1 Tesalonaika 1:3 - Loina Tabu Auwauna NT

³ manuna 'imi emisa be 'imi guinuwa bobo'adi 'anuwa'i'isidi, ta wate 'imi guinuwao oboboma 'enega, be 'imi e'alama'i'ita ma imi emisa be 'aene 'ida 'Inapwana Yesu Keliso 'ida 'etoseyemi.

1 Tesalonaika 1:3 Referans Kwoze

1 Kolinita 13:13

Yage sinabwadi 'etoi simiya ataya, nate emisa, be nuwayaina, be oboboma, ta maibo'adi 'ediyega oboboma 'isinabwa sinedi.

E'ita'ita 2:19

Tauna gete 'ina simana 'emiya, 'igwae, “'Imi guinuwao ni'atu yamwalamwalatonidi, 'imi oboboma be 'imi emisa be 'imi paisewa be 'imi 'alama'i'ita, ta yamwalatonimi 'aene gete tuga 'imi guinuwao bobo'ana wawasae, ta lowa tupwana.

Galetia 5:6

Ona'ai'aila, Yesu Keliso 'enaya me Yudia 'adi we'iwe'iyaya, nate bwaladi silodaba, nigeya 'igiepaepaluyeda, be wate 'abo lodaba taguitoyase geya'abo 'ada 'awapalupalu talobaloba. Nate namo 'eguma Yesu taemise be taobobome, tauna 'ada togiepalu.

2 Tesalonaika 1:11

Lowa Yaubada 'iesinuwemi ga 'ibwauyemi, ga 'enega waemisena. Gete manuna 'abo'ama tuta yauyauna 'asidasida manumi be 'aene wada muliya 'ai'aili. Manuna 'omi nuwanuwami be emisa 'ai'ailega wada bubuna palupalu, 'enega 'ima sidasida Yaubada 'enaya 'aene 'ida giewaiwaiyemi be guinuwa nidi wada guinuwedi.

1 Yoni 5:3

Manuna Yaubada 'ana oboboma be 'ina loina 'ana ematamatana leleleya, ta 'ina loina nidi nigeya mwaudi, ta esi kapekapeyadi.

Galetia 6:9

Geya'abo 'ida guinuwa bobo'adi 'ediyega talo'ame'ame, manuna 'eguma geya'abo taneeneta, ma'etamo sesoi bobo'ana tada loba.

Loma 15:13

Ta ona'ai'aila, Yaubada namo ma 'ana emisa, manuna taunamo 'enega lema bobo'adi talobalobadi, 'enega nuwanuwagu be ma imi gwausowala wada emisa 'aene 'imi miya sida bobo'ana, ta wate Yaluyaluwa Tabuna 'ina waiwaiyega 'imi emisao nidi 'ida giesinabwa 'ai'ailidi.

1 Yoni 3:3

'Ida emisa yage gete manuna 'enega 'ida bubuna tagie'esasedi, nadigega Keliso.

1 Tesalonaika 3:6

'Enega Timoti nina 'iwai ga tetelimi 'ime'ena, 'igwae, “Me Tesalonaika nidi Keliso 'ena siemisa 'ai'aila, ta oboboma 'aledi, ta wate tuta maibo'ana 'ida ayausa nuganuganina sinuwanuwa'i'isi ma idi gwausowala, ta nuwanuwadi be sida 'italimada.” 'Abo'ama wate nadigega nuwanuwama be 'omi 'a'italimami.

1 Yoni 3:18

Natugwao, geya'abo 'ida oboboma ona namo 'enega, ta esi 'ida guinuwega be tada oboboma 'ai'aila.

Ibeliu 10:36

Ta 'ilobwenemi be watoolo pa'ala be Yaubada 'ina nuwanuwa wada guinuwe, be to'ase 'iona upaupaena wada 'ewa.

1 Kolinita 15:58

Ta wate gosegwao yalokagutoki sinabwana 'emiya, be yaloguguyami be wada toolo pa'ala, be tuta yauyauna wada etapewa 'Inapwana 'ina paisewa 'enaya, manuna ma'etamo 'Inapwana 'ina paisewa nina 'enega uwana tada loba.

2 Tesalonaika 1:3

Gosemao, 'ilobwenema be tuta yauyauna Yaubada 'ada lokagutokiye 'imi emisa be 'imi eobooboboma taumimo 'emiya 'adi sinabwa manuna.

1 Yoni 3:21

Gosegwao, 'eguma nigeya 'ida 'ebe 'atesa'alamo, kapekapeyana be ta'atepatu Yaubada matanaya,

1 Pita 3:4

ta esi 'atemi wada eiyalidi iyalao miyamiya atayadi 'ediyega, taudi nadigega bubuna nuwana be nuwamwa'uta 'ediyega. Wada nuwa'i'isi 'aene yage gete yage sinabwana Yaubada matanaya.

Ibeliu 11:17

Ebelaamo wate ma ina emisa tuta nina 'ebe toona 'ilobena Yaubada 'enega ga 'aene natu 'ai'ailina Aisake 'italiyae Yaubada 'enaya. Lowa Yaubada 'ina onaupaupao 'i'ebwa'edi Ebelaamo nina 'enaya, ta wate 'igwae, “Aisake 'enega 'imu boda 'ida apwesa,” 'enega Ebelaamo natunana 'itagwalena be 'ida loemwawasi,

Ibeliu 6:15

Ta Ebelaamo nina 'i'alama'i'ita tuta dudulana, ga onaupaupa uwana 'ilobena.

1 Timoti 2:3

'Ada To'etoseyana Yaubada nina nuwanuwana be gete nadigega tada sidasida'esa,

Galetia 5:13

Gosegwao, Yaubada ni'atu 'iesinuwemi ga li'ali'amimi, ta geya'abo wanuwena 'aene nigeya 'ami loinamo be bubuna bale'u wamulimuliyedi, ta esi oboboma 'ina loinega wada tauya be taumimo wada elemalema limanemi.

Galetia 1:4

Manuna Tamada Yaubada 'ina nuwanuwa gete nadigega, ga Yesu tauna 'itagwalena ga 'imwawasa 'ida loegesiyao manudi, be 'enega tuta gete to'umalina 'ina waiwaiyega 'i'etoseyeda,

Loma 16:6

Ta wate 'igu oboboma Meli 'enaya, tauna 'ietapewa sinabwana manumi.

Loma 15:4

Ta wate 'aina 'ebe'itao yaudi Buki Tabu 'ena simiyami Yaubada 'ina lemao manudi, ta 'abo 'ebe'ita nidi taemisedi, tada e'alama'i'itana ma ida nuwayaina be 'aene ma'etamo 'etoseyana tada loba.

Loma 12:12

Ta wanuwayai 'aene ma'etamo Yaubada 'ina lema 'iapwesa 'edaya be manuna wada gwausowala, 'enega 'imi miyamwau 'ediya wada sidasida Yaubada 'enaya ma imi 'alama'i'itana.

Loma 2:7

Ta 'eguma 'aida guinuwa bobo'ana 'ena tuta yauna tae'alama'i'itana, be nadigega tuga taguiguinuwa be 'aene 'awabobo'ana be yawasi ataya tada loba Yaubada 'enega, ona'ai'aila ma'etamo yawasida miyamiya atayana 'ida 'ebwa'eda.

Guinuwa 10:31

Ta 'ieonegu, ‘Konilio, Yaubada 'imu sidasida ni'atu 'inonodi, ta wate 'imu lema gomabeso 'ediya 'inuwa'i'isidi.

Guinuwa 3:19

'Enega 'ilobwenemi be wanuwa'ebuni be 'imi loegesiyao 'ida 'ewayauledi, be 'ami lotoona bobo'ana wada loba 'Inapwana tauna 'enega,

Yoni 14:15

Ta Yesu wate 'ediya 'igwae, “'Abo waobobomegu, 'igu loinao waematamatanedi,

Ibeliu 13:21

Ga Yaubada yage yauyauna bobo'adi 'i'ebwa'emi, be 'ediyega 'ina nuwena wada muliya 'ai'aili, be 'enega Yesu Keliso 'ina guinuwega Yaubada 'ida giebobo'anemi to'ase nadigega 'ina nuwanuwa, be manumi 'ida gwausowala. 'Enega Keliso nina tada tupu atae. Eimeni.

Ibeliu 4:11

Ta 'ilobweneda be tatoo waiwai be 'ebe eyawai'ata nina taloba, ta geya'abo 'ebweu yaita 'ilooguitoyasa, 'abona nai 'ibebe'u, nadigega taudi lowaenei sibe'u'esa.

2 Kolinita 2:17

Ta 'abo'ama nigeya nadigega tologuguya kabokabodi, taudi 'idi esaesa tuga manuna siloguguya, ta esi 'abo'ama ma 'ama emisa, nadigega Yaubada 'iloinema, 'enega tauna matanaya Keliso tetelina 'aonaona 'ai'aila.

Loma 16:26

ta esi gete tuga ni'atu 'igieapwesena 'edaya palopitao 'idi 'etoladiyao 'ediyega, ta wate Yaubada miyamiya atayana 'iloina be 'aene sena maibo'ana tomotediyao tetela gete sida mwalatoni, be 'enega sida emisa be sida muliye.

Yoni 15:10

'Eguma 'igu loina wamuliya 'ai'ailidi, 'igu oboboma 'ena wamiyami. Nadigega 'abo'agu Tamagu 'ina loina yamuliya 'ai'ailidi, 'enega 'abo'agu wate 'ina oboboma 'ena yamiyami.

E'ita'ita 3:10

“Ta 'etamo tuta mwau 'ida apwesa bale'uya, be tomota yaudi 'ida toodi, ta 'omi esi mwau nina 'enaya yada 'ita'i'isimi, manuna 'igu ona waematamatanena, ga manugu wae'alama'i'itanemi.

1 Timoti 1:14

ga 'ida 'Inapwana nina 'ioboboma 'ai'ailigu, ga emisa be oboboma Yesu Keliso 'enega 'i'ebwa'egu.