2 Tesalonaika 1:4 - Loina Tabu Auwauna NT

⁴ 'Enega toekalesiyao sena yaudi matadiya 'atuputupumi, 'agwae, “Taudi me Tesalonaika e'alama'i'ita 'aledi. 'Anabwa'ayoi 'adi talauwalao mwau sinabwana si'ebwa'edi, ta tuwa tuga ma idi 'alama'i'ita be ma idi emisa Yaubada 'enaya.”

2 Tesalonaika 1:4 Referans Kwoze

Ibeliu 10:36

Ta 'ilobwenemi be watoolo pa'ala be Yaubada 'ina nuwanuwa wada guinuwe, be to'ase 'iona upaupaena wada 'ewa.

1 Tesalonaika 2:14

Ta wate miyamwau walobena, nadigega taudi Yesu Keliso 'ana toemisao sena Yudia 'enaya, manuna toekalesiyao nidi 'idi miyamwau silobena taudi 'idi tomotaiyao 'ediyega, nadigega 'omi 'imi miyamwau walobena taumi 'imi tomotaiyao 'ediyega.

1 Tesalonaika 2:19

Ona'ai'aila, 'omi namo manumi ma ima nuwayaina be 'aene tuta nina 'ida 'Inapwana Yesu 'iapwesa limanama,

1 Tesalonaika 1:3

manuna 'imi emisa be 'imi guinuwa bobo'adi 'anuwa'i'isidi, ta wate 'imi guinuwao oboboma 'enega, be 'imi e'alama'i'ita ma imi emisa be 'aene 'ida 'Inapwana Yesu Keliso 'ida 'etoseyemi.

2 Kolinita 7:14

Lowa Taito 'imiyami ta yatuputupumi, ga Taito matanega ni'atu 'i'itena, 'enega nigeya wate 'ebe omayamaya 'eguya. Ta esi 'igu ona maibo'ana 'omi manumi 'ana 'ai'aila ni'atu 'iapwesa.

E'ita'ita 14:12

Ona gete 'enega Yaubada 'ina tomotaiyao sida 'alama'i'ita, taudi 'ina loina 'ana toematamatanao ta Yesu 'ana toemisao.

1 Kolinita 7:17

'Ida paisewa Yaubada ni'atu 'ieguyaiyena 'ebweuna 'ebweuna 'edaya, 'enega 'ebe paisewa nidi 'ediya tada miyami. Gete nadigega 'igu loina toekalesiyao sena maibo'ana 'ediya.

2 Pita 1:6

'etonina 'alama'i'ita, eatana toolopa'ala, enimana bubuna 'esasena,

Yemesa 5:11

Ta 'abo yaisigedi taudi nadigega tada eesedi togwausowala, manuna mwau nidi 'ediyega sitoolopa'ala. Ta gete wate 'ebweu 'ebe'ita Yobi 'ina 'alama'i'ita manuna. Ni'atu wamwalatonina 'aene Yobi nina 'ina miyamwau 'ana 'ebe losalowa 'enaya, 'ana 'etoseyana 'ilobena 'ida 'Inapwana 'enega. Manuna tauna 'Inapwana nina oboboma ta 'atenuwa'ole'ole 'alena.

Ibeliu 6:15

Ta Ebelaamo nina 'i'alama'i'ita tuta dudulana, ga onaupaupa uwana 'ilobena.

2 Tesalonaika 3:5

ta wate 'ida gienuwa sabwalenimi, tauna 'ina oboboma manuna, ta wate 'imi toolopa'ala Keliso 'ena manuna.

2 Kolinita 9:4

'Abo ma'etamo 'aina me Masidonia ma'egwao 'aweewa be si'italobami 'imi 'ebwayadaita nigeya wagibugibubuna, gete 'ebe omayamaya 'eguya ta wate 'emiya, 'igu gimisimana nina manuna.

2 Kolinita 9:2

ta wate yamwalatonimi 'aene 'ebwayadaita nina manuna wagwausowala, 'enega 'omi ya'awa bobo'anemi me Masidonia 'ediya, yagwae, “Sena Akaya 'ena taudi me Kolinita ni'atu sietapewa ga 'idi 'ebwayadaita sigibubuna yakwala 'igumwala 'enaya.” 'Enega yaudi 'ediyega wate nadigega siguinuwa'esa.

Loma 12:12

Ta wanuwayai 'aene ma'etamo Yaubada 'ina lema 'iapwesa 'edaya be manuna wada gwausowala, 'enega 'imi miyamwau 'ediya wada sidasida Yaubada 'enaya ma imi 'alama'i'itana.

Loma 8:25

Ta 'abo 'ida emisa uwana nigeya talobaloba, tuwa tuga ma ida 'alama'i'ita tada yamwayamwa 'ana laba talobai.

Loma 2:7

Ta 'eguma 'aida guinuwa bobo'ana 'ena tuta yauna tae'alama'i'itana, be nadigega tuga taguiguinuwa be 'aene 'awabobo'ana be yawasi ataya tada loba Yaubada 'enega, ona'ai'aila ma'etamo yawasida miyamiya atayana 'ida 'ebwa'eda.

2 Kolinita 7:4

Ni'atu manumi yagwaugwausowala ta yatupumi, ga 'igu nuwanuwa ni'atu 'ibobo'ana manumi. Gete tuga 'amiya mwau, ta tuwa tuga manumi yagwausowala sinabwana.

2 Kolinita 12:10

'Enega Keliso manuna yatagwatagwala mwau yaudi 'ediya, nadigega neneta, 'awa to'umalina, tuta mwau, etalauwala, esilae. Manuna 'abo yaneneta gete 'igu 'ebe ewaiwai!

Ibeliu 6:12

Geya'abo waloogwautoyasa, ta esi 'abo'ama waetotowanema, manuna ma ima 'alama'i'ita 'aemiemisa be 'enega yage nidi Yaubada 'iona upaupaediya ta'ewadi.