalowa 'enaya 'itu'e galewaya ga Yaubada 'atainega 'imiyatowa.

Yoni 1:14

Ona nina ni'atu 'edaya 'ietomotai, ga 'ina esaesa 'ena 'a'itena, tosinabwa sana 'ituyayalina, manuna tauna Yaubada natu'ai'ailina, ta wate tauna tooboboma ta adelina palupaluna maibo'ana.

E'ita'ita 22:5

Geya'abo wate boiboi, ta geya nuwadi sinala be mayale maedanidi, manuna 'Inapwana Yaubada tauna tuga 'idi maedana nina, ta sida loina ataya.

E'ita'ita 11:19

'Enega Yaubada 'ina Anuwa Tabu galewaya 'igigegena, ga Dedewaga Tabu, Anuwa Tabu solanaya, ya'itena, ga Dedewaga nina solanaya 'ina onaupaupa 'ana buki 'imiyami. 'Enega namala, be 'enanao, be wepalala 'ina dudu, be mwani'ini'i, be 'usana pulipulidi ta pa'alidi, siapwesama.

E'ita'ita 7:9

Muliyega, yadunedune ga pwalu sinabwa wawasae ya'itedi, nigeya aisawa. Tomota nidi 'ebeloina 'ebweuna 'ebweuna 'ediyega, be susu 'ebweuna 'ebweuna 'ediyega be boda 'ebweuna 'ebweuna 'ediyega be 'enana 'ebweuna 'ebweuna 'ediyega, maibo'adi 'ebemi esaesa matanaya be wate Lami matanaya sitootoolo ma 'adi 'oama wakewakekedi, ta magimagi yawadi sigiyaidi,

E'ita'ita 4:4

Ta 'ebemi esaesa wate 'adi yau tuweniti powa simiya sakowasiyena, ta 'ebemiya nidi 'ediya 'inapwanao site tuweniti powa simiyatowa ma 'adi 'oama wakewakekedi, ta wate ma 'adi peyaula esaesa goula debadiya.

Ibeliu 8:1

'Igu ona maibo'ana 'alena gete 'aene 'ida totaliya sinabwana, ta gete tuga Toloetana sana galewaya 'ina 'ebemi esaesa 'atainaya 'imiyami.

1 Kolinita 3:16

'Enega wada nuwa'i'isi 'aene 'abo'ada Yaubada 'ina Anuwa Tabu, manuna Yaubada Yaluyaluwana 'edaya 'imiyami.

E'ita'ita 20:10

'Enega 'adi tokabo Seitani nina, si'ewena ga siulena yaiyai sinabwana solanaya, lowa 'ena yobai nina be palopita kabokabo nina siuledi, be sena nina 'ena si'elo'elouya 'asiyata be boiboi 'ediya, ta geya'abo 'igumwagumwala.

E'ita'ita 4:8

Ta 'ebweuna 'ebweuna papediyao 'adi yau sikisi, ta papediyao nidi maibo'adi matadi wate yauna 'atamanega ta solanega. Ta tuta maibo'ana, 'asiyata be boiboi 'ediya, siwaliwali, sigwaegwae: “Tabu, tabu, tabu, 'Inapwana Yaubada, Toewaiwai sana. Tauna tuta lowa, ta batuwa ta tuta simeemai 'ediya 'imiyami.”

E'ita'ita 4:9

Tomiya ataya nina 'ina 'ebemi esaesa 'enaya 'imiyatowa, ta tuta yauyauna yobai nidi getedi siwaliwali tuputupu ta si'awa'awa esaesa, ta wate silokalokagutoki 'enaya.

E'ita'ita 13:6

'Enega yobai nina Yaubada 'i'awa to'umaliyena, ga 'ana esana be 'ina sena ta wate galewa 'ana tomiyanao 'i'awa to'umaliyedi.

E'ita'ita 21:22

'Asa nina 'enaya nigeya Anuwa Tabu ya'ita'ita, manuna 'Inapwana Yaubada Toewaiwai sana be Lami taudi Anuwa Tabu nidi tuga.