1 Pita 2:24 - Loina Tabu Auwauna NT

²⁴ Ona'ai'aila, Keliso tauna oonega 'ida to'umalinao 'i'aalidi kelose 'enaya, be gote 'enega 'aene 'ida bubuna to'umalidi sigugumwala, ta bubuna palupaluna 'enega tatatauya. Tauna 'ana badi 'enega 'imi bobo'ana walobena.

1 Pita 2:24 Referans Kwoze

Madiu 8:17

Yage getedi ni'atu siapwesa ga 'enega palopita Aisea 'ina gimisimana 'iapwesa, nadigega Buki Tabu 'ena 'isimana, 'igwae, “Tauna 'ida 'elouya ta 'ada le'oasao 'ana to'ewayaula.”

Loma 6:11

'Omi wate nadigega wada nuwa'i'isi 'aene Yesu Keliso ma'edai tamwawasaya, 'enega bubuna to'umalina 'edega 'ilosa'u, 'enega Yesu Keliso ma'edai Yaubada 'ena mayawasida tamiyami.

E'ita'ita 22:2

ga 'asa nina gamwagamwaninega 'idaudolo. Ta bwasi nina tupitupina 'ediya yawasida kaiwenao sitootoolo. Kaiwe nidi uwadi nawalae 'ebweuna 'ebweuna dumadumadi be dumadumadi, 'enega yakwala 'ebweuna matuwelo siuwauwa, be yawanao boda maibo'adi bale'uya 'idi mulamula.

1 Yoni 2:29

Ta Yaubada wate wada mwalatoni 'aene tauna Topalupaluna, 'enega 'abo yaisigedi taudi siguinuwa palupaluna, taudi Yaubada 'enega situbuwama.

Yemesa 5:16

'Enega 'ebweuna 'ebweuna 'emiya 'imi to'umalinao wada simanedi, be manudi wada sidasida, be 'enega 'imi bobo'ana wada loba. Ona'ai'aila, topalupaludi 'idi sidasida waiwai wawasae.

Ibeliu 9:28

Wate nadigega Keliso 'ina mwawasega tauna 'italiyaena ma'ebweuna namo, be yauyauda 'ida bubuna to'umalidi 'i'ewa yauledi, ta ma'etamo 'iila limanama, be nigeya 'aene bubuna to'umalidi 'i'ewayaula limadi, ta esi sabi 'etoseyeda 'abo ma ida nuwa'ewa tayamwayamwa.

Galetia 3:13

Ta nigeya sawesawenaya be loina maibo'adi taematamatanedi, 'enega Keliso nina 'ilopa'eluda ga 'i'etoseyeda loina 'ana mwau 'enega. Loina 'ana mwau gete 'eguma nigeya tada ematamatanediya tamwamwawasa, 'enega Keliso 'abo'ada manuda 'imwawasa nadigega taudi toto'umalidi sinabwadi 'adi loemwawasa kelose 'ediya. Buki Tabu lowa 'ina ona gete manuna 'igwae, “'Abo yaisigedi kelose 'ediya sisa'udi be simwamwawasa, tomwawasa nidi 'awa to'umali siloba Yaubada 'enega.” Ga Keliso 'abo'ada manuda mwau nina 'ilobena.

Loma 6:2

Nigeya sa'i! Manuna bubuna to'umalina ni'atu 'edega 'igumwala, 'enega nigeya sawesawenaya be 'edaya wate 'ida miyami.

Kolose 3:3

manuna ni'atu wamwawasa, ta gete tuga yawasimi Keliso ma'iyana Yaubada 'enaya.

Loma 6:13

Ta wate geya'abo 'ebweu welawela'ami watagwatagwale guinuwa to'umalina manudi, ta esi Yaubada 'ena wada tagwalemi manuna mwawasega 'igietoolo limemi, ga batuwa mayawasimi, be 'enega welawela'ami maibo'adi watagwaledi Yaubada 'ina guinuwa palupaluna manuna.

Yoni 1:29

Ga mali 'asiyataya Yoni Yesu 'i'itena 'imeemai 'enaya, ga Yoni tomota 'ieonedi, 'igwae, “Tai gote tauna Yaubada 'ina Lami, be me bale'u manuda 'imwamwawasa be 'ida bubuna to'umalina maibo'ana 'i'ewayauledi.

Loma 7:6

Ta esi gete tuga loina nina ni'atu 'edaya 'igumwala, manuna lowa loina nina 'enega 'atuwa 'iyonida ga tamwawasa Keliso ma'eda, 'enega Keliso nina 'ada yona 'ili'amina ga gete tuga sawesawedaya be taguinuwa 'ai'aila, manuna Yaubada Yaluyaluwana 'ina waiwai 'edaya 'imiyami, ta esi Mosese 'ina loina nina 'eto'etoladina nigeya 'ina waiwaimo be 'igie palupaluyeda.

1 Yoni 3:7

Natugwao, geya'abo e'ita kabokabo wamulimuliye, ta esi nuwami sida sabwalena 'aene 'abo yaisigedi taudi 'idi bubuna bobo'ana, taudi nate tobobo'adi, nadigega Keliso.

Loma 6:7

manuna 'abo to tuta 'ena tamwamwawasa, geya'abo wate to'umalina 'ina loina 'edaya 'imiyami.

Loma 6:16

Ta wada nuwa'i'isi 'aene 'abo yaita 'ina loina 'ena watagwalemi, tauna 'enana wamuliye. 'Abo to'umalina wamuliye mwawasa waloba, ta 'abo emisa wamuliye bubuna bobo'ana waloba.

2 Kolinita 6:17

'Enega Yaubada wate 'igwae, ‘Mali boda 'ediyega wada apwesa be wapilisinedi, be geya'abo yage baibailidi wagitogitoodi, be yada 'au'ewami 'igu senaya,

Guinuwa 5:30

Ona'ai'aila, 'omi Yesu kaiwe 'ena watutu epa'iyena ga 'ana laba 'imwawasa, ta tubudao 'idi Yaubada Yesu 'igietoolo limena,

Luke 4:18

“'Inapwana Yaluyaluwana 'eguya 'imiyami. Tauna 'iesinuwegu be togomabeso 'ediya tetela bobo'ana yaguguyae. Ta yoniyonidi wate 'ediya 'ietunegu be 'adi li'ama manuna yada simane. Ta tomatakebokebo wate 'idi 'esasa limana manuna yasimane. Ta wate 'ietunegu be tomiyamwau 'adi talauwalao nimadiyega ya'etoli'amidi.

Madiu 5:20

Wate yaeonami 'aene 'ilobwenemi be 'imi bubuna taudi Palisiyao be loina 'ana toe'itao 'idi bubuna 'ida bobo'ana sinedi. Ta 'eguma nigeya, geya'abo Yaubada 'ina 'ebeloina 'ena walugulugu.

Ibeliu 12:13

be 'imi 'eda wada giepaepaluyedi, be 'abo tolopegoi sitautauya, geya'abo 'ena sibe'ube'u ta esi 'idi lopegoi nidi sida bobo'ana be taudi wate sida ewaiwai.

Guinuwa 13:29

“'Enega ona nidi Buki Tabu 'ena sigimi simanena To'etoseyana manuna, maibo'ana gote me Yudia ni'atu siguinuwedi, ga 'ina mwawasa mulinaya 'ana kelose 'enega si'ewa mwa'utena ga sisa'una 'ali'ali 'enaya.

Guinuwa 10:35

ta esi mali sena be mali sena tomoteninao, 'eguma si'amayabena be sibubuna palupalu, 'igwausowala manudi.

Ibeliu 7:26

Ona'ai'aila, Yesu nina sawesawenaya be 'ietotaliya manuda, manuna tauna adelina maibo'ana bobo'ana tuga, ta nigeya nadigega toto'umalida 'abo'ada, 'enega Yaubada Yesu nina 'igilagasina, ga galewa 'ana tomiyanao 'iloetana sinedi.

Kolose 2:20

Lowa wamwawasa Keliso ma'emiya 'enega bubuna bale'u 'ina loina 'emiya ni'atu 'ilosa'u, ta to'ase manuna 'etamo waguiguinuwa 'atuwa me bale'u 'idi guinuwa nadigega?

Loma 6:22

Ta gete tuga to'umalina nina 'ina loina 'enega ni'atu wagumwala, ga 'omi batuwa Yaubada 'ina toguinuwao, be 'enega e'isa bobo'ana waloba, nate bubuna bobo'ana be wate yawasi ataya.

Guinuwa 10:39

Ta 'abo'ama sa'i Yesu 'ana tosimanao, manuna 'ina guinuwao 'a'itediya Yudia senanao maibo'adi 'ediya be wate Yelusalema 'enaya, ga 'ana 'ebe losalowa kaiwe 'ena situtu epa'iyena ga 'imwawasa,

Madiu 27:26

'Enega Pailato 'idi ona 'inononaya, ta Balaba 'ili'amina, ta wate 'ina tolosaiyao 'iloinedi be Yesu balaeyega sida sapi, be muliyega sida tutuepa'iye kelose 'enaya.

Epeso 5:9

be bubuna nidi bobo'adi ta palupaludi ta 'ai'ailidi siapweapwesa maedana 'enega.

Yoni 19:1

'Enega Pailato Yesu 'i'au'ewena ga 'ina tolosaiyao 'i'ebwa'edi, ga balae metametana si'ewena ga 'enega Yesu sisapina sinabwana.

Pilipai 1:11

ta ma imi guinuwa bobo'adi Yesu Keliso 'ina waiwaiyega, manudi tomota Yaubada sida tupui be sida 'awa eseese.

Maki 15:15

'Enega Pailato nuwanuwana be pwalu 'ida giegwausowalidi ga Balaba 'ili'amina, ta wate 'ina tolosaiyao 'iloinedi be Yesu balaeyega sida sapi be muliyega sida tutuepa'iye kelose 'enaya.

1 Kolinita 15:3

Tetela gete 'alena ya'ita lobena 'enega yasimanena 'emiya 'aene Keliso 'ida to'umalinao manudi 'imwawasa, nadigega Buki Tabu 'ina simana,

Kolose 2:14

ta 'ida lowaga 'ana loina mwauna 'i'upwa yaulena, ga 'ana kelose 'ena 'itutu epa'iyena.

Ibeliu 10:5

'Enega tuta nina Keliso bale'uya 'imaiya, Keliso nina Yaubada 'ena 'igwae, “Taliyao be 'ebwayadaitao geya nuwayo, 'enega oogu 'u'ebwa'eguya 'imu guinuwa manuna.

Ibeliu 10:10

Ta Yaubada 'ina nuwanuwa be Yesu Keliso bwalana 'italiyae sabi gie'esaseda 'ina mwawasa ma'ebweuna namo 'enega.